1. Anong peryodo nin panahon an kinabubuhayan niyato?

NABUBUHAY kita sa masakit na marhay na panahon. An peryodong ini nin panahon na nagpuon kan 1914 inaapod kan Bibliya na ‘huring mga aldaw.’ Puon kan ‘panahon na ini na makahahandal,’ mas naggrabe nanggad an sitwasyon sa kinaban kun ikukumparar sa mga panahon bago an makasaysayan na taon na iyan. (2 Tim. 3:1-5) Asin padagos pang magrururo an sitwasyon sa kinaban huli ta ihinula kan Bibliya na ‘an mga maraot na tawo asin mga madaya [urog na magraraot].’—2 Tim. 3:13.

2. Anong klase an mga libangan sa kinaban na ini? (Hilingon an ritrato sa itaas.)

² Para sa paglilibang, naghihiling o naggigibo an dakul na tawo nin mga bagay na ibinibilang kan Bibliya na madahas, imoral, espiritistiko, o bakong diyosnon. Halimbawa, sa Internet, mga programa sa telebisyon, pelikula, nobela, asin mga magasin, ipinapahiling na garo baga puwede nang akuon an kadahasan asin imoralidad. An mga paggawi na dati dai inaako ginibo nang legal sa ibang mga lugar. Pero dai buot sabihon kaiyan na aakuon na nin Diyos an siring na mga paggawi.—Basahon an Roma 1:28-32.

3. Ano an parating paghiling kan iba sa mga tawong namumuhay uyon sa mga pamantayan kan Kasuratan?

 ³ Kan inot na siglo, hinabuan kan mga parasunod ni Jesus an maating mga libangan. Huli kaini asin sa iba pa nindang paggawi bilang mga Kristiyano, pinakaraot asin pinersegir sinda kan iba. ‘Nagngangalas an mga pagano ta kamong [mga Kristiyano] dai na ngunyan nakikiiba sa sainda sa maraot na pamumuhay,’ an isinurat ni apostol Pedro, “kaya pinapakaraot ninda kamo.” (1 Ped. 4:4, BPV *) Iyo man ngunyan, an mga namumuhay uyon sa mga pamantayan nin Diyos ibinibilang na bakong normal kan kinaban. Apuwera diyan, ‘an gabos na buot mamuhay nin diyosnon diyan ki Cristo Jesus, magtitios [man] nin paglamag.’—2 Tim. 3:12.

4. Ano an sinasadol sa sato kan Kasuratan na dai gibuhon kun dapit sa kinaban na ini?

⁴ Sinasadol kan Kasuratan an mga gustong gibuhon an kabutan nin Diyos na dai mamuot sa kinaban na ini asin sa mga gibo kaiyan. (Basahon an 1 Juan 2:15, 16.) An relihiyon, pulitika, asin komersiyo kan kinaban na ini—kabali na an media—nasa irarom kan impluwensiya kan “diyos kan sistemang ini nin mga bagay,” si Satanas na Diyablo. (2 Cor. 4:4, NW; 1 Juan 5:19) Kaya kaipuhan niyatong mga Kristiyano na pilion an satong mga kaiba-iba. Ihinahayag kan ipinasabong na Tataramon nin Diyos an katotoohan na ini: ‘Dai kamo madayaan. An maraot na pag-iriba nakakaraot kan marahay na mga ugali.’—1 Cor. 15:33.

5, 6. Kiisay kita dapat na dai makiiba, asin taano?

⁵ Tanganing dai maraot an satong marahay na mga ugali, dai ta dapat magin dayupot na kairiba an mga tawong naggigibo nin maraot na mga bagay. Kaiba sa mga ini bako sana an mga bako tang kapagtubod kundi pati man an mga nagsasamba daa ki Jehova pero tuyong binabalga an saiyang mga ley. Kun an naghihingakong mga Kristiyanong iyan makagibo nin magabat na pagkakasala asin dai magsulsol, dai na kita dapat na nakikiiba sa sainda.—Roma 16:17, 18.

⁶ Kun makikiiba kita sa mga dai nagsusunod sa ley nin Diyos, posibleng matentaran kitang arugon an mga ginigibo ninda tangani sanang akuon ninda kita. Halimbawa, kun makikiiba kita sa imoral na mga tawo, tibaad matentaran kita na gumibo man nin imoral na bagay. Nangyari na iyan sa nagkapirang Kristiyano, asin an iba sa sainda natiwalag huling dai sinda nagsulsol. (1 Cor. 5:11-13) Kun dai sinda magsulsol, an kamugtakan ninda magigin arog kan ilinadawan ni Pedro.—Basahon an 2 Pedro 2:20-22.

