SARONG grupo nin hoben na mga Kristiyano an nagplanong magsine. Nadangog ninda na may pelikula na talagang nagustuhan kan dakul sa mga kaedad ninda sa eskuwelahan. Pag-abot ninda sa sinehan, nahiling ninda sa poster an garo baga may kapangyarihan na mga armas asin mga babaying haros huba na. Ano an gigibuhon ninda? Masine pa man giraray daw sinda?

Ipinapahiling kan sitwasyon na ini na dakul kitang pinagdedesisyunan na puwedeng makarahay o makaraot sa satong espirituwalidad asin sa satong relasyon ki Jehova. Kun minsan, may nakaplano ka nang gibuhon, pero pinag-isipan mo giraray iyan, asin nagbago an isip mo. Iyan daw huling paburubago sana an isip mo o tibaad iyan an tamang gibuhon?

An pagkamuot ta ki Jehova an nagpahiro sa sato na idusay an satong buhay sa saiya asin magpabawtismo. Udok sa pusong minamawot niyato na magdanay na maimbod sa Diyos. Pero, determinado an satong kaiwal na si Satanas na Diyablo na rauton an satong integridad. (Kap. 12:17) Nagdesisyon kita na maglingkod ki Jehova asin sunudon an mga tugon niya. Kun dapit sa satong pagdusay ki Jehova, makamumundo nanggad kun magbago kita nin isip! Buhay ta an puwedeng magin karibay kaiyan.

Labing 26 na siglo na an nakaagi, si Hading Nabucodonosor kan Babilonya nagtugdok nin dakulaon na imahen na bulawan asin ipinagbuot niya sa gabos na maghuruhod asin magsamba diyan. An siisay man na dai magsunod iaapon sa nagkakalayong hurno. Dai nagsunod an tulong may takot sa Diyos na mga parasamba ki Jehova na si Sadrac, Mesac, asin Abednego. Huling habo nindang maghuruhod sa imahen na iyan, inapon sinda sa nagkakalayong hurno. Milagroso sindang ilinigtas ni Jehova, pero nagin andam man sindang magadan kisa ikompromiso an desisyon nindang maglingkod sa Diyos.—Dan. 3:1-27.

 Kan huri, si propeta Daniel man nagmaigot sa pagpamibi dawa tinakot siyang iaapon sa lungib kan mga leon. Iyo, dai niya ipinundo an nakaugalian na niyang pagpamibi ki Jehova nin tulong beses kada aldaw. Dai binago ni Daniel an determinasyon niya na sambahon an tunay na Diyos. Huli kaiyan, ilinigtas an propeta sa ‘[kuko] kan mga leon.’—Dan. 6:1-27.

Inuutob man kan mga lingkod nin Diyos ngunyan an saindang pagdusay sa saiya. Sa sarong eskuwelahan sa Aprika, sarong grupo nin mga estudyante na mga Saksi ni Jehova an nagsayumang makikabtang sa sarong seremonya tanganing sambahon an sarong simbolo kan nasyon. Tinakot sinda na papahalion sa eskuwelahan kun dai sinda mapartisipar kaiba kan ibang mga estudyante. Dai nahaloy pagkatapos kaiyan, nagbisita sa lugar ninda an ministro nin edukasyon asin kinaulay an nagkapira sa mga estudyanteng Saksi. Magalang pero daing takot na ipinaliwanag kan hoben na mga Saksing ini an saindang paninindugan. Puon kaidto, dai na giraray nagin isyu an bagay na iyan. Nakakapag-eskuwela na an satong hoben na mga tugang duman na mayo nin nagpipirit sa sainda na ikompromiso an relasyon ninda ki Jehova.

