1, 2. (a) Taano ta namemeligro an kongregasyon sa Colosas? (b) Ano an isinadol sa mga tugang sa Colosas tanganing magdanay sindang marigon?

NAMEMELIGRO an inot na siglong Kristiyanong kongregasyon sa Colosas! Nagkakabaranga an kongregasyon huli sa mga tugang na ipinipirit an pagsunod sa Ley ni Moises. An iba nagsusuportar sa paganong pilosopiya nin ascetismo o sobrang pagpainda sa sadiri. Tanganing labanan an salang mga katukduan na ini, nagpatanid si apostol Pablo sa mga taga Colosas: ‘Mag-ingat kamo tibaad may siisay man na bumihag saindo huli kan saiyang pilosopiya asin basang na daya suno sa usipon nin mga tawo, suno sa inot na katukduan kan kinaban asin bakong suno ki Cristo.’—Col. 2:8.

² Kun isesentro kan linahidan na mga Kristiyanong idto an saindang isip sa ‘inot na katukduan kan kinaban,’ tatalikdan ninda an probisyon ni Jehova para sa kaligtasan. (Col. 2:20-23) Tanganing maingatan an mahalagang marhay na relasyon ninda sa Diyos, sinadol sinda ni Pablo: “Isentro an saindong isip sa mga bagay na nasa itaas, bakong sa mga bagay na nasa daga.” (Col. 3:2, NW) Iyo, dapat na isentro kan mga tugang ni Cristo an saindang isip sa paglaom na makaresibi nin manang dai nalalapa na ‘nakatagama sa sainda sa kalangitan.’—Col. 1:4, 5.

3. (a) Sa anong paglaom isinesentro kan linahidan na mga Kristiyano an saindang isip? (b) Anong mga hapot an pag-uulayan ta sa artikulong ini?

 ³ Ngunyan, isinesentro man kan linahidan na mga Kristiyano an saindang isip sa langitnon na Kahadian nin Diyos asin sa paglaom na magin ‘kapwa paramana ni Cristo.’ (Roma 8:14-17) Pero kumusta man an mga may paglaom na mabuhay digdi sa daga? Paano aplikado sa sainda an mga sinabi ni Pablo? Sa anong paagi maisesentro kan ‘ibang mga karnero’ an saindang isip sa “mga bagay na nasa itaas”? (Juan 10:16) Asin paano kita gabos makikinabang sa mga halimbawa kan maimbod na mga tawo kaidto, arog ni Abraham asin Moises, na isinentro an saindang isip sa mga bagay na nasa itaas sa ibong nin mga kasakitan?

4. Paano maisesentro kan ibang mga karnero an saindang isip sa mga bagay na nasa itaas?

⁴ Minsan ngani bakong sa langit an paglaom kan ibang mga karnero, maisesentro man ninda an saindang isip sa mga bagay na nasa itaas. Paano? Kun iinuton ninda sa saindang buhay an Diyos na Jehova asin an kapakanan kan saiyang Kahadian. (Luc. 10:25-27) Tanganing magibo ini, arugon ta si Cristo. (1 Ped. 2:21) Arog kan mga tugang ta kan inot na siglo, napapalibutan kita nin salang mga pangangatanusan, kinabanon na mga pilosopiya, asin materyalistikong mga kaisipan sa sistemang ini ni Satanas. (Basahon an 2 Corinto 10:5.) Bilang mga paraarog ni Jesus, dapat na alisto kita sa pagbantay sa siring na mga peligro sa satong espirituwalidad.

5. Paano ta maaaraman kun ano na an satong pagmansay sa materyal na mga bagay?

⁵ Nakakaimpluwensiya na daw sa sato an pagmansay kan kinaban sa materyal na mga bagay? Sa parati, maririsa sa satong mga iniisip asin ginigibo kun anong mga bagay an mahalagang marhay sa sato. Sinabi ni Jesus: ‘Kun sain an saindong kayamanan, diyan man an saindong puso.’ (Mat. 6:21) Tanganing maaraman kun sain kita dinadara kan satong puso, marahay na siyasaton ta an satong sadiri sa pana-panahon. Haputon an sadiri: ‘Dakul na panahon daw an inuubos ko sa pagparaisip sa kuwarta? Pirmi ko daw iniisip an pagnegosyo, pangangapital, o pagkaigwa nin mas komportableng buhay? O nagmamaigot daw akong papagdanayon an sakong mata na nakapokus sa espirituwal na mga bagay?’ (Mat. 6:22, NW) Sinabi ni Jesus na an mga nakapokus sa ‘pagtipon nin mga kayamanan sa kinaban’ isinasapeligrong marhay an saindang espirituwalidad.—Mat. 6:19, 20, 24.

