MGA pirang taon na an nakaagi, maginhawang namumuhay an mag-agom na si Cesar asin Rocio sa California, kun sain bilog na panahon na nagtatrabaho si Cesar sa linya nin heating, ventilation, asin air-conditioning. Nagtatrabaho man si Rocio nin part-time sa sarong klinika nin doktor. May sadiri sindang harong asin mayo sindang aki. Pero, may nangyari na nakapabago sa buhay ninda. Ano iyan?

Kan Oktubre 2009, nagsurat an sangang opisina kan Estados Unidos sa gabos na kongregasyon sa bilog na nasyon tanganing imbitaran an skilled na mga boluntaryo na mag-aplay para sa temporaryong paglilingkod sa Bethel tanganing magtabang sa pagpahiwas kan mga pasilidad kan sangay sa Wallkill, New York. Inimbitaran na mag-aplay pati idtong mga lampas na sa edad na inaako sa Bethel. “Huli sa edad mi, aram mi na puwedeng ini na sana an pagkakataon na makapaglingkod kami sa Bethel,” an sabi ni Cesar asin Rocio. “Maski anong mangyari, dai mi papalampason an oportunidad na ini!” Ipinasa tulos kan mag-agom an aplikasyon ninda.

Nakalihis na an sarong taon, pero dai pa naiimbitaran sa Bethel si Cesar asin Rocio. Pero may ginibo pa sinda tanganing maabot an saindang pasuhan—pinasimple ninda an saindang buhay. “Ginibo ming studio apartment an samong garahe tanganing maipaarkila mi sa iba an samong harong. Dangan, naghali kami sa 200 metro kuwadrado ming pangarap na harong, na duwang taon mi pa sanang ipinatugdok, asin nagbalyo kami sa 25 metro kuwadrado ming apartment. Huli sa mga pagbabagong ini na ginibo mi,” an sabi ni Cesar, “mas magigin andam kami na akuon an imbitasyon sa Bethel, kun mag-abot an pagkakataon na iyan.” Ano an sunod na nangyari? “Sambulan pagkalipat mi sa sadit ming apartment,” an sabi ni Rocio, “nakaresibi kami nin imbitasyon na maglingkod bilang temporaryong mga boluntaryo sa Wallkill. Malinaw samo na huling pinasimple mi an samong buhay, tinawan mi si Jehova nin dahilan na bendisyunan kami.”

Arog ni Cesar asin Rocio, dakul na tugang an nagsasakripisyo tanganing makatabang sa mga pagtugdok na ginigibo sa New York State. An dakul sa sainda nagtatabang sa pagpahiwas sa Wallkill, mantang dakul na iba pa an nagkapribilehiyong magtabang  sa pagtugdok kan pambilog na kinaban na headquarters sa Warwick. * Binayaan nin dakul na mag-agom an saindang magayon na harong, magayon na trabaho, asin pati ataman na mga hayop tanganing mas lubos na makapaglingkod ki Jehova. Binendisyunan daw ni Jehova an siring na pagsasakripisyo? Iyo nanggad!

Halimbawa, ipinabakal ni Way na sarong elektrisyan, asin ni Debra, pareho nang ma-60 anyos, an saindang harong asin an kadaklan na pagsadiri ninda sa Kansas asin nagbalyo sa Wallkill tanganing maglingkod bilang commuter na mga Bethelite. * Dawa ngani kinaipuhan nindang gumibo nin mga pagbabago sa buhay ninda, para sa sainda sulit nanggad an mga pagsakripisyong iyan. Mapadapit sa saiyang asignasyon sa Bethel, si Debra nagsabi: “Kun minsan an pagmati ko yaon ako sa mga eksena nin pagtugdok sa Paraiso na mahihiling sa satong mga publikasyon!”

Ipinabakal ni Melvin asin Sharon an harong ninda asin mga pagsadiri sa South Carolina tanganing makatabang sinda sa Warwick. Dawa ngani bakong madali an ginibo nindang mga pagsakripisyo, ibinilang kan mag-agom na pribilehiyo an makikabtang sa makasaysayan na proyektong ini. Sinabi ninda: “Talagang nakakaugma na aram mong may ginigibo kang kapaki-pakinabang sa pambilog na kinaban na organisasyon.”

