1, 2. (a) Ano an inaasahan sa mga lingkod nin Diyos kun dapit sa saindang paggawi? (b) Sisimbagon sa artikulong ini an anong mga hapot?

PINASABNGAN ni Jehova si apostol Pedro na ikonektar an kabanalan na sinasabi sa Levitico sa kahagadan sa mga Kristiyano na magin banal sa paggawi. (Basahon an 1 Pedro 1:14-16.) Inaasahan ni Jehova, an Saro na Banal, na gigibuhon kan mga linahidan asin kan ‘ibang mga karnero’ an gabos nindang makakaya tanganing magin banal sa gabos nindang paggawi—bako sanang sa nagkapira kaiyan.—Juan 10:16.

² Kapaki-pakinabang na marhay an urog pang pagsiyasat sa mahahalagang leksiyon na makukua sa libro nin Levitico, asin makakatabang sa sato an pag-aplikar sa mga manunudan ta tanganing magin banal kita sa gabos tang paggawi. Pag-uulayan ta an mga hapot na arog kan: Paano ta dapat mansayon an pakikikompromiso? Ano an itinutukdo sa sato kan Levitico dapit sa pagsuportar sa soberaniya ni Jehova? Ano an manunudan ta sa pagdulot nin mga atang?

3, 4. (a) Taano ta dapat likayan kan mga Kristiyano na ikompromiso an mga ley asin prinsipyo sa Bibliya? (b) Taano ta dapat tang likayan na magbalos o magtanom nin raot nin buot?

³ Tanganing mapaugma si Jehova, dapat kitang marigon na  mangapot sa saiyang mga ley asin prinsipyo na dai nuarin man nagkakaigwa nin bakong banal na kaisipan na puwedeng ikompromiso an mga iyan. Dawa bako na kitang sakop kan Ley ni Moises, tinatabangan kita kaini na masabutan kun ano an puwede o dai puwede sa paghiling nin Diyos. Halimbawa, ipinagbuot sa mga Israelita: ‘Dai ka magbalos, dai ka man magdara nin maraot na buot sa mga aki kan saimong banwaan, tara kamutan mo an kataid mo nin siring sa saimo man sana. Ako si Jehova.’—Lev. 19:18.

⁴ Inaasahan ni Jehova na lilikayan ta na magbalos o magtanom nin raot nin buot. (Roma 12:19) Kun babaliwalaon ta an mga ley asin prinsipyo nin Diyos, mauugma an Diyablo asin tibaad makatao kita nin katuyawan ki Jehova. Dawa pa tinutuyo kan iba na kulgan kita, likayan tang magin garo lalagan na nagtitipon nin kaanggutan. Tinawan kita nin Diyos kan pribilehiyong magin ‘mga lalagan na daga’ na an laog na kayamanan iyo an satong ministeryo. (2 Cor. 4:1, 7) An garo asidong kaanggutan dai puwedeng ilaag sa siring na mga lalagan!

5. Ano an manunudan ta ki Aaron asin sa pagkagadan kan saiyang mga aki? (Hilingon an ritrato sa kapinunan kan artikulo.)

⁵ Sarong mamunduon na pangyayari sa pamilya ni Aaron an nakarekord sa Levitico 10:1-11. Siguradong nakulgan sindang marhay kan matumtom nin kalayo hali sa langit an mga aki ni Aaron na si Nadab asin Abihu sa tabernakulo. Saro nanggad na pagbalo sa pagtubod ni Aaron asin kan pamilya niya kan sabihan sinda nin Diyos na dai ninda puwedeng pagtangisan an nagadan nindang mga kapamilya! Ipinapahiling mo daw mismo an saimong pagigin banal paagi sa dai pakikiiba sa mga kapamilya o iba pa na natiwalag?—Basahon an 1 Corinto 5:11.

6, 7. (a) Kun nagdedesisyon kun baga mapartisipar sa sarong kasal sa simbahan, ano an dapat tang ikonsiderar? (Hilingon an nota sa ibaba.) (b) Paano niyato maipapaliwanag sa bakong Saksing mga paryente an paninindugan ta dapit sa kasal sa simbahan?