6. Paano ta mapapangganahan an makalaman na mga tendensiya?

⁶ Huling bako kitang perpekto, may tendensiya kitang magpangana sa mga bagay na gusto ta. (Basahon an Roma 7:21-25.) Kun dai kita mapagiya sa banal na espiritu nin Diyos, tibaad magpadara kita sa ‘mga gibo nin kadikluman.’ Puwedeng kaiba digdi an ‘kasingawan, pagburat, [imoral na pagdudurog], asin karigsukan.’ (Roma 13:12, 13) Tanganing mapangganahan an “mga bagay na nasa daga”—mga bagay na nakakaakit sa laman—dapat na isentro ta an satong isip sa mga bagay na nasa itaas. Kaipuhan digdi an paghihinguwa. Kaya nasabi ni apostol Pablo: ‘Linalanog ko an sakong hawak asin inuuripon ko.’ (1 Cor. 9:27) Kaipuhan nanggad niyatong magin istrikto sa satong sadiri tanganing magdanay kita sa paurumbasan para sa buhay! Pag-ulayan ta an ginibo kan duwang maimbod na tawo kan suanoy tanganing mapaugma an Diyos.—Heb. 11:6.

7, 8. (a) Ano an nagin mga problema ni Abraham asin Sara? (b) Sa ano isinentro ni Abraham an saiyang isip?

⁷ Kan sabihan ni Jehova si Abraham na magbalyo sa Canaan kaiba an saiyang pamilya, gikan sa buot siyang nagsunod. Huli sa  pagtubod asin pagsunod ni Abraham, nakipagtipan si Jehova sa saiya, na sinasabi: ‘Magibo ako saimo nin dakulang nasyon, asin ta bebendisyunan taka.’ (Gen. 12:2) Pero pakalihis nin dakul na taon, mayo pa man giraray nin aki si Abraham asin an agom niyang si Sara. Nalingawan na daw ni Jehova an panuga niya ki Abraham? Apuwera diyan, bakong pasil an buhay sa Canaan. Binayaan ni Abraham asin kan saiyang pamilya an saindang harong saka mga paryente sa Ur, sarong mayaman na siyudad sa Mesopotamia. Nagbaklay sinda nin labing 1,600 kilometros pa-Canaan, kun sain nag-istar sinda sa mga tolda, nagtios nin tiggutom, asin napaatubang sa mga tulisan. (Gen. 12:5, 10; 13:18; 14:10-16) Pero, dai ninda inisip na balikan an komportableng buhay sa Ur!—Basahon an Hebreo 11:8-12, 15.

⁸ Imbes na magpokus sa “mga bagay na nasa daga,” si Abraham ‘nagtubod ki Jehova.’ (Gen. 15:6) Iyo, isinentro niya an saiyang isip sa mga bagay na nasa itaas—sa mga panuga nin Diyos. Bilang resulta, binalusan an pagtubod ni Abraham kan makipag-ulay sa saiya an Kahuruhalangkawing Diyos asin magsabi: ‘“Tumingag ka ngunyan sa kalangitan, asin bilangon mo an mga bituon, kun baga mabibilang mo sinda.” Asin sinabihan siya: “Siring an magirikan sa saimo.”’ (Gen. 15:5) Nakakapakusog nanggad sa buot iyan! Sa kada pagtangad ni Abraham sa mabituon na kalangitan, magigirumduman niya an panuga ni Jehova na papadakulon an saiyang banhi. Asin kan mag-abot an itinalaan na panahon nin Diyos, nagkaaki si Abraham, arog kan ipinanuga sa saiya.—Gen. 21:1, 2.

9. Paano kita mapapakusog kan halimbawa ni Abraham na magin sibot sa paglilingkod sa Diyos?

⁹ Arog ni Abraham, hinahalat ta man an kautuban kan mga panuga nin Diyos. (2 Ped. 3:13) Kun dai nakasentro an satong isip sa mga bagay na nasa itaas, tibaad isipon ta na naaatraso an mga panuga Niya asin tibaad magparelaks-relaks na sana sa satong espirituwal na mga gibuhon. Halimbawa, may mga isinakripisyo ka daw kaidto tanganing makapagpayunir o mapahiwas an saimong ministeryo? Kun iyo, dapat kang komendaran. Pero kumusta man ngunyan? Girumdumon na isinentro ni Abraham an saiyang isip sa ‘siyudad na igwa nin mga pasisikadan’ o may tunay na mga pundasyon. (Heb. 11:10) Siya ‘nagtubod sa Diyos asin idto ibinilang sa saiya na katanusan.’—Roma 4:3.

