NABUBUHAY kita sa pinakamasakit na panahon sa bilog na kasaysayan nin tawo. (2 Tim. 3:1-5) Aroaldaw na nababalo an satong pagkamuot ki Jehova asin an determinasyon tang mamuhay uyon sa matanos na mga pamantayan niya. Patiinot na nahiling ni Jesus an masakit na panahon na ini, asin siniyerto niya sa mga parasunod niya na maako sinda nin pamparigon na kinakaipuhan tanganing makatagal sinda sagkod sa katapusan. (Mat. 24:3, 13; 28:20) Tanganing pakusugon sinda, nagnombra siya nin maimbod na uripon tanganing magtao sa sainda nin espirituwal na “kakanon sa tamang panahon.”—Mat. 24:45, 46, NW.

Puon kan nombrahan an maimbod na uripon kan 1919, minilyon na ‘lingkod sa harong’ hali sa gabos na lengguwahe an tiniripon sa organisasyon nin Diyos asin pinapakakan sa espirituwal. (Mat. 24:14; Kap. 22:17) Pero, dai makukua sa gabos na lengguwahe an gabos na literatura, asin bako gabos may access sa mga publikasyon ta na nasa elektronikong format. Halimbawa, dakul an dai nakakahiling kan mga video asin nakakabasa kan mga artikulo na nasa jw.org sana. Nangangahulugan daw ini na kulang an nakukua nindang kakanon na kaipuhan ninda tanganing magdanay na makusog sa espirituwal? Tanganing makua an simbag, pag-isipan ta an apat na mahalagang hapot.

Kan tentaran ni Satanas si Jesus na gibuhon na tinapay an mga gapo, si Jesus nagsimbag: ‘An tawo dai mabubuhay sa tinapay sana, kundi sa gabos na tataramon na minaluwas sa nguso nin Diyos.’ (Mat. 4:3, 4) Nakasurat sa Bibliya an mga tataramon ni Jehova. (2 Ped. 1:20, 21) Kaya, an Bibliya an panginot na sangkap sa satong espirituwal na kakanon.—2 Tim. 3:16, 17.

Itrinadusir kan organisasyon ni Jehova an New World Translation of the Holy Scriptures, nin bilog o nin kabtang sana, sa labing 120 lengguwahe, asin dakul pang lengguwahe an idinadagdag kada taon. Apuwera sa traduksiyon na iyan, binilyon na kopya nin ibang bersiyon kan Bibliya an makukua nin bilog o nin kabtang sana sa rinibong lengguwahe. An makangangalas na nagibong iyan kauyon kan kabutan ni Jehova na ‘an gabos na tawo makaligtas asin makaabot sa pakasabot kan katotoohan.’ (1 Tim. 2:3, 4) Asin huling ‘dai nin linalang na dai nahahayag sa paghiling’ ni Jehova, makakasiyerto kita na irarani niya sa saiyang organisasyon an mga nakakamati kan saindang espirituwal na pangangaipo asin tatawan niya sinda nin espirituwal na kakanon.—Heb. 4:13; Mat. 5:3, 6; Juan 6:44; 10:14.

Tanganing magin makusog an pagtubod nin saro, urog pa sa pagbasa kan Bibliya an dapat niyang gibuhon. Dapat niyang masabutan an binabasa niya asin iaplikar an nanunudan niya. (Sant. 1:22-25) Aram kan kapon na Etiope kan inot na siglo an kahalagahan kaiyan. Binabasa niya an Tataramon nin Diyos kan haputon siya kan ebanghelisador na si Felipe: ‘Nasasabutan mo an binabasa mo?’ Nagsimbag an Etiope: ‘Paano ko ini masasabutan kun mayo man nin magpaliwanag sako?’ (Gibo 8:26-31, BPV) * Kaya tinabangan siya ni Felipe na magkaigwa nin tamang kaaraman sa Tataramon nin Diyos. Napahiro an Etiope sa nanudan niya kaya nagpabawtismo siya. (Gui. 8:32-38) Sa kaagid na paagi, natabangan kita kan mga publikasyon ta na magkaigwa nin tamang kaaraman kan katotoohan. Napahiro asin namotibar kita kaiyan na iaplikar an mga nanunudan ta.—Col. 1:9, 10.

Paagi sa mga publikasyon, itinatao sa mga lingkod ni Jehova an abundang suplay nin espirituwal na kakanon. (Isa. 65:13) Halimbawa, an Torrengbantayan, na makukua sa labing 210 na lengguwahe, nagpapaliwanag kan mga hula sa Bibliya, nagtatabang sa sato na masabutan an harararom na espirituwal na katotoohan, asin nagmomotibar sa sato na mamuhay kauyon kan mga prinsipyo sa Bibliya. An magasin na Awake!, na ipinupublikar sa mga 100 na lengguwahe, pinapahiwas an satong kaaraman manungod sa mga linalang ni Jehova asin ipinapahiling sa sato kun paano iaaplikar an praktikal na konseho kan Bibliya. (Tal. 3:21-23; Roma 1:20) Nagtatao an maimbod na uripon nin mga publikasyon na basado sa Bibliya sa labing 680 lengguwahe! Nagtatagama ka daw nin panahon na basahon an Bibliya aroaldaw? Binabasa mo daw an kada bagong magasin asin an gabos na bagong publikasyon na makukua sa sadiri mong lengguwahe kada taon?

