1. Anong organisasyon an nagsalida sa apostatang Israel bilang an banwaan para sa ngaran ni Jehova? (Hilingon an ritrato sa itaas.)

ANGAY nanggad na itao ki Jehova an kaumawan sa pagkaestablisar kan Kristiyanong kongregasyon kan inot na siglo asin sa pagbalik kan tunay na pagsamba sa presenteng panahon. Arog kan tinukar sa sinundan na artikulo, sinalidahan kan organisasyon na kompuwesto kan inot na mga parasunod ni Cristo an apostatang nasyon nin Israel bilang an banwaan para sa ngaran ni Jehova. An bagong organisasyon, na inuuyunan nanggad nin Diyos, nakaligtas sa pagkalaglag kan Jerusalem kan 70 C.E. (Luc. 21:20, 21) An mga pangyayaring iyan kan inot na siglo nagbukas nin dalan para sa mga pag-uswag na kalabot an mga lingkod ni Jehova sa presenteng panahon. An sistema nin mga bagay ni Satanas madali nang mapara, pero an organisasyon nin Diyos makakaligtas sa huring mga aldaw. (2 Tim. 3:1) Paano kita makakasigurado sa bagay na ini?

2. Ano an sinabi ni Jesus manungod sa ‘dakulang kahurasaan,’ asin paano iyan mapuon?

² Mapadapit sa saiyang dai nahihiling na presensiya asin sa pagtatapos kan sistema nin mga bagay, sinabi ni Jesus na magkakaigwa nin  ‘dakulang kahurasaan na dai pang kaagid na nangyari magpuon sa kapinunan nin kinaban sagkod ngunyan, ni minsan nuarin pa man.’ (Mat. 24:3, 21) An daing kaagid na kahurasaan na ini mapuon pag linaglag na ni Jehova an ‘Dakulang Babilonya,’ an pambilog na kinaban na imperyo nin palsong relihiyon, paagi sa paggamit sa pulitikal na mga kapangyarihan. (Kap. 17:3-5, 16) Ano an sunod na mangyayari?

3. Pagkatapos laglagon an palsong relihiyon, anong pagsalakay an pupurbaran na gibuhon sa banwaan ni Jehova?

³ Pagkatapos laglagon an palsong relihiyon, aatakehon ni Satanas asin kan manlain-lain na elemento kan saiyang kinaban an mga lingkod ni Jehova. Halimbawa, mapadapit ki ‘Gog kan daga nin Magog,’ ihinula kan Kasuratan: ‘Madatong kang garo bagyo, magigin kang garo dâgom sa pagkatahob kan daga asin an gabos mong kapisanan, saka an dakul na banwaan na kairiba mo.’ Huling an Mga Saksi ni Jehova mayo nin mga puwersa armada asin iyo an pinakamatuninong na mga tawo sa daga, sinda garo baga madali sanang puntiryahon. Pero talagang mapapasala nanggad sinda sa pag-atakeng iyan!—Ezeq. 38:1, 2, 9-12.

4, 5. Paano mahiro si Jehova sa pagpurbar ni Satanas na paraon an mga lingkod Niya?

⁴ Paano mahiro an Diyos sa mga paghihinguwa ni Satanas na paraon an Saiyang banwaan? Mainterbenir si Jehova para sa sainda, na ginagamit an saiyang deretso bilang Unibersal na Soberano. Para ki Jehova, an pag-atake sa mga lingkod niya pag-atake man sa saiya. (Basahon an Zacarias 2:8.) Kaya, mahiro tulos an satuyang Ama sa langit tanganing iligtas kita. An magigin kulminasyon kan pagliligtas na iyan iyo an paglaglag sa kinaban ni Satanas sa Armagedon, ‘an ralaban sa dakulang aldaw nin Diyos na Makapangyarihan sa Gabos.’—Kap. 16:14, 16.

