1, 2. Ano an sarong katunayan kan udok na pagkamuot ni Jesus sa mga tawo?

AN PANGANAY na Aki nin Diyos an kainot-inuti asin pinakakumpletong kapahayagan kan dai marurop na kadunungan ni Jehova. Siya an personipikasyon nin kadunungan, an “ekspertong trabahador” kan saiyang Ama. Isip-isipa an satispaksiyon asin kaugmahan niya mantang ‘inaandam kan saiyang Ama an kalangitan’ asin ‘ineestablisar an pundasyon kan daga.’ Pero, sa gabos na linalang kan saiyang Ama, an panganay na Aki nin Diyos “nangurugnang nauugma . . . sa mga aki nin mga tawo.” (Tal. 8:22-31, NW) Iyo, namumutan na ni Jesus an mga tawo dawa kaidtong nasa langit pa siya.

² Kan huri, bilang patunay kan saiyang kaimbudan asin pagkamuot sa saiyang Ama, siring man kan saiyang udok na pagkamuot sa “mga aki nin mga tawo,” an Panganay nin Diyos gikan sa buot na “nagpakang-daing-halaga” asin nagin tawo. Ginibo niya iyan tanganing magtao nin ‘pantubos para sa dakul.’ (Fil. 2:5-8; Mat. 20:28, An Banal na Biblia) Dakula nanggad an pagkamuot niya sa mga tawo! Kan yaon si Jesus sa daga, tinawan siya nin Diyos nin kapangyarihan na makagibo nin mga milagro—na nagpahiling na namumutan niyang marhay an mga tawo. Paagi kaiyan, ipinahiling ni Jesus an makangangalas na mga bagay na madali nang mangyari sa bilog na daga.

3. Ano an sisiyasaton niyato sa artikulong ini?

 ³ Huli man sa pagdigdi ni Jesus sa daga ‘naihulit niya an marahay na bareta kan Kahadian nin Diyos.’ (Luc. 4:43) Aram ni Jesus na an Kahadian na ini an mapabanal sa pangaran kan saiyang Ama asin iyo an matao kan permanenteng solusyon sa gabos na kasakitan nin tawo. Bakong makangangalas na mahihiling sa rekord kan ministeryo ni Jesus an mga ebidensiya kan saiyang tunay na pagmalasakit sa mga tawo. Taano ta mahalaga ini sa sato? Huli ta an mga manunudan niyato digdi mapahiro sa sato na magtiwala asin maglaom para sa magayon na puturo. Siyasaton niyato an apat sa mga milagrong ginibo ni Jesus.

4. Iistorya an nangyari kan matuparan ni Jesus an sarong lalaking may leproso.

⁴ Sa panahon kan saiyang ministeryo, nagduman si Jesus sa lugar na inaapod na Galilea. Sa saro sa mga siyudad kaiyan, natuparan ni Jesus an sarong tawo na makahirak an kamugtakan. (Mar. 1:39, 40) Nasa atubangan niya an sarong lalaki na may nakakangiring leproso. Grabe na an hilang niya huling sinabi kan doktor na si Lucas na ‘pano nin [leproso]’ an lalaking ini. (Luc. 5:12) ‘Kan mahiling niya si Jesus, naglaob siya asin nakimahirak sa saiya: “Kagurangnan, kun buot [mo], mapapalinig mo ako.”’ Sigurado nanggad an lalaki na may kapangyarihan si Jesus na paumayan siya, pero gusto niyang maaraman kun buot ni Jesus na gibuhon iyan? Ano an reaksiyon ni Jesus sa udok sa pusong pakiulay na ini? Ano daw an iniisip ni Jesus kan pinagmamasdan niya an lalaking ini na posibleng naraot na an itsura? Magigin arog daw si Jesus kan mga Fariseo na mayo nin pagkahirak sa mga tawong igwa kan hilang na ini? Kun ika si Jesus, ano an gigibuhon mo?

5. Ano an nagpahiro ki Jesus na paumayan an lalaking may leproso?

⁵ Minalataw na nalingawan kan lalaking ini an ipinagbubuot sa Ley ni Moises na magkurahaw nin “Maati, maati!” Pero, dai na iyan inintindi ni Jesus. Mas nagpokus siya sa lalaki mismo asin sa kaipuhan kaini. (Lev. 13:43-46, NW) Dai ta aram kun ano talaga an nasa isip ni Jesus, pero aram ta kun ano an nasa puso niya. Pinahiro siya kan saiyang pagmalasakit na gibuhon an sarong pambihirang bagay. Inunat ni Jesus an saiyang kamot, dinutan an lalaki, asin makusog pero mabuot na nagsabi: ‘Buot ko! Luminig ka.’ Dangan ‘an [leproso] nahali sa saiya.’ (Luc. 5:13) Iyo, talagang yaon ki Cristo an kapangyarihan ni Jehova—bako sanang para magibo an arog kaiyan na milagro kundi para maipahiling man na namumutan niyang marhay an mga tawo.—Luc. 5:17.

