1, 2. (a) Anong pisikal na mga bendisyon sa Paraiso an gustong-gusto mo nang mangyari? (Hilingon an ritrato sa itaas.) (b) Anong espirituwal na mga bendisyon an makakamtan ta sa bagong kinaban?

“AN TUNAY NA BUHAY.” An paglaom na buhay na daing katapusan sa Paraiso an naiisip kan kadaklan sa sato pag nadadangog an mga tataramon na iyan. Sa katunayan, ikinonektar ni apostol Pablo an “buhay na daing katapusan” sa “tunay na buhay.” (Basahon an 1 Timoteo 6:12, 19. *) Hinahalat niyato an buhay na magpapadagos sagkod lamang asin magtatao sa sato nin nagdadanay na pagkakontento saka kaugmahan. Siguradong dai mailaladawan an satong mamamatian kun sa pagmata niyato kada aga marahayon na an satong pisikal, mental, asin emosyonal na salud. (Isa. 35:5, 6) Isip-isipa kun gurano kaugma na makaibanan an satong namumutan na mga kapamilya asin mga amigo, pati na idtong mga binuhay liwat! (Juan 5:28, 29; Gui. 24:15) Magkakaigwa man kita nin oportunidad na mapauswag an satong abilidad sa siyensiya, musika, arkitektura, asin iba pa.

 ² Kun paanong hinahalat-halat ta nang makamtan an magagayon na bagay na ini, hinahalat-halat ta na man na makamtan an panginot na mga bendisyon sa bagong kinaban—an espirituwal na mga bendisyon. Nakakaugmang marhay nanggad na maaraman na napapabanal na an pangaran ni Jehova asin nabibindikar na an saiyang soberaniya! (Mat. 6:9, 10) Mauugma kitang marhay na mahiling na nauutob na an orihinal na katuyuhan ni Jehova para sa katawuhan asin sa daga. Asin isip-isipa na sana kun gurano na kadali para sa sato na mas maparani ki Jehova mantang dikit-dikit kitang nagigin perpekto!—Sal. 73:28; Sant. 4:8.

3. Ano an dapat na pag-andaman niyato ngunyan?

³ Makakamtan ta an mga bendisyon na ini huling siniyerto sa sato ni Jesus na ‘an gabos posible sa Diyos.’ (Mat. 19:25, 26, BPV *) Pero kun naglalaom kita na mabuhay sa bagong kinaban na iyan—asin padagos na mabuhay pagkatapos kan Sangribong Taon na Paghadi ni Cristo—dapat na humiro na kita ngunyan tanganing ‘makapangapot nin marigon’ sa buhay na daing katapusan. Dapat na mamuhay kita na hinahalat an katapusan kan maraot na kinaban na ini, asin kaipuhan tang gumibo nin positibong mga lakdang ngunyan tanganing makapag-andam kita para sa buhay sa bagong kinaban. Paano niyato magigibo ini mantang nabubuhay pa kita sa maraot na sistemang ini nin mga bagay?

4. Iilustrar kun paano kita makakapag-andam ngunyan para sa buhay sa bagong kinaban.

⁴ Paano kita makakapag-andam ngunyan para sa buhay sa bagong kinaban nin Diyos? Ipamugtak na nagpaplano kitang magbalyo sa ibang nasyon. Paano kita makakapag-andam para sa pagbabagong iyan? Tibaad pag-adalan ta nguna an lengguwahe kan mga tawo diyan. Makakatabang man kun pag-aadalan ta an saindang mga kostumbre. Tibaad namitan ta man an nagkapira sa mga kakanon ninda. Minsan paano, mamumuhay kita na garo baga nakaistar na sa nasyon na iyan. Tutal, iyan an inaasahan niyato na magigin pamumuhay ta pag yaon na kita diyan. Kaagid kaiyan, makakapag-andam man kita para sa buhay sa bagong kinaban kun, sagkod sa mapupuwede, an pamumuhay niyato ngunyan arog na kan inaasahan tang magigin buhay niyato sa panahon na iyan. Manungod digdi, pag-ulayan ta an minasunod na mga halimbawa.

5, 6. Paano makakatabang sa sato na makapag-andam para sa buhay sa bagong kinaban an pagpapasakop sa teokratikong mga areglo ngunyan?

⁵ Sa bagong kinaban, lubos na susuportaran kan gabos na tawo an soberaniya nin Diyos. Magigin kabaliktaran nanggad iyan sa kinaban na ini na kontrolado ni Satanas kun sain gusto kan mga tawo na pamahalaan an saindang sadiri! Importanteng marhay para sa iba na magin independiyente asin iniinsistir ninda an sadiri nindang kagustuhan, pero ano an nagin resulta kaiyan? An dai pag-ako sa paggiya nin Diyos nagresulta sa kasakitan, kamunduan, asin trahedya pa ngani. (Jer. 10:23) Hinahalat-halat na nanggad niyato an panahon na magpapasakop an gabos na tawo sa mamumuton na soberaniya ni Jehova!

