NATAPOS ni Guy Hollis Pierce, miyembro kan Namamahalang Grupo kan mga Saksi ni Jehova, an saiyang daganon na buhay kan Martes, Marso 18, 2014. Nakamtan niya an saiyang paglaom na magin saro sa binuhay liwat na mga tugang ni Cristo sa edad na 79.—Heb. 2:10-12; 1 Ped. 3:18.

Namundag si Guy Pierce sa Auburn, California, U.S.A., kan Nobyembre 6, 1934, asin nabawtismuhan kan 1955. Nagpakasal sinda kan namumutan niyang agom na si Penny kan 1977 asin nagpamilya. An pagigin may pamilya niya an nakatabang sa saiya na magin garo sarong ama sa iba. Kan 1982, sibot na sinda ni Penny sa pagpapayunir, asin kan 1986 pinunan niya an 11 taon na paglilingkod bilang paraataman nin sirkito sa Estados Unidos.

Kan 1997, nagin miyembro kan pamilyang Bethel sa Estados Unidos si Guy asin Penny Pierce. Naglingkod si Brother Pierce sa Service Department, asin kan 1998 ninombrahan siya bilang paratabang sa Personnel Committee kan Namamahalang Grupo. Kan Oktubre 2, 1999, iinanunsiyar an pagnombra ki Brother Pierce bilang miyembro kan Namamahalang Grupo sa taunan na miting kan Watch Tower Bible and Tract Society of Pennsylvania. Sa nakaagi pa sanang mga taon, naglingkod siya sa Personnel Committee, Writing Committee, Publishing Committee, asin Coordinators’ Committee.

An mga tawo na lain-lain an pinaghalian asin kultura napaparani an buot ki Brother Pierce huli sa makikatuod niyang ngirit asin pagigin mapagpangisi. Pero, an mga kuwalidad na gustuhon kan iba sa saiya iyo an saiyang pagkamuot, kapakumbabaan, paggalang sa matanos na mga ley patin prinsipyo, asin an saiyang lubos na pagtubod ki Jehova. Para ki Guy Pierce, mas posible pang dai sumirang an saldang kisa dai mautob an mga panuga ni Jehova, asin gusto niyang ipaaram an katotoohan na iyan sa bilog na kinaban.

Si Brother Pierce daing kapagalan sa paglilingkod ki Jehova, na amay na minabangon pagkaaga asin sa parati nagtatrabaho sagkod sa matanga. Haros nalibot na niya an bilog na kinaban tanganing pakusugon an saiyang Kristiyanong mga tugang, asin pirmi siyang may panahon para sa mga kapwa Bethelite asin iba pa na gusto siyang makaiba o gustong maghagad sa saiya nin sadol saka tabang. Nagigirumduman pa man giraray kan mga tugang an saiyang pagigin mapag-istimar, pakikikatuod, asin mga pagparigon nin buot na hali sa Bibliya dawa pirang taon nang nakalihis iyan.

Nawalat kan satong tugang asin namumutan na katuod an saiyang agom, anom na aki, siring man mga makuapo saka makuapo sa tuhod. Kadakul man siyang aki sa espirituwal. Itinao ni Mark Sanderson, kapwa miyembro kan Namamahalang Grupo, an sarong pahayag manungod ki Brother Pierce kan Sabado, Marso 22, 2014, sa Brooklyn Bethel. Kaiba sa mga sinambit niya an langitnon na paglaom ni Brother Pierce asin binasa niya an sinabi ni Jesus: ‘Sa harong nin sakong Ama [dakul] an mga untukan. Kun ako magduman asin mag-andam saindo nin lugar, ako madigdi liwat asin iiiba ko kamo, tanganing kun sain ako, duman man kamo. Asin sa dudumanan ko, tatao kamo kan dalan.’—Juan 14:2-4.

Totoong namumundo kitang marhay sa pagkawara ni Brother Pierce. Pero, nauugma kita na ‘tatao siya kan dalan’ pasiring sa permanente niyang “untukan.”