KUN konstruksiyon an pag-uulayan, tuod nang marhay diyan si Bezalel asin Oholiab. Siguradong habo na nindang girumdumon kun gurano kadakul na ladrilyo an nagibo ninda kan mga uripon pa sinda sa Ehipto. Pero tapos na idto. Ngunyan, sinda an magigin pinakamahusay na trabahador huling pinili sinda nin Diyos tanganing panginutan an konstruksiyon kan tabernakulo. (Ex. 31:1-11) Pero pipira sana an makakahiling kan saindang mga obra maestra. Madidisganar daw sinda huling dikit sana an makakaapresyar kaiyan? Importante daw talaga kun may makakahiling kan mga nagibo ninda? Paano kun mayo man nin ibang nakakahiling kan mga nagigibo mo?

Talagang mga obra maestra an ibang kasangkapan sa tabernakulo. Halimbawa kaiyan an bulawan na mga kerubin na nasa ibabaw kan kaban kan tipan. Inapod iyan ni apostol Pablo na “mamuraway.” (Heb. 9:5) Isip-isipa kun gurano kagayon kan duwang kerubin na iyan na gibo sa pinulpog na bulawan!—Ex. 37:7-9.

Kun makukua ngunyan an mga ginibo ni Bezalel asin Oholiab, siguradong idi-displey iyan sa bantog na mga museo para maapresyar nin dakul na tawo. Pero kan panahon na ginibo iyan, pira katawo sana daw an talagang nakahiling sa kagayunan kaiyan? Nasa laog kan Kabanal-banali kan tabernakulo an mga kerubin, kaya an makakahiling sana kaiyan iyo an halangkaw na saserdote pag naglalaog siya diyan, sarong beses sana kada taon, para sa Aldaw nin Pagbayad sa Kasalan. (Heb. 9:6, 7) Kaya, dikiton sana an nakahiling sa mga iyan.

Kun ika si Bezalel o si Oholiab, ano daw an mamamatian mo na dikiton sana an nakahiling kan obra maestrang pinagpagalan mong marhay? An mga tawo ngunyan nauugma pag inuumaw asin hinahangaan sinda nin iba. Diyan ninda ibinabasar an halaga kan nagibo ninda. Pero bakong arog kaiyan an mga lingkod ni Jehova. Arog ni Bezalel asin Oholiab, kontento na kita pag nagigibo ta an gusto ni Jehova asin yaon sa sato an pag-uyon niya.

Kan nasa daga si Jesus, ugali na kan mga lider nin relihiyon kaidto na mamibi tanganing pahangaon an iba. Pero, ibang paagi an itinukdo ni Jesus: Sinserong mamibi na dai iniisip na pahangaon an mga nagmamasid. Ano an resulta kaini? ‘An saindong  Ama na nakakahiling sa hilom, siya an mabalos sa saindo.’ (Mat. 6:5, 6) Kaya an importante, bako an iniisip kan iba manungod sa satong pamibi, kundi an iniisip ni Jehova. An mamamatian Niya sa satong mga pamibi an nagpapangyaring magin napakahalaga kaiyan. Totoo man iyan sa ano man na nagigibo ta sa satong sagradong paglilingkod. Dai masasabing mahalaga an satong ginigibo huli sana ta dakul an nag-uumaw kaiyan; kundi huli ta nakakapaugma iyan ki Jehova, “na nakakahiling sa hilom.”

Kan matapos na an tabernakulo, sarong panganuron ‘an puminatos sa tabernakulo nin pagpatotoo, asin an kamurawayan ni Jehova nakapano sa tabernakulo.’ (Ex. 40:34) Malinaw nanggad na tanda iyan kan pag-uyon ni Jehova! Ano sa hiling nindo an namatian ni Bezalel asin Oholiab kan panahon na idto? Dawa ngani dai nakaukit an saindang pangaran sa mga ginibo ninda, siguradong naugma sinda huling binendisyunan nin Diyos an gabos nindang paghihinguwa. (Tal. 10:22) Kan suminunod na mga taon, siguradong mas naugma pa sinda huling nahiling nindang padagos na ginamit sa paglilingkod ki Jehova an mga ginibo ninda. Kun buhayon na liwat sa bagong kinaban si Bezalel asin Oholiab, siguradong mas lalo pa sindang mauugma pag naaraman nindang mga 500 na taon na ginamit an tabernakulo para sa tunay na pagsamba!

Sa organisasyon ni Jehova ngunyan, dai man ipinapabisto an mga animator, paradrowing, paratugtog, pararitrato, paratradusir, asin parasurat. Sa paaging iyan, masasabing mayo nin “nakakahiling” kan saindang ginigibo. Totoo man iyan sa dakul na trabahong ginigibo sa labing 110,000 na kongregasyon sa bilog na kinaban. Siisay an nakakahiling sa accounts servant pag inaandam niya an kinakaipuhan na mga report para sa kuwenta kada katapusan nin bulan? Siisay an nakakahiling sa sekretaryo pag ginigibo niya an report nin paglilingkod sa langtad kan kongregasyon? Siisay an nakakahiling sa tugang na may hinihirahay sa Kingdom Hall?

Sagkod na magadan si Bezalel asin Oholiab, dai sinda nagkaigwa nin tropeo, medalya, o plake para sa magayunon na disenyo asin marahay na kalidad kan mga nagibo ninda. Pero nagkaigwa sinda kan sarong bagay na urog nanggad na mahalaga—an pag-uyon ni Jehova. Makakasigurado kita na nahiling ni Jehova an saindang ginibo. Lugod na arugon niyato an saindang kapakumbabaan asin pagigin andam na maglingkod.