⁶ Mauugma kitang magpasakop sa mga areglo ni Jehova sa bagong kinaban mantang nagtatabang kita sa pagpagayon sa daga, sa pagtukdo sa mga binuhay liwat, asin sa paggibo kan kabutan ni Jehova para sa katawuhan. Pero paano kun tawan kita nin partikular na asignasyon na dai ta gayong gusto? Magpapasakop pa daw kita na itinatao an bilog tang makakaya asin hinihinguwa pa nganing ikaugma iyan? An kadaklan sa sato masimbag nin iyo! Kaya, pirmi daw kitang nagpapasakop sa teokratikong mga paggiya ngunyan? Kun iyo, nag-aandam na kita para sa buhay na daing katapusan sa irarom kan pamamahala ni Jehova.

7, 8. (a) Taano ta dapat na maghinguwa kita na magin makikooperar? (b) Anong mga pagbabago sa kamugtakan an naeksperyensiyahan nin nagkapirang Kristiyano? (c) Sa ano kita makakasigurado kun dapit sa magigin buhay sa bagong kinaban?

⁷ Makakapag-andam kita para sa buhay sa bagong kinaban bako sanang paagi sa pagpapasakop sa mga areglo ni Jehova sa panahon na ini kundi paagi man sa paghihinguwa na ngunyan na makikooperar asin magin kontento. Kun nakikikooperar na kita sa mga nanginginot sa sato ngunyan, halimbawa kaiyan iyo na kun kontento kita asin maugma  dawa tinawan nin bagong asignasyon, siguradong iyan man an gigibuhon ta sa bagong kinaban. (Basahon an Hebreo 13:17.) Sa Dagang Panuga kaidto, binaranga an mana kan mga Israelita paagi sa burunutan. (Bil. 26:52-56; Jos. 14:1, 2) Siyempre dai ta aram ngunyan kun sain papaistaron an kada saro sa sato pag nasa bagong sistema na kita nin mga bagay. Pero, kun tatao kitang makikooperar, magigin kontento asin maugma kita mantang ginigibo an kabutan ni Jehova sain man kita mag-istar sa panahon na iyan.

⁸ Sulit an ano man na paghihinguwa niyato na makikooperar sa organisasyon ni Jehova asin sa pag-asikaso sa satong teokratikong mga asignasyon huli sa pribilehiyo niyato na mamuhay sa irarom kan pamamahala kan Kahadian. Siyempre, puwedeng magbago an satong kamugtakan sa paglihis nin panahon. Halimbawa, an ibang miyembro kan pamilyang Bethel sa Estados Unidos iinasignar sa langtad asin ngunyan nakakamtan ninda an abundang mga bendisyon sa ibang paagi nin bilog na panahon na paglilingkod. Mga espesyal payunir na ngunyan an ibang dating nagbibiyaheng paraataman huling nagkakaedad na sinda o sa iba pang dahilan. Kun hinihinguwa tang magin kontento, namimibi sa Diyos para sa tabang, asin ginigibo an bilog tang makakaya sa paglilingkod sa saiya, magigin maugma kita saka mag-aako nin dakul na bendisyon dawa sa delikadong huring mga aldaw na ini. (Basahon an Talinhaga 10:22. *) Kumusta man kun yaon na kita sa bagong kinaban? Tibaad may lugar kitang gustong-gustong istaran sa panahon na iyan, pero paano kun pabalyuhon kita sa ibang lugar? Iyo, sain man na lugar kita maglingkod asin ano man an magin asignasyon ta sa bagong kinaban, siguradong ipagpapasalamat ta iyan asin magigin kontento saka maugma kita.—Neh. 8:10.

9, 10. (a) Sa anong mga bagay tibaad kaipuhanon tang magin mapasensiya pag nasa bagong kinaban na kita? (b) Paano ta maipapahiling na mapasensiya kita?

⁹ Sa bagong kinaban, tibaad may panahon na kaipuhan niyato na magin mapasensiya. Halimbawa, tibaad mabaretaan niyato na ugmahon na marhay an iba huling binuhay na liwat an saindang mga kapamilya asin amigo. Mantang an satong mga namumutan hinahalat ta pang buhayon liwat. Kun arog kaiyan an mangyari, magigin maugma daw kita para sa iba asin mapasensiyang maghahalat? (Roma 12:15) Kun mapasensiya kitang naghahalat ngunyan sa kautuban kan mga panuga ni Jehova, makakatabang ini sa sato na magin mapasensiya man sa panahon na iyan.—Par. 7:8.

