1, 2. Taano ta naiintindihan ni Pablo an mga maluya?

GABOS kita nakakamati nin pangluluya kun minsan. Kun tinatrangkaso kita o nagkaka-allergy, puwedeng mangruluya kita asin masakitan na gibuhon an mga aktibidad sa aroaldaw. Imahinaron na nangruruluya ka bako sanang saro o duwang semana kundi dakul na bulan na. Sa arog kaiyan na kamugtakan, bako daw na aapresyaron mo kun maiintindihan ka kan iba?

² Aram ni apostol Pablo kun paano maapektaran asin mangluya pa ngani huli sa mga panggigipit sa luwas asin laog kan kongregasyon. Bako lang sarong beses na nakamati siyang dai na niya kaya. (2 Cor. 1:8; 7:5) Sa paghurop-hurop kan saiyang buhay asin kan dakul na kasakitan na naeksperyensiyahan niya bilang maimbod na Kristiyano, inadmitir ni Pablo: “Siisay an maluya, asin bako akong maluya?” (2 Cor. 11:29, NW) Asin kun manungod sa manlain-lain na miyembro kan Kristiyanong kongregasyon, na iinagid sa mga parte kan hawak nin tawo, sinabi ni Pablo na an mga ‘garo baga maluya anas kaipuhan.’ (1 Cor. 12:22) Ano an buot niyang sabihon? Taano ta kaipuhan tang  arugon an pagmansay ni Jehova sa mga tugang na garo baga mas maluya? Asin paano kita makikinabang sa paggibo kaiyan?

3. Ano an puwedeng makaimpluwensiya sa satong pagmansay sa mga nangangaipo nin tabang sa laog kan kongregasyon?

³ Nabubuhay kita sa kinaban na pano nin kompetisyon asin parating inuumaw an pagigin makusog saka pagigin hoben. Ginigibo nin dakul an gabos tanganing makua an gusto ninda dawa sa parati tinitimakan na an namamatian kan mga mas maluya. Dai ta kinokonsinte an siring na paggawi, pero tibaad dai ta naririsa na nagkakaigwa na kita nin negatibong pagmansay sa mga parating nangangaipo nin tabang, dawa sa laog kan kongregasyon. Pero puwede kitang magkaigwa nin mas timbang na pagmansay, siring kan sa Diyos.

4, 5. (a) Paano kita tinatabangan kan ilustrasyon sa 1 Corinto 12:21-23 na masabutan kun ano an pagmansay ni Jehova sa kaluyahan nin tawo? (b) Paano kita makikinabang sa pagtabang sa mga maluya?

⁴ Manunudan ta kun paano minamansay ni Jehova an kaluyahan nin tawo sa sarong ilustrasyon na yaon sa inot na surat ni Pablo sa mga taga Corinto. Sa kapitulo 12, ipinapagirumdom sa sato ni Pablo na dawa an pinakabakong magayon o pinakamaluyang parte kan hawak nin tawo igwang pakinabang. (Basahon an 1 Corinto 12:12, 18, 21-23.) Kinukuwestiyon nin nagkapirang ebolusyonista an mga aspekto kan konseptong ini dapit sa hawak nin tawo. Minsan siring, ipinapahiling sa mga nadiskubre sa pag-adal nin anatomiya na an mga parte kan hawak na sinasabi kaidto na daing serbi sa katunayan igwang mahalagang marhay na pakinabang. * Halimbawa, kinuwestiyon nin nagkapira kun baga kaipuhan an pinakasadit na muro sa bitis; pero, nadiskubre ngunyan na igwa iyan nin epekto sa balanse kan satong bilog na hawak.

⁵ Idinuduon sa ilustrasyon ni Pablo na may pakinabang an gabos na miyembro kan Kristiyanong kongregasyon. Bakong arog ni Satanas na hinahalian nin dignidad an mga tawo, para ki Jehova “kaipuhan” an gabos niyang lingkod kaiba na an mga garo baga mas maluya. (Job 4:18, 19) An pakaaram kaiyan maninigong makatabang sa sato na mapahalagahan an papel niyato sa satong kongregasyon asin bilang kabtang kan kongregasyon kan banwaan nin Diyos sa bilog na daga. Halimbawa, girumdumon an panahon na inalalayan mo an sarong may-edad. Tibaad kinaipuhan mong baguhon an rikas kan saimong paglakaw. Bako daw na an pagtabang niyato nagin kapaki-pakinabang asin nakapaugma sa sato? Iyo, kun tinatabangan ta an iba, nagigin magaya-gaya kita sa pagpahiling nin pagmakulog sa sainda, asin kita nagigin maygurang, mas mapasensiya, saka mamumuton. (Efe. 4:15, 16) Aram kan satong mamumuton na Ama na an kongregasyon na nagpapahiling nin pagigin timbang asin pagkamuot may pagpapahalaga sa gabos na miyembro kaiyan, ano man an saindang limitasyon.

