1, 2. Paano kinakaulay ni Jehova an saiyang mga lingkod?

SA BILOG na kasaysayan kan Bibliya, an mga indibidwal nag-ako nin paggiya ni Jehova sa lain-lain na paagi. Kinaulay nin Diyos an nagkapira paagi sa mga anghel o sa mga bisyon o pangaturugan tanganing ihayag sa sainda an mangyayari sa maabot na panahon. Tinawan man sinda ni Jehova nin espesipikong mga asignasyon. (Bil. 7:89; Ezeq. 1:1; Dan. 2:19) An iba nag-ako nin instruksiyon paagi sa mga tawong representante ni Jehova na naglilingkod sa daganon na kabtang kan saiyang organisasyon. Sa ano man na paagi inako kan banwaan ni Jehova an saiyang tataramon, an mga nagsunod kan saiyang mga instruksiyon binendisyunan.

² Ngunyan, ginigiyahan ni Jehova an saiyang mga lingkod paagi kan Bibliya, saiyang banal na espiritu, asin kongregasyon. (Gui. 9:31; 15:28; 2 Tim. 3:16, 17) Malinaw na marhay an paggiya niya sa sato na garo man sana ‘an satong talinga nakakadangog sa satong likudan nin tataramon na nagtataram: “Iyo ini an dalan, lakaw kamo diyan.”’ (Isa. 30:21) Mantang ginigiyahan ni Jesus an kongregasyon paagi sa “maimbod asin mapagmansay na uripon,” garo man sana ipinapadangog niya sa sato an tingog ni Jehova. (Mat. 24:45, NW) Kaipuhan tang seryosuhon an paggiya asin instruksiyon na ini, huling makakamit sana niyato an buhay na daing katapusan kun magigin makinuyog kita.—Heb. 5:9.

3. Ano an puwedeng makaulang sa pagkuyog niyato sa paggiya ni Jehova? (Hilingon an ritrato sa kapinunan kan artikulo.)

 ³ Desidido si Satanas na Diyablo na irayo an satong atensiyon sa nagliligtas-buhay na paggiya ni Jehova. Apuwera diyan, an sato mismong ‘madayang puso’ puwedeng makaulang sa lubos niyatong pagkuyog sa paggiya ni Jehova. (Jer. 17:9) Kaya, pag-ulayan ta kun paano madadaog an mga ulang na nagpapadipisil sa sato na madangog an tingog nin Diyos. Pag-ulayan man niyato kun paanong an dayupot na komunikasyon ki Jehova maprotektar sa relasyon ta sa saiya ano man an satong kamugtakan.

4. Paano pinagmamaigutan ni Satanas na impluwensiyahan an pag-iisip nin mga tawo?

⁴ Pinagmamaigutan ni Satanas na impluwensiyahan an pag-iisip nin mga tawo paagi sa salang impormasyon asin mapandayang propaganda. (Basahon an 1 Juan 5:19.) Apuwera sa inimprentang mga babasahon, lakop sa kinaban—pati sa hararayong lugar—an mga brodkast sa radyo, TV, asin Internet. Dawa ngani may makukuang interesanteng mga bagay sa mga iyan, sa parati sinusuportaran kaiyan an paggawi asin mga pamantayan na kontra sa mga pamantayan ni Jehova. (Jer. 2:13) Halimbawa, inaako na sa media asin industriya nin aling-alingan an pag-aguman nin magkasekso, asin dakul na tawo an naniniwala na sobra man kaistrikto an sinasabi kan Bibliya manungod sa homoseksuwalidad.—1 Cor. 6:9, 10.