⁵ Mapadapit sa Armagedon, sinasabi kan hula sa Bibliya: ‘“Si Jehova makikipagsuway sa mga nasyon. Siya an hukom sa gabos na laman; itatao niya an mga maraot na tawo sa minasbad,” sabi ni Jehova. Siring na nagsabi si Jehova kan mga hukbo: “Uya, karatan an maluwas paghali sa nasyon pasiring sa nasyon, asin ta matindog an dakulang bagyo na gikan sa mga gilid kan daga. Asin an panggagaradanon ni Jehova sa aldaw na iyan paghali sa sarong puro kan daga sagkod sa sarong puro. Dai sinda pag-aawitan kan sa gadan, dai man sinda pananarayon, dai man sinda ipangrurulubong. Magigin sinda garo udo sa ibabaw kan daga.”’ (Jer. 25:31-33) Tatapuson kan Armagedon an maraot na sistemang ini nin mga bagay. Mawawara na an kinaban ni Satanas, pero makakaligtas an daganon na kabtang kan organisasyon ni Jehova.

6, 7. (a) Sain hali an mga kabilang sa dakulang kadaklan? (b) Nagkaigwa nin anong pagdakul sa nakaagi pa sanang mga taon?

⁶ An organisasyon nin Diyos nagdadanay asin nag-uuswag sa daga huling may pag-uyon niya an mga tawong kabilang diyan. Sinisiyerto sa sato kan Bibliya: ‘An mga mata [ni Jehova] nasa mga matanos, asin an saiyang mga talinga nasa saindang pagngayo-ngayo.’ (1 Ped. 3:12) Kabilang sa mga matanos an “sarong dakulang kadaklan” na nagruluwas ‘sa dakulang kahurasaan.’ (Kap. 7:9, 14) An mga nakaligtas na ini bako sanang “sarong kadaklan.” Sinda “sarong dakulang kadaklan”—kadakul-dakul nanggad na tawo. Nahihiling mo daw an sadiri mo na kabilang sa mga nakaligtas sa ‘dakulang kahurasaan’?

⁷ Sain hali an mga kabilang sa dakulang kadaklan? Sinda tinitiripon huli sa ihinula ni Jesus na kabtang kan tanda kan saiyang presensiya. Sinabi niya: ‘Ining ebanghelyo nin Kahadian ihuhulit sa bilog na kinaban sa pagpatotoo sa gabos na nasyon asin dangan madatong an katapusan.’ (Mat. 24:14) Sa huring mga aldaw na ini, iyan an panginot na gibuhon kan organisasyon nin Diyos. Huli sa pambilog na kinaban  na paghuhulit asin pagtutukdo kan Mga Saksi ni Jehova, minilyon na tawo an nakakanuod na sambahon an Diyos “sa espiritu asin katotoohan.” (Juan 4:23, 24) Halimbawa, sa nakaagi pa sanang sampulong taon—durante kan taon nin paglilingkod 2003 sagkod 2012—labing 2,707,000 na indibidwal an nabawtismuhan bilang simbolo kan saindang pagdusay sa Diyos. Sa bilog na kinaban, igwa na ngunyan nin labing 7,900,000 na Saksi, asin minilyon pa an nakikiiba sa sainda, lalo na sa taunan na pagselebrar kan Memoryal. Dai ta ipinag-oorgulyo an bilang, huli ta ‘an Diyos an [padagos na] nagpapatalubo’ kaiyan. (1 Cor. 3:5-7) Minsan siring, risang marhay na an dakulang kadaklan padagos na nagtatalubo asin nagdadakul sa kada taon na minaagi.

8. Ano an dahilan kan kahanga-hangang pagdakul kan mga kabilang sa organisasyon ni Jehova sa presenteng panahon?

⁸ Kahanga-hanga an pagdakul kan mga lingkod nin Diyos huling sinusuportaran mismo ni Jehova an saiyang Mga Saksi. (Basahon an Isaias 43:10-12.) An pagdakul na iyan ihinula sa mga tataramon na ini: ‘An sadit [magigin] sangribo; an nguhod magigin makusog na nasyon. Ako si Jehova, sa saiyang panahon gigibuhon ko ini nin madali.’ (Isa. 60:22) Kaidto, an linahidan na mga natatada garo “sadit,” pero duminakul sinda kan an iba pang espirituwal na Israelita dinara sa organisasyon nin Diyos. (Gal. 6:16) Huli sa bendisyon ni Jehova sa pag-agi nin mga taon, padagos na nagdadakul an tinitipon na dakulang kadaklan.