⁶ Tibaad dai ta man agihan an pagbalo na arog kagrabe kan nangyari ki Aaron asin sa saiyang pamilya. Pero paano kun inimbitaran kita nin sarong bakong Saksing paryente na mag-atender asin magpartisipar sa kasal niya sa simbahan? Mayo nin espesipikong pagbuot sa Kasuratan na nagbabawal sa sato na mag-atender, pero igwa daw nin mga prinsipyo sa Bibliya na dapat ikonsiderar sa paggibo nin siring na desisyon? *

⁷ Tibaad dai masabutan kan mga paryente tang bakong Saksi an satong determinasyon na paugmahon si Jehova asin magin banal sa sitwasyon na arog kaiyan. (1 Ped. 4:3, 4) Siyempre, habo niyatong makulgan sinda, pero sa parati mas marahay na kaulayon sinda nin prangka pero sa mabuot na paagi. Kun posible, gibuhon ini haloy pa bago an okasyon. Puwede niyato sindang pasalamatan sa pag-imbitar ninda sa sato na magin parte kan kasal ninda. Dangan puwede tang sabihon na gusto niyatong magin maugma sinda sa espesyal na aldaw ninda asin na habo niyatong mapasupog sinda asin an iba pang maatender huli sa dai ta pakikikabtang sa relihiyosong seremonya. Saro ining paagi na malilikayan ta na maikompromiso an satong mga paniniwala asin pagtubod.

8. Paano itinatampok kan libro nin Levitico an soberaniya ni Jehova?

⁸ Itinatampok kan libro nin Levitico an soberaniya ni Jehova. Mababasa ta diyan nin labing 30 beses na hali ki Jehova an mga ley na nasa Levitico. Aram ini ni Moises asin ginibo niya nanggad an mga ipinagbuot ni Jehova sa saiya. (Lev. 8:4, 5) Arog ni Moises, dapat na gibuhon ta man pirmi an mga ipinapagibo sa sato kan satong Soberano, si Jehova. Tatabangan kita kan organisasyon nin Diyos na magibo ini. Pero puwedeng mabalo an satong pagtubod kun nagsosolo kita, arog kan nangyari ki Jesus kan siya tinentaran  sa kaawagan. (Luc. 4:1-13) Kun nakapokus kita sa soberaniya nin Diyos asin nagtitiwala sa saiya, mayo nin siisay man na makakapagpakompromiso sa sato. Dai kita mapadaog sa takot.—Tal. 29:25.

9. Taano ta ikinakaungis an mga lingkod nin Diyos sa gabos na nasyon?

⁹ Bilang mga parasunod ni Cristo asin mga Saksi ni Jehova, pinepersegir kita sa lain-lain na nasyon sa bilog na kinaban. Inaasahan ta na ini huling sinabi ni Jesus sa saiyang mga disipulo: ‘Itatao kamo sa kahurasaan asin gagadanon kamo, asin ikakaungis kamo kan gabos na nasyon dahil sa ngaran ko.’ (Mat. 24:9) Dawa ikinakaungis kita, padagos tang ihinuhulit an Kahadian asin naghihinguwa kitang magdanay na banal sa atubangan ni Jehova. Pero taano ta ikinakaungis kitang marhay maski ngani namumuhay kita nin malinig saka onesto, asin makinuyog kita sa ley? (Roma 13:1-7) Huling pinili ta si Jehova bilang satong Soberanong Kagurangnan! Sa “saiya sana” niyato itinatao an satong sagradong paglilingkod asin dai ta nuarin man ikokompromiso an saiyang matanos na mga ley asin prinsipyo.—Mat. 4:10.

