GRABE an pagtangis ni Pedro pagkatapos niyang paindahan si Jesus. Dawa kaipuhan pa kan apostol na maghinguwang mapakusog giraray an saiyang espirituwalidad, gusto ni Jesus na gamiton siya sa pagtabang sa iba. Kaya, sinabi ni Jesus sa saiya: ‘Kun ika makabalik na, pariguna an saimong mga tugang.’ (Luc. 22:32, 54-62) Si Pedro nagin saro sa mga harigi kan Kristiyanong kongregasyon kan inot na siglo. (Gal. 2:9) Kaagid kaiyan, an sarong brother na dating naglilingkod bilang elder puwedeng makabalik sa pribilehiyong iyan asin magin maugma sa pagtabang na mapakusog an espirituwalidad kan mga kapagtubod.

May nagkapira na nahali sa paglilingkod bilang paraataman, asin tibaad namatian nindang bigo sinda. Si Julio, * na naglingkod bilang elder sa South America nin labing 20 taon, nagsabi: “Dakulang parte kan buhay ko an pag-andam nin mga pahayag, pagsungko sa mga tugang, asin pagpastor sa mga kakongregasyon! Bigla na sanang nawara iyan kaya pagmati ko may kulang sa buhay ko. Makulugon nanggad na panahon idto!” Ngunyan, elder na giraray si Julio.

Isinurat kan disipulong si Santiago: ‘Mga tugang ko, ikaugma nindo kun magkaigwa kamo nin manlain-lain na pagbalo.’ (Sant. 1:2, An Marahay na Bareta Biblia) An sinasabi ni Santiago iyo an mga pagbalo huli sa persekusyon asin huli sa satong pagkabakong perpekto. Sinambit niya an makasadiring mga kamawutan, pagpahiling nin paboritismo, asin iba pa. (Sant. 1:14; 2:1; 4:1, 2, 11) Kun dinidisiplina kita ni Jehova, tibaad makulog iyan sa sato. (Heb. 12:11) Pero an siring na mga pagbalo dai dapat makahali kan satong kaugmahan.

Dawa kun nahali kita sa pribilehiyo sa kongregasyon, may oportunidad pa man giraray kitang siyasaton an satong pagtubod asin ipahiling an pagkamuot ta ki Jehova. Puwede man niyatong hurop-hurupon  kun taano ta naglingkod kita. Para daw iyan sa satong pakinabang, o napahiro daw kitang abuton an siring na pribilehiyo huling namumutan ta an Diyos asin nagtutubod kitang sadiri niya an kongregasyon saka maninigo ining atamanon? (Gui. 20:28-30) Kun an dating mga elder padagos na maugmang naglilingkod, pinapatunayan ninda sa gabos, pati na ki Satanas, na tunay an pagkamuot ninda ki Jehova.

Kan madisiplina si Hading David huling nakakomiter siya nin seryosong mga kasalan, inako niya an pagsagwi asin pinatawad siya. Nag-awit si David: “Maugma an saro na an paglapas pinatawad, na an kasalan tinahuban. Maugma an tawo na dai inaakusaran ni Jehova nin pagkakasala, na sa saiyang espiritu mayo nin pandadaya.” (Sal. 32:1, 2, NW) Nakatabang an disiplina na madalisay si David asin magin mas marahay na pastor kan banwaan nin Diyos.

Sa parati, an mga brother na nakabalik sa pagigin elder nagigin mas marahay na mga pastor kisa kan dati. “Mas aram ko na kun paano tatabangan an mga nakakagibo nin sala,” an sabi nin sarong elder. Saro pang elder an nagsabi: “Mas pinapahalagahan ko na an pribilehiyo kong maglingkod sa mga tugang.”

