1. Taano ta dapat tang papagdanayon na makusog an satong relasyon ki Jehova?

IKA daw sarong dusay asin bawtisadong Saksi ni Jehova? Kun iyo, igwa ka kan sarong mahalagang marhay na bagay—personal na relasyon sa Diyos. Pero, an relasyon na iyan inaatake kan kinaban ni Satanas saka puwedeng paluyahon kan sato mismong pagkabakong perpekto. Arog man kaini an sitwasyon kan gabos na Kristiyano. Kaya, dapat na papagdanayon tang makusog an satong relasyon ki Jehova sagkod sa pinakamakakaya ta.

2. (a) Ano an kahulugan kan tataramon na relasyon? (Hilingon an nota sa ibaba.) (b) Paano ta mapapakusog an satong relasyon ki Jehova?

² Gurano katotoo sa saimo an personal na relasyon mo ki Jehova? Gusto mo daw na pakusugon iyan? Sinasabi sa saimo kan Santiago 4:8 kun paano gigibuhon iyan: ‘Rumani kamo sa Diyos, asin siya marani sa saindo.’ Mangnuhon na duwa an kalabot digdi—ika asin si Jehova. * Mantang naggigibo kita nin paagi tanganing maparani sa  Diyos, magibo man siya nin paagi tanganing maparani sa sato. Kun pirmi ta ining gigibuhon, luway-luway na papakusugon kaini an satong relasyon ki Jehova. Bilang resulta, magigin totoong-totoo sa sato an relasyon na iyan. Mapapatalubo ta an kumpiyansa na arog kan ki Jesus kan sabihon niya: “An nagsugo sako totoo, asin . . . midbid ko siya.” (Juan 7:28, 29, BPV) * Pero, anong espesipikong mga paagi an magigibo mo tanganing maparani ki Jehova?

3. Paano kita makikikomunikar ki Jehova?

³ An regular na komunikasyon ki Jehova mahalagang marhay tanganing maparani sa saiya. Paano kita makikikomunikar sa Diyos? Buweno, paano ka nakikikomunikar sa amigo mo na nakaistar sa harayo? Tibaad paagi sa parating pagsusuratan asin pag-uulay sa telepono. Nakikipag-ulay ka man ki Jehova paagi sa parating pamimibi sa saiya. (Basahon an Salmo 142:2.) Masasabing tinutugutan mo si Jehova na makipag-ulay sa saimo kun regular mong binabasa an saiyang nasusurat na Tataramon asin hinuhurop-hurop iyan. (Basahon an Isaias 30:20, 21.) Kaya, pag-ulayan ta kun paano an komunikasyon nindo ni Jehova makakatabang tanganing kumusog asin magin mas totoong-totoo sa saimo an personal na relasyon mo sa saiya.

4, 5. Paano nakikipag-ulay sa saimo si Jehova paagi kan saiyang nasusurat na Tataramon? Magtao nin halimbawa.

⁴ Siguradong mauyon ka na an mga sinasabi sa Bibliya mensahe nin Diyos para sa gabos na tawo. Pero sinasabi man daw kan Bibliya kun paano ka mismo mapaparani ki Jehova? Iyo. Paano? Mantang regular mong binabasa asin pinag-aadalan an Bibliya, tawan nin atensiyon an reaksiyon mo sa sinasabi kaiyan asin isipon kun paano mo iyan ikakaaplikar sa saimong buhay; paagi kaini, tinutugutan mong kaulayon ka ni Jehova paagi sa saiyang Tataramon. Bilang resulta, mas mapaparani ka sa saiya.—Heb. 4:12; Sant. 1:23-25.

⁵ Halimbawa, basahon asin hurop-hurupon an sinabi ni Jesus na ‘dai kamo magtiripon nin mga kayamanan sa kinaban.’ Kun sa hiling mo nakapokus na an saimong buhay sa paggibo kan intereses kan Kahadian, mamamatian mo na nauugma sa saimo si Jehova. Pero, kun sa hiling mo kaipuhan mo pang pasimplehon an saimong buhay asin mas magpokus sa intereses kan Kahadian, tinatabangan ka ni Jehova na mahiling an puwede mong gibuhon tanganing mas maparani sa saiya.—Mat. 6:19, 20.

6, 7. (a) Ano an epekto kan pag-adal nin Bibliya sa pagkamuot ta ki Jehova asin sa pagkamuot niya sa sato? (b) Ano an dapat na magin katuyuhan ta pag personal kitang nag-aadal nin Bibliya?

 ⁶ Bako sanang mga bagay na puwede tang pauswagon sa espirituwal an maaaraman ta sa pag-adal sa Kasuratan. Pinapararom man kaiyan an satong pag-apresyar sa kawili-wiling personalidad ni Jehova, kaya lalo ta siyang mamumutan. Asin kun lalo tang mamumutan an Diyos, lalo man niya kitang mamumutan, dangan mas mákusog an relasyon ta sa saiya.—Basahon an 1 Corinto 8:3.