7. Sairisay an dapat na pilion tang magin dayupot na amigo?

⁷ Maski ngani gusto tang magin mabuot dawa sa mga dai nagsusunod sa ley nin Diyos, dai kita dapat na magin dayupot na kaiba-iba ninda o amigo. Kaya, sala nanggad para sa sarong daraga o solterong Saksi ni Jehova na makipag-date sa sarong bakong bawtisado, bakong maimbod sa Diyos, asin dai iginagalang an Saiyang halangkaw na mga pamantayan. Mas mahalaga na mapagdanay niyato an pag-uyon nin Diyos kisa sa akuon kan mga tawong dai namumuhay kauyon kan mga ley ni Jehova. An dayupot niyatong mga kaiba-iba dapat na idtong mga naggigibo kan kabutan nin Diyos. Sinabi ni Jesus: ‘An siisay man na minagibo kan kabutan nin Diyos, ini iyo an sakong tugang na lalaki, asin tugang na babayi patin ina.’—Mar. 3:35.

8. Ano an nagin epekto sa suanoy na Israel kan maraot na pag-iriba?

⁸ Naeksperyensiyahan kan mga Israelita an kapaha-pahamak na epekto kan maraot na mga pag-iriba. Pagkatapos na iligtas sinda ni Jehova sa pagkauripon sa Ehipto, giniyahan niya sinda pasiring sa Dagang Panuga asin pinatanidan sinda manungod sa mga nakaistar diyan: ‘Dai ka magluhod sa saindang mga Diyos, dai ka man sa sainda magkuyog, dai ka man maggibo kan  saindang pinaggigibo; ata nganing ihurulog mo sindang biyo, asin ralaglagon mo nanggad an saindang mga ladawan. Alagad ki Jehova na saindong Diyos maglingkod kamo.’ (Ex. 23:24, 25) Pero, an kadaklan sa mga Israelita dai nagsunod sa mga pagbuot ni Jehova. (Sal. 106:35-39) Huling dai sinda nagin maimbod sa Diyos, sinabi sa sainda ni Jesus: “Uya! An saindong harong pinabayaan na sa saindo.” (Mat. 23:38, NW) Isinikwal ni Jehova an Israel, asin ibinalyo an saiyang mga bendisyon sa bagong maestablisar na Kristiyanong kongregasyon.—Gui. 2:1-4.

9. Taano ta puwedeng magin peligroso an media sa kinaban na ini?

⁹ An kadaklan sa ipinapahiling kan media sa kinaban na ini, arog kan mga programa sa telebisyon, website, asin babasahon, puwedeng magsapeligro sa espirituwalidad nin mga Kristiyano. Dai dinisenyo an mga iyan para pakusugon an pagtubod ta ki Jehova asin sa saiyang mga panuga. Imbes, iniimpluwensiyahan kaiyan an mga tawo na magtiwala sa maraot na kinaban na ini ni Satanas. Kaya, kaipuhan kitang mag-ingat na marhay na dai mapili an mga bagay na makakapukaw nin ‘kinabanon na mga pagmawot.’—Tito 2:12, BPV.

10. Ano an mangyayari sa nakakaraot na mga babasahon asin pasali sa kinaban na ini?

¹⁰ Dai na mahahaloy, mawawara na an nakakaraot na mga babasahon asin mga pasali. Gabos iyan hahalion pag linaglag na an kinaban na irinerepresentar kaiyan—an kinaban ni Satanas. An Tataramon nin Diyos nagsasabi: ‘An kinaban na ini maagi sana asin an saiyang mga [mawot], alagad an naggigibo kan kabutan nin Diyos magdadanay sagkod lamang.’ (1 Juan 2:17) Siring man, nag-awit an salmista: ‘An mga [maraot] rurunuton, alagad an mga naghahalat ki Jehova, sinda an magmamana kan daga. Alagad an mga mahuyo magmamana kan daga, asin magkakararanga nin labi-labi sa katuninungan.’ Gurano kahaloy? ‘An mga [matanos] magmamana kan daga, asin mabubuhay diyan sagkod lamang.’—Sal. 37:9, 11, 29.

11. Paano itinatao nin Diyos sa saiyang banwaan an nakakapakusog na espirituwal na kakanon?

¹¹ Kabaliktaran sa ginigibo kan kinaban, an organisasyon ni Jehova sa huring mga aldaw na ini nagtatabang sa mga tawo na makapamuhay sa paagi na minagiya sa buhay na daing sagkod. Kan mamibi si Jesus ki Jehova, sinabi niya: ‘Ini [nangangahulugan nin] buhay na daing katapusan, na sinda makamidbid sa saimo, na ika sana an tunay na Diyos, asin ki Jesu-Cristo na saimong sinugo.’ (Juan 17:3) Paagi kan Saiyang organisasyon, tinatawan kita kan satong Ama sa langit nin abundang nakakapakusog na espirituwal na kakanon. Bendisyon nanggad sa sato an pagkaigwa nin mga magasin, brosyur, libro, video, asin Web page na nagtatabang sa sato na padagos na maglingkod sa Diyos! Nag-aareglar man an organisasyon nin Diyos nin regular na mga pagtiripon sa labing 110,000 na kongregasyon sa bilog na kinaban. Tinutukar sa mga pagtiripon na iyan asin sa mga asembleya saka kumbensiyon an espirituwal na mga bagay na nagpapakusog sa satong pagtubod sa Diyos asin sa saiyang mga panuga.—Heb. 10:24, 25.