9. Ano an dapat tang gibuhon tanganing magkaigwa nin maugmang puturo na ipinanuga sa Tataramon nin Diyos?

⁹ Kabilang man kita sa linahidan na mga Kristiyano o miyembro kan dakulang kadaklan, puwede kitang magkaigwa nin maugmang puturo na ipinanuga sa Tataramon nin Diyos. Minsan siring, kaipuhan tang sunudon an mga kahagadan ni Jehova. (Isa. 48:17, 18) Isip-isipon an mga Israelita na sakop kan ley ni Moises. An saro sa katuyuhan kan Ley iyo na protektaran an banwaan nin Israel paagi sa pagtao sa sainda nin kapaki-pakinabang na mga reglamento mapadapit sa seksuwal na paggawi, mga transaksiyon sa negosyo, pag-ataman sa aki, tamang paagi nin pagtratar sa kapwa, asin iba pa. (Ex. 20:14; Lev. 19:18, 35-37; Deut. 6:6-9) Nakikinabang kita sa kaparehong paagi huli sa pagsunod sa mga kahagadan nin Diyos—asin dai nanggad nakakapagabat sa sato an paggibo kan saiyang kabutan. (Basahon an 1 Juan 5:3.) Sa katunayan, kun paanong an mga Israelita naingatan kan Ley, an pagsunod ta sa mga ley asin prinsipyo ni Jehova Diyos dai sana nagpoprotektar sa sato kundi pinapagdanay man kitang makusog sa pagtubod.—Tito 1:13.

10. Taano ta maninigo kitang magtagama nin panahon para sa pag-adal nin Bibliya asin semanal na Pampamilyang Pagsamba?

¹⁰ An daganon na kabtang kan organisasyon ni Jehova nag-aabante sa lain-lain na paagi. Halimbawa, an satong pakasabot sa katotoohan sa Bibliya padagos na nagliliwanag. Aasahan ta iyan huling ‘an dana kan mga banal garo man sana an liwanag kan kaagahon, na nag-uurog sagkod na masangkap an aldaw.’ (Tal. 4:18) Pero, marahay na haputon an sadiri: ‘Nakakasabay daw ako sa mga pagliliwat sa pakasabot sa katotoohan sa Kasuratan? Ugali ko daw na basahon an Bibliya aroaldaw? Gustong-gusto ko daw na basahon an satong mga publikasyon? Ako daw saka an sakong mga mahal sa buhay may semanal na Pampamilyang Pagsamba?’ Mauyon an kadaklan sa sato na bako man dipisilon an paggibo kan mga bagay na ini. Sa parati, kaipuhan sanang magtagama nin panahon tanganing magibo iyan. Importante nanggad na magkua nin tamang kaaraman sa Kasuratan, iaplikar iyan, asin umuswag sa espirituwal—lalo na ngunyan na an dakulang kahurasaan haranihon na!

11. Sa anong mga paagi kapaki-pakinabang an mga kapiyestahan kan suanoy asin an mga pagtiripon, asembleya, saka kumbensiyon sa presenteng panahon?