¹⁰ Makakapag-andam man kita para sa buhay sa bagong kinaban paagi sa pagigin mapasensiya kun dapit sa ihinahayag na katotoohan. Mainadal asin mapasensiya daw kita mantang dikit-dikit na linilinaw an satong pakasabot sa mga katotoohan sa Bibliya? Kun iyo, dai kita madidipisilan na magin mapasensiya sa bagong kinaban mantang dikit-dikit man na ipinapaaram sa sato ni Jehova an saiyang bagong mga kahagadan para sa katawuhan.—Tal. 4:18; Juan 16:12.

11. Ano an itinutukdo sa sato ngunyan ni Jehova kun dapit sa pagtratar sa iba, asin paano ini makakatabang sa sato pag nasa bagong kinaban na kita?

¹¹ An saro pang kuwalidad na makakatabang sa sato na makapag-andam para sa buhay sa bagong kinaban iyo an pagigin mapagpatawad. Durante kan Sangribong Taon na Paghadi ni Cristo, tibaad kaipuhan nin panahon para biyong mahali kan mga matanos asin bakong matanos an saindang maraot na mga ugali huli sa pagigin bakong perpekto. (Gui. 24:15) Magigin mamumuton daw kita sa kada saro sa panahon na iyan? Kun hinihinguwa na niyato ngunyan na magin mapagpatawad asin magkaigwa nin marahay na relasyon sa iba, mas magigin madali para sa sato na gibuhon iyan sa bagong kinaban.—Basahon an Colosas 3:12-14.

12. Ipaliwanag kun ano an koneksiyon kan satong pamumuhay ngunyan sa inaasahan tang magigin pamumuhay sa maabot na panahon.

¹² Sa bagong kinaban, tibaad dai niyato makukua an gabos na gusto ta, o tibaad kaipuhanon tang maghalat bago makua iyan. Kaya, an pamumuhay diyan nangangaipo na magin mapagpasalamat kita  asin kontento sa ano man na kamugtakan mantang nakikinabang kita sa pagpapasakop sa mamumuton na soberaniya ni Jehova. Nangangahulugan iyan na kaipuhan tang iaplikar an mga kuwalidad na itinutukdo sa sato ni Jehova na kultibaron ngunyan. Kun namumuhay kita ngunyan arog kan inaasahan tang magigin pamumuhay ta sa panahon na iyan, pinapauswag ta an mga kuwalidad na kaipuhan tang ipahiling nin daing sagkod. Asin pinapakusog niyato an satong pagtubod na totoo “an madatong na kinaban.” (Heb. 2:5; 11:1) Saro pa, ipinapahiling niyato na gustong-gusto ta nang mangyari sa daga an matanos na mga kamugtakan. Tunay nanggad, nag-aandam na kita para sa buhay na daing katapusan sa bagong kinaban nin Diyos.

13. Ano an magigin pinakapanginot niyatong gibuhon sa bagong kinaban?

¹³ Pag-isipan an saro pang paagi tanganing makapag-andam kita para sa maabot na tunay na buhay. Ipinanuga sa sato na sa bagong kinaban magkakaigwa kita nin abundang kakanon asin iba pang pangangaipo, pero magigin mas maugma kita huling mapapaniguan sa panahon na iyan an satong espirituwal na pangangaipo. (Mat. 5:3) An magigin pinakapanginot sa sato iyo an espirituwal na mga gibuhon, asin magigin maugmang marhay kita sa paglilingkod ki Jehova. (Sal. 37:4) Kaya, kun iniinot niyato ngunyan an espirituwal na mga bagay, nag-aandam na kita sa maabot na tunay na buhay.—Basahon an Mateo 6:19-21.

14. Anong espirituwal na mga pasuhan an makakatabang sa mga hoben na magpokus sa paglaom na buhay na daing sagkod?

¹⁴ Paano kita magigin mas maugma sa satong teokratikong mga gibuhon? An sarong paagi iyo na magkaigwa nin espirituwal na mga pasuhan. Kun ika sarong hoben asin pinag-iisipan mong marhay na gamiton an saimong buhay sa paglilingkod ki Jehova, puwede mong repasuhon an nagkapira sa mga artikulo sa satong mga publikasyon manungod sa manlain-lain na paagi nin bilog na panahon na ministeryo asin gibuhon na pasuhan an saro kaiyan. * Puwede kang makipag-ulay sa mga tugang na dakul na taon nang nasa bilog na panahon na paglilingkod. Kun gagamiton mo an saimong buhay sa paglilingkod ki Jehova, nag-aandam ka para sa padagos na paglilingkod sa Diyos sa bagong kinaban, kun sain magagamit mong marhay an saimong pagsasanay asin eksperyensiya sa ministeryo.