12. Ipaliwanag an sadol kan Bibliya na mag-agom ‘diyan sana sa Kagurangnan.’

¹² Lalo nang mahalaga para sa mga Kristiyanong gustong mag-agom na pilion an saindang kaiba-iba. Malinaw kitang sinasadol kan Tataramon nin Diyos: ‘Dai kamo makipagsakal na bakong timbang sa mga dai nagtutubod, huli ta paanong magkauyon an katanusan asin an kabikuan? O anong pakisumaro kan liwanag sa diklom?’ (2 Cor. 6:14) Sinasadol kan Bibliya an mga lingkod nin Diyos na naghahanap nin magigin agom na mag-agom ‘diyan sana sa Kagurangnan,’ an buot sabihon, mag-agom sana nin dusay asin bawtisadong lingkod ni Jehova na namumuhay kauyon kan mga pamantayan Niya. (1 Cor. 7:39) Kun kapagtubod an magigin agom nin sarong  Kristiyano, magkakaigwa siya nin kaiba-iba na dusay ki Jehova, na matabang sa saiya na magdanay na maimbod sa Diyos.

13. Anong pagbuot dapit sa pagpili nin magigin agom an itinao nin Diyos sa mga Israelita?

¹³ Aram ni Jehova kun ano an pinakamarahay para sa saiyang mga lingkod, asin puon kaidto, dai nagbago an pagbuot niya kun dapit sa pagpili nin magigin agom. Halimbawa, isip-isipa an saiyang malinaw na pagbuot sa Israel paagi ki Moises. Kun dapit sa mga nakaistar sa mga nasyon na nakapalibot sa sainda—mga tawong dai naglilingkod ki Jehova—sinabi niya sa mga Israelita: ‘Dai ka makipagbalae sa sainda. Dai mo ipagtao an saimong aking babayi sa saindang aking lalaki, dai mo man ipagpaagom an saindang aking babayi sa saimong aking lalaki. Huli ta papasukion ninda an saimong aki [sa pagsunod sa sako] asin maglilingkod sinda sa mga putik na diyos; asin an kaanggutan ni Jehova malaad sa saindo, asin tutunawon ka nin madali.’—Deut. 7:3, 4.

14, 15. Ano an nagin epekto ki Solomon kan pagbaliwala niya sa pagbuot ni Jehova?

¹⁴ Kan inot na mga taon kan paghadi kan aki ni David na si Solomon, namibi ini para sa kadunungan, asin itinao iyan sa saiya nin Diyos. Kaya nagin bantog si Hading Solomon bilang an madunong na tagapamahala nin sarong mayaman na nasyon. Sa katunayan, ini an sinabi kan reyna nin Seba kan magbisita siya ki Solomon: ‘Dai ako nagtubod kan mga bareta sagkod na nagdigdi ako asin nahiling kan sadiri kong mga mata. Alagad kabanga sana kan bareta an nadangog ko; an saimong kadunungan asin kayamanan urog pa kisa sa ibinareta sa sako.’ (1 Ha. 10:7, BPV) Pero, nagin mamundong halimbawa si Solomon sa kun ano an puwedeng mangyari sa saro pag binaliwala an pagbuot nin Diyos na dai mag-agom nin bakong kapagtubod.—Par. 4:13.

¹⁵ Sa ibong kan gabos na ginibo nin Diyos para sa saiya, binaliwala ni Solomon an pagbuot nin Diyos na dai mag-agom nin mga babayi hali sa nakapalibot na mga nasyon, mga tawong dai nagsasamba ki Jehova. Si Solomon “namuot sa dakul na babaying dayuhan” asin pag-abot nin panahon nagkaigwa siya nin 700 na agom asin 300 na babayi. Ano an nagin resulta? Kan gurang na si Solomon, an saiyang mga paganong agom ‘pinakiling an saiyang puso sa ibang mga diyos, asin guminibo si Solomon nin maraot sa mga mata ni Jehova.’ (1 Ha. 11:1-6) Naraot kan maraot na mga pag-iriba ni Solomon an saiyang kadunungan asin nagin dahilan kan pagbaya niya sa tunay na pagsamba. Sarong patanid nanggad ini sa mga Kristiyano na tibaad nag-iisip na mag-agom nin saro na dai namumuot ki Jehova!