5. Paano ta malilikayan na maanod kan propaganda ni Satanas?

⁵ Paano malilikayan kan mga namumuot sa katanusan nin Diyos na maanod kan garo bahang propaganda ni Satanas ngunyan? Paano ninda maaaraman kun ano an tama asin sala? Paagi sa danay na ‘pag-utob kan tataramon nin Diyos’! (Sal. 119:9) Yaon sa nasusurat na Tataramon nin Diyos an mahalagang marhay na paggiya na makakatabang sa sato na mahiling an kalainan kan totoong impormasyon sa mapandayang propaganda. (Tal. 23:23) Kinotar ni Jesus an Kasuratan kan sabihon niyang ‘an tawo mabubuhay sa gabos na tataramon na minaluwas sa nguso ni Jehova.’ (Mat. 4:4) Kaipuhan niyatong manudan kun paano iaaplikar sa satong buhay an mga prinsipyo sa Bibliya. Halimbawa, haloy pa bago naisurat ni Moises an ley ni Jehova tumang sa pagsambay, aram na kan hoben na si Jose na an siring na paggawi kasalan sa Diyos. Kan akiton siya kan agom ni Potifar na gumibo nin sala, dai man lamang niya inisip na suwayon si Jehova. (Basahon an Genesis 39:7-9.) Dawa pauruutro siyang inaakit kaini, mas pinili ni Jose na magdangog sa tingog nin Diyos. Tanganing mahiling an kalainan kan tama asin sala, mahalagang marhay na dangugon an tingog ni Jehova asin dai pagdangugon an daing untok na ribok kan propaganda ni Satanas.

6, 7. Ano an dapat tang gibuhon tanganing malikayan an maraot na mga sadol ni Satanas?

⁶ Pano-pano an kinaban nin nagkokorontrahan na mga katukduan asin doktrina sa relihiyon kaya iniisip nin dakul na sayang sana an paghanap sa totoong relihiyon. Pero, nagtatao si Jehova nin malinaw na paggiya sa mga andam na magdangog kan katotoohan. Dapat kitang magdesisyon kun kiisay kita madangog. Huling haros imposibleng dangugon an duwang magkasabay na tingog, kaipuhan tang ‘midbidon an tingog’ ni Jesus asin magdangog sa saiya. Siya an ninombrahan ni Jehova  na mangataman sa Saiyang mga karnero.—Basahon an Juan 10:3-5.

⁷ ‘Mag-ingat kamo kan saindong nadadangog,’ an sabi ni Jesus. (Mar. 4:24) Malinaw asin tama an konseho ni Jehova, pero dapat tang dangugon iyan asin tawan nin atensiyon paagi sa pag-andam kan satong puso sa pag-ako kaiyan. Kun bako kitang maingat tibaad an maraot na sadol ni Satanas an dangugon niyato imbes na an mamumuton na konseho nin Diyos. Dai nuarin man pagtugutan na kontrulon ka kan kinabanon na mga musika, video, programa sa TV, libro, kairiba-iba, edukador, o kan mga eksperto daa.—Col. 2:8.

8. (a) Paano kita puwedeng magin madaling mabiktima ni Satanas huli kan satong puso? (b) Ano an puwedeng mangyari sa sato kun binabaliwala ta an mga sintomas na may diperensiya an satong puso?

⁸ Aram ni Satanas na igwa kita nin makasalan na mga tendensiya, asin pinagmamaigutan niyang sutsutan kita na paniguan iyan. Kun pinupuntirya kita ni Satanas sa paaging ini, nagigin masakiton nanggad na papagdanayon an satong integridad. (Juan 8:44-47) Paano niyato posibleng mapangganahan an angat na ini? Konsideraron an sarong tawo na nawili sa temporaryong kaugmahan asin nakakomiter nin kasalan na dai niya lamang hunaon na magigibo niya. (Roma 7:15) Taano ta nangyari iyan? Posibleng marhay na luway-luway na nagluya an pagdangog niya sa tingog ni Jehova. Magsalang dai niya nariparo an mga sintomas na may diperensiya an saiyang puso o pinili niyang baliwalaon iyan. Halimbawa, tibaad dai na siya namimibi, dai nang gayo nakikikabtang sa ministeryo, o nagpapalta na sa mga pagtiripon. Sa kahuri-hurihi, nagpadaog siya sa saiyang pagmawot, asin ginibo an aram niyang sala. Malilikayan ta an kapahamakan na ini kun pirmi kitang alerto sa ano man na sintomas asin kun tulos-tulos tang itatanos an mga bagay-bagay. Saro pa, kun dinadangog ta an tingog ni Jehova, dai ta iintindihon an ano man na apostatang mga ideya.—Tal. 11:9.