6. Ano an makangangalas sa mga milagro ni Jesus, asin ano an ipinapahiling kaini?

⁶ Paagi sa kapangyarihan nin Diyos, nakakagibo si Jesu-Cristo nin dakul na makangangalas na milagro. Bako sanang leproso an pinaumayan niya kundi pati an gabos na klase nin hilang asin diperensiya sa pisikal. Sinasabi sa sato kan ipinasabong na rekord: ‘An kadaklan nagngaralas kan mahiling na an mga púla nagtataram, an mga kimay naumayan, an mga pilay naglalakaw, asin an mga buta nakakahiling.’ (Mat. 15:31) Dai kinaipuhan ni Jesus nin mga tawong madonar nin pansalihid na organ o parte nin hawak para magibo an mga pagpaumay na iyan. Pinaumayan niya mismo an apektadong organ o parte nin hawak! Asin tulos niyang napapaumayan an mga tawo, na kun minsan ngani harayo pa sa saiya. (Juan 4:46-54) Ano an ipinapahiling kan makangangalas na mga halimbawang ini? Bilang pinatukaw nang Hadi sa langit, si Jesus bako sanang may kapangyarihan kundi may kamawutan man na permanente nang paumayan an mga may hilang. Sa pag-adal ta kun paano trinatar ni Jesus an mga tawo, nagkakaigwa kita nin kumpiyansa  na sa bagong kinaban, mauutob an hulang ini sa Bibliya: ‘Mahihirak siya sa mga dukha asin nangangaipo.’ (Sal. 72:13) Iyo, sa panahon na iyan mahiro si Jesus uyon sa pagmawot kan saiyang puso na tabangan an gabos na nagsasakit.

7, 8. Paano natuparan ni Jesus an sarong lalaking paralisado sa karigusan nin Betzata?

⁷ Pirang bulan pagkatapos na paumayan ni Jesus an lalaking may leproso sa Galilea, nagpa-Judea siya tanganing maghulit asin ihayag an maugmang bareta kan Kahadian nin Diyos. Siguradong rinibo an napahiro kan mensahe asin kan pagkamuot sa sainda ni Jesus. Malinaw na gusto ni Jesus na sabihon an maugmang bareta sa mga dukha, ipahayag an katalingkasan sa mga bihag, asin bendahan an mga nalugadan an puso.—Isa. 61:1, 2; Luc. 4:18-21.

⁸ Dangan bulan na nin Nisan. Bilang pagsunod sa pagbuot kan saiyang Ama, nagpa-Jerusalem si Jesus para sa Paskuwa. Sibot-sibot an siyudad mantang nag-aarabot an mga tawo tanganing iselebrar an sagradong kapiyestahan na ini. Sa parteng norte kan templo, may karigusan na inaapod na Betzata, asin duman natuparan ni Jesus an sarong lalaking paralisado.

9, 10. (a) Taano ta nagduduman an mga tawo sa karigusan nin Betzata? (b) Taano ta yaon si Jesus sa karigusan, asin ano an itinutukdo kaini sa sato? (Hilingon an ritrato sa kapinunan kan artikulo.)

⁹ Nagduduman sa Betzata an dakul na tawong may hilang asin diperensiya sa pisikal. Taano? Sa dai maipaliwanag na dahilan, naniniwala sinda na kun an sarong may hilang mabuntog sa karigusan pag binubukag an tubig, milagroso siyang mauumayan. Isip-isipa an sitwasyon diyan! Siguradong dakul an desperado, hadit, asin nawawaran na nin paglaom. Pero taano ta yaon duman si Jesus mantang saro siyang perpektong tawo asin mayo siyang diperensiya sa pisikal? Buweno, huli sa pagkahirak, rinanihan ni Jesus an lalaki na haloy nang may hilang, mas haloy pa sa mga taon na yaon si Jesus sa daga.—Basahon an Juan 5:5-9.