Konsideraron man si Joseph, na an agom nagsakit huli sa kanser asin biglang nagadan. Nasabutan asin iginalang kan pamilya ni Joseph an mga gusto niyang mangyari sa paglubong. Pero mayo sa katotoohan an pamilya kan saiyang agom, asin gusto nindang gibuhon an partikular na mga tradisyon sa paglubong, kaiba na an mga ritwal na hinahabuan nin Diyos. Sinabi ni Joseph: “Kan nahiling ninda na dai ako makompromiso, pinurbaran nindang impluwensiyahan an mga aki ko asin sinda nanindugan man. Pinurbaran man ninda na gibuhon sa harong mi an kostumbre ninda na pagbelar, pero sinabi ko sa sainda na kun ipipirit ninda an pagbelar, gibuhon ninda iyan bako sa harong mi. Aram ninda na bakong kauyon kan pagtubod ko asin kan sakong agom an pagbelar ninda, kaya pagkatapos nin halawig na mga pag-uulay, ginibo ninda iyan sa ibang lugar.

“Sa masakit na panahon na ini nin pagmundo, udok akong namibi ki Jehova na lugod tabangan niya an samong pamilya na dai mabalga an saiyang mga ley. Dinangog niya an mga pamibi ko asin tinabangan kaming magdanay na marigon dawa may panggigipit.” Para ki Joseph asin sa mga aki niya, dai ninda magigibong magbago nin isip kun dapit sa saindang pagsamba.

Dai nahaloy pagkatapos kan Paskuwa kan 32 C.E., sarong babaying taga Sirofenicia an nagdulok ki Jesu-Cristo sa lugar nin Sidon. Pauruutro siyang nakiulay ki Jesus na palayason an demonyo na yaon sa aki niyang babayi. Sa primero, dai naggirong si Jesus. Sinabi niya sa saiyang mga disipulo: ‘Dai ako sinugo [sa kiisay man] kundi sa mga karnerong nalagalag sa harong nin Israel.’ Kan nagparapirit siya, nagsabi si Jesus: ‘Dai maninigo na kuanon an tinapay nin mga aki, asin iapon sa mga ayam.’ Huling makusog talaga an pagtubod, nagsimbag an babayi: ‘Iyo man nanggad Kagurangnan, huli ta minsan an mga ayam nagkakakan kan mga rakdag na nahuhulog sa lamesa nin saindang mga kagurangnan.’ Pinaonrahan ni Jesus an pakiulay kan babayi asin pinaumayan an aki kaini.—Mat. 15:21-28.

Sa ginibo ni Jesus, inarog niya si Jehova na andam na magbago nin isip kun itinutugot iyan kan sitwasyon. Halimbawa, nagdesisyon an Diyos na puhuon an mga Israelita kan maggibo sinda nin bulawan na ugbon na baka, pero tinugutan niya na makimahirak sa Saiya si Moises na pag-isipan giraray an Saiyang desisyon.—Ex. 32:7-14.

Inarog ni apostol Pablo si Jehova asin si Jesus. May panahon kaidto na sa hiling ni Pablo dai dapat iiba si Juan Marcos sa pagbiyahe ninda sa pagmimisyonero huling binayaan kaini si Pablo saka si Bernabe kan inot nindang pagbiyahe. Pero kan huri, minalataw na nahiling ni Pablo an pag-uswag ni Marcos asin na makakatabang ini sa saiya. Kaya sinabi ni Pablo ki Timoteo: ‘Kuaha si Marcos asin iiba mo, huli ta magagamit ko siya sa paglilingkod.’—2 Tim. 4:11.

 Kumusta man kita? Bilang pag-arog sa satong mahihirakon, mapasensiya, asin mamumuton na Ama sa langit, tibaad kun minsan tama man na magbago kita nin isip. Halimbawa, puwede tang baguhon an paghiling ta sa iba. Bakong arog ni Jehova asin ni Jesus, bako kitang perpekto. Kun sinda ngani andam na magbago, bako daw na dapat man niyatong ikonsiderar an kamugtakan nin iba asin baguhon an satong isip kun kaipuhan?