15. Ano pang espirituwal na mga pasuhan an puwedeng abuton kan mga parabalangibog kan Kahadian?

¹⁵ Bilang mga parabalangibog kan Kahadian, ano pang espirituwal na mga pasuhan an puwede tang abuton? Puwede tang gibuhon na pasuhan na magin mas matibay sa sarong paagi nin pagmiministeryo. O tibaad puwede tang hinguwahon na mas mapararom an satong pakasabot sa mga prinsipyo sa Bibliya asin kun paano iyan iaaplikar sa satong buhay. Puwede man kitang maghinguwa na magin mas epektibo sa pagbasa asin pagpahayag sa publiko o sa pagkokomento sa mga pagtiripon. Siguradong  dakulon kang maiisip na iba pang pasuhan. Pero an punto iyo ini: Kun igwa ka nin espirituwal na mga pasuhan, mas magigin entusiyastiko ka sa teokratikong mga gibuhon asin makakatabang ini na magin andam ka para sa buhay sa bagong kinaban.

16. Taano ta an paglilingkod ki Jehova an pinakamarahay na paagi nin pamumuhay?

¹⁶ Kun ginagamit ta an satong panahon sa pag-andam para sa bagong kinaban nin Diyos, dai na daw magigin marahay o nakakakontento an buhay ta ngunyan? Dai nanggad! An paglilingkod ki Jehova iyo an pinakanakakakontentong paagi nin pamumuhay. Dai kita naglilingkod huling may nagpipirit sa sato o tangani sanang makaligtas kita sa dakulang kahurasaan. Kun may harani kitang relasyon sa Diyos, magigin mas marahay asin maugmang marhay an satong buhay. Dinisenyo niya kitang mamuhay na arog kaiyan. An pamumuhay na may paggiya ni Jehova asin namamatian an saiyang maimbod na pagkamuot sa sato mas marahay kisa sa pamumuhay na harayo sa saiya. (Basahon an Salmo 63:1-3.) Siyempre, dai ta kaipuhan halaton an bagong kinaban para magkaigwa kan espirituwal na mga bendisyon na resulta kan satong bilog na pusong paglilingkod ki Jehova—makukua na niyato iyan ngunyan! Iyo, an nagkapira sa sato dakul na dekada nang nakakamtan an mga bendisyon na iyan, asin base sa eksperyensiya ta, masasabi niyato na mayo talaga nin ibang paagi nin pamumuhay na makakatao sa sato nin arog kaini kadakulang kaugmahan.—Sal. 1:1-3; Isa. 58:13, 14.

17. Ano an magigin lugar kan satong personal na mga kagustuhan asin pag-aling-aling sa Paraiso?

¹⁷ Sa bagong kinaban nin Diyos, magkakaigwa kita nin panahon para sa mga gusto tang gibuhon asin mga pag-aling-aling. Tutal, linalang kita ni Jehova na may pagmawot na magibo an mga bagay na nakakapaugma sa sato. (Par. 2:24) Nanunuga man si Jehova na ‘papaniguan niya an mawot nin lambang bagay na may buhay.’ (Sal. 145:16, NW) Kaipuhan ta an pag-aling-aling asin pagpurupahingalo, pero mas madadagdagan an kaugmahan na makukua ta sa mga iyan kun iniinot niyato an satong relasyon ki Jehova. Arog man kaiyan sa Paraiso. Kaya sarong kadunungan nanggad na papagdanayon na nasa tamang lugar an satong personal na mga kagustuhan mantang iniinot ta an Kahadian asin nagpopokus sa espirituwal na mga bendisyon na nakakamtan kan mga lingkod ni Jehova ngunyan!—Mat. 6:33.

18. Paano ta maipapahiling na nag-aandam kita para sa buhay na daing katapusan sa Paraiso?

¹⁸ Sa maabot na Paraiso, mamamatian ta an kaugmahan na dai ta pa nuarin man namatian. Lugod na ipahiling niyato na gustong-gusto tang makalaog diyan paagi sa pag-andam ngunyan para sa tunay na buhay. Ipahiling niyato an mga kuwalidad na itinutukdo sa sato nin Diyos asin ikaugma ta an maigot na pakikikabtang sa paghuhulit kan Kahadian na iinasignar sa sato. Lugod na magkaigwa kita nin dakulang kaugmahan sa pag-inot ta sa satong buhay kan espirituwal na mga bagay. Asin lugod na mag-andam na kita ngunyan para sa buhay sa bagong kinaban na may lubos na pagtubod sa mga panuga ni Jehova!