1. Ano an kaipuhan nin mga tawo, asin siisay an nagpapanigo kaiyan?

GABOS kita nangangaipong marhay na magin harani o dayupot sa ibang tawo. Masasabing “dayupot sa lambang saro an mga indibidwal kun gustong-gusto ninda asin midbid nindang marhay an lambang saro.” Nauugma kita kun may marahay kitang relasyon sa satong pamilya asin mga katuod na namumuot, nag-aapresyar, asin nakakasabot sa sato. Pero, an Saro na dapat na pinakadayupot sa sato iyo an satong Kahuruhalangkawing Kaglalang.—Par. 12:1.

2. Ano an ipinanuga ni Jehova sa sato, pero taano ta dakul na tawo an dai naniniwala sa panugang iyan?

² Sinasadol kita ni Jehova sa saiyang Tataramon na “rumani” sa saiya, asin nanunuga siya na kun gigibuhon ta iyan, ‘siya marani’ sa sato. (Sant. 4:8) Bako daw na nakakaugmang maaraman iyan? Pero para sa dakul na tawo, bakong kapani-paniwala na gusto nin Diyos na maparani sa sainda; iniisip ninda na bako sindang maninigo na dumulok sa saiya o na harayo siyang marhay tanganing dulukon. Posible daw talagang maparani ki Jehova?

3. Anong katotoohan an dapat niyatong maaraman manungod ki Jehova?

³ An totoo, si Jehova “bakong harayo sa lambang saro” na naghahanap sa saiya; posible nanggad na mamidbid siya. (Basahon an Guibo 17:26, 27; Salmo 145:18.) Katuyuhan kan satong Diyos na maparani  sa saiya dawa an bakong perpektong mga tawo, asin andam siya saka gusto niyang akuon sinda bilang dayupot niyang mga katuod. (Isa. 41:8; 55:6) Base sa mismong eksperyensiya kan salmista, makakasurat siya manungod ki Jehova: “O Paradangog nin pamibi, sa saimo madurulok an gabos na klase nin tawo. Maugma an saro na saimong pinipili asin irinarani.” (Sal. 65:2, 4, NW) An pagkasaysay kan Bibliya manungod ki Hading Asa nin Juda sarong halimbawa nin tawong nagrani sa Diyos, asin ipinapahiling man diyan kun paano nagrani si Jehova sa saiya. *

4. Anong halimbawa an ipinahiling ni Hading Asa sa banwaan nin Juda?

⁴ Kahanga-hanga an kaigutan ni Hading Asa para sa dalisay na pagsamba huling hinali niya an prostitusyon sa templo asin an idolatriya na lakop na marhay sa nasyon. (1 Ha. 15:9-13) Huling dayupot si Asa ki Jehova asin kinukuyog an ley Niya, sinadol niya an banwaan na ‘hanapon si Jehova na Diyos kan saindang mga magurang asin na gibuhon an Pagbuot asin an mga tugon.’ Binendisyunan ni Jehova nin lubos na katuninungan an inot na sampulong taon na paghadi ni Asa. Ano an sinabi ni Asa na dahilan kan pagkaigwa ninda nin katuninungan? Sinabi niya sa banwaan: ‘An daga nasa atubangan niyato, huli ta hinanap niyato si Jehova na satuyang Diyos. Hinanap niyato siya, asin tinawan niya kita nin kapahingaluan sa gabos na kamugtakan.’ (2 Cron. 14:1-7) Hilingon ta an sunod na nangyari.

5. Anong sitwasyon an buminalo sa pagtitiwala ni Asa sa Diyos, asin ano an nagin resulta?

⁵ Ipamugtak na ika an nasa sitwasyon ni Asa. Suminalakay si Zera na Etiope kaiba an 1,000,000 na tawuhan asin 300 na karwahe laban sa Juda. (2 Cron. 14:8-10) Ano an magigin reaksiyon mo kun mahiling mo an dakulaon na hukbong iyan na nagmamartsa pasiring sa saimong kahadian? An bilog mong hukbo 580,000 sana! Huling nakakalamang an bilang kan kalaban mo, mga duwa laban sa saro, iisip-isipon mo daw kun taano ta tinutugutan nin Diyos an siring na pagsalakay? Pupurbaran mo daw na atubangon an siring na sitwasyon na nagtitiwala sa sadiri mong kadunungan? Ipinahiling kan reaksiyon ni Asa na siya nagtitiwala asin may dayupot na relasyon ki Jehova. Udok sa puso siyang namibi: ‘Tabangi kami, O Jehova na samuyang Diyos, huli ta sa saimo kami naglalaom, asin sa saimong ngaran nagpadigdi kami tumang sa hukbong ini. O Jehova, ika an samuyang Diyos. Dai man lugod mangurog sa saimo an tawo.’ Paano sinimbag nin Diyos an udok sa pusong pakiulay ni Asa? Dinaog ni Jehova an mga Etiope. Mayo ni sarong kalaban an nakaligtas sa ralaban!—2 Cron. 14:11-13.

