NAGDAKULA si Katherine sa Estados Unidos asin kan siya 16 anyos, nabawtismuhan siya bilang sarong Saksi ni Jehova. Mahiguson siya sa ministeryo pero mayong gayong nag-aako sa mensahe kan Kahadian sa lugar na hinuhulitan niya. Sabi niya: “May nababasa akong mga eksperyensiya nin mga tawong namibi sa Diyos na lugod may suguon Siyang matabang sainda na mamidbid Siya. Gustong-gusto kong makahanap nin arog kaiyan na tawo, pero nungkang nangyari iyan.”

Pakalihis nin dakul na taon na paghuhulit sa iyo man sanang teritoryo, inisip ni Katherine na bumalyo sa lugar na mas mahimati an mga tawo sa mensahe kan Kahadian. Pero, iniisip-isip niya kun makakaya niya iyan. Sarong beses pa sana siyang naparayo sa pamilya niya. Dawa duwang semana sana idto, aroaldaw siyang napupungaw. Pero, mas makusog an pagmawot niyang mamatian an kagaya-gayahan sa pagtabang sa mga naghahanap ki Jehova. Pakapili nin nagkapirang lugar kun sain siya puwedeng magboluntaryo, nagsurat siya sa sangang opisina sa Guam asin itinao sa saiya an mga impormasyon na kaipuhan niya. Kan Hulyo 2007, sa edad na 26, buminalyo si Katherine sa Saipan, sarong isla sa Kadagatan nin Pasipiko na mga 10,000 kilometros an rayo sa sainda. Ano an nagin resulta kan paglipat niya?

Dai nahaloy pag-abot niya sa bagong kongregasyon, nanumpungan ni Katherine si Doris, sarong babayi na mga 45 anyos, asin nag-ako ini nin pag-adal sa Bibliya. Pagkatapos nindang mapag-adalan an inot na tulong kapitulo kan librong Itinotokdo kan Biblia, nahadit si Katherine. “Marahay na estudyante si Doris, kaya habo kong mapasala sa pagtukdo saiya,” an sabi niya. “Dai pa lamang ako nagkaigwa nin regular na Bible study. Pagmati ko kaipuhan ni Doris nin mas eksperyensiyadong matukdo saiya, tibaad saro na kaedad niya.” Namibi si Katherine ki Jehova na tabangan siyang makahanap nin angay na sister na matukdo nin Bibliya ki Doris. Dangan, nagdesisyon siyang sabihon ki Doris na iba na an ma-Bible study sa saiya.

“Bago ko pa iyan masabi saiya,” an istorya ni Katherine, “sinabi sako ni Doris na may gusto siyang ipakipag-ulay na problema. Pagkatapos kong madangog iyan, sinabi ko saiya kun paano ako tinabangan ni Jehova na maatubang an kaparehong sitwasyon. Pinasalamatan niya ako.” Dangan sinabi ni Doris ki Katherine: “Ginagamit ka ni Jehova tanganing tabangan ako. Kan inot na magduman ka sa harong ko, pirang oras na akong nagbabasa nin Bibliya. Naghihibi ako mantang nakikiulay sa Diyos na lugod may suguon siyang  matabang sako na masabutan an Bibliya. Tapos, nagtuktok ka sa pinto. Sinimbag nanggad ni Jehova an pamibi ko!” Napapaluha si Katherine kan iniistorya niya iyan. Sabi niya: “An mga sinabi ni Doris an simbag sa pamibi ko. Ipinahiling sako ni Jehova na kaya kong ipagpadagos an pag-study saiya.”

Nabawtismuhan si Doris kan 2010, asin ngunyan nagkapira na man an saiyang Bible study. Sinabi ni Katherine: “Nagpapasalamat nanggad ako ta nagkatotoo an haluyon ko nang mawot na makatabang sa sarong sinserong tawo na magin lingkod ni Jehova!” Ngunyan, si Katherine maugmang naglilingkod bilang espesyal payunir sa Kosrae, sarong isla sa Pasipiko.

Labing sanggatos na tugang hali sa ibang nasyon (na an edad puon 19 sagkod 79) an naglilingkod sa lugar na mas dakula an pangangaipo sa Micronesia. An namamatian kan maigot na mga parahayag na ini malinaw na ipinahayag ni Erica, na buminalyo sa Guam kan 2006 sa edad na 19. Sabi niya: “Maugmahon magpayunir sa teritoryo na an mga tawo paha sa katotoohan. Nagpapasalamat akong marhay na tinabangan ako ni Jehova na maglaog sa arog kaining paglilingkod. Ini an pinakamarahay na paagi nin pamumuhay!” Ngunyan, si Erica magaya-gayang naglilingkod bilang espesyal payunir sa Ebeye sa Marshall Islands. Siyempre, may mga kadipisilan man an paglilingkod sa ibang nasyon. Pag-ulayan ta an tulo sa mga iyan asin hilingon kun paano iyan inatubang kan mga buminalyo sa Micronesia.

Istilo nin pamumuhay. Pag-abot kan 22 anyos na si Simon sa isla nin Palau kan 2007, nahiling niya tulos na dikit sana an magaganar niya diyan kun ikukumparar sa dati niyang ginaganar sa pinaghalian niyang nasyon, an Inglatera. “Nanudan ko na dai magparabakal nin kun anong magustuhan ko. Ngunyan, pinipili kong marhay an kakanon na binabakal ko, saka naghahanap ako nin mas baratong mga barakalon. Pag may gamit akong naraot, naghahanap ako nin segunda manong mga piyesa asin nin matabang sako na hirahayon iyan.” Ano an nagin epekto sa saiya kan pangangaipong magin simple an pamumuhay? Sinabi ni Simon: “Nakatabang iyan sako na maaraman kun ano an talagang kaipuhan sa buhay asin kun paano mabuhay na dikit sana an gamit saka kuwarta. Dakul na beses ko talagang nahiling an pag-ataman sako ni Jehova. Sa pitong taon na paglilingkod ko digdi, pirmi akong may kakanon asin lugar na matuturugan.” Iyo, sinusuportaran ni Jehova an mga namumuhay nin simple huling gusto nindang hanapon nguna an Kahadian.—Mat. 6:32, 33.