10. Ano an nangyari sa sarong brother na ikinompromiso an saiyang neutralidad?

¹⁰ ‘Bako man kitang kabtang kan kinaban.’ Kaya neutral kita sa giyera asin pulitika. (Basahon an Juan 15:18-21; Isaias 2:4.) May mga nagdusay sa Diyos na ikinompromiso an saindang neutralidad. Dakul sa sainda an nagsulsol asin naibalik an saindang marahay na relasyon sa satong mahihirakon na Ama sa langit. (Sal. 51:17) Pero, an nagkapira dai nagsulsol! Halimbawa kan Giyera Mundiyal II, tiniripon sa sarong banwaan hali sa gabos na presuhan sa Hungary an 160 sa mga tugang ta—na 45 pababa an edad—na prineso na mayong makatanusan na basehan. Pinagbutan sinda diyan na magsuldados. Marigon na nagsayuma an maimbod na mga tugang, pero may siyam na nanumpa sa militar asin nagsulot nin uniporme. Pakalihis nin duwang taon, an saro sa mga nagkompromiso iiniba sa sarong firing squad na mabadil sa maimbod na mga Saksi. Kaiba sa mga babadilon ninda iyo an saiya mismong tugang sa laman! Pero, dai man nadagos an humang paggadan.

11, 12. Ano an manunudan ta sa kahagadan ni Jehova dapit sa pagdulot nin atang kan suanoy na Israel?

¹¹ Espesipikong sinabi kan Ley ni Moises kun anong mga atang an dapat na idulot kan mga Israelita. (Lev. 9:1-4, 15-21) Dapat na daing kaninan an mga atang huling nagrerepresentar iyan sa perpektong atang ni Jesus. Apuwera diyan, sa lambang klase nin dulot, o atang, may espesipikong prosedimiyento na dapat sunudon. Halimbawa, mangnuhon kun ano an hinahagad sa sarong ina na may bagong mundag na aki. Sinasabi kan Levitico 12:6: ‘Kun makaagi na an saiyang mga aldaw nin paglilinig manungod sa aking lalaki o manungod sa aking babayi, madara siya nin sarong kordero na sangtaon pa sana [para] sa atang asin sarong [salampati] o saro man na agbaan na pantubos, sa [saserdote] sa tata kan tabernakulo kan pagpatotoo.’ Espesipiko an mga kahagadan nin Diyos, pero hiling-hiling sa Ley an saiyang pagkamuot asin pagkarasonable. Kun dai kaya kan ina an sarong karnero, puwede siyang magdulot nin duwang agbaan o duwang salampati. (Lev. 12:8) Dawa pobre, namumutan asin inaapresyar man ni Jehova an parasambang ini arog kan saro na nakakatao nin mas mahal na dulot. Ano an manunudan ta digdi?

¹² Sinadol ni apostol Pablo an mga kapagtubod na magdulot sa Diyos nin ‘atang nin pag-umaw.’ (Heb. 13:15) Maninigo tang gamiton an satong mga ngabil sa pagpahayag kan banal na pangaran ni Jehova sa publiko. Ginagamit kan satong mga tugang na púla an lengguwaheng pasenyas tanganing magtao nin siring na pag-umaw sa Diyos. An mga Kristiyanong dai makahali sa harong inuumaw siya paagi sa pagpapatotoo sa surat saka telepono asin paghuhulit sa mga katabang asin bisita. An satong atang  nin pag-umaw ki Jehova paagi sa pagpamidbid ta kan saiyang pangaran asin pagbalangibog kan maugmang bareta maninigong nakadepende sa satong salud asin abilidad. Pero, dapat na pinakamarahay an itatao ta.—Roma 12:1; 2 Tim. 2:15.

