1, 2. Paano minamansay ni Jehova an saiyang mga lingkod sa daga?

KUN nahihiling kan mga magurang an saindang mga aki na nagkakawat, sa parati napapangalas sinda sa natural na mga abilidad kan mga ini. Nahiling mo na daw mismo iyan sa mga aki mo? An sarong aki tibaad garo baga may natural na liksi o matibay sa isports, mantang an tugang kaini garo mas gusto an mga board game, magdrowing o magbuting-ting nin mga bagay-bagay. Pero ano man an talento kan saindang mga aki, nauugma an mga magurang na madiskubre an potensiyal kan mga ini.

² Bilang mamumuton na Ama, interesado si Jehova sa mga lingkod niya sa presenteng panahon. Ibinibilang niya sinda na “mahalagang marhay na mga bagay kan gabos na nasyon.” (Hag. 2:7, NW) Mahalagang marhay sinda huli sa pagtubod asin debosyon ninda. Pero, tibaad narisa nindo na manlain-lain an mga talento kan mga kapwa niyato Saksi. May mga brother na mahusay magpahayag sa publiko, mantang an iba matibay sa pag-organisar nin mga bagay-bagay. Dakul na sister an madaling makanuod nin ibang mga lengguwahe asin ginagamit ninda iyan sa ministeryo, mantang an iba marahayon na mga halimbawa sa pagsuportar sa mga nangangaipo nin pamparigon sa buot asin sa pag-ataman sa may  hilang. (Roma 16:1, 12) Bako daw na nagpapasalamat kita na yaon kita sa laog kan kongregasyon kaiba an gabos na arog kaiyan na mga Kristiyano?

3. Anong mga hapot an pag-uulayan ta sa artikulong ini?

³ Minsan siring, may mga kapagtubod kita, kaiba na an hoben o bagong bawtisadong mga brother na nasasakitan pang mahiling an papel ninda sa laog kan kongregasyon. Paano ta sinda matatabangan na lubos na mapauswag an saindang potensiyal? Taano ta maninigo kitang magmaigot na hanapon an marahay na mga kuwalidad ninda, sa siring minamansay sinda arog kan pagmansay ni Jehova?

4, 5. Paano ipinapahiling kan pagkasaysay sa Hokom 6:11-16 na nahihiling ni Jehova an potensiyal kan saiyang mga lingkod?

⁴ Malinaw na ipinapahiling kan dakul na pagkasaysay sa Bibliya na bako sanang an marahay na mga kuwalidad kan mga lingkod ni Jehova an nahihiling niya, kundi pati an saindang potensiyal. Halimbawa, kan pinili si Gideon na iyo an magligtas sa banwaan nin Diyos sa pang-aapi kan mga Midianita, siyertong nabigla siya kan sabihan siya kan anghel: ‘Si Jehova yaon sa saimo, makusog na lalaki.’ Kan panahon na iyan, garo baga malinaw na dai lamang naghuna si Gideon na ‘makusog’ siya. Inadmitir niyang nagduduwa-duwa siya asin na bako siyang importanteng tawo. Pero mahihiling ta sa pag-uulay na iyan na positibo nanggad na marhay an pagmansay ni Jehova sa saiyang lingkod na si Gideon kisa sa pagmansay kaini sa sadiri niya.—Basahon an Hokom 6:11-16.

⁵ May tiwala si Jehova na ikakaligtas ni Gideon an Israel huling nahiling Niya an mga kakayahan kaini. Halimbawa, narisa kan anghel ni Jehova kun paanong bilog na kusog na pigginik ni Gideon an trigo. May narisa pang sarong bagay an anghel. Kaidtong mga panahon kan Bibliya, sa parati sa luwas giniginik kan mga parauma an inani nindang trigo tanganing maipalid kan duros an apa. Pero, si Gideon pasekretong nagginik nin trigo sa pugaan nin ubas tanganing itago sa mga Midianita an dikit niyang ani. Madunong nanggad na estratehiya iyan! Bakong makangangalas na sa paghiling ni Jehova, si Gideon bako sanang sarong mapagmaan na parauma kundi sarong madunong na tawo. Iyo, nahiling ni Jehova an potensiyal ni Gideon kaya sinanay niya ini.

6, 7. (a) Paano an pagmansay ni Jehova ki Amos naiiba sa pagmansay kan nagkapirang Israelita? (b) Taano ta masasabing bakong ignorante si Amos?