Apuwera sa pagprodusir nin mga publikasyon, nag-aandam an organisasyon ni Jehova nin mga outline para sa mga pahayag sa satong mga pagtiripon, asembleya, asin kumbensiyon. Nauugma ka daw sa mga pahayag, drama, demonstrasyon, asin interbiyu sa mga pagtiripon na iyan? Tunay nanggad na nagtatao si Jehova nin espirituwal na bangkete!—Isa. 25:6.

Dai man. Asin dai kita maninigong magngalas na kun beses mas dakul an nakukuang espirituwal na kakanon kan nagkapirang lingkod ni Jehova kisa sa iba. Taano man? Isip-isipa an mga apostol. Nag-ako sinda nin mas dakul na pagtutukdo kisa sa dakul na iba pang disipulo kan inot na siglo. (Mar. 4:10; 9:35-37) Pero, dai man nagkulang sa espirituwal na kakanon an ibang mga disipulo; nag-ako sinda kan kaipuhan ninda.—Efe. 4:20-24; 1 Ped. 1:8.

Mahalaga man na mangnuhon na dai nakarekord sa mga pagkasaysay sa Ebanghelyo an dakul sa mga sinabi asin ginibo ni Jesus kan siya yaon sa daga. Si apostol Juan nagsurat: ‘Dakul pang ibang mga bagay an ginibo ni Jesus na kun isurat gabos, sa paghuna ko, an mga librong susuratan dai makakaigo sa bilog na kinaban.’ (Juan 21:25, BPV) Kumpara sa sato, mas dakul na impormasyon an aram kan mga parasunod ni Jesus kan inot na siglo manungod sa perpektong tawong si Jesus, pero dai man kita nakukulangan nin impormasyon dapit sa saiya. Sinisiyerto ni Jehova na igwa kita nin igong kaaraman manungod ki Jesus tanganing masunod niyato an saiyang halimbawa.—1 Ped. 2:21.

Isip-isipon man an mga surat kan mga apostol sa mga kongregasyon kan inot na siglo. Kisiyera sarong surat ni Pablo an dai iiniba sa Bibliya. (Col. 4:16) Kulang daw an satong espirituwal na kakanon huling dai ta nababasa an surat na iyan? Dai man. Aram ni Jehova an kaipuhan ta asin igo an itinatao niya sa sato tanganing magdanay kitang makusog sa espirituwal.—Mat. 6:8.

Ngunyan, an nagkapirang lingkod ni Jehova mas dakul an nakukuang espirituwal na kakanon kisa sa iba. Dikit sana daw na publikasyon an makukua sa lengguwahe mo? Kun iyo, girumdumon na nagmamakulog si Jehova sa saimo. Pag-adalan an publikasyon na makukua mo, asin kun posible, mag-atender sa mga pagtiripon na nasasabutan mo an ginagamit na lengguwahe. Makakasiyerto ka na tatabangan ka ni Jehova na magdanay na makusog sa espirituwal.—Sal. 1:2; Heb. 10:24, 25.

Sa satong Web site, nagpupublikar kita nin mga kopya kan mga magasin asin iba pang mga publikasyon na basado sa Bibliya. Nagtatao man an Web site nin mga impormasyon na nagtatabang sa mga mag-agom, tin-edyer, asin may saradit na aki. Nakikinabang an mga pamilya sa pag-adal kan mga impormasyon na ini sa saindang Pampamilyang Pagsamba. Dugang pa, ibinabareta sa satong Web site an espesyal na mga programa, arog kan mga gradwasyon sa Gilead asin taunan na miting, saka pirming iniimpormaran kaiyan an kasararuan nin magturugang sa bilog na kinaban manungod sa natural na mga kalamidad asin legal na mga kaso na nakakaapektar sa banwaan ni Jehova. (1 Ped. 5:8, 9) Mapuwersa man na kasangkapan sa paghuhulit an Web site, huling paagi kaiyan nakakaabot an maugmang bareta dawa sa mga nasyon na may restriksiyon o ipinagbabawal an satong gibuhon.

Pero, makakapagdanay kang makusog sa espirituwal baga man may access ka o dai sa satong Web site. Nagmamaigot an maimbod na uripon na makapagtao nin igong inimprentang mga babasahon tanganing mapakakan na marhay an lambang Kristiyano. Kaya, dai ka maninigong maobligar na bumakal nin gadyet tangani sanang maka-access sa jw.org. An iba puwedeng mag-imprenta nin nagkapirang impormasyon na ipinublikar sa satong Web site asin itao iyan sa mga daing access sa Internet, pero dai man inoobligar an mga kongregasyon na gibuhon ini.

Nagpapasalamat kita ki Jesus ta inuutob niya an saiyang panuga na itatao niya an satong espirituwal na mga pangangaipo. Mantang marikas nang nagdadangadang an katapusan kan masakit na huring mga aldaw na ini, makakapagtiwala kita na padagos na itatao ni Jehova an espirituwal na “kakanon sa tamang panahon.”