6. Ano an maninigo niyatong arugon ki Asa?

⁶ Ano an nakatabang ki Asa na lubos na magtiwala sa paggiya asin proteksiyon nin Diyos? Sinasabi kan Bibliya na ‘ginibo ni Asa an matanos sa atubangan kan mga mata ni Jehova’ asin na ‘an puso ni Asa nagin sangkap [“bilog,” NW] ki Jehova.’ (1 Ha. 15:11, 14) Kaipuhan man niyatong maglingkod sa Diyos na may bilog na puso. Mahalagang marhay nanggad ini tanganing magkaigwa kita nin dayupot na relasyon sa saiya ngunyan asin sa maabot na panahon. Nagpapasalamat nanggad kita na si Jehova an naggibo nin paagi tanganing irani kita sa saiya asin tabangan kitang magkaigwa saka mapagdanay an dayupot na relasyon sa saiya! Pag-isipan an duwang paagi kun paano iyan ginibo nin Diyos.

7. (a) Ano an ginigibo ni Jehova na nakakadagka sa sato na rumani sa saiya? (b) Ano an panginot na paagi na irinarani kita ni Jehova sa saiya?

⁷ Ipinahiling ni Jehova an pagkamuot niya sa mga tawo paagi sa paglalang kan satong magayon na istaran na daga. Padagos niyang ipinapahiling an saiyang pagkamuot sa sato paagi sa pagtao kan pisikal na mga pangangaipo niyato tanganing mabuhay. (Gui. 17:28; Kap. 4:11) An  mas mahalaga, itinatao niya an satong espirituwal na mga pangangaipo. (Luc. 12:42) Sinisiyerto man niya sa sato na siya mismo an nagdadangog pag namimibi kita sa saiya. (1 Juan 5:14) Minsan siring, an panginot na paagi na irinarani kita ni Jehova sa saiya asin an nakadagka sa sato na rumani sa saiya iyo an pantubos, na kapahayagan kan saiyang pagkamuot. (Basahon an 1 Juan 4:9, 10, 19.) Isinugo ni Jehova an saiyang ‘Aking bugtong’ sa daga tanganing iligtas kita sa kasalan asin kagadanan.—Juan 3:16.

8, 9. Ano an papel ni Jesus sa katuyuhan ni Jehova?

⁸ Pinagin posible ni Jehova na makinabang sa pantubos dawa an mga tawong nabuhay bago kan panahon ni Cristo. Kan ihinula ni Jehova an manungod sa maabot na Paraligtas kan katawuhan, sa pagmansay niya, an pantubos garo man sana ibinayad na huling aram niya na mauutob an saiyang katuyuhan. (Gen. 3:15) Pakalihis nin dakul na siglo, pinasalamatan ni apostol Pablo an Diyos “sa pagkabutas huli sa pantubos na ibinayad ni Cristo Jesus.” Sinabi pa ni Pablo: “Mantang an Diyos nagpupugol, pinapatawad niya an mga kasalan na nangyari kan nakaagi.” (Roma 3:21-26, NW) Mahalagang marhay nanggad an papel ni Jesus sa pagigin dayupot niyato sa Diyos!

⁹ Paagi sana ki Jesus puwedeng mamidbid nin mapakumbabang mga tawo si Jehova asin magkaigwa nin dayupot na relasyon sa Saiya. Paano idinuduon kan Kasuratan an katotoohan na ini? Sinabi ni Pablo na irinerekomendar ‘nin Diyos an saiyang sadiring pagkamuot sa sato, huli ta kan kita mga parakasala pa, si Cristo nagadan dahil sato.’ (Roma 5:6-8) Itinao an atang na pantubos ni Jesus, bakong huling maninigo kita kaiyan, kundi huling namumutan kita ni Jehova asin ni Jesus. ‘Dai nin makakadulok sa sako kun dai siya dagkahon kan Ama na nagsugo sako,’ an sabi ni Jesus. Sa saro pang pagkakataon, sinabi niya: ‘Dai nin siisay na makakadulok sa Ama kun bakong huli sako.’ (Juan 6:44; 14:6) Ginagamit ni Jehova an banal na espiritu tanganing irani an mga indibidwal sa saiya paagi ki Jesus asin tabangan sindang magdanay sa Saiyang pagkamuot na may paglaom na mabuhay na daing katapusan. (Basahon an Judas 20, 21.) Hilingon an saro pang paagi na irinarani kita ni Jehova sa saiya.