9. Taano ta mahalagang marhay na amay na madiskubre an makasalan na mga tendensiya?

⁹ Puwedeng mailigtas an buhay nin sarong tawo kun amay na madidiskubre an saiyang hilang. Kaagid kaiyan, makakalikay kita sa grabeng kapahamakan kun maaaraman ta tulos an mga tendensiya na puwedeng magdara sato sa sugot. Pagkadiskubre ta tulos kan mga tendensiyang iyan, sarong kadunungan na humiro tulos-tulos bago pa kita ‘mabihag ni Satanas sa pagsunod kan saiyang kabutan.’ (2 Tim. 2:26) Ano an maninigo tang gibuhon kun marisa niyato na an satong pag-iisip asin pagmawot luway-luway nang nagrarayo sa mga kahagadan ni Jehova sa sato? Dai mag-atrasong bumalik sa saiya na may kapakumbabaan, buksan an satong mga talinga sa saiyang konseho, asin sunudon niyato iyan nin bilog na puso. (Isa. 44:22) Dapat tang tandaan na an salang desisyon puwedeng magkaigwa nin grabeng danyos sa sato, na dawa nakabalik na kita ki Jehova tibaad kaipuhan tang tiuson an mga resulta kaiyan sa  sistemang ini nin mga bagay. Mas marahay nanggad na likayan na rumayo ki Jehova paagi sa paghiro tulos tanganing dai makagibo nin seryosong sala!

10, 11. (a) Paano ta maririsa na mapalangkaw an sarong tawo? (b) Anong leksiyon an manunudan ta sa pagrebelde ni Kora, Datan, asin Abiram?

¹⁰ Dapat tang tandaan na puwede kitang irayo kan satong puso ki Jehova. Makusugon an impluwensiya sa sato kan makasalan na mga tendensiya niyato! Kuanon tang halimbawa an kapalangkawan asin kahanaban. Isip-isipon kun paanong an mga ugaling ini puwedeng makaulang sa pagdangog niyato sa tingog ni Jehova asin magdara sa sato sa kapahamakan. An mapalangkaw na tawo halangkawon an hiling sa sadiri niya. Tibaad iniisip niya na may deretso siyang gibuhon an ano man na gusto niya asin dai siya puwedeng sabihan nin siisay man kun ano an dapat niyang gibuhon. Kaya, tibaad iniisip niya na dai niya kaipuhan na sunudon an instruksiyon asin konseho kan mga kapwa Kristiyano, elder, o dawa kan organisasyon nin Diyos. Para sa arog kaiyan na tawo, maluyahon na an tingog ni Jehova.

¹¹ Kan nagbabaklay sa kaawagan an mga Israelita, nagrebelde si Kora, Datan, asin Abiram sa awtoridad ni Moises asin Aaron. Huli sa kapalangkawan, naggibo an mga rebelde nin sadiri nindang mga areglo sa pagsamba ki Jehova. Ano an ginibo ni Jehova? Ginadan niya sinda. (Bil. 26:8-10) Mahalagang marhay na leksiyon an itinutukdo sa sato kan kasaysayan na ini! An pagrebelde ki Jehova maresulta sa grabeng kapahamakan. Tandaan ta man na ‘an kapaabaw-abawan naiinot sa pagkalaglag.’—Tal. 16:18; Isa. 13:11.

12, 13. (a) Magtao nin halimbawa kun paano puwedeng magresulta sa grabeng kapahamakan an kahanaban. (b) Ipaliwanag kun paano puwedeng maggrabe an kahanaban kun dai iyan pupugulan.