⁶ Kaagid kaiyan, mahihiling ta sa nangyari ki propeta Amos na narisa ni Jehova an potensiyal kan saro sa mga lingkod niya, dawa ngani tibaad para sa dakul siya garo baga ordinaryo o simple sanang tawo. Sinabi ni Amos na siya sarong paraataman nin mga hayop asin paratudok nin mga igos nin sikomoro—sarong klase nin igos na ibinibilang na pagkakan kan mga pobre. Kan nombrahan ni Jehova si Amos na kondenaron an idolatrosong sampulong tribong kahadian nin Israel, tibaad inisip nin nagkapirang Israelita na sala an pagkapili sa saiya.—Basahon an Amos 7:14, 15.

⁷ Si Amos hali sa sarong puwerang banwaan, pero an kaaraman niya sa mga kostumbre asin namamahala kan panahon niya nagpapatunay na bako siyang ignorante. Posibleng marhay na dakul nanggad an aram niya manungod sa kamugtakan sa Israel, asin tibaad pamilyar man siyang marhay sa kataid na mga nasyon huli sa pakikipagtransaksiyon niya sa nagbibiyaheng mga negosyante. (Amos 1:6, 9, 11, 13; 2:8; 6:4-6) Sinasabi nin nagkapirang iskolar sa Bibliya na si Amos may abilidad sa pagsurat. Dai sana nagpili an propeta nin simple asin mapuwersang mga tataramon kundi mahusay siyang naggamit nin pag-aagid saka nin mga tataramon na may duwang kahulugan. Iyo nanggad, pinatunayan kan daing takot na simbag ni Amos sa maraot na saserdoteng si Amasias na tama an pagkapili sa saiya ni Jehova asin na puwede Niyang gamiton an mga abilidad ni Amos na garo baga daing gayo risa sa primero.—Amos 7:12, 13, 16, 17.

8. (a) Ano an inasegurar ni Jehova ki David? (b) Taano ta an Salmo 32:8 nakakaparigon nin buot sa mga tibaad kulang an kumpiyansa sa sadiri o abilidad?

⁸ Iyo, nahihiling ni Jehova an potensiyal kan lambang lingkod niya. Inasegurar niya si Hading David na pirmi niya ining gigiyahan, na  ‘itinuturuhok an saiyang mga mata’ ki David. (Basahon an Salmo 32:8.) * Nahihiling daw nindo kun taano ta nakakaparigon iyan sa sato? Dawa ngani tibaad kulang kita nin kumpiyansa sa sadiri, matatabangan kita ni Jehova na malampasan an iniisip tang mga limitasyon ta asin maabot an mga pasuhan na dai ta lamang naisip na maaabot niyato. Kun paanong binabantayan na marhay nin sarong instruktor an daing eksperyensiyang parasakat sa gapo (rock climber) tanganing tabangan ining mahiling an pinakamarahay na puwedeng kaputan, gusto ni Jehova na giyahan kita mantang nag-uuswag kita sa espirituwal. Tibaad gamiton man ni Jehova an mga kapagtubod ta tanganing tabangan kitang lubos na mapauswag an satong potensiyal. Paano?

9. Paano ta maiaaplikar an sadol ni Pablo na ‘mangnuhon’ an kapakanan kan iba?

⁹ Sinadol ni Pablo an gabos na Kristiyano na ‘mangnuhon’ an kapakanan kan mga kapagtubod. (Basahon an Filipos 2:3, 4.) An kahulugan kan konseho ni Pablo iyo na maninigo tang mangnuhon an mga abilidad kan iba asin apresyaron iyan. Ano an namamatian ta kun may nagpapahiling nin interes sa pag-uswag niyato? Sa parati, napapahiro kita kaiyan na urog pang umuswag asin gibuhon an pinakamakakaya ta. Siring man, kun pinapahalagahan ta an satong mga kapagtubod, tinatabangan ta sindang umuswag sa espirituwal.

10. Siisay an tibaad nangurugnang nangangaipo kan satong atensiyon?

¹⁰ Siisay an tibaad nangurugnang nangangaipo kan satong atensiyon? Siyempre, gabos kita nangangaipo nin espesyal na atensiyon sa pana-panahon. Pero, talagang kaipuhan na mamatian kan mga hoben o bagong bawtisadong mga brother na kabali sinda sa mga aktibidad kan kongregasyon. Makakatabang ini sa sainda na mahiling na may papel sinda sa laog kan kongregasyon. Sa kabaliktaran, kun dai ta ipapahiling an pag-apresyar sa siring na mga brother tibaad madisganar sindang umabot nin urog pang mga paninimbagan, na ineengganyar kan Tataramon nin Diyos na gibuhon ninda.—1 Tim. 3:1.

11. (a) Paano tinabangan nin sarong elder an sarong hoben na lalaki na mapangganahan an pagkamasusupgon? (b) Anong leksiyon an manunudan mo sa eksperyensiya ni Julien?