6. Paano ginamit ni Pablo an mga terminong “maluya” asin “kaluyahan”?

⁶ Interesante nanggad, ginamit ni Pablo sa surat niya sa mga taga Corinto an mga terminong “maluya” asin “kaluyahan” kan sambiton niya an manungod sa pagmansay kan mga bakong kapagtubod sa inot na siglong mga Kristiyano asin sa paghiling man niya sa saiyang sadiri. (1 Cor. 1:26, 27; 2:3) Kan sabihon ni Pablo an manungod sa mga “makusog,” dai niya intensiyon na isipon kan nagkapirang Kristiyano na sinda mas marahay kisa sa iba. (Roma 15:1) Imbes, sinasabi niya na an mas eksperyensiyadong mga Kristiyano maninigong magin mapasensiya sa mga bako pang marigon sa katotoohan.

7. Ano an puwedeng makapugol sa sato na tabangan an mga nangangaipo?

⁷ Kun tinatabangan ta an mga maluya inaarog ta si Jehova asin nakakamtan ta man an pag-uyon  niya. (Sal. 41:1; Efe. 5:1) Pero, totoo na kun beses an negatibong pagmansay sa mga nangangaipo puwedeng makapugol sa sato na tabangan sinda. O huling dai kita sigurado sa mga sasabihon ta, tibaad masupog kita asin likayan na sana an mga nasa masakit na kamugtakan. Si Cynthia, * sarong sister na binayaan kan saiyang agom, nagkomento: “Pag linilikayan ka kan mga tugang o dai ninda ginigibo an inaasahan mong gigibuhon nin dayupot na mga katuod, makulog nanggad iyan. Kun igwa ka nin magabat na problema, kaipuhan mo nin mga tawo sa palibot mo.” Aram ni Hading David kun gurano kakulog pag linilikayan ka nin iba.—Sal. 31:12.

8. Ano an makakatabang sa sato na mas maintindihan an iba?

⁸ Posibleng marhay na magigin mas maiintindihan ta an iba kun gigirumdumon ta na an ibang namumutan tang mga tugang nagin maluya huli sa masakit na mga kamugtakan—may hilang, may kapamilyang bakong Saksi, o may depresyon. Tibaad sarong aldaw magin arog man kaiyan an sitwasyon ta. Bago maglaog sa Dagang Panuga, ipinagirumdom sa mga Israelita, na nagin dukha asin maluya sa daga nin Ehipto, na dai ninda maninigong ‘patagason an saindang puso’ sa nagsasakit nindang mga tugang. Inaasahan ni Jehova na tatabangan ninda an mga dukha.—Deut. 15:7, 11; Lev. 25:35-38.

9. Ano an maninigong magin priyoridad ta kun nagtatabang sa mga nasa masakit na kamugtakan? Magtao nin halimbawa.

⁹ Imbes na magin mapaghusgar o mapagsuspetsa, maninigong magtao kita nin espirituwal na karangahan sa mga nasa masakit na kamugtakan. (Job 33:6, 7; Mat. 7:1) Bilang halimbawa, kun darahon sa emergency room an sarong nagmomotorsiklo na naerido sa aksidente, pagmamaigutan daw kan mga nars asin doktor na aramon kun baga siya an dahilan kan aksidente? Dai, tulos-tulos sindang matao nin medikal na tabang. Kaagid kaiyan, kun an sarong kapagtubod nangluluya huli sa personal na mga problema, an maninigong priyoridad niyato iyo na magtao nin espirituwal na tabang.—Basahon an 1 Tesalonica 5:14.