10. Ano an itinutukdo sa sato kan Bibliya na mas mapadayupot sa sato sa Diyos?

¹⁰ Sa mga natukar ta na sa artikulong ini, naggamit na kita nin mga teksto hali sa 14 lain-lain na libro sa Bibliya. Kun mayong Bibliya, paano ta maaaraman na puwede kitang magin harani sa satong Kaglalang? Kun mayo iyan, paano ta maaaraman an manungod sa pantubos asin kun paano kita tinatabangan ni Jesus na maparani ki Jehova? Paagi sa banal na espiritu, ipinasabong ni Jehova an pagsurat kan Bibliya, na naghahayag sa sato kan saiyang magayon na personalidad asin marahayon na mga katuyuhan. Halimbawa, sa Exodo 34:6, 7, ilinadawan ni Jehova an saiyang sadiri ki Moises bilang sarong Diyos na ‘mahihirakon asin maugayon, haloy na maanggot asin dakula sa karahayan asin sa katotoohan, na nagtatao nin pagkahirak sa rinibo-ribo, na nagpapatawad kan kalapasan, kan pagtumang, asin kan kasalan.’ Siisay an dai mapaparani sa siring na Diyos? Aram ni Jehova na miyentras na mas dakul kitang nanunudan dapit sa saiya paagi sa Bibliya, urog siyang nagigin tunay sa sato asin mas nagigin dayupot kita sa saiya.

11. Taano ta maninigo niyatong hinguwahon na pag-adalan an mga kuwalidad asin pamamaagi nin Diyos? (Hilingon an ritrato sa kapinunan kan artikulo.)

¹¹ Ipinapaliwanag kan librong Rumani ki Jehova kun paano kita magkakaigwa nin dayupot na relasyon sa Diyos. An introduksiyon kaiyan nagsasabi: ‘Sa ano man na pakikikatuod na magibo niyato, an relasyon nakabasar sa pakamidbid sa tawong iyan, na hinahangaan asin pinapahalagahan an saiyang daing kaagid na mga karakteristiko. Kaya an mga kuwalidad asin paagi nin Diyos, na ihinahayag sa Bibliya, mahalagang marhay na tema nin pag-adal.’ Kaya, nagpapasalamat nanggad kita na ipinasurat ni Jehova an Bibliya sa paaging masasabutan nin tawo!

12. Taano ta mga tawo an ginamit ni Jehova sa pagsurat kan Bibliya?

 ¹² Puwede kutanang ipinasurat ni Jehova sa mga anghel an Bibliya huling interesado sindang marhay sa sato asin sa mga ginigibo niyato. (1 Ped. 1:12) Siguradong ikakasurat kan mga anghel an mensahe nin Diyos sa katawuhan. Alagad mahihiling daw ninda an mga bagay-bagay uyon sa pananaw nin tawo? Masasabutan daw ninda an satong mga pangangaipo, kaluyahan, asin kamawutan? Dai. Aram ni Jehova an saindang mga limitasyon sa bagay na ini. Huling mga tawo an pinasurat ni Jehova kan Bibliya, mas madali niyatong masabutan iyan. Masasabutan ta an iniisip asin namamatian kan mga kagsurat kan Bibliya asin kan iba pang mga nasambit sa Kasuratan. Pag nababasa ta an manungod sa sainda, namamatian ta an namatian nindang pagkadisganar, pagduwa-duwa, pagkatakot, asin pagkabakong perpekto saka nakikigaya-gaya man kita sa kaugmahan patin kapangganahan ninda. Arog ni propeta Elias, an gabos na kagsurat kan Bibliya may ‘mga pakamati siring sa sato.’—Sant. 5:17.

13. Taano ta mapapahiro an puso mo kan pamibi ni Jonas?

¹³ Halimbawa, pag-isipan kun baga lubos na ikakapahayag nin sarong anghel an namatian ni Jonas kan duminulag an propetang ini sa asignasyon na itinao sa saiya nin Diyos. Mas marahay nanggad na ipinasurat ni Jehova ki Jonas an sadiri kaining eksperyensiya, pati na an udok sa buot na pamibi kaini sa Diyos mantang nasa kararuman kan dagat! Sinabi ni Jonas: ‘Kan an sakuyang kalag pinangluluya sa sako, nakagirumdom ako ki Jehova.’—Jon. 1:3, 10; 2:1-9.

14. Taano ta masasabutan mo an isinurat ni Isaias manungod sa sadiri niya?

¹⁴ Isip-isipon man an ipinasurat ni Jehova ki Isaias manungod sa sadiri niya. Pagkatapos na mahiling an sarong bisyon kan kamurawayan nin Diyos, napahiro an propeta na akuon an saiyang pagigin makasalan: ‘Hirak man sakuya,  ta ako [garo] gadan na, huli ta ako tawong marigsok sa mga ngabil, asin nag-iirok ako sa tahaw kan banwaan na may mga ngabil na marigsok; huli ta [nahiling kan] sakuyang mga mata an Hadi na si Jehova kan mga hukbo!’ (Isa. 6:5) Mayong anghel na makakapagsabi nin arog kaiyan dapit sa sadiri niya, bako daw? Pero masasabi iyan ni Isaias, asin nasasabutan ta an namatian niya.