¹² Pag-ulayan ta man an dapit sa kahanaban. An mahanab na tawo sa parati pangahas asin minagawi nin bakong tama. Pagkatapos maumayan an leproso kan hepe kan hukbo nin Siria na si Naaman, nag-alok siya nin mga regalo ki propeta Eliseo pero dai iyan inako kan propeta. Pero, minawot kan suruguon ni Eliseo na si Gehazi an mga regalong iyan. Sinabi ni Gehazi sa sadiri niya: ‘Nabubuhay si Jehova, madalagan ako sa hurihan ni Naaman, asin makua ako sa saiya minsan ano lamang na bagay.’ Mayong aram si Eliseo kan linapag ni Gehazi si Naaman asin kan magputik ini tanganing maghagad nin ‘sarong talentong pirak asin duwang bubulusan,’ o bado. Anong nangyari sa mahanab na si Gehazi? Nagbalyo sa saiya an leproso ni Naaman!—2 Ha. 5:20-27.

¹³ An kahanaban puwedeng magpuon sa simpleng pagmawot, pero kun dai iyan pupugulan, tulos iyan na magrabe asin mangingibabaw sa saro. Ipinapahiling kan pagkasaysay kan Bibliya dapit ki Acan an puwersa kan kahanaban. Mangnuhon kun gurano karikas na naggrabe an kahanaban ni Acan. Sinabi niya: ‘Nakahiling ako duman sa mga tada-tada nin sarong lambong na sa taga Babilonya na marahay-rahay asin 200 na siklong pirak asin sarong kaputol na bulawan na timbang nin 50 siklo, na iyan naaraan ko asin kinua ko.’ Imbes na isikwal an salang pagmawot, may kahanaban na hinabon ni Acan an mga bagay na iyan asin itinago iyan sa saiyang tolda. Kan madiskubre an ginibo ni Acan, sinabi ni Josue na mapaabot si Jehova nin grabeng kapahamakan sa saiya. Kan mismong aldaw na idto, si Acan asin an pamilya niya ginapo sagkod na magadan. (Jos. 7:11, 21, 24, 25) Yaon pirmi an tendensiyang magin mahanab asin an peligrong madaog kita kaiyan. Kaya, padagos kitang ‘maglikay sa gabos na kaimutan,’ o kahanaban. (Luc. 12:15) An imoralidad sarong klase man nin kahanaban. Dawa ngani kun minsan tibaad minalaog sa satong isip an sala o imoral na mga bagay, mahalagang marhay na kontrulon niyato an satong isip asin dai pagtugutan an satong mga pagmawot na umabot sa punto na kita magkasala.—Basahon an Santiago 1:14, 15.

14. Ano an maninigo tang gibuhon kun naririsa niyatong may tendensiya kitang magin mapalangkaw asin mahanab?

¹⁴ Pareho puwedeng magresulta sa grabeng kapahamakan  an kapalangkawan asin kahanaban. Kun huhurop-hurupon ta an resulta nin salang paggawi, makakatabang iyan sa sato na dai pagtugutan an siring na mga tendensiya na makaulang sa pagdangog ta sa tingog ni Jehova. (Deut. 32:29) Sa Bibliya, sinasabi sa sato kan tunay na Diyos kun ano an tamang dalan asin an mga pakinabang man sa paglakaw diyan saka an mga resulta kun kita malihis diyan. Kun natetentaran kita kan satong puso na gumibo nin sarong bagay huli sa kapalangkawan o kahanaban, madunong nanggad na isip-isipon an mga kaaabtan kaiyan! Maninigo tang isipon kun paano an maraot na gibo makakaapektar sa sato, sa mga namumutan ta, asin nangurugna sa relasyon ta ki Jehova.

