KUMPARA sa magayunon na sedro kan Lebanon, garo mayong sinabi an biribid asin garap-gasapon na kahoy nin olibo. Pero an kahoy nin olibo igwa nin pambihirang kakayahan na makatagal sa manlain-lain na kamugtakan. An ibang kahoy nin olibo kinakarkulo na minaabot na sa 1,000 taon. Huli sa mahiwas na sakop kan mga ugat kaiyan, kaya kaiyan na tumubo giraray dawa putol na an puon. Sagkod na buhay pa an mga ugat, masupang giraray iyan.

Kumbinsido an patriyarkang si Job na dawa magadan siya, mabubuhay siya giraray. (Job 14:13-15) Ginamit niya an sarong kahoy—tibaad an kahoy nin olibo—tanganing ipahiling an pagtitiwala niya sa kakayahan nin Diyos na buhayon siya liwat. ‘May paglaom [dawa] an sarong kahoy. Kun iyan paludon, mabubuhay giraray,’ an sabi ni Job. Kun tig-uran na pagkatapos nin grabeng tigmara, an sarong naalang na tuod nin olibo matubo giraray saka maluwas an mga supang hali sa mga ugat kaiyan, asin “masanga siring sa sadit [o “bagong,” NW] tinanom.”—Job 14:7-9, An Marahay na Bareta Biblia.

Kun paanong minamawot na mahiling nin sarong paratanom an pagsupang giraray kan putol nang kahoy nin olibo, minamawot man kan Diyos na Jehova na buhayon liwat an saiyang mga lingkod asin an kadakul pang iba na nagadan. (Mat. 22:31, 32; Juan 5:28, 29; Gui. 24:15) Siguradong mauugma kitang sabaton asin mahiling na buhay na giraray sinda!