¹⁰ Naiimahinar mo daw an kamunduan sa mga mata kan lalaking paralisado kan haputon siya ni Jesus kun gusto niyang maumayan? Nagsimbag tulos an lalaki. Gusto niyang maumayan pero dai niya aram kun paano huling mayo man nin matabang sa saiya na makabuntog sa karigusan. Kaya pinagbutan ni Jesus an lalaki na gibuhon an sarong bagay na imposible—kuanon an saiyang banig asin maglakaw. Nagtubod an lalaki sa sinabi ni Jesus, kinua niya an saiyang banig asin nagpuon na maglakaw. Nakakaugma nanggad na patanaw ini kan gigibuhon ni Jesus sa bagong kinaban! Nahiling ta man sa milagrong ini an pagmalasakit ni Jesus. Hinanap niya an mga nangangaipo nin tabang. An halimbawa ni Jesus maninigo na magpahiro sa sato na hanapon sa satong teritoryo an mga tawong nangluluya huli sa marauton na mga nangyayari sa kinaban na ini.

11. Paano ipinahiling kan Marcos 5:25-34 an pagmalasakit ni Jesus sa mga may hilang?

¹¹ Basahon an Marcos 5:25-34. Sa laog nin 12 taon, tinios nin sarong babayi an sarong nakakasupog na hilang. Nakaapektar ini sa buhay niya, pati na sa saiyang pagsamba. Dakul na an tinios niya sa kamot nin ‘dakul na parabulong asin naubos na niyang ikabayad an gabos niyang pagsadiri,’ pero lalo sanang naggrabe an hilang niya. Sarong aldaw, may naisip na ibang plano an babayi tanganing marahay. Nagpuwesto siya sa lugar na madali siyang makakarani ki Jesus. Dangan, nakisusuan siya sa mga tawo asin dinutaan an pang-ibabaw na gubing ni Jesus. (Lev. 15:19, 25) Narisa ni Jesus na may kapangyarihan na nagluwas sa saiya, kaya naghapot siya kun siisay an nagduta sa saiya. An babayi, na ‘natatakot asin tinatakigan, naglaob sa atubangan niya asin  nagsabi sa saiya kan bilog na katotoohan.’ Huling narealisar ni Jesus na an saiyang Ama, si Jehova, an nagpaumay sa babayi, mabuot niya ining trinatar asin sinabihan: ‘Aki, an saimong pagtubod iyo an nagpaumay saimo. Lakaw sa katuninungan, asin maumayan ka kan saimong hilang.’

12. (a) Basado sa mga napag-ulayan ta na, ano an masasabi mo dapit ki Jesus? (b) Anong halimbawa an ipinahiling sa sato ni Jesus?

¹² Mabuuton talaga si Jesus! Nahiling niyato na namumutan niya an mga tawong may hilang. Gusto ni Satanas na isipon ta na mayong namumuot sa sato asin mayo kitang halaga. Pero paagi sa mga milagro, pinatunayan ni Jesus na talagang nagmamakulog siya sa sato asin sa mga problema ta. Saro nanggad siyang madinamayon na Hadi asin Halangkaw na Saserdote! (Heb. 4:15) Tibaad dipisil sa sato na sabuton an namamatian kan mga may hilang na dai nararahay, lalo na kun dai ta pa naeksperyensiyahan iyan. Pero tandaan niyato na nakapahiling si Jesus nin empatiya sa mga may hilang dawa nungka siyang nagkahilang. Lugod na pahiruon kita kan halimbawa ni Jesus na gibuhon man iyan sagkod sa pinakamakakaya ta.—1 Ped. 3:8.

13. Ano an manunudan niyato dapit sa personalidad ni Jesus kan buhayon niya liwat si Lazaro?

¹³ Naaapektaran si Jesus kan kulog na namamatian nin iba. Kan mahiling niya an kamunduan kan iba huli sa pagkagadan kan saiyang amigong si Lazaro, si Jesus man ‘napaagrangay asin napahiro sa pagkahirak.’ Naghibi siya dawa aram niyang uruatyan bubuhayon niya liwat si Lazaro. (Basahon an Juan 11:33-36.) Dai nasupog si Jesus na mahiling nin iba an saiyang namamatian. Nahiling ninda na padangat na marhay ni Jesus si Lazaro asin an pamilya kaini. Dakulang pagmalasakit nanggad an ipinahiling ni Jesus kan gamiton niya an kapangyarihan na  itinao sa saiya nin Diyos tanganing buhayon liwat an saiyang amigo!—Juan 11:43, 44.

14, 15. (a) Ano an nagpapahiling na gustong-gusto ni Jehova na halion an pagsakit kan katawuhan? (b) Ano an itinutukdo sa sato kan mga tataramon na “mga lulubngan na girumduman”?