¹¹ An organisasyon ni Jehova naghihiro para  sa pinakaikakarahay niyato kun sinasadol kita kaiyan na sunudon an konseho ni apostol Pablo: ‘Magpamurumangno kita na magpasaradol-sadol sa pagkamuot asin sa mga marahay na gibo; na dai pinapabayaan an satong pagturutiripon siring kan kaugalian nin nagkapira, kundi na magpasaradol-sadol kita, asin lalo na ta nahihiling nindo na an aldaw naghaharani na.’ (Heb. 10:24, 25) An taunan na kapiyestahan asin iba pang pagtiripon para sa pagsamba nagpakusog sa espirituwalidad kan mga Israelita. Apuwera kaiyan, an mga okasyon arog kan espesyal na Kapiyestahan nin mga Payag-payag kan panahon ni Nehemias maugmang mga okasyon. (Ex. 23:15, 16; Neh. 8:9-18) Arog man kaiyan an nakukua tang mga pakinabang sa satong mga pagtiripon, asembleya, asin kumbensiyon. Lubos tang aprobetsaran an mga probisyon na ini para sa satong espirituwal na salud asin kaugmahan.—Tito 2:2.

12. Ano an maninigong magin sabuot niyato dapit sa paghuhulit kan Kahadian?

¹² Bilang mga miyembro kan organisasyon nin Diyos, magaya-gaya kitang nakikikabtang sa “banal na gibuhon kan maugmang bareta nin Diyos.” (Roma 15:16, NW) Huli sa pakikikabtang sa “banal na gibuhon” na ini, kita nagigin “katabang” o kapwa trabahador ni Jehova, an Saro na Banal. (1 Cor. 3:9; 1 Ped. 1:15) An paghuhulit kan maugmang bareta nakakatabang sa pagbindikar kan banal na pangaran ni Jehova. Asin tunay nanggad na sarong pambihirang pribilehiyo na pagkatiwalaan kan ‘mamuraway na ebanghelyo’ kan maugmang Diyos.—1 Tim. 1:11.

13. Sa ano nakadepende an marahay na espirituwalidad asin an sato mismong buhay?

¹³ Gusto nin Diyos na papagdanayon ta an marahay na espirituwalidad paagi sa pagdanay na maimbod sa saiya asin pagsuportar sa saiyang organisasyon sa manlain-lain na aktibidad kaini. Sinabihan ni Moises an mga Israelita: ‘Isinasaksi ko an kalangitan asin an daga ngunyan tumang sa saindo, na ibinugtak ko sa atubangan nindo an buhay asin an kagadanan, an [bendisyon asin an sumpa]. Pilia nanggad an buhay tanganing mabuhay ka asin an saimong banhi. Na mamutan mo si Jehova na saimong Diyos, na maghinanyog ka kan saiyang tingog, asin dumulok ka sa saiya; huli ta siya an saimong buhay asin an kahalabaan kan saimong mga aldaw tanganing mag-irok ka sa ibabaw kan daga na isinumpa ni Jehova na itatao sa saimong mga magurang na si Abraham, si Isaac, asin si Jacob.’ (Deut. 30:19, 20) An satong buhay nakadepende sa paggibo kan kabutan ni Jehova, pagkamuot sa saiya, masinunod na paghimati sa tingog niya, asin pangangapot sa saiya.

14. Ano an namatian nin sarong brother dapit sa nahihiling na kabtang kan organisasyon nin Diyos?

¹⁴ Si Brother Pryce Hughes, na marigon na nagdanay na maimbod sa Diyos asin padagos na nakisabay sa Saiyang organisasyon, nagsurat kaidto: “Dakulaon an sakong pasasalamat na nabuhay ako suno sa kaaraman sa mga katuyuhan ni Jehova puon kan inot na mga aldaw na idto bago an 1914 . . . Kun may sarong bagay na nagin pinakamahalaga para sa sako, iyan an pagdadanay na dayupot sa nahihiling na organisasyon ni Jehova. Itinukdo sa sako kan mga eksperyensiya ko kaidto kun gurano kabakong madunong na magsarig sa kaisipan nin tawo. Kan magin malinaw iyan sa isip ko, nagin determinado akong magdanay sa maimbod na organisasyon. Sa anong paagi pa man makakamtan nin saro an pag-uyon asin bendisyon ni Jehova?”

15. Magtao nin halimbawa sa Kasuratan na nagpapahiling kun paano ta maninigong mansayon an mga pagliliwat sa satong pakasabot sa mga topiko sa Bibliya.