‘Si Jehova dai magpaparahanap nin sala,’ an surat kan salmista. (Sal. 103:9, NW) Kaya dai ta maninigong isipon na dai na giraray pagtitiwalaan nin Diyos an saro na nakagibo nin magabat na pagkakasala. “Grabe an pagkadisganar ko sa nagin pagkukulang ko,” an sabi ni Ricardo, na nawaran nin mga pribilehiyo pagkatapos maglingkod bilang elder sa laog nin dakul na taon. “Sa halawig na panahon, pagmati ko mayo akong kakayahan na paglingkudan an mga tugang kaya dai ako tulos buminalik sa paglilingkod bilang paraataman. Nawaran ako nin kumpiyansa na kaya kong patunayan giraray na mapagtitiwalaan ako. Pero huling nauugma akong tumabang sa iba, nakakapagkondukta ako nin mga pag-adal sa Bibliya, napapakusog ko an mga tugang sa Kingdom Hall, asin nakakaibanan ko sinda sa ministeryo. Nakatabang iyan sa sako na magkaigwa giraray nin kumpiyansa, asin ngunyan nakabalik na ako sa pagigin elder.”

An pagtanom nin raot nin buot puwedeng makaulang sa saro na maglingkod giraray bilang elder. Mas marahay nanggad na arugon an lingkod ni Jehova na  si David, na kinaipuhan na dumulag sa nauuring si Hading Saul! Nagsayuma si David na bumalos ki Saul, dawa may mga oportunidad siyang gibuhon iyan. (1 Sam. 24:4-7; 26:8-12) Kan magadan si Saul sa ralaban, nagmundo si David sa pagkagadan kaini, na inapod pa ngani si Saul asin an aki kaining si Jonatan na mga ‘namumutan asin mahal.’ (2 Sam. 1:21-23) Dai nagtanom nin raot nin buot si David.

Kun naghihinanakit ka huling pagmati mo biktima ka nin dai pagkasinabutan o inhustisya, dai pagtugutan na iyo na sana iyan an pagparaisipon mo. Halimbawa, kan mawara an pribilehiyo ni William pagkatapos nin mga 30 taon na paglilingkod bilang elder sa Britania, naghinanakit siya sa nagkapirang elder. Ano an nakatabang ki William na magkaigwa nin timbang na pagmansay? “Napakusog ako sa pagbasa kan libro nin Job,” an sabi niya. “Kun natabangan ni Jehova si Job na makipagkatuninungan sa tulo kaining kaiba-iba, lalo nang matatabangan Niya akong makipagkatuninungan sa mga elder!”—Job 42:7-9.

Kun pinili mong butasan an pagpapastor sa aripumpon nin Diyos, marahay na pag-isipan kun taano ta iyan an nagin desisyon mo. Nagabatan ka daw sa personal na mga problema? Nagin mas importante daw sa buhay mo an ibang bagay? Nangluya daw an buot mo huli sa mga kaluyahan nin iba? Ano man an dahilan, girumdumon na mas dakul an naitatabang mo sa mga tugang kan ika elder pa. Napakusog sinda kan mga pahayag mo, naparigon sinda kan halimbawa mo, asin an pagsungko mo sa pagpastor nakatabang na matagalan ninda an mga pagbalo. An paglilingkod mo bilang maimbod na elder nakapaugma sa puso ni Jehova, asin sa saimo man.—Tal. 27:11.

Tinatabangan ni Jehova an mga brother na maibalik an kaugmahan asin an kamawutan nindang manginot sa kongregasyon. Kun ika naghali o hinali sa pagigin elder, puwede ka giraray ‘maghinguwang magin paraataman.’ (1 Tim. 3:1, NW) Si Pablo ‘dai nag-untok nin pagpamibi’ na an mga taga Colosas magkaigwa nin tamang kaaraman sa kabutan nin Diyos tanganing sinda ‘makalakaw nin angay’ ki Jehova asin lubos na makapaugma sa Saiya. (Col. 1:9, 10) Kun magkapribilehiyo kang magin elder giraray, hagadon ki Jehova na tawan ka nin kusog asin tabangan kang magin mapasensiya saka maugma. Sa huring mga aldaw na ini, kaipuhan kan mga lingkod nin Diyos an espirituwal na suporta kan mamumuton na mga pastor. Nasa kamugtakan asin andam ka daw na pakusugon an saimong mga tugang?