10. Taano ta masasabing “mayaman sa pagtubod” an nagkapirang tugang na garo mas maluya?

¹⁰ Kun iisip-isipon ta nguna an kamugtakan kan satong mga tugang, tibaad mabago an satong pananaw sa garo baga kaluyahan ninda. Isipon an mga sister na dakul na taon nang nagtitios nin pagkontra kan pamilya. An nagkapira tibaad simple sana asin garo maluya, pero bako daw na nagpapahiling sinda nin pambihirang pagtubod asin kakusugan? Kun nakakahiling ka nin nagsosolong ina na regular na nag-aatender sa mga pagtiripon kaiba an saiyang aki o mga aki, dai ka daw napapahanga kan pagtubod niya asin determinasyon? Asin kumusta man an mga tin-edyer na nagdadanay sa katotoohan sa ibong nin maraot na mga impluwensiya sa eskuwelahan? Kun mapakumbaba kita, mahihiling ta na an mga tugang na garo mas maluya ‘mayaman man sa pagtubod’ arog kan ibang mga tugang na nasa mas marahay na kamugtakan.—Sant. 2:5.

11, 12. (a) Ano an makakatabang sa sato na liwaton an pagmansay ta sa kaluyahan nin tawo? (b) Ano an manunudan ta sa pagtratar ni Jehova ki Aaron?

¹¹ Matatabangan kitang arugon an pagmansay ni Jehova sa kaluyahan nin tawo kun aaramon ta kun ano an ginibo niya may koneksiyon sa nagkapirang lingkod niya. (Basahon an Salmo 130:3.) Halimbawa, kun kaiba ka ni Moises kan si Aaron naggibo nin estatwang ugbon na bakang bulawan, ano an mamamatian mo sa hababaw na pagdadahilan ni Aaron? (Ex. 32:21-24) O ano an iisipon mo ki Aaron na kan maimpluwensiyahan kan saiyang tugang na si Miriam, krinitika si Moises sa pag-agom nin babaying taga ibang nasyon? (Bil. 12:1, 2) Ano an magigin reaksiyon mo kan si Jehova dai tinawan nin onra ni Aaron asin Moises kan Siya milagrosong nagtao nin tubig sa Meriba?—Bil. 20:10-13.

¹² Sa kada sitwasyon na ini, puwede kutanang tulos-tulos na pinadusahan ni Jehova si Aaron.  Pero aram Niya na si Aaron bakong maraot na tawo o iyo an talagang may magabat na sala. Garo baga nagpadara sana si Aaron sa mga sitwasyon o impluwensiya kan iba. Pero, kan iinatubang sa saiya an saiyang sala, tulos niyang inadmitir iyan asin inako an hatol ni Jehova. (Ex. 32:26; Bil. 12:11; 20:23-27) Pinili ni Jehova na magpokus sa pagtubod asin pagsulsol ni Aaron. Pakalihis nin dakul na siglo, si Aaron asin an saiyang mga gikan nagigirumduman pa man giraray bilang mga may takot ki Jehova.—Sal. 115:10-12; 135:19, 20.

13. Magtao nin halimbawa kun paano ta maninigong siyasaton an pagmansay niyato sa kaluyahan nin tawo.

¹³ Tanganing maarog ta an kaisipan ni Jehova, maninigo tang siyasaton an pagmansay niyato sa mga tugang na garo baga maluya. (1 Sam. 16:7) Halimbawa, ano an reaksiyon ta kun an sarong tin-edyer bakong maingat sa pagpili nin libangan o garo baga iresponsable? Imbes na magin sobra kamapagkritika, taano ta dai isipon kun ano an magigibo niyato tanganing matabangan siyang magin maygurang? Puwede kitang magsadiring buot na tabangan an sarong nangangaipo nin tabang, asin sa paggibo kaiyan, kita totoong magigin mas mapagsabot asin mamumuton.

14, 15. (a) Ano an namatian ni Jehova kan temporaryong mawaran nin kusog nin buot si Elias? (b) Anong leksiyon an manunudan ta sa eksperyensiya ni Elias?

¹⁴ Matatabangan man kitang mapahiwas an pagmansay ta sa iba kun ikukumparar ta an satong kaisipan sa nagin reaksiyon ni Jehova sa mga lingkod niyang nangluyang gayo an buot. Saro sa sainda si Elias. Minsan ngani daing takot niyang inangat an 450 propeta ni Baal, nagdulag si Elias kan maaraman niyang nagpakana si Reyna Jezebel na gadanon siya. Pagkatapos maglakaw nin mga 150 kilometros pasiring sa Beer-seba, nagpasiring pa siya sa kaawagan. Huling mainiton asin pagal-pagal na an propeta, tuminukaw siya sa sirong nin sarong kahoy asin nagsabing gusto niya nang magadan.—1 Ha. 18:19; 19:1-4.