¹⁵ Tanganing makamtan an pag-uyon asin bendisyon ni Jehova bilang indibidwal, dapat tang suportaran an saiyang organisasyon asin akuon an mga pagliliwat sa satong pakasabot sa Kasuratan. Pag-isipan ini: Pagkagadan ni Jesus, rinibong Judiong Kristiyano an gusto pa man giraray sumunod sa Ley asin nadipisilan na bayaan  iyan. (Gui. 21:17-20) Pero, sa tabang kan surat ni Pablo sa mga Hebreo, inako ninda an katotoohan na sinda pinabanal, bako kan mga atang na ‘idinulot suno sa Katugunan,’ kundi kan ‘pagdulot kan hawak ni Jesu-Cristo nin makasaro manungod sa gabos na panahon.’ (Heb. 10:5-10) Daing duda, an kadaklan sa mga Kristiyanong idto na may Judiong ginikanan liniwat an saindang kaisipan asin uminuswag sa espirituwal. Kaipuhan ta man na magin maigot sa pag-adal asin magin bukas an isip kun may mga pagliliwat sa pakasabot sa Tataramon nin Diyos o sa satong gibuhon na paghuhulit.

16. (a) Anong mga bendisyon an magpapaugmang marhay sa buhay sa bagong kinaban? (b) Ano an linalauman mong makamtan sa bagong kinaban?

¹⁶ An gabos na nagdadanay na maimbod ki Jehova asin sa organisasyon niya padagos na maako kan saiyang bendisyon. An maimbod na mga linahidan maako nin pambihirang mga pribilehiyo bilang mga kapwa paramana ni Cristo sa langit. (Roma 8:16, 17) Kun kita may daganon na paglaom, imahinara kun gurano kaugma na mabuhay sa Paraiso. Bilang kabtang kan organisasyon ni Jehova, naggagaya-gaya nanggad kita ngunyan sa pagsabi sa iba kan panuga nin Diyos na bagong kinaban! (2 Ped. 3:13) ‘An mga mahuyo manununod [makakasadiri] kan daga,’ an sabi kan Salmo 37:11, ‘asin sinda magkakararanga nin labi-labi sa katuninungan.’ An mga tawo ‘magpapatirindog nin mga harong, asin mag-uuruntok diyan’ asin ikakaugma an ‘gibo kan saindang mga kamot.’ (Isa. 65:21, 22) Mawawara na an pang-aapi, kadukhaan, asin gutom. (Sal. 72:13-16) An Dakulang Babilonya dai na makakapandaya sa kiisay man, huling mapapara na siya. (Kap. 18:8, 21) An mga gadan bubuhayon liwat asin tatawan nin oportunidad na mabuhay nin daing sagkod. (Isa. 25:8; Gui. 24:15) Nakakaugma nanggad na paglaom para sa minilyon na nagdusay ki Jehova! Tanganing magkatotoo sa sato bilang indibidwal an siring na mga panuga, dapat na padagos kitang umuswag sa espirituwal, na nag-aabante kaiba kan organisasyon nin Diyos, asin pirming nakikisabay diyan.

17. Ano an dapat na magin sabuot ta sa pagsamba ki Jehova asin sa organisasyon niya?

¹⁷ Mantang haranihon na an katapusan kan sistemang ini, magdanay kitang marigon sa pagtubod asin magin mapagpasalamat na marhay sa areglo nin Diyos sa pagsamba. Iyan an sabuot kan salmistang si David na nag-awit: ‘Sarong bagay an hinagad ko ki Jehova, iyan hahanapon ko, na magdanay ako diyan sa harong ni Jehova sa gabos na aldaw nin sakong buhay, sa paghiling-hiling kan kagayunan ni Jehova asin sa paghurop-hurop diyan sa saiyang [templo].’ (Sal. 27:4) Lugod na an lambang saro sa sato magdanay na maimbod sa Diyos, na padagos na nakikisabay sa banwaan niya asin nag-aabante kaiba kan organisasyon ni Jehova.