Kapungawan. Sinabi ni Erica: “Dayupot akong marhay sa pamilya ko, kaya nahadit ako na tibaad makaapektar sa sakong ministeryo an kapungawan ko.” Ano an ginibo niya tanganing andamon an saiyang sadiri? “Bago magbalyo, binasa ko an mga artikulo sa Torrengbantayan manungod sa kapungawan. Talagang inandam kaiyan an puso ko tanganing makaya ko iyan. Sa sarong artikulo, inasegurar nin sarong ina an aki niyang babayi na aatamanon ini ni Jehova sa pagsabing, ‘Mas maaataman kang marhay ni Jehova kisa magigibo ko.’ Talagang napakusog an buot ko kan mga tataramon na iyan.” Si Hannah asin an agom niyang si Patrick naglilingkod  sa Majuro, sa Marshall Islands. Nakakaya ni Hannah an kapungawan paagi sa pagpokus kan saiyang atensiyon sa mga tugang sa kongregasyon. Sabi niya: “Pirmi akong nagpapasalamat ki Jehova sa satong pambilog na kinaban na kasararuan nin magturugang huling pamilya ko man sinda. Kun mayo an mamumuton nindang suporta, dai lamang gayod ako nakapaglingkod sa lugar na mas dakula an pangangaipo.”

Pakikikatuod. “Pag-abot mo sa bagong nasyon, talagang ibang-iba an gabos,” an sabi ni Simon. “Kun minsan, nami-miss kong magpangisi na talagang nasasabutan kan iba.” Sinabi ni Erica: “Kan inot, pagmati ko naiitsa-puwera ako, pero nakatabang iyan sako na isip-isipon kun ano an motibo ko sa pagbalyo. Nagbalyo ako bako para sa sadiri kong kapakinabangan kundi tanganing gumibo nin urog pa para ki Jehova.” Sinabi pa niya: “Pag-abot nin panahon, nagkaigwa ako nin marahay na mga amigo asin amiga, na talagang pinapahalagahan kong marhay.” Nagmaigot na marhay si Simon na makanuod kan lengguwaheng Palauan, na nagin dahilan para ‘makapahiwas’ siya sa mga tugang duman. (2 Cor. 6:13) Huli sa mga paghihinguwa niyang manudan an lengguwahe, napamahal siya sa mga tugang. Iyo, kun an mga bagong abot asin an mga tugang sa kongregasyon magkairibang naglilingkod, pareho sindang nagkakamit nin balos na iyo an dayupot na pakikikatuod sa laog kan kongregasyon. Ano pang ibang balos an inaako kan mga gikan sa buot na naglilingkod sa lugar na mas dakula an pangangaipo?

Si apostol Pablo nagsabi: “An nagtatanom nin dakul, dakul man an aanihon.” (2 Cor. 9:6, An Marahay na Bareta Biblia) An prinsipyong ini aplikado nanggad sa mga nagpapahiwas kan saindang ministeryo. Ano an ‘dakul na inaani’ ninda sa Micronesia?

Sa Micronesia, dakul pa an oportunidad na makapuon nin pag-adal sa Bibliya asin mahiling mismo an pag-uswag sa espirituwal kan mga nakakanuod asin nag-aaplikar kan katotoohan hali sa Tataramon nin Diyos. Si Patrick asin Hannah naghuhulit man sa Angaur, sarong sadit na isla na may 320 residente. Pagkatapos maghulit duman nin duwang bulan, may nanumpungan sindang sarong nagsosolong ina. Tulos siyang nagpa-Bible study, nag-ako kan katotoohan, asin naggibo nin dakulang mga pagbabago sa saiyang buhay. Sinabi ni Hannah: “Pagkatapos kan kada pag-adal mi, mantang papuli kaming nagbibisikleta kan agom ko, mahilingan kami asin masabi: ‘Salamat Jehova!’” Idinagdag pa ni Hannah: “Aram kong dadagkahon ni Jehova sa saiya an babaying ini sa ano man na paagi, pero huli sa paglilingkod sa lugar na mas dakula an pangangaipo, nahanap asin natabangan mi an arog-karnerong ini na mamidbid si Jehova. Ini an saro sa pinakanakakaugmang mga eksperyensiya mi sa buhay!” Arog kan sinabi ni Erica, “pag natatabangan mo an sarong tawo na mamidbid si Jehova, mag-aani ka nin dai mailadawan na kagaya-gayahan!”

Sa dakul na lugar, dakul pa an kaipuhan na parahulit kan Kahadian. Saro ka daw sa puwedeng magbalyo sa lugar na nangangaipo nin tabang? Ipamibi ki Jehova na pakusugon an pagmawot mong pahiwason an saimong ministeryo. Ipakipag-ulay iyan sa mga elder sa kongregasyon, sa paraataman nin sirkito, o sa mga nagkapribilehiyong maglingkod sa lugar na nangangaipo nin tabang. Kun nagpupuon ka nang magplano, magsurat sa sangang opisina na nag-aasikaso sa teritoryong gusto mong paglingkudan, asin maghagad nin dugang pang impormasyon. * Tibaad puwede ka man magin saro sa rinibong tugang—hoben asin gurang, may agom o mayo—na gikan sa buot na iprinesentar an saindang sadiri asin nagin magaya-gaya huli sa ‘pag-ani nin dakul.’