15. Ano an manunudan ta sa halimbawa nin pakikikomunikar ni Jesus ki Jehova?

¹⁵ Gusto ni Jehova an pinakamarahay para sa sato. (Sal. 1:1-3) Tinatawan niya kita nin bastanteng paggiya sa panahon mismo na kaipuhan ta iyan. (Basahon an Hebreo 4:16.) Dawa ngani perpekto si Jesus, nagdepende siya sa regular na pakikikomunikar ki Jehova, asin pirmi siyang namimibi. Sinuportaran asin giniyahan ni Jehova si Jesus sa makangangalas na mga paagi. Nagsugo si Jehova nin mga anghel tanganing paglingkudan si Jesus, nagtao kan Saiyang banal na espiritu tanganing tabangan ini, asin giniyahan ini sa pagpili kan 12 apostol. Nadangog an boses ni Jehova hali sa langit na nagpapahayag kan Saiyang pagsuportar asin pag-aprubar ki Jesus. (Mat. 3:17; 17:5; Mar. 1:12, 13; Luc. 6:12, 13; Juan 12:28) Arog ni Jesus, kaipuhan na biyo tang ipahayag an laog kan satong puso pag namimibi sa Diyos. (Sal. 62:7, 8; Heb. 5:7) Paagi sa pamibi, mapapagdanay ta an dayupot na komunikasyon ki Jehova asin makakapamuhay sa paagi na nagtataong onra sa saiya.

16. Paano niyato maaako an tabang ni Jehova tanganing madangog an tingog niya?

¹⁶ Minsan ngani itinatao ni Jehova an saiyang konseho, dai man niya pinipirit an siisay man na sunudon iyan. Kaipuhan tang hagadon an saiyang banal na espiritu, asin abunda niyang itatao iyan sa sato. (Basahon an Lucas 11:10-13.) Pero mahalagang marhay na magtao kita nin atensiyon kun paano kita nagdadangog. (Luc. 8:18) Halimbawa, sarong pagsagin-sagin kun mahagad kita nin tabang ki Jehova na makalikay sa imoralidad mantang padagos kitang naghihiling nin pornograpiya o nagdadalan nin imoral na mga pelikula. Tanganing matabangan kita ni Jehova, kaipuhan tang siyertuhon na yaon kita sa mga lugar o kamugtakan na yaon an banal na espiritu niya. Aram ta na yaon sa mga pagtiripon kan kongregasyon an saiyang espiritu. Dakul na lingkod ni Jehova an nakalikay sa kapahamakan huling nagdangog sinda ki Jehova sa mga pagtiripon. Bilang resulta, naaraman ninda an salang mga pagmawot sa puso ninda asin naitanos an saindang mga gibo.—Sal. 73:12-17; 143:10.

17. Taano ta peligrosong magsarig sa satong sadiri?

¹⁷ Isip-isipon si Hading David kan suanoy na Israel. Kan siya hoben pa, dinaog niya an higanteng Filisteo na si Goliat. Si David nagin sarong suldados, hadi, paraprotektar, asin naggibo man siya nin mga desisyon para sa nasyon nin Israel. Pero kan si David magsarig sa sadiri niya, dinaya siya kan puso niya asin nakakomiter nin seryosong kasalan kaiba si Bat-seba. Naggibo pa ngani siya nin paagi na magadan an agom ni Bat-seba na si Urias. Kan dinisiplina si David, mapakumbaba niyang inako an kasalan niya asin pinakarhay giraray an relasyon niya ki Jehova.—Sal. 51:4, 6, 10, 11.

18. Ano an makakatabang sa sato na padagos na magdangog sa tingog ni Jehova?

¹⁸ Dangugon ta an sadol sa 1 Corinto 10:12 asin dai magin sobra an kumpiyansa sa sadiri. Huling dai ta kayang ‘giyahan an satong lakad,’ sa huri madangog kita magsalang sa tingog ni Jehova o sa tingog kan Kaiwal niya. (Jer. 10:23, NW) Padagos lugod kitang mamibi, magsunod sa paggiya kan banal na espiritu, asin pirming magdangog nin maingat sa tingog ni Jehova.