⁷ Pero, para maparani kita ki Jehova, mahalagang mag-adal kita na may tamang katuyuhan. Sinasabi kan Juan 17:3: ‘Ini iyo an buhay na dai nin katapusan, na sinda makamidbid saimo, na ika sana an tunay na Diyos, asin ki Jesu-Cristo na saimong sinugo.’ Kaya, an satong katuyuhan dapat na bako sanang kumua nin kaaraman kundi mas ‘mamidbid’ si Jehova bilang sarong Persona.—Basahon an Exodo 33:13; Sal. 25:4.

8. (a) Ano an tibaad magin reaksiyon nin nagkapira manungod sa ginibo ni Jehova ki Hading Azarias, arog kan sinabi sa 2 Hade 15:1-5? (b) Taano ta dai kita magdududa manungod sa mga ginigibo ni Jehova kun midbid niyato siyang marhay?

⁸ Mantang mas namimidbid ta si Jehova, dai kita nahahadit kun may nababasa kitang mga istorya sa Bibliya na bakong malinaw sa sato kun taano ta ginibo ni Jehova an sarong bagay. Halimbawa, ano an reaksiyon mo sa ginibo ni Jehova ki Hading Azarias nin Juda? (2 Ha. 15:1-5) Mangnuhon na dawa ngani ‘an banwaan nag-aatang pa giraray asin nagtututong nin mga pahamot duman sa mga haralangkaw na kamugtakan,’ si Azarias padagos na ‘naggibo kan matanos sa mga mata ni Jehova.’ Pero, pinadusahan ni Jehova an hadi paagi sa pagtao sa saiya nin leproso ‘sagkod kan aldaw kan saiyang kagadanan.’ Taano? Dai sinabi sa istoryang iyan. Magdududa daw kita o makuwestiyon kun taano ta pinadusahan ni Jehova si Azarias na garo baga mayo nin marahay na dahilan? Dai mangyayari iyan kun igwa kita nin hararom na kaaraman dapit sa dalan ni Jehova. Kaiba diyan an pakaaram na si Jehova pirming nagdidisiplina “nin tama sana.” (Jer. 30:11, NW) Sinisiyerto kaini sa sato na dawa dai ta aram kun taano ta arog kaidto an ginibo ni Jehova ki Azarias, makakapagtiwala kita na matanos an paghukom Niya.

9. Anong mga detalye an nagpapaliwanag kun taano ta pinadusahan ni Jehova nin leproso si Azarias?

⁹ Pero kun dapit sa pangyayaring iyan, igwa kita nin makukuang dagdag na mga detalye sa iba pang libro sa Bibliya. Si Hading Azarias inaapod man na Hading Uzias. (2 Ha. 15:7, 32) Sa kaparehong istorya na yaon sa 2 Cronica 26:3-5, 16-21, manunudan ta na kan inot ginibo ni Uzias an tama sa paghiling ni Jehova, pero sa huring kabtang kan saiyang buhay ‘luminangkaw an saiyang puso sa saiyang kagabaan.’ Pangahas niyang pinurbaran na gibuhon an trabaho na para sana sa mga saserdote. Pinagmaigutan kan 81 saserdote na pugulan siya asin sagwion. Pero, ano an nagin reaksiyon ni Uzias? Nagin mapalangkaw siya. ‘Naanggot’ siya sa mga saserdote. Kaya pinadusahan siya ni Jehova nin leproso!

10. Taano ta dai niyato pirming kaipuhan nin paliwanag sa mga ginigibo ni Jehova, asin paano niyato mapapakusog an pagtitiwala ta na pirming tama an ginigibo ni Jehova?

¹⁰ Pag-isipan kun ano an manunudan ta digdi. Paano kun mayo sa Tataramon nin Diyos nin ibang detalye na matao sa sato nin linaw, arog kan ibang halipot na istorya sa Bibliya? Kukuwestiyunon mo daw an pagigin matanos nin Diyos? O iisipon mo daw na igo na an impormasyon sa Bibliya tanganing siyertuhon sa sato na pirming tama an ginigibo ni Jehova, asin sa katunayan, siya mismo an nagtatao kan pamantayan sa kun ano an tama asin kun ano an sala? (Deut. 32:4) Mantang mas namimidbid ta si Jehova bilang sarong Persona, lalo man na márarom an pagkamuot asin pagpapahalaga ta sa saiya sagkod sa punto na dai na niyato kaipuhan nin paliwanag sa gabos na ginigibo niya. Makakasiyerto ka na  mas márarom an siring na pagpapahalaga mantang hinihinguwa mong pag-adalan asin hurop-hurupon an mga sinasabi sa saimo nin Diyos sa saiyang nasusurat na Tataramon. (Sal. 77:12, 13) Dangan, lalong mákusog asin magigin totoong-totoo an relasyon mo ki Jehova.

11-13. Paano ka makakasigurado na dinadangog ni Jehova an mga pamibi? (Hilingon an ritrato sa kapinunan kan artikulo.)