¹⁴ Sinasabi kan Bibliya na si Jesus iyo an ‘eksaktong ladawan kan mismong persona [kan Kaglalang].’ (Heb. 1:3, NW) Kaya, paagi sa saiyang mga milagro, pinatunayan ni Jesus na gusto niya asin kan saiyang Ama na halion an kulog na dara kan hilang asin kagadanan. Apuwera sa mga binuhay liwat na nakarekord sa Bibliya, mas dakul na tawo pa an bubuhayon liwat. Sinabi ni Jesus: “Maabot an oras na an gabos na nasa mga lulubngan na girumduman . . . maruluwas.”—Juan 5:28, 29, NW.

¹⁵ Angay an paggamit ni Jesus kan mga tataramon na “mga lulubngan na girumduman” huling kalabot digdi an memorya nin Diyos. Kaya kan Diyos na Makakamhan sa Gabos, na naglalang kan mahiwason na uniberso, na girumdumon an gabos na detalye kan kada saro sa nagadan niyatong mga namumutan, kaiba na an saindang hitsura asin mga ugali. (Isa. 40:26) Asin bako sanang kaya niyang girumdumon sinda kundi talagang gusto niya asin kan saiyang Aki na girumdumon sinda. An pagbuhay liwat ki Lazaro asin sa iba pa na nakarekord sa Bibliya nagseserbing patanaw kan mangyayari sa bilog na daga sa bagong kinaban.

16. Ano an magigin pribilehiyo kan dakul na Kristiyano ngunyan kun magdadanay sindang maimbod?

¹⁶ Kun magdadanay kitang maimbod bilang Kristiyano, mahihiling ta an saro sa pinakadakulang mga milagro na mangyayari kasuarin man—an milagrong makaligtas sa dakulang kahurasaan. Pagkatapos tulos kan Armagedon, dakul pang milagro an mangyayari, na mabalik kan perpektong salud sa mga tawo. (Isa. 33:24; 35:5, 6; Kap. 21:4) Isip-isipa an panahon na mahihiling mo an mga tawo na iinaapon na an saindang mga antipara, sugkod, saklay, wheelchair, hearing aid, asin iba pa. Kadakul an gigibuhon kan mga makakaligtas sa Armagedon kaya ibabalik sinda ni Jehova sa perpektong salud. Huli kaiyan, magigin madali sa sainda na gibuhon na paraiso an bilog niyatong planeta, na sarong regalo hali sa Diyos.—Sal. 115:16.

17, 18. (a) Ano an malinaw na panginot na katuyuhan kan mga milagro ni Jesus? (b) Taano ta dapat kang maghinguwa na makalaog sa bagong kinaban nin Diyos?

¹⁷ An mga pagpaumay ni Jesus kaidto nagpapakusog sa buot ngunyan kan “dakulang kadaklan” asin sa saindang paglaom na sa maabot na panahon mauumayan an gabos nindang hilang. (Kap. 7:9) Ipinapahiling kan mga pagpaumay na idto kun gurano kararom an pagmalasakit asin pagkamuot sa mga tawo kan panganay na Aki nin Diyos. (Juan 10:11; 15:12, 13) Ilinaladawan kan pagmalasakit ni Jesus an pagmakulog ni Jehova sa kada saro sa saiyang mga lingkod.—Juan 5:19.

¹⁸ An katawuhan ngunyan nag-aagrangay, nakukulgan na marhay, asin nagagadan. (Roma 8:22) Kaipuhan niyato an bagong kinaban nin Diyos, kun sain mangyayari an lubos na pagpaumay sa pisikal, arog kan ipinanuga niya. Tinatawan kita nin dahilan kan Malaquias 4:2 na magtiwala na kita ‘marulukso na garo mga ugbon na baka,’ na ugmahon na marhay huli ta naumayan na asin talingkas na kita sa pagkabakong perpekto. Lugod na pahiruon kita kan satong udok sa pusong pasasalamat sa Diyos asin kan satong dakulang pagtubod sa saiyang mga panuga na gibuhon na ngunyan an ano man na kinakaipuhan tanganing makuwalipikar na makalaog sa bagong kinaban na iyan. Nakakapakusog nanggad sa buot na maaraman na an mga milagro ni Jesus kaidtong yaon pa siya sa daga nagseserbing patanaw kan mangyayaring permanenteng kaginhawahan na madali nang kamtan kan katawuhan sa irarom kan saiyang Mesiyanikong pamamahala!