SA HURING mga taon kan buhay ni Nikolai Dubovinsky, an tiyo kan sakong mga magurang, isinurat niya an nakakaugma asin nakakanerbiyos niyang mga eksperyensiya sa paglilingkod ki Jehova. An kadaklan kaiyan nangyari kan panahon na ipinagbawal an satong gibuhon sa dating Unyon Sobyet. Dawa may mga pagbalo asin kadipisilan, nagdanay siyang maimbod saka dai lamang siya pinangluyahan nin buot. Parating sinasabi ni Lolo Nikolai na gusto niya na maaraman kan mga hoben an istorya niya, kaya isasaysay ko an nagkapirang pangyayari sa buhay niya. Namundag siya kan 1926 sa sarong pamilya nin parauma sa baryo nin Podvirivka, na nasa Chernivtsi Oblast, Ukraine.

Pinunan ni Lolo Nikolai an saiyang istorya: “Sarong aldaw kaidtong 1941, an matua kong tugang na si Ivan nagdara sa harong nin librong The Harp of God saka The Divine Plan of the Ages, mga magasin na Torrengbantayan, asin nagkapirang buklet. Binasa ko idto gabos. Nangalas ako kan maaraman kong bako an Diyos an dahilan kan gabos na kariribukan sa kinaban, kundi an Diyablo. Kaiba kan mga publikasyon, binasa ko an mga Ebanghelyo asin narealisar kong nanumpungan ko na an katotoohan. Gustong-gusto kong ipinapakipag-ulay sa iba an paglaom ko sa Kahadian. Mantang pinag-aadalan ko an mga publikasyon na ini, mas nasabutan ko an katotoohan saka kuminusog an pagmawot kong magin lingkod ni Jehova.

“Aram kong maagi ako nin pagbalo huli sa sakong pagtubod. Giyera kaidto asin habo kong gumadan nin tawo. Para maiandam an sadiri ko sa maabot na mga pagbalo, pinunan kong magtuom nin mga teksto arog kan Mateo 10:28 asin 26:52. Determinado akong magdanay na maimbod ki Jehova maski magadan pa ako!

“Nag-18 anyos ako kan 1944 asin inapudan ako para magsuldados. Idto an inot na pagkakataon na nakaibanan ko an sakong mga kapagtubod, mga hoben na brother na nasa edad nang apudon sa serbisyo militar na tiniripon man duman para piriton na magsuldados. Marigon ming sinabi sa mga awtoridad na dai kami makikikabtang sa giyera. Naanggot an mga militar kaya tinakot ninda kami asin sinabing dai kami tatawan nin kakanon, puwersahan na papakaluton nin mga kali, o babadilon. Daing takot ming sinabi: ‘Kapot nindo an buhay mi. Pero ano man an gibuhon nindo samo, dai mi babalgahon an pagbuot nin Diyos na, “Dai ka maggadan.”’—Ex. 20:13.

“Kaya, kaiba an duwa pang brother, ipinadara kami sa Belarus para magtrabaho sa uma saka maghirahay nin mga harong. Nagigirumduman ko pa an nakakapanggirabong epekto kan giyera sa luwas kan siyudad nin Minsk: Nagkaturutong na kahoy sa gilid kan tinampo,  mga bangkay nin tawo asin mga kabayo sa mga kali saka kadlagan, asin abandonadong mga kareta saka kanyon pati ngani mga pidaso nin suminabog na eroplano. Nahihiling ko mismo an resulta kan dai pagsunod sa mga pagbuot nin Diyos.

“Natapos an giyera kan 1945, pero sinentensiyahan pa man giraray kami nin sampulong taon na pagkapreso huling nagsayuma kaming makigiyera. Sa inot na tulong taon, mayo kaming mga pagtiripon o literatura. Nakakontak kami nin pirang sister paagi sa surat, pero inarestar man sinda asin sinentensiyahan nin 25 taon sa kampo nin puwersahan na pagtrabaho.

“Pero kan 1950, amay kaming napaluwas sa presuhan asin nakapuli kami sa pamilya mi. Kan nakapreso ako, nagin Saksi ni Jehova an sakong ina asin an nguhod kong tugang na si Maria! Bako pang mga Saksi an matua kong mga tugang na lalaki pero nagba-Bible study na sinda. Huling aktibo ako sa paghuhulit, gusto giraray akong ipapreso kan ahensiyang panseguridad kan Sobyet. Dangan kan ako 24 anyos, pinakiulayan ako kan mga tugang na nangangataman sa gibuhon na tabangan ko sinda na patagong magprodusir nin literatura.”

“Pirming sinasabi kan mga Saksi sa lugar mi, ‘Kun bawal sa ibabaw kan daga an pang-Kahadian na gibuhon, magpapadagos iyan sa irarom.’ (Tal. 28:28) Kan panahon na idto, kadaklan sa pag-imprenta mi ginigibo sa sekretong mga lugar sa irarom kan daga. An inot kong ‘imprentahan’ sarong sadit na kuwartong kinalot sa irarom kan harong kan matua kong tugang na si Dmitry. Minsan dai ako naghahali diyan sa laog nin duwang semana. Pag napalsok na an gasera huling kulang na an oksiheno sa laog, mahigda nguna ako asin mahalat na mapano giraray an kuwarto nin aire.