Puwede ta man baguhon an satong isip kun pinag-iisipan an teokratikong mga pasuhan. An ibang tinutukduan sa Bibliya na haloy-haloy nang nag-aatender sa mga pagtiripon kan kongregasyon tibaad nag-aatraso pang magpabawtismo. O may mga tugang na tibaad nag-aalangan na magpayunir, dawa nasa kamugtakan man sindang magpahiwas kan saindang ministeryo. Asin may mga brother man na garo habong umabot nin mga pribilehiyo sa kongregasyon. (1 Tim. 3:1) An sitwasyon mo daw kapareho kan saro sa mga iyan? Mamumuton kang inaagda ni Jehova na kamtan an siring na mga pribilehiyo. Kaya taano ta dai ka magbago nin isip asin magin maugma sa paglilingkod ki Jehova saka sa iba?

Ini an sinabi ni Ella dapit sa paglilingkod niya sa sarong sangang opisina kan Mga Saksi ni Jehova sa Aprika: “Kan inot akong mag-abot sa Bethel, dai ako sigurado kun mahaloy ako diyan. Gusto kong paglingkudan si Jehova nin bilog kong kalag, pero dayupot akong marhay sa pamilya ko. Kan primero, pungawon akong marhay sa pamilya ko! Pero pinakusog ako kan kaiba ko sa kuwarto, kaya nagdesisyon akong dai maghali. Pagkatapos nin 10 taon sa Bethel, gusto kong magdanay sa sakong asignasyon diyan tanganing padagos na makapaglingkod sa mga tugang sagkod na mapupuwede.”

Nagigirumduman mo an nangyari ki Cain kan mauri siya asin maanggot na marhay sa  tugang niya? Sinabihan nin Diyos an nagmumuto-mutong si Cain na siya uuyunan giraray kun magibo siya nin marahay. Sinadol nin Diyos si Cain na daugon an kasalan na nakaabang “sa tata.” Puwede man kutanang baguhon ni Cain an saiyang ugali asin kaisipan, pero mas pinili niyang baliwalaon an sadol nin Diyos. Makamumundo, ginadan ni Cain an saiyang tugang asin siya an nagin inot na tawong paragadan!—Gen. 4:2-8.

Pag-isipan man an halimbawa ni Hading Uzias. Kan primero, ginibo niya an tama sa paghiling ni Jehova asin padagos na hinanap an Diyos. Pero makamumundo ta rinaot ni Uzias an saiyang marahay na rekord kan magin mapalangkaw siya. Naglaog siya sa templo tanganing magdulot nin insenso dawa bako man siyang saserdote. Kan pinatanidan siya kan mga saserdote na dai paggibuhon an kapangahasan na iyan, nagbago daw an isip niya? Dai. ‘Naanggot’ si Uzias asin dai inintindi an patanid ninda. Huli kaiyan, tinawan siya ni Jehova nin hilang na leproso.—2 Cron. 26:3-5, 16-20.

May mga pagkakataon na talagang dapat tang baguhon an satong isip. Ini an sarong halimbawa sa presenteng panahon. Nabawtismuhan si Joachim kan 1955, pero kan 1978 natiwalag siya. Pakalihis nin labing 20 taon, nagsulsol siya asin ibinalik bilang Saksi ni Jehova. Kasuarin pa sana, hinapot siya nin sarong elder kun taano ta naghalat siya nin arog kaiyan kahaloy bago siya nagsurat na gusto na niyang makabalik. Nagsimbag si Joachim: “Anggot ako saka mapalangkaw kaidto. Nagbabasol ako ta naghalat ako nin arog kaiyan kahaloy. Kan tiwalag ako, aram kong itinutukdo kan mga Saksi ni Jehova an katotoohan.” Kinaipuhan niyang baguhon an saiyang kaisipan asin magsulsol.

Tibaad mapaatubang kita sa sitwasyon na kaipuhan tang magbago nin isip asin paggawi. Lugod na magin andam kitang gibuhon iyan tanganing mapaugma si Jehova.—Sal. 34:8.