 ¹⁵ Ano an namatian ni Jehova kan mahiling niya an saiyang maimbod na propeta na nangluluya an buot? Isinikwal daw niya an saiyang lingkod huling temporaryo ining nagmundo nin makuri asin nawaran nin kusog nin buot? Dai nanggad! Kinonsiderar ni Jehova an mga limitasyon ni Elias asin nagsugo nin anghel. Duwang beses na dinagka kan anghel si Elias na magkakan. Kaya, dai na magigin masakiton para sa saiya an sunod na pagbaklay. (Basahon an 1 Hade 19:5-8.) Iyo, bago pa man magtao nin ano man na instruksiyon, dinangog nguna ni Jehova an saiyang propeta asin naggibo nin praktikal na mga paagi tanganing pakusugon siya.

16, 17. Paano ta maaarog an pagmakulog ni Jehova ki Elias?

¹⁶ Paano ta maaarog an satong mapagmakulog na Diyos? Dai kita maninigong magtao nin sadol tulos-tulos. (Tal. 18:13) Mas marahay na intindihon ta nguna an kamugtakan kan mga tibaad nag-iisip na sinda “kulang nin halaga” huli sa sitwasyon ninda. (1 Cor. 12:23) Dangan, nasa kamugtakan na kitang tumabang sa sainda sa tamang paagi, uyon sa talagang pangangaipo ninda.

¹⁷ Halimbawa, isipon si Cynthia, na nasambitan sa inutan. Siya asin an duwa niyang aking babayi binayaan kan saiyang agom. Grabe an kamunduan ninda. Paano sinda tinabangan kan mga kakongregasyon ninda? Sinabi niya: “Kan inapudan mi sinda sa telepono asin sinabi sainda an nangyari, sa laog sana nin 45 minutos, yaon na sinda sa harong mi. Napaluha man sinda. Dai ninda kami binayaan sa inot na duwa o tulong aldaw. Huling dai kami makakakan nin tultol saka emosyonal kaming marhay, pinaistar ninda kami sa saindang harong sa laog nin kadikit na panahon.” Iyan tibaad magpagirumdom sa sato kan isinurat ni Santiago: ‘Kun an tugang na lalaki o babayi huba asin nagkukulang nin kakanon sa aroaldaw, asin an saro sa saindo magsabi sainda, “Lakaw kamo sa katuninungan; magpahimbong kamo asin mabasog,” alagad dai nindo sinda tinatawan kan mga bagay na kaipuhan sa hawak, ano an pakinabang kaiyan? Siring man an pagtubod, kun iyan dai nin mga gibo, gadan sa saiya man sana.’ (Sant. 2:15-17) Huli sa napapanahon na suporta kan mga kakongregasyon ninda, si Cynthia asin an saiyang mga aki napakusog na mag-auxiliary payunir anom na bulan pagkatapos kan makulog na inagihan ninda.—2 Cor. 12:10.

18, 19. (a) Paano ta matatabangan an mga temporaryong nangluluya? (b) Siisay an mga nakikinabang kun tinatabangan ta an mga maluya?

¹⁸ Tibaad base sa sadiri mong eksperyensiya aram mo na nangangaipo nin panahon tanganing maka-recover sa grabeng hilang. Sa kaagid na paagi, an sarong Kristiyano na nagin maluya huli sa personal na mga problema o masakiton na mga kamugtakan tibaad mangaipo nin panahon tanganing magin makusog giraray sa espirituwal. Totoo na kaipuhan kan satong tugang na pakusugon an sadiri niyang pagtubod paagi sa personal na pag-adal, pamibi, asin ibang pang Kristiyanong mga aktibidad. Pero magigin mapasensiya daw kita sagkod na siya magin makusog giraray? Asin sa panahon na iyan, padagos daw kitang mapahiling nin pagkamuot sa saiya? Pagmamaigutan ta daw na tabangan an mga temporaryong nangluluya na mamatian na mahalaga sinda asin mamatian an satong Kristiyanong kapadangatan?—2 Cor. 8:8.

¹⁹ Dai nuarin man paglingawan na mantang sinusuportaran ta an satong mga tugang, naeeksperyensiyahan ta an kagaya-gayahan na nakukua sana sa pagtao. Nagigin mas mapagsabot asin mapasensiya man kita. Pero bako sana kita an nakikinabang. Sa pangkagabsan, an bilog na kongregasyon nagigin mas mapagpadangat asin mamumuton. Urog sa gabos, inaarog ta si Jehova, na ibinibilang na mahalagang marhay an lambang indibidwal. Igwa nanggad kita kan gabos na marahay na dahilan na maghimati sa pagdagka sa sato na ‘magtabang sa mga maluya.’—Gui. 20:35.