 “Sarong aldaw, hinapot ako kan katrabaho kong brother, ‘Nikolai, nabawtismuhan ka na?’ Dai pa ako kaidto bawtisado dawa 11 taon na akong naglilingkod ki Jehova. Ipinakipag-ulay niya sa sako an bagay na iyan, asin kan banggi man sanang idto, nabawtismuhan ako sa sarong danaw sa edad na 26. Pakalihis nin tulong taon, nadagdagan an responsabilidad ko—an magin miyembro kan Country Committee. Kan panahon na idto, pag inarestar an may paninimbagan na brother, nagnonombra tulos nin ibang brother na maribay sa saiya para dagos-dagos an pang-Kahadian na gibuhon.”

“Mas dipisil mag-imprenta sa irarom kan daga kisa sa mapreso! Tanganing dai mamanmanan kan KGB, pitong taon akong dai nag-atender sa mga pagtiripon sa kongregasyon asin ako mismo an kaipuhan na magpakusog sa espirituwalidad ko. Nagkakahilingan sana kaming magkapamilya pag binibisita ko sinda, na bihira sanang mangyari. Pero, nasasabutan ninda an sitwasyon ko, asin nakakapakusog iyan sa sako. Nangruruluya an hawak ko huli ta pirmi akong stress saka kaipuhan na pirmi kaming mag-ingat na dai madakop. Dapat na andam kami sa ano man na posibleng mangyari. Halimbawa, sarong banggi, duwang pulis an nagduman sa harong na pigdadagusan ko. Naglukso ako sa bintana asin nagdulag pasiring sa kadlagan. Nagluwas ako sa kaumahan, dangan nakadangog ako nin garo sagitsit. Kan makadangog na ako nin mga putok, sa mga bala palan hali an sagitsit na idto! Suminakay sa kabayo an saro sa naglalapag sako asin pigparabadil niya ako sagkod na maubusan siya nin bala. Tinamaan ako sa takyag. Pagkatapos nin limang kilometrong paglapag sako, nakadulag ako kan makatago ako sa kadlagan. Kan huri, sa pagbista sa sako, naaraman kong 32 na beses ninda akong pinaputukan!

“Huling haloy akong nasa irarom kan daga, nagin malungsi akong marhay. Huli kaiyan, tibaad marisa ninda kun ano an ginigibo ko. Kaya sagkod na mapupuwede, nagbabalad ako sa saldang. Naapektaran man an salud ko. Sarong beses, dai ako nakaatender sa sarong mahalagang miting kaiba kan ibang mga brother huling nagdudugo an nguso ko saka dungo.”

“Kan Enero 26, 1957, naarestar ako. Pakalihis nin anom na bulan, ilinuwas kan Korte Suprema kan Ukraine an desisyon sa kaso ko. Sinentensiyahan ako nin kagadanan paagi sa firing squad, pero huling hinali na sa Ukraine an padusang kagadanan, ibinaba an sentensiya ko sa 25 taon na pagkapreso. Kun susumahon, maabot sa 130 taon sa kampo nin puwersahan na pagtrabaho an sentensiya sa samong walo.  Ipinadara kami sa mga kampo sa Mordvinia, na diyan igwa nin mga 500 na Saksi. Pasekreto kaming nagtitiripon sa saradit na grupo para pag-adalan an Torrengbantayan. Pagkatapos na mabasa nin sarong guwardiya an nakumpiskar na mga magasin, sinabi niya: ‘Kun padagos nindo ining babasahon, mayong makakadaog saindo!’ Onesto kami pirmi sa trabaho asin an nagigibo mi labi pa sa iinasignar sa samo. Pero, sinabi kan komandante kan kampo: ‘Bakong importante samo an nagigibo nindo. An kaipuhan mi, kaimbudan saka pagsurog nindo sa samo.’”

Pagkaluwas ni Lolo Nikolai sa kampo nin puwersahan na pagtrabaho kan 1967, nagtabang siya sa pag-organisar nin mga kongregasyon sa Estonia asin St. Petersburg, Russia. Sa kapinunan kan taon 1991, nabaliktad an desisyon kan korte kaidtong 1957 huli sa kakulangan nin ebidensiya para masabing may nakomiter na krimen. Kan panahon na idto, napatunayan na daing sala an dakul na Saksi na nakaeksperyensiya nin maringis na pagtrato kan mga awtoridad. Kan 1996, nagbalyo si Lolo Nikolai sa siyudad nin Velikiye Luki sa Pskov Oblast, mga 500 kilometros an rayo sa St. Petersburg. Nakabakal siya nin daga na may sadit na harong, asin kan 2003, sarong Kingdom Hall an itinugdok sa kataid kan harong niya. Duwang mauswag na kongregasyon an nagtitiripon diyan ngunyan.

Ako asin an sakong agom parehong naglilingkod sa sangang opisina kan Mga Saksi ni Jehova sa Russia. Kan Marso 2011, mga pirang bulan bago magadan si Lolo Nikolai, dinalaw niya kami sa Bethel sa huring pagkakataon. Napahiro kaming marhay kan maugma niyang sinabi: “Sain ko man hilingon, masasabi kong nagpuon na an ikapitong aldaw nin pagmartsa sa palibot kan Jerico.” (Jos. 6:15) Kan panahon na idto, 85 anyos na siya. Dawa ngani nagin masakit an buhay niya, ilinadawan niya iyan sa mga tataramon na ini: “Ugmahon akong marhay na nagdesisyon akong paglingkudan si Jehova kan ako hoben pa! Dai ko nanggad iyan pinagbasulan!”