15, 16. (a) Taano ta nasasabutan niyato an namamatian kan satong kapwa? Magtao nin mga halimbawa. (b) Ano an makakatabang sa sato na mas maparani ki Jehova?

¹⁵ Masasabi daw kan mga anghel na sinda ‘bakong maninigo,’ arog kan nasabi ni Jacob dapit sa sadiri niya, o na sinda “parakasala,” arog kan nagin pagmati ni Pedro? (Gen. 32:10, NW; Luc. 5:8) ‘Matatakot’ daw sinda arog kan mga disipulo ni Jesus, o kaipuhan daw kan matanos na mga anghel na ‘magpakapusuan’ kun may pagtumang sa paghuhulit kan maugmang bareta, arog kan kinaipuhan na gibuhon ni Pablo asin kan iba pa? (Juan 6:19; 1 Tes. 2:2) Dai, perpekto an mga anghel sa gabos na paagi asin mas nakakalabi sa mga tawo. Pero, kun mga tawong bakong perpekto an nagpapahayag kan siring na mga pagmati, nasasabutan ta tulos sinda ta mga tawo man kita. Pag nagbabasa kita kan Tataramon nin Diyos, puwede nanggad kitang ‘mag-ugma sa kaibahan kan mga nag-uugma; magtangis sa kaibahan kan mga nagtatangis.’—Roma 12:15.

¹⁶ Kun huhurop-hurupon ta an sinasabi kan Bibliya manungod sa pagtratar ni Jehova sa saiyang maimbod na mga lingkod kan nakaagi, maaaraman ta an dakul na kahanga-hangang bagay manungod sa satong Diyos, na mapasensiya asin mamumuton na minarani sa mga tawo na bakong perpekto. Huli kaiyan, mas mamimidbid asin mas mamumutan niyatong marhay si Jehova. Bilang resulta, mas mapaparani kita sa saiya.—Basahon an Salmo 25:14. *

17. (a) Anong marahay na konseho an itinao ni Azarias ki Asa? (b) Paano binaliwala ni Asa an konseho ni Azarias, asin ano an nagin resulta?

¹⁷ Pagkatapos kan lubos na kapangganahan ni Hading Asa laban sa hukbo nin Etiopia, an propeta nin Diyos na si Azarias nagtao nin madunong na konseho sa saiya asin sa banwaan. Sinabi ni Azarias: ‘Si Jehova yaon sa saindo mantang kamo nasa saiya; asin kun hanapon nindo siya, makukua nindo, alagad kun bayaan nindo siya, babayaan man niya kamo.’ (2 Cron. 15:1, 2) Pero, kan maedad na si Asa, dai niya nasunod an marahay na konsehong iyan. Kan humaon sinda kan karibal na kahadian nin Israel sa amihanan, naghagad nin tabang si Asa sa mga Siriano. Imbes na humagad giraray nin tabang ki Jehova, nakipag-alyansa si Asa sa mga pagano. Huling huminiro si Asa na may kamangmangan, sinabi sa saiya ni Jehova: ‘Magpuon ngunyan sagkod sa mga masunod magkakaigwa nin laban tumang sa saimo.’ Nagin maribok an natatadang mga taon kan pamamahala ni Asa huli ta pirming may giyera. (2 Cron. 16:1-9) Ano an leksiyon kaini sa sato?

18, 19. (a) Ano an maninigo tang gibuhon kun medyo napaparayo na kita sa Diyos? (b) Paano kita urog na magigin harani ki Jehova?

¹⁸ Dai kita nuarin man dapat rumayo ki Jehova. Kun medyo napaparayo na kita sa saiya, dapat kitang humiro kauyon kan Oseas 12:6, na nagsasabi: ‘Magbalik ka sa saimong Diyos, mag-utob ka nin pagkahirak asin hatol, asin danay kang manarig sa saimong Diyos.’ Kaya, mas rumani pa kita ki Jehova paagi sa mapag-apresyar na paghurop-hurop sa kahalagahan kan pantubos asin maigot na pag-adal kan saiyang Tataramon, an Bibliya.—Basahon an Deuteronomio 13:4.

¹⁹ ‘Para sako, mas marahay an magin harani sa Diyos,’ an surat kan salmista. (Sal. 73:28, An Marahay na Bareta Biblia) Lugod gabos kita padagos na mag-adal nin bagong mga bagay dapit ki Jehova asin mas pahalagahan pa an dakul na dahilan na mamutan siya. Asin lugod na urog pang magin harani sa sato si Jehova ngunyan asin sa bilog na panahon na daing sagkod!