Sa sarong awit nin pag-umaw sa Kaglalang, si Hading David kan suanoy na Israel uminawit: ‘An paggibo kan saimong kabutan, Diyos ko, [nakakapaugma] sa sakuya, asin an saimong tugon uya sa laog nin sakuyang puso.’ (Sal. 40:8) Sa ibong nin mga kasakitan asin panggigipit, tunay na naugma si David sa paggibo kan kabutan nin Diyos. Siyempre, bako sana si David an parasamba ni Jehova na naugma sa paglilingkod sa tunay na Diyos.

Iinaplikar ni apostol Pablo sa Mesiyas o Cristo an mga tataramon sa Salmo 40:8. Si Pablo nagsurat: ‘Kaya kan siya [si Jesus] pumadigdi sa kinaban, siya nagsabi: “Habo ka nin atang asin dulot, kundi inandaman mo ako nin hawak; sa mga bilog na dulot na tinutong asin mga atang manungod sa kasalan dai ka nasunuan.” Dangan ako nagsabi: “Uya, ako napadigdi (sa [rolyo] kan libro na nasusurat dapit sako) sa paggibo kan saimong buot, O Diyos.”’—Heb. 10:5-7.

Kan si Jesus yaon digdi sa daga, naugma siyang pagmasdan an mga linalang, makiasosyar sa mga amigo, asin magkakan na kaibahan an iba. (Mat. 6:26-29; Juan 2:1, 2; 12:1, 2) Pero an panginot asin pinakanakapaugma sa saiya iyo an paggibo kan kabutan kan saiyang Ama sa langit. Sa katunayan, si Jesus nagsabi: ‘An sakong kakanon iyo an paggibo kan buot kan nagsugo sako, asin an paghaman kan saiyang gibo.’ (Juan 4:34; 6:38) Nanudan kan mga disipulo ni Jesus sa saindang Kagurangnan an sekreto nin tunay na kaugmahan. May dakulang kagaya-gayahan nindang ipinaabot sa iba, nin gikan sa buot asin may kaigutan, an mensahe kan Kahadian.—Luc. 10:1, 8, 9, 17.

Isinugo ni Jesus an saiyang mga parasunod: ‘Paduman kamo asin gumibo kamo nin mga disipulo sa mga tawo kan gabos na nasyon, na bawtismuhan nindo sinda sa ngaran kan Ama asin kan Aki patin kan banal na espiritu, na tukduan nindo sinda na utubon an gabos na bagay na ipinagbuot ko sa saindo.  Asin, uya! ako kaiba nindo sa gabos na aldaw sagkod sa pagtatapos kan sistema nin mga bagay.’ (Mat. 28:19, 20, NW) Kaiba sa paggibo kan sugong ini an paghulit sa mga tawo sain man sinda manumpungan, pagdalaw liwat sa mga interesado, asin pagkondukta sa sainda nin pag-adal sa Bibliya. An paggibo kaini puwedeng magin gikanan nin dakulang kaugmahan.

Baga man an mga tawo magpahiling nin interes o dai sa satong mensahe, an satong sabuot mahalagang marhay tanganing magin maugma kita sa ministeryo. Taano ta padagos kitang naghuhulit kan maugmang bareta dawa may mga dai nagpapahiling nin interes? Huling aram niyato na an paghuhulit kan Kahadian asin paggibo nin disipulo pagpahiling kan satong pagkamuot sa Diyos asin kapwa. Sa katunayan, buhay an nakataya—an buhay ta asin an sa satong kapwa. (Ezeq. 3:17-21; 1 Tim. 4:16) Pag-ulayan ta an nagkapirang paagi na nakatabang sa dakul niyatong kapwa trabahador na mapagdanay o mapakusog giraray an saindang kaigutan sa ministeryo sa masakit na mga teritoryo.