Si Kenneth na retiradong construction worker asin si Maureen, na parehong mga 55 anyos, nagbalyo hali sa California tanganing makatabang sa proyekto sa Warwick. Tanganing makalipat, pinakiulayan ninda an sarong sister sa kongregasyon na iyo an mag-asikaso kan harong ninda asin pinakiulayan man ninda an saindang mga kapamilya na tumabang sa pag-ataman sa gurang nang ama ni Ken. Pinagbasulan daw ninda an saindang mga pagsasakripisyo tanganing makapaglingkod sa Bethel? Dai nanggad! “Nakinabang kaming marhay,” an sabi ni Ken. “Dai lamang daw kami nasakitan? Iyo man, pero kontentong-kontento kami sa buhay mi, asin talagang irinerekomendar mi man an paglilingkod na ini sa iba.”

Kaipuhan na pangganahan kan kadaklan sa mga nagpresentar kan saindang sadiri an nagkapirang ulang. Halimbawa, si William asin Sandra, na parehong labi nang 60 anyos, maugma asin marahay na an buhay sa Pennsylvania. Makusog an kompanya ninda na naggigibo nin mga piyesa para sa mga makinarya asin may 17 sindang trabahador. Magpuon kan aki pa sinda, nakaasosyar na sinda sa kongregasyon ninda, asin kadaklan sa mga paryente ninda nakaistar sa lugar na iyan. Kaya kan magkaoportunidad sinda na maglingkod bilang mga commuter sa Wallkill, aram ninda na mangangahulugan iyan na babayaan  na ninda an haros gabos na kamidbid ninda asin an gabos na bagay na pamilyar na sa sainda. “Daing duda na an talagang pinakadipisil sa samo iyo na bayaan an mga kinatudan mi na,” an sabi ni William. Pero pagkatapos nin dakul na pamibi, nagdesisyon an mag-agom na idagos an pagbalyo—sarong bagay na dai ninda pinagbasulan. “Daing kapantay an kaugmahan na magkaigwa nin direktang kabtang asin maglingkod kaiba kan pamilyang Bethel,” an sabi ni William. “Mas maugma kami ngunyan ni Sandra kisa kasuarin man!”

Si Ricky na taga Hawaii, sarong project manager sa konstruksiyon, inimbitaran na maglingkod bilang commuter na Bethelite tanganing magtabang sa proyekto sa Warwick. Gusto kan saiyang agom na si Kendra na akuon niya an imbitasyon. Pero, an iniisip ninda iyo an ikakarahay kan saindang 11 anyos na aking si Jacob. Iniisip ninda kun tama na lumipat an pamilya ninda sa New York asin kun makakaya kan saindang aki na mamuhay sa lugar na ibang marhay.

“An saro sa priyoridad mi iyo na makahanap nin kongregasyon na igwang mga hoben na marahay an espirituwalidad,” an sabi ni Ricky. “Gusto ming magkaigwa si Jacob nin dakul na marahay na kairiba.” An nangyari, an naasosyaran nindang kongregasyon dikit sana an mga aki pero igwa nin nagkapirang Bethelite. “Pagkatapos kan inot ming pag-atender, hinapot ko si Jacob kun ano an masasabi niya sa bagong kongregasyon, lalo na ta mayo siyang kaedad,” an sabi ni Ricky. “An simbag niya sako, ‘Dai ka po maghadit, Pa. Mga hoben na brother na Bethelite po an magigin mga amigo ko.’”

Iyo man nanggad, inamigo kan mga Bethelite si Jacob. Ano an nagin epekto kaini? “Sarong banggi, nag-agi ako sa kuwarto kan aki ko tapos narisa kong bukas pa an ilaw niya,” an sabi ni Ricky. “An huna ko madadakop ko siyang nagkakawat nin video game sa gadyet niya, pero nagbabasa palan siya nin Bibliya! Kan haputon ko si Jacob kun ano an ginigibo niya, nagsimbag siya, ‘Garo po ako Bethelite, asin babasahon ko an Bibliya nin sarong taon.’” Siyempre, ugmahon si Ricky asin Kendra, bako sana ta nakakatabang si Ricky sa pagtutugdok sa Warwick kundi huli ta an pagbalyo ninda nakakatabang man sa espirituwal na pag-uswag kan aki ninda.—Tal. 22:6.