10. Sa anong klaseng buhay nagdakula si Moises?

¹⁰ An saro pang tawo na isinentro an isip sa mga bagay na nasa itaas iyo si Moises. Kan siya hoben pa, ‘tinukduan siya kan gabos na kadunungan nin mga taga Ehipto.’ Bako ining ordinaryong edukasyon. An Ehipto an pinakamakapangyarihan na nasyon kaidto asin kabilang pa si Moises sa pamilya ni Faraon. Kaya bakong makangangalas na huli sa halangkaw na edukasyon na ini, si Moises nagin ‘makapangyarihan sa saiyang mga tataramon asin mga gibo.’ (Gui. 7:22) Isipon na sana an mga oportunidad na bukas sa saiya! Pero, isinentro ni Moises an saiyang isip sa mga bagay na mas halangkaw pa diyan—an paggibo kan kabutan nin Diyos.

11, 12. Anong edukasyon an pinahalagahan na marhay ni Moises, asin paano ta naaraman iyan?

¹¹ Kan aki pa si Moises, siyertong itinukdo na sa saiya kan saiya mismong inang si Jocabed an manungod sa Diyos kan mga Hebreo. Mas pinahalagahan na marhay ni Moises an kaaraman dapit ki Jehova kisa sa ano man na kayamanan. Kaya hinabuan niya an mga pribilehiyo asin oportunidad na bukas kutana sa saiya bilang miyembro kan pamilya ni Faraon. (Basahon an Hebreo 11:24-27.) Iyo, huli sa espirituwal na edukasyon ni Moises asin sa pagtubod niya ki Jehova, napahiro si Moises na isentro an isip niya sa mga bagay na nasa itaas.

 ¹² Nakua ni Moises an pinakamarahay na sekular na edukasyon kan panahon niya, pero ginamit daw niya iyan tanganing magin makapangyarihan, bantog, o mayaman sa Ehipto? Dai. Sa katunayan, sinasabi kan Bibliya na ‘nagsayuma siya na pag-apudon na aki kan aking babayi ni Faraon, na pinagmarahay niya na makidamay na pasakitan sa kaibahan kan banwaan nin Diyos kisa magpa-uyon sa kaugmahan nin kasalan sa kadikit na panahon.’ Malinaw nanggad, ginamit ni Moises an espirituwal na edukasyon niya tanganing gibuhon an katuyuhan ni Jehova.

13, 14. (a) Ano an nakatabang ki Moises na magin kuwalipikado sa asignasyon na itatao ni Jehova sa saiya? (b) Arog ni Moises, ano an kaipuhan tang gibuhon?

¹³ Namutan ni Moises si Jehova asin an Saiyang banwaan. Kan 40 anyos na si Moises, an paghuna niya andam na siya na tabangan an banwaan nin Diyos na makatalingkas sa pagkauripon sa Ehipto. (Gui. 7:23-25) Pero bago itao ni Jehova sa saiya an asignasyon na iyan, may kaipuhan pang gibuhon si Moises. Kaipuhan pa niyang manudan an kapakumbabaan, pagpapasensiya, kahuyuan, asin pagpupugol sa sadiri. (Tal. 15:33) Kaipuhan ni Moises nin pagsasanay tanganing matagalan an maabot na mga pagbalo asin kasakitan. An 40 taon na pagigin pastor ni Moises nagtao sa saiya nin pagsasanay tanganing magkaigwa kan diyosnon na mga kuwalidad na ini.

¹⁴ May nanudan daw si Moises sa praktikal na pagsasanay na ini? Igwa nanggad! Sinasabi kan Tataramon nin Diyos na si Moises an nagin pinakamahuyo sa gabos na tawo na nag-iirok sa ibabaw nin daga. (Bil. 12:3) Nagin mapakumbaba siya asin nakatabang iyan sa saiya na magin mapasensiya sa lain-lain na tawo pati sa mga problema ninda. (Ex. 18:26) Kaipuhan man na magkaigwa kita nin espirituwal na mga kuwalidad na makakatabang sa sato na makabalyo sa ‘dakulang kahurasaan’ pasiring sa matanos na bagong kinaban nin Diyos. (Kap. 7:14) Pinapakiibanan ta daw an gabos, pati an mga tawo na sa hiling niyato arangguton o sobra kasensitibo? Marahay na sunudon ta an sadol ni apostol Pedro sa mga kapagtubod: ‘Gumalang kamo sa gabos na tawo, mamuot kamo sa [kasararuan] nin magturugang.’—1 Ped. 2:17.