An paggamit nin angay na mga hapot sa satong ministeryo sa parati may marahay na mga resulta. Sarong aga, nahiling ni Amalia sa parke an sarong lalaki na nagbabasa nin diyaryo. Dinulok asin hinapot niya ini kun may nabasa na ining marahay na bareta. Kan sabihon kaining mayo, sinabi ni Amalia, “May maugmang bareta ako saimo manungod sa Kahadian nin Diyos.” Napukaw kaini an interes kan lalaki, asin inako niya an pag-adal sa Bibliya. Sa katunayan, nakapagpuon si Amalia nin tulong pag-adal sa Bibliya sa parkeng iyan.

Ginibo ni Janice na teritoryo an lugar kan saiyang trabaho para makapagpatotoo. Kan an sarong guwardiya asin an katrabaho kaini magkainteres sa sarong artikulo sa An Torrengbantayan, inalok sinda ni Janice na regular na darahan nin mga magasin. Arog man kaiyan an ginibo niya sa saro pang katrabaho, na nagkainteres sa lain-lain na tema sa An Torrengbantayan asin Awake! Dangan saro pang katrabaho an naghagad man nin magasin. “Bendisyon nanggad ini hali ki Jehova!” an sabi ni Janice. Dai nahaloy, igwa na siya nin 11 ruta nin magasin sa pinagtatrabahuhan niya.

Irinekomendar nin sarong nagbibiyaheng paraataman na pag naghuhulit sa harong-harong, dai dapat tapuson kan mga parahayag an pakikipag-ulay sa kagharong sa pagsabing mabalik na sana sinda sa ibang aldaw. Imbes, puwede ninda siyang haputon: “Gusto mong mahiling kun paano ginigibo an pag-adal sa Bibliya?” o, “Anong aldaw asin oras gusto mong bumalik ako para ikapadagos ta an satong pag-uulay?” Sinabi kan nagbibiyaheng paraataman na kan gamiton an paaging ini kan mga tugang sa sarong kongregasyon na dinadalaw niya, nakapuon sinda nin 44 pag-adal sa Bibliya sa laog nin sarong semana.

An tulos-tulos na pagdalaw liwat—dawa pirang aldaw pa sana puon kan inot na pag-uulay—puwedeng magin epektibo. Taano? Huling ipinapahiling kaiyan  na talagang interesado kitang tabangan an mga may sadiyosan an puso na masabutan an Bibliya. Kan haputon kun taano ta nakipag-adal siya nin Bibliya sa mga Saksi ni Jehova, sinabi nin sarong babayi: “Nakipag-adal ako ta nagpahiling sinda nin sinserong interes asin pagkamuot sa sako.”

Dai lang nahaloy pagkatapos mag-adal ni Madaí sa Paadalan sa Paglilingkod Bilang Payunir, nagkaigwa siya nin 15 tinutukduan sa Bibliya asin lima pa an itinao niya sa ibang mga parahayag. An nagkapira sa sainda regular nang nag-aatender sa satong mga pagtiripon. Ano an nakatabang ki Madaí na makapuon nin kadakul na pag-adal sa Bibliya? Idinuon sa saiya kan paadalan an kahalagahan nin padagos na pagdalaw liwat sagkod na manumpungan an mga nagpahiling nin interes sa inot na pagdalaw. An saro pang Saksi na nakatabang sa dakul na maaraman an katotoohan sa Bibliya nagsabi, “Nanudan ko na an pagmamaigot na makadalaw liwat iyo an liyabe para matabangan an mga tawo na gustong mamidbid si Jehova.”

An pagdalaw liwat asin pagkondukta nin pag-adal sa Bibliya nangangaipo nin maigot na paghihinguwa. Pero an balos kaini labi pa kisa gabos na kaipuhan na paghihinguwa. Paagi sa pakikikabtang ta sa gibuhon na paghuhulit kan Kahadian, matatabangan ta an iba na “makaabot sa pakasabot kan katotoohan,” asin huli kaiyan puwede sindang maligtas. (1 Tim. 2:3, 4) Kun para sa sato, iyan matao nin pagkakontento asin kaugmahan na daing kaagid.