¹¹ Mas napaparani kita ki Jehova kun namimibi kita. Paagi kaiyan, inuumaw ta siya, pinapasalamatan, asin hinahagadan nin paggiya. (Sal. 32:8) Pero, tanganing magin totoo an saimong relasyon ki Jehova, dapat na kumbinsido kang dinadangog niya an mga pamibi.

¹² Naniniwala an iba na an pakinabang na nakukua sa pamibi nasa isip sana. Sinasabi ninda na kun sa pagmati mo sinimbag an saimong pamibi, iyan huli ta naisabi mo an saimong mga iniisip, nahiling mo kun ano an problema, asin naipokus mo an saimong isip sa paghanap nin solusyon. Pero apuwera diyan, paano ka makakasigurado na talagang dinadangog ni Jehova an sinserong mga pamibi mo?

¹³ Pag-isipan ini: Bago pa nagin tawo si Jesus, aktuwal niyang nahiling kun paano sinisimbag ni Jehova an mga pamibi kan Saiyang mga lingkod na tawo. Dangan, sa panahon kan saiyang ministeryo sa daga, ginamit ni Jesus an pamibi tanganing ipakipag-ulay sa saiyang Ama sa langit an mga namamatian niya. Mamimibi daw si Jesus—na kun minsan inaabot pa nin magdamlag—kun iniisip niyang dai man talaga nagdadangog si Jehova? (Luc. 6:12; 22:40-46) Tutukduan daw niya na mamibi an saiyang mga disipulo kun iniisip niyang nasa isip man sana an naitatabang kaiyan? Malinaw nanggad na aram ni Jesus na an pamibi totoong pakikipag-ulay ki Jehova. Sa sarong pamibi niya, sinabi ni Jesus: “Ama, nagpapasalamat ako saimo, ta dinadangog mo ako. Aram ko na danay mo akong dinadangog.” Makakapagtiwala man kita na si Jehova ‘naghihinanyog sa satong mga pamibi.’—Sal. 65:2; Juan 11:41, 42, BPV.

14, 15. (a) Paano kita makikinabang kun magigin espesipiko kita sa satong mga pamibi? (b) Paano nakatabang an mga pamibi nin sarong sister tanganing mapakusog an saiyang relasyon ki Jehova?

¹⁴ Kun espesipiko ka sa saimong mga pamibi, mas mahihiling mo an mga simbag ni Jehova, dawa kun daing gayo risa an mga iyan. Pag nahihiling  mo na sinisimbag ni Jehova an mga pamibi mo, mas nagigin totoo siya sa saimo. Dugang pa, mantang mas ipinapaaram mo ki Jehova an gabos mong problema, mas marani man siya sa saimo.

¹⁵ Pag-isipan an halimbawa ni Kathy. * Regular man siyang nag-iiba sa ministeryo, pero dai niya ikinakaugma iyan. Sinabi niya: “Dai ko gusto an mag-service. Talagang dai. Kan magretiro ako sa trabaho, sarong elder an nagdagka sako na magregular payunir; inabutan pa ngani niya ako nin application form. Nagdesisyon akong magpayunir, saka kasabay kaiyan aroaldaw ko man na ipinapamibi ki Jehova na tabangan akong magustuhan an pag-service.” Sinimbag daw ni Jehova an pamibi niya? Sinabi niya: “Ikatulong taon ko na ngunyan bilang payunir. Huli sa paggamit ko nin mas dakul na panahon sa ministeryo asin sa mga nanunudan ko sa ibang mga sister, luway-luway na nag-uswag an sakong paagi nin pagpapatotoo. Ngunyan, dai ko na gusto an pag-service—gustong-gusto ko na iyan. Saka ngunyan, namati kong nagin mas harani na akong marhay ki Jehova.” Iyo, nakatabang ki Kathy an mga pamibi tanganing magin totoo an saiyang relasyon ki Jehova.

16, 17. (a) Ano an dapat tang gibuhon tanganing mapagdanay na makusog an relasyon niyato ki Jehova? (b) Ano an ipapaliwanag sa masunod na artikulo?

¹⁶ An pagpatalubo nin mas haraning relasyon ki Jehova sarong bilog na buhay na paghihinguwa. Dapat kitang gumibo nin mga paagi na maparani sa Diyos kun gusto niyatong magrani man siya sa sato. Kaya, papagdanayon nanggad niyato an regular na komunikasyon sa Diyos paagi sa pag-adal sa Bibliya asin pagpamibi. Bilang resulta, an satong lalong nagkukusog na relasyon ki Jehova matabang sa sato na mapangganahan an inaatubang tang mga pagbalo.

¹⁷ Pero, puwedeng dawa sa ibong kan satong sinserong mga pamibi, dai pa man giraray nawawara an satong mga problema. Sa mga panahon na arog kaiyan, puwedeng magluya an satong pagtitiwala ki Jehova. Posibleng magduda kita kun baga talagang dinadangog ni Jehova an satong mga pamibi o kun talagang gusto niyang magkaigwa kita nin relasyon sa saiya. Kun arog kaini an satong namamatian, paano ta ini aatubangon na may pagtitiwalang totoo an relasyon ta sa Diyos? Ipapaliwanag ini sa masunod na artikulo.