Maabot an panahon na matatapos an mga proyekto nin pagtutugdok sa Wallkill asin Warwick, kaya aram kan mga naimbitaran na magtabang na temporaryo an paglilingkod ninda sa Bethel. Nahahadit daw na marhay an mga tugang na ini kun masain na sinda o kun ano an gigibuhon ninda pagkatapos kaiyan? Dai lamang! An sabuot kan dakul sa sainda arog kan sabuot kan mag-agom na labi nang 50 anyos hali sa Florida. Si John, sarong construction manager, asin an saiyang agom na si Carmen parehong naglilingkod  bilang temporaryong mga boluntaryo sa Warwick. Sinda nagsabi: “Nahiling mi kun paano inasikaso ni Jehova an espesipikong mga pangangaipo mi sagkod ngunyan. Inisip mi na siguradong dai kami dinara digdi ni Jehova ngunyan tangani sanang pabayaan pagkatapos.” (Sal. 119:116) Si Luis, na nagdidisenyo nin mga fire sprinkler system, naglilingkod sa Wallkill kaiba an agom niyang si Quenia. An sabi ninda: “Nahiling mi na kun paano abundang itinatao ni Jehova an mga pangangaipo mi sa materyal. Dawa ngani dai mi aram kun paano, kun nuarin, o kun sain, may tiwala kami na padagos niya kaming aatamanon.”—Sal. 34:10; 37:25.

An kadaklan sa mga nagtatabang sa pagtugdok sa New York may mga rason kuta na dai magboluntaryo. Pero binalo ninda si Jehova—arog kan pag-agda niya sa gabos: ‘Balua nindo ako asin mahihiling nindo na bubukasan ko an mga bintana nin kalangitan dangan iuula ko sa saindo an nagsusupay na mga marahay na bagay.’—Mal. 3:10, An Marahay na Bareta Biblia.

Babaluon mo man daw si Jehova tanganing maeksperyensiyahan an nagsusupay na bendisyon niya? Mapagngayo-ngayong aramon kun ano an magigibo mo tanganing magkaigwa nin kabtang sa nakakaugmang gibuhon nin pagtutugdok ngunyan, sa New York man o sa iba pang teokratikong mga proyekto nin pagtutugdok, asin mamamatian mo mismo kun paano ka tatawan nin balos ni Jehova.—Mar. 10:29, 30.

An klaseng ini nin paglilingkod irinerekomendar na marhay ni Dale, sarong civil engineer, asin ni Cathy, na mga taga Alabama asin nagboboluntaryo sa Wallkill. Sinabi ninda: “Kun may kusog nin buot ka na bayaan an mga kinatudan mo na, magkakaoportunidad kang mahiling kun paano minahiro an espiritu ni Jehova.” Asin ano an kaipuhan tanganing makapagboluntaryo ka? Sinabi ni Dale: “Pasimplehon, pasimplehon, asin pasimplehon pa an buhay. Nungka mong pagbabasulan iyan!” Si Gary na taga North Carolina, 30 taon nang may eksperyensiya sa construction management. Siya asin an agom niya, si Maureen, nagsabi na an saro sa mga bendisyon na nakakamtan ninda sa Warwick iyo an “makamidbid saka makatrabaho an dakul na marahayon na mga tugang na ginagamit an saindang buhay sa paglilingkod ki Jehova sa Bethel.” Sinabi pa ni Gary: “Tanganing makapaglingkod sa Bethel, kaipuhan na magin simple an saimong buhay, na iyo an pinakamarahay na klase nin buhay mantang nasa sistemang ini nin mga bagay.” Si Jason, na nagtatrabaho sa sarong electrical contractor, asin si Jennifer, na mga taga Illinois, nagsabi na an paglilingkod sa proyekto nin Bethel sa Wallkill an “saro sa pinakaharani sa magigin buhay na maeeksperyensiyahan mo sa bagong kinaban.” Sinabi pa ni Jennifer: “Maugmahon nanggad sa pagmati na pinapahalagahan ni Jehova an gabos na ginigibo mo asin ibinibilang niyang pasaray ta iyan para sa buhay na inaandam niya para sa sato. Sisiguraduhon ni Jehova na bebendisyunan ka nin labi-labi.”