¹¹ Si Ludovic, sarong elder na nakinabang sa ipinahiling na interes sa saiya kan siya hoben pa, nagsabi: “Pag nagpapahiling ako nin tunay na interes sa sarong brother, mas marikas siyang nag-uuswag.” Mapadapit ki Julien, sarong hoben na lalaki na medyo masusupgon, sinabi ni Ludovic: “Huling kun beses nagpupurbar si Julien na urog pang makatabang pero alanganon an paagi niya, bako nang natural an hiro niya. Pero nahihiling ko na mabuuton siya saka talagang gusto niyang tabangan an iba sa kongregasyon. Kaya, imbes na pagdudahan an motibo niya, nagpokus ako sa positibong mga kuwalidad niya, na pinagmamaigutan na parigunon an buot niya.” Pag-abot nin panahon, nagin kuwalipikado si Julien na magin ministeryal na lingkod, asin saro na siyang regular payunir ngunyan.

12. Anong mahalagang kuwalidad an kaipuhan tanganing matabangan an sarong tawo na lubos na mapauswag an saiyang potensiyal? Magtao nin halimbawa.

¹² Siyempre, kun gusto tang matabangan an iba na lubos na mapauswag an saindang potensiyal, kaipuhan na tatao kitang magrisa kaiyan. Arog kan ipinahiling kan eksperyensiya ni Julien, kaipuhan tang marisa, bako an mga kaluyahan nin saro kundi an marahay na mga kuwalidad asin kakayahan niya na mas mapapauswag pa. Kapareho iyan kan paghiling ni Jesus ki apostol Pedro. Dawa ngani kun beses garo baga bakong masasarigan si Pedro, sinabi ni Jesus na siya magigin masarig siring sa sarong dakulang gapo.—Juan 1:42.

13, 14. (a) Paano minansay ni Bernabe si Marcos? (b) Arog kan tabang na inako ni Marcos, paano nakinabang an sarong hoben na brother sa pagtabang sa saiya? (Hilingon an ritrato sa kapinunan kan artikulo.)

¹³ Arog man kaiyan an nagin pagmansay ni Bernabe ki Juan, na may Romanong apelyido na Marcos. (Gui. 12:25) Sa inot na pagbiyahe ni Pablo bilang  misyonero kaiba si Bernabe, naglingkod si Marcos bilang “katabang,” na tibaad iyo an nag-asikaso sa pisikal na mga pangangaipo ninda. Minsan siring, kan makaabot sinda sa Panfilia, bigla na sana sindang binayaan ni Marcos. Kinaipuhan nindang magbiyahe panorte sa lugar na bantog na may mga bandido na dai kaiba si Marcos. (Gui. 13:5, 13) Pero minalataw na liningawan ni Bernabe an bakong marahay na ginibo ni Marcos asin kan huri inaprobetsaran niya an oportunidad na kumpletuhon an pagsasanay ki Marcos. (Gui. 15:37-39) Nakatabang iyan sa hoben na lalaking ini na magin maygurang na lingkod ni Jehova. Interesante nanggad, yaon si Marcos sa Roma kaiba ni Pablo, na nakabilanggo kaidto, asin sa surat ni Pablo pareho sindang nangumusta sa mga Kristiyano sa kongregasyon nin Colosas. Asin may marahay na sinabi an apostol dapit sa saiya. (Col. 4:10) Imahinara an kaugmahan ni Bernabe kan hagadon pa ngani ni Pablo an tabang ni Marcos.—2 Tim. 4:11.

¹⁴ Nagigirumduman ni Alexandre, sarong bagong nombrahan na elder, kun paano siya nakinabang sa tabang nin sarong brother: “Kan ako hoben pa, dipisilon para sako na panginutan an pamibi sa publiko. Tinukduan ako nin sarong elder kun paano ko aandamon an sadiri ko asin kun paano ako magigin mas relaks. Imbes na dai na ako papamibion, tinawan niya ako nin mga oportunidad na regular na mamibi sa mga pagtiripon para sa paglilingkod sa langtad. Pag-abot nin panahon, mas may kumpiyansa na ako.”

15. Paano ipinahayag ni Pablo an saiyang pag-apresyar sa mga tugang?

¹⁵ Kun may naririsa kitang marahay na kuwalidad sa sarong Kristiyano, sinasabi ta daw kun gurano ta iyan pinapahalagahan? Sa Roma kapitulo 16, inapresyar ni Pablo an labing 20 kapagtubod na napamahal sa saiya huli sa mga kuwalidad ninda. (Roma 16:3-7, 13) Halimbawa, sinabi ni Pablo na si Andronico asin Junia mas haloy nang naglilingkod ki Cristo kisa sa saiya, na idinuduon an saindang Kristiyanong pakatagal. Inumaw man ni Pablo an ina ni Rufo, tibaad huli sa mamumuton na pag-ataman kaini sa saiya kan inot.