15, 16. (a) Taano ta mahalagang marhay na isentro an satong isip sa tamang mga bagay? (b) Taano ta mahalagang papagdanayon kan mga Kristiyano an marahay na paggawi?

¹⁵ Nabubuhay kita sa ‘mga panahon na makahahandal.’ (2 Tim. 3:1) Kaya tanganing magdanay na puka sa espirituwal, mahalagang marhay na isentro ta an satong isip sa tamang mga bagay. (1 Tes. 5:6-9) Pag-ulayan ta kun paano magigibo iyan sa tulong aspekto kan satong buhay.

¹⁶ Satong paggawi: Aram ni Pedro na mahalaga an marahay na paggawi. Sinabi niya: “Papagdanayon na marahay an saindong paggawi sa tahaw kan mga nasyon, tanganing . . . tibaad mahiling ninda mismo an saindong marahay na mga gibo asin, bilang resulta, pamurawayon ninda an Diyos.” (1 Ped. 2:12, NW) Yaon man kita sa harong, trabaho, eskuwelahan, paglilibang, o ministeryo, pinagmamaigutan niyatong mapamuraway si Jehova paagi kan satong marahay na paggawi. Totoo, huling bako kitang perpekto, gabos kita nakakagibo nin sala. (Roma 3:23) Pero kun padagos kitang ‘makikipaglaban kan marahay na pakilaban nin pagtubod,’ mapapangganahan ta an satong pagkabakong perpekto.—1 Tim. 6:12.

17. Paano ta maaarog an pag-iisip ni Cristo Jesus? (Hilingon an ritrato sa kapinunan kan artikulo.)

¹⁷ Satong pag-iisip: Tanganing mapagdanay an marahay na paggawi, dapat na igwa kita nin tamang kaisipan. Sinabi ni apostol Pablo: ‘Mapasaindo an pag-iisip na ini na nasa ki Cristo Jesus man.’ (Fil. 2:5) May anong kaisipan si Jesus? May  mapakumbaba siyang kaisipan. Kapakumbabaan an nagpahiro sa saiya na magin mapagsakripisyo sa ministeryo. Panginot sa isip niya an paghuhulit sa iba kan maugmang bareta kan Kahadian nin Diyos. (Mar. 1:38; 13:10) Minansay ni Jesus an Tataramon nin Diyos bilang an ultimong awtoridad. (Juan 7:16; 8:28) Maigot niyang pinag-adalan an Banal na Kasuratan tanganing makotar iyan, maidepensa, asin maipaliwanag. Magigin mas arog-Cristo an satong pag-iisip kun kita magigin mapakumbaba asin maigot sa ministeryo saka sa personal na pag-adal sa Bibliya.

18. Sa anong mahalagang paagi ta masusuportaran an gibuhon ni Jehova?

¹⁸ Satong pagsuportar: Katuyuhan ni Jehova na ‘sa ngaran ni Jesus magluhod an gabos na tuhod kan mga nasa langit asin mga nasa ibabaw nin daga.’ (Fil. 2:9-11) Dawa ilinangkaw an posisyon ni Jesus, mapakumbaba siyang nagpapasakop sa kabutan kan saiyang Ama, asin arog man kaiyan an dapat tang gibuhon. (1 Cor. 15:28) Paano? Paagi sa bilog na pusong pagsuportar niyato sa itinaong gibuhon sa sato na ‘paggibo nin disipulo sa gabos na nasyon.’ (Mat. 28:19) Siring man, gusto tang ‘gumibo nin karahayan sa gabos,’ sa satong kapwa asin sa satong mga tugang.—Gal. 6:10.

19. Ano an maninigong determinado niyatong gibuhon?

¹⁹ Nagpapasalamat nanggad kita na ipinapagirumdom sa sato ni Jehova na isentro an satong isip sa mga bagay na nasa itaas! Tanganing magibo iyan, kaipuhan tang ‘dumalagan sa pakatios diyan sa paurumbasan na nasa atubangan ta.’ (Heb. 12:1) Lugod na kita gabos “bilog na kalag na [maglingkod] para ki Jehova,” asin babalusan nanggad kan satong Ama sa langit an satong mga paghihinguwa.—Col. 3:23, 24, NW.