13. Taano ta dapat tang ireport an mga nagigibo ta sa ministeryo?

¹³ Namumutan ta si Jehova kaya gikan sa buot niyatong idinudulot sa saiya an satong personal na mga atang nin pag-umaw. (Mat. 22:37, 38) Pero hinahagad sa sato na ireport an satong mga nagigibo sa ministeryo. Kaya, paano ta maninigong mansayon an areglong ini? An pagreport kada bulan pagpapahiling kan satong diyosnon na debosyon. (2 Ped. 1:7) Pero dai kita dapat maobligar na maggamit nin dakul na oras sa ministeryo tangani sanang makapagreport nin halangkaw. An totoo, an parahayag na nasa nursing home o dai nang gayo makahiro puwedeng magreport dawa 15 minutos imbes na bilog na oras. Pinapahalagahan ni Jehova an mga minutong iyan huling iyan an pinakamakakayang idulot kan parahayag asin kapahayagan iyan kan pagkamuot niya ki Jehova saka pasasalamat sa pribilehiyo na maglingkod bilang saro sa mga Saksi Niya. Arog kan mga Israelitang idto na huli sa kamugtakan sa buhay dai makapagdulot nin mas mahal na atang, an mga lingkod ni Jehova na may mga limitasyon makakapagreport pa man giraray. Asin an report kan lambang saro sa sato nakakaiba sa total na report sa bilog na kinaban, na nakakatabang sa organisasyon na patiinot na magplano nin mga gigibuhon para sa paghuhulit kan Kahadian. Kaya, sobra daw an kahagadan na ireport ta an mga nagigibo ta sa paghuhulit?

14. Ipaliwanag kun taano ta maninigo niyatong siyasaton an satong kaugalian sa pag-adal.

¹⁴ Pagkatapos tang pag-ulayan an nagkapirang mahalagang leksiyon sa Levitico, tibaad masabi mo, ‘Mas nasasabutan ko na ngunyan kun taano ta iiniba sa ipinasabong na Tataramon nin Diyos an librong ini.’ (2 Tim. 3:16) Tibaad mas determinado ka na ngunyan na magin banal, bako sanang huli ta kahagadan iyan ni Jehova, kundi huling maninigo sa saiya an maigot na paghihinguwa mong mapaugma siya. Tibaad huli sa mga nanudan mo sa Levitico mas gusto mo na ngunyan na pag-adalan nin mas hararom an iba pang kabtang kan Bibliya. (Basahon an Talinhaga 2:1-5.) Siyasaton na may pagpamibi an kaugalian mo sa pag-adal. Siguradong gusto mong akuon ni Jehova an saimong mga atang nin pag-umaw. Tinutugutan mo daw na makadisturbo asin makaulang sa saimong espirituwal na pag-uswag an mga programa sa telebisyon, video game, isport, o libangan? Kun iyo, makakatabang na marhay sa saimo an paghurop-hurop sa mga sinabi ni apostol Pablo sa libro nin Hebreo.

15, 16. Taano ta prangkang marhay si Pablo sa surat niya sa Hebreong mga Kristiyano?

¹⁵ Prangka nanggad si Pablo sa surat niya sa kapwa niya Hebreong mga Kristiyano. (Basahon an Hebreo 5:7, 11-14.) Diretsahan an mga tataramon kan apostol! Sinabi niya sa sainda na nagin “maluya” sinda sa pagdangog. Taano ta nagin prangkang marhay si Pablo? Ipinapahiling niya an pagkamuot asin pagmakulog ni Jehova  para sa mga Kristiyanong idto na kontento na sana sa espirituwal na gatas. Mahalagang marhay na aram ta an pundamental na mga katukduan sa Bibliya. Pero, kaipuhan an “matagas na kakanon” tanganing umuswag sa espirituwal na pagkamaygurang bilang Kristiyano.

¹⁶ Imbes na umuswag an mga Hebreo tanganing makapagtukdo sa iba, sinda pa an kaipuhan na tukduan. Taano? Huling linilikayan ninda an “matagas na kakanon.” Haputon an sadiri: ‘Tama daw an sabuot ko sa matagas na espirituwal na kakanon? Gustong-gusto ko daw na pag-adalan iyan? O linilikayan ko daw na mamibi asin pag-adalan nin hararom an Bibliya? Kun iyo, may problema daw ako sa sakong kaugalian sa pag-adal?’ Bako sanang paghuhulit sa mga tawo an dapat tang gibuhon kundi dapat man kitang magtukdo asin gumibo nin disipulo.—Mat. 28:19, 20.