16. Ano an puwedeng magin resulta kun tinatawan nin komendasyon an mga hoben?

¹⁶ Puwedeng magkaigwa nin marahay na mga resulta kun nagtatao kita nin sinserong komendasyon. Hilingon ta an halimbawa ni Rico, sarong aki na taga Pransia, na nangluya an buot huling kontra sa pagpabawtismo niya an saiyang ama, na bako niyang kapagtubod. Inisip ni Rico na kaipuhan niyang maghalat sagkod na siya nasa legal na edad na, tanganing lubos na makapaglingkod ki Jehova. Namumundo man siya ta tinutuya-tuya siya sa eskuwelahan. Si Frédéric, sarong elder na pinakiulayan na iyo an magtukdo sa saiya sa Bibliya, nagsabi: “Kinomendaran ko si Rico huling ipinapahiling kan arog kaiyan na pagtumang na siya talagang may kusog nin buot na ipahiling an saiyang pagtubod.” An komendasyon na ini nagpakusog sa determinasyon ni Rico na magdanay na marahay na halimbawa asin nakatabang sa saiya na magin mas dayupot sa saiyang ama. Nabawtismuhan si Rico kan siya 12 anyos.

17. (a) Paano ta matatabangan an satong mga brother na umuswag? (b) Paano nagpahiling nin personal na interes an sarong misyonero sa hoben na mga brother, asin ano an nagin resulta?

¹⁷ Sa kada pag-apresyar ta sa mahusay na paggibo ninda nin mga asignasyon o kaumaw-umaw na mga paghihinguwa, namomotibar ta an satong  mga kapagtubod na mas lubos na paglingkudan si Jehova. Sinabi ni Sylvie, * na dakul na taon nang naglilingkod sa Bethel sa Pransia, na puwede man magtao nin komendasyon an mga sister sa mga brother. Sinabi niya na naaapresyar nin mga babayi an lain-lain na detalye o mga paghihinguwa na naoobserbaran ninda. Paagi kaini, an saindang “mga tataramon nin pagparigon sa buot makakadagdag sa puwedeng sabihon kan eksperyensiyadong mga brother.” Sinabi pa niya: “Para sako, obligasyon an pagtao nin komendasyon.” (Tal. 3:27) Natabangan ni Jérôme, sarong misyonero sa French Guiana, an dakul na hoben na lalaki na makuwalipikar na magin mga misyonero. Sinabi niya: “Narisa ko na pag inuumaw ko an hoben na mga brother sa espesipikong mga nagibo ninda sa ministeryo o sa pagtao nin pinag-isipan na marhay na mga komento, nadudugangan an saindang kumpiyansa. Bilang resulta, urog pang nag-uuswag an saindang mga abilidad.”

18. Taano ta kapaki-pakinabang kun ibabali ta an hoben na mga brother sa nagkapirang gibuhon?

¹⁸ Mapapahiro ta man an mga kapagtubod na umuswag sa espirituwal kun ibabali ta sinda sa nagkapirang gibuhon. Puwedeng pakiulayan nin sarong elder an sarong hoben na brother na matibay sa kompyuter na mag-print nin mga impormasyon sa jw.org na makakaparigon sa buot nin mga may edad na, na mayong kompyuter. O kun igwa kang lilinigon o hihirahayon sa Kingdom Hall, taano ta dai agdahon an sarong brother na ibanan ka? An siring na mga inisyatiba matao nin oportunidad na maobserbaran an mga hoben, makatao nin komendasyon, asin mahiling an mga resulta.—Tal. 15:23.

19, 20. Taano ta maninigo tang tabangan an iba na umuswag?

¹⁹ Kan nombrahan ni Jehova si Josue na panginutan an mga Israelita, pinagbutan man Niya si Moises na ‘parigunon’ asin ‘pakusugon’ si Josue. (Basahon an Deuteronomio 3:28.) Padakul nin padakul an mga tawong nakikiiba sa sato sa mga kongregasyon sa bilog na kinaban. An gabos na eksperyensiyadong Kristiyano—bako sanang mga elder—puwedeng makatabang sa hoben na mga brother asin mga baguhan na lubos na mapauswag an saindang potensiyal. Huli kaini, padakul nin padakul an malaog sa bilog na panahon na ministeryo, asin padakul man nin padakul an magigin kuwalipikadong ‘magtukdo sa iba.’—2 Tim. 2:2.

²⁰ Baga man yaon kita sa sarong haloy nang kongregasyon o sa sarong sadit na grupo, mag-andam kita para sa pangangaipo kan organisasyon sa puturo. An sarong mahalagang lakdang iyo na arugon si Jehova, na pirming hinahanap an marahay na mga kuwalidad kan saiyang mga lingkod.