16. Anong sadol hali sa Kasuratan an aplikado para sa mga lingkod nin Diyos na may agom na bakong kapagtubod?

¹⁶ Paano kun magin parasamba nin Diyos an saro na may agom na bakong kapagtubod? An Bibliya nagsasabi: ‘Kamong mga agom na babayi, magpasakop kamo sa saindong mga agom na lalaki, tanganing minsan kun may dai minatubod sa tataramon, sinda madara na dai nin tataramon paagi kan pamumuhay nin saindang mga agom na babayi.’ (1 Ped. 3:1) Para sa Kristiyanong mga agom na babayi an mga tataramon na iyan, pero aplikado man iyan sa mga lalaking nagin parasamba ni Jehova na may agom na bakong kapagtubod. Malinaw an sadol kan Bibliya: Magin marahay na agom, asin mamuhay uyon sa halangkaw na pamantayan nin Diyos para sa mga mag-agom. Dakul na agom na bakong kapagtubod an nag-ako kan katotoohan huli sa nahiling nindang pagbabago sa saindang agom na nagsunod sa mga kahagadan nin Diyos.

17, 18. Taano ta nakaligtas si Noe asin an mga Kristiyano kan inot na siglo kan laglagon an maraot na sistema na inistaran ninda kaidto?

¹⁷ Iyo, an maraot na kaiba-iba nakakaraot nin marahay na mga ugali, pero an marahay na kaiba-iba may maitataong marahay na impluwensiya. Halimbawa kaiyan si Noe, na nabuhay kaidto sa kinaban na pano nin maraot pero dai siya  nakiamigo sa sainda. Kan panahon na idto, ‘nahiling ni Jehova na an karatan kan mga tawo labi-labi na sa daga, asin ta ano man na [tendensiya] nin mga pa2g-isip kan saindang puso anas sana nanggad na sa karatan.’ (Gen. 6:5) Kaya nagdesisyon an Diyos na puhuon an maraot na sistemang iyan, pati na an mga tagasuporta kaiyan, paagi sa sarong delubyo na lakop sa bilog na globo. Pero ‘si Noe tawong banal asin daing katuyawan [kumpara sa saiyang mga kakontemporanyo]. Siya naglakaw kaiba nin Diyos.’—Gen. 6:7-9.

¹⁸ Siguradong dai nakiiba si Noe sa mga tawong dai namumuot ki Jehova. Ginamit niya asin kan saiyang pitong kapamilya an saindang panahon sa paggibo kan kabutan nin Diyos, kaiba na an pagtugdok nin arka. Apuwera diyan, si Noe nagin man ‘sarong parahulit nin katanusan.’ (2 Ped. 2:5) Huli sa paghuhulit ni Noe, paggibo kan arka, asin pakikiiba sa saiyang pamilya, nagin sibot siya sa paggibo kan mga bagay na nakapaugma sa Diyos. Bilang resulta, si Noe asin an saiyang pamilya nakaligtas sa Baha. Dakula an pasasalamat niyato ki Noe, sa saiyang agom, sa saiyang mga aking lalaki, saka sa mga agom kaini huling gabos kita naggikan sa pamilyang ini na maimbod na naglingkod ki Jehova. Arog ninda, an maimbod asin makinuyog na mga Kristiyano kan inot na siglo dai man nakiiba sa mga dai namumuot ki Jehova kaya nakaligtas sinda kan laglagon an Jerusalem asin an Judiong sistema nin mga bagay kan 70 C.E.—Luc. 21:20-22.

19. Ano an dapat tang gibuhon tanganing makamtan an pag-uyon nin Diyos?

¹⁹ Bilang mga parasamba ni Jehova kaipuhan niyatong arugon si Noe asin an saiyang pamilya, saka an makinuyog na mga Kristiyano kan inot na siglo. Dapat kitang magdanay na suway sa maraot na sistema nin mga bagay na iniistaran niyato asin makiiba-iba sa minilyon na maimbod na mga tugang tanganing mas kumusog an satong pagtubod. An pagigin harani sa mga tawong namumuhay kauyon kan mga pamantayan nin Diyos makakatabang sa sato na magin ‘danay na masarig an pagtubod’ sa masakit na marhay na mga panahon na ini. (1 Cor. 16:13; Tal. 13:20) Asin isip-isipa na sana an satong marahayon na paglaom! Kun pipilion niyato an satong mga kaiba-iba sa huring mga aldaw na ini, puwede kitang makaligtas sa kalaglagan kan maraot na sistemang ini asin mabuhay sa matanos na bagong kinaban nin Diyos na madali nang umabot!