Maingat mo daw na binasa an dai pa sana nahahaloy na mga isyu kan An Torrengbantayan asin The Watchtower? Buweno, hilinga kun masisimbag mo an minasunod na mga hapot:

Dapat daw na ki Jesu-Cristo mamibi an mga Kristiyano?

Dai. Si Jesus mismo an nagtukdo sa sato na ki Jehova mamibi, asin nagtao siya nin halimbawa kan mamibi siya sa saiyang Ama. (Mat. 6:6-9; Juan 11:41; 16:23) Kaya, an saiyang mga parasunod kaidto namimibi, bako ki Jesus, kundi sa Diyos. (Gui. 4:24, 30; Col. 1:3)—1/1-E, pahina 14.

Paano kita makakapag-andam taon-taon para sa Memoryal kan kagadanan ni Jesus?

An sarong paagi iyo an pagsunod sa nakaiskedyul na babasahon sa Bibliya para sa Memoryal. Puwede man na dagdagan ta an satong pakikikabtang sa ministeryo sa panahon na iyan. Asin puwede ta man na hurop-hurupon asin udok na ipamibi an dapit sa paglaom na itinao sa sato nin Diyos.—1/15, pahina 14-16.

Ano an nangyari sa duwang Ehipsiyong bilanggo na nag-istorya ki Jose kan saindang pangaturugan na dai ninda maintindihan?

Sinabi ni Jose sa kopero ni Faraon na ibabalik ini sa saiyang posisyon. Mantang an pangaturugan kan panadero nangangahulugan na ipapagadan siya ni Faraon asin ipapabitay sa harigi. Parehong nagkatotoo iyan. (Gen. 40:1-22)—2/1-E, pahina 12-14.

Anong dai inaasahan na regalo an naresibi kan mga tugang sa Japan?

Naresibi ninda an buklet kan Ebanghelyo ni Mateo na kinua hali sa New World Translation. Iinaalok iyan sa ministeryo, asin dakul na bakong pamilyar sa Bibliya an nag-aako kaiyan.—2/15, pahina 3.

Anong mga kamugtakan kan inot na siglo an nakatabang na ikapalakop an maugmang bareta?

Kan panahon nin Pax Romana, pinapapundo an ano man na rebelyon kaya mayong gayo nin ralaban kaidto. Nakakapagbiyahe an inot na mga disipulo sa marahay na mga tinampo na nagkokonektar sa mga probinsiya. Lakop man an paggamit kan lengguwaheng Griego, kaya nagin mas madali an paghuhulit, dawa sa mga Judio na nakawararak sa bilog na imperyo. Asin nagagamit kan mga disipulo an ley nin Roma para idepensa an maugmang bareta.—2/15, pahina 20-23.

Taano ta dai isineselebrar kan tunay na mga Kristiyano an Pasko nin Pagkabuhay (Easter)?

Pinagbutan ni Jesus an saiyang mga parasunod na girumdumon an saiyang kagadanan, bako an saiyang pagkabuhay liwat. (Luc. 22:19, 20)—3/1-E, pahina 8.

Kaining nakaaging mga taon, taano ta bihira nang sambiton sa satong mga publikasyon an mga tipiko asin antitipiko?

Sinasabi kan Bibliya na may mga indibidwal na nagseserbing mga tipiko nin sarong bagay na mas urog pa. Sarong halimbawa kaini an yaon sa Galacia 4:21-31. Pero kun dai man sinasabi kan Kasuratan, mas marahay na dai mag-isip o magtao nin antitipikong kahulugan sa mga indibidwal asin pangyayari na nasambit sa Bibliya. Imbes, an hanapon ta iyo an mga leksiyon na manunudan ta sa mga iyan. (Roma 15:4)—3/15, pahina 17-18.

Taano ta mamumuton na probisyon an pagtitiwalag sa sarong dai nagsusulsol na nagkasala?

Sinasabi sa Bibliya kun taano ta itinatao an disiplina nin pagtitiwalag, asin may mga pakinabang sa paggibo kaiyan. (1 Cor. 5:11-13) Nagtataong onra iyan sa pangaran nin Diyos, pinoprotektaran an malinig na kongregasyon, asin nakakatabang sa mga nagkasala na makapag-isip-isip.—4/15, pahina 29-30.

Taano ta interesanteng marhay an sarong pidaso nin papiro na nakua sa sarong suanoy na tambak nin basura sa Ehipto?

Kan nakaaging siglo, may nadiskubreng sarong pidaso nin papiro na igwa kan mga porsiyon kan Ebanghelyo ni Juan. Posibleng isinurat iyan mga pirang dekada matapos isurat ni Juan an saiyang libro, asin an laog kaiyan kapareho kan mababasa ta ngunyan sa satong mga Bibliya, na nagpapatunay kan pagkamasasarigan kan Bibliya.—5/1, pahina 8-9.