17, 18. (a) Taano ta dapat na regular kitang magkakan nin matagas na espirituwal na kakanon? (b) Paano ta maninigong mansayon an paggamit nin inumon na de-alkohol bago an Kristiyanong mga pagtiripon?

¹⁷ Tibaad nasasakitan an dakul sa sato na pag-adalan an Bibliya. Siyempre, dai man pinapakonsiyensiya ni Jehova an saiyang mga lingkod tangani sanang mag-adal sinda. Pero, baga man haloy na kitang dusay na lingkod nin Diyos o baguhan pa sana, dapat na padagos kitang magkakan nin matagas na espirituwal na kakanon. Mahalagang marhay ini kun gusto tang magdanay na banal.

¹⁸ Tanganing magin banal, dapat tang maingat na siyasaton an Kasuratan asin gibuhon an hinahagad sa sato nin Diyos. Pag-isipan an nangyari sa mga aki ni Aaron na si Nadab asin Abihu, na ginadan huli sa pagdulot nin “iba man na kalayo,” na tibaad mantang burat sinda. (Lev. 10:1, 2) Mangnuhon an sinabi nin Diyos ki Aaron. (Basahon an Levitico 10:8-11.) Nangangahulugan daw an tekstong ini na dai kita puwedeng mag-inom nin ano man na inumon na de-alkohol bago mag-atender sa Kristiyanong pagtiripon? Pag-isipan an mga puntong ini: Dai kita sakop kan Ley. (Roma 10:4) Sa ibang mga nasyon, nag-iinom nin tama sanang arak an satong mga kapagtubod pag nagkakakan sinda bago mag-atender sa pagtiripon. Apat na kopa nin arak an ginagamit sa Paskuwa. Kan punan ni Jesus an Memoryal, pinainom niya an saiyang mga apostol nin arak na nagrerepresentar sa saiyang dugo. (Mat. 26:27) Kinokondenar kan Bibliya an sobrang pag-inom asin pagburat. (1 Cor. 6:10; 1 Tim. 3:8) Asin dakul na Kristiyano an huli sa saindang konsiyensiya dai talaga nag-iinom nin inumon na de-alkohol bago makikabtang sa ano man na sagradong paglilingkod. Pero, magkakaiba an sitwasyon sa lambang nasyon, asin an importante iyo na an mga Kristiyano mapaglain ‘an banal asin an bakong banal’ tanganing gumawi sindang may kabanalan na nakakapaugma sa Diyos.

19. (a) Paano ta magigibong magin makahulugan an satong pampamilyang pagsamba asin personal na pag-adal? (b) Ano an determinado mong gibuhon tanganing magdanay na banal?

¹⁹ Kadakul na mahalagang leksiyon an manunudan ta kun pag-aadalan ta an Tataramon nin Diyos. Gamiton an makukuang mga kasangkapan sa pag-research tanganing magin makahulugan an saindong pampamilyang pagsamba asin personal na pag-adal. Pararumon an kaaraman mo dapit ki Jehova asin sa mga katuyuhan niya. Magin mas dayupot sa saiya. (Sant. 4:8) Mamibi sa Diyos arog kan salmista na nag-awit: ‘Bukasan mo an sakuyang mga mata, asin mahihiling ko an mga ngangalasan nin saimong pagbuot.’ (Sal. 119:18) Dai nuarin man ikompromiso an mga ley asin prinsipyo sa Bibliya. Gikan sa buot na sunudon an kadurudakulaing ley kan Saro na Banal, si Jehova, asin maigot na makikabtang sa banal na ‘ebanghelyo nin Diyos.’ (1 Ped. 1:15; Roma 15:16) Magdanay na banal sa maribok na huring mga aldaw na ini. Gabos lugod kita magin banal sa satong paggawi asin suportaran an soberaniya kan satong banal na Diyos, si Jehova.