1, 2. Taano ta namutan ni Jesus si Marta, pero ano an nagpapahiling na bako siyang perpekto?

ANO an naiisip mo pag nadadangog o nababasa mo an karakter sa Bibliya na si Marta? Dawa siya sana an babayi na nginaranan bilang saro na namutan ni Jesus, namutan man ni Jesus asin iginalang an iba pang maimbod na mga babayi arog kan saiyang ina na si Maria saka an saro pang Maria na tugang ni Marta. (Juan 11:5; 19:25-27) Kaya taano ta namutan ni Jesus si Marta, arog kan sinambit sa Ebanghelyo?

² Bako sanang huli sa pagigin mapag-istimar asin mahigos ni Marta kaya namutan siya ni Jesus, kundi siyertong huli man sa saiyang makusog na pagtubod. Talagang nagtubod siya sa gabos na itinukdo ni Jesus. Makusog man an pagtubod niya na si Jesus an ipinanugang Mesiyas. (Juan 11:21-27) Pero, arog niyato gabos, bakong perpekto si Marta. Kan magin bisita ninda si Jesus, sinabihan niya si Jesus kun ano an dapat gibuhon tanganing itama an sarong sitwasyon na sa paghuna ni Marta sala. Sinabi ni Marta: ‘Kagurangnan, dai ka nakikilabot na pinapabayaan ako kan tugang ko na ako sana an maglingkod? Sabihi ngani siya na tabangan ako.’ (Basahon an Lucas 10:38-42.) Ano an manunudan niyato sa istoryang ini?

3, 4. Sa anong paagi pinili ni Maria an “marahay na kabtang,” asin ano an nanudan ni Marta na siyertong isinapuso niya? (Hilingon an ritrato sa kapinunan kan artikulo.)

³ Bilang pasasalamat ni Jesus sa pagigin mapag-istimar ni Marta asin Maria, tinawan niya sinda nin espirituwal na regalo. Inaprobetsaran ni Maria an oportunidad na makanuod sa Dakulang Paratukdo asin ‘nagtukaw siya sa may pamitisan kan Kagurangnan, asin naghihinanyog kan saiyang tataramon.’ Puwede kutanang arog man kaiyan an ginibo ni Marta. Siguradong kokomendaran siya ni Jesus kun ipinundo nguna niya an saiyang ginigibo para magdangog sa saiya.

⁴ Kaso, nagin sibot si Marta sa pagpreparar nin mga kakanon asin sa iba pang gibuhon sa harong tanganing, sagkod na posible, magin maugma an pagbisita ni Jesus. Pero huli kaini, nahadit siyang marhay asin nairitar ki Maria. Narisa ni Jesus na sobra-sobra an ginigibong preparasyon ni Marta, kaya mabuot niyang sinabi: ‘Marta, Marta, nahahadit ka asin nasisibot manungod sa dakul na bagay.’ Sinabi pa niya na supisyente na dawa saro sanang putahe. Dangan, kinomendaran ni Jesus si Maria asin lininaw na dai ini nagin pabaya. Sinabi niya: ‘Si Maria, pinili an marahay na kabtang, dai iyan sa saiya hahalion.’ Malingawan man ni Maria kun ano an kinakan niya sa espesyal na okasyon na idto, pero nungka niyang malilingawan an komendasyon asin marahayon na espirituwal na kakanon na nakua niya sa paghinanyog ki Jesus na dai naaagaw an atensiyon. Pakalihis nin labing 60 taon, isinurat ni apostol Juan: ‘Namutan ni Jesus si Marta asin an saiyang tugang na babayi.’ (Juan 11:5) Ipinapahiling kan ipinasabong na tataramon na ini na siyertong isinapuso ni Marta an mamumuton na pagtatanos ni Jesus asin naghinguwa siyang maimbod na maglingkod ki Jehova sa bilog niyang buhay.

5. Paano naiiba an buhay ta ngunyan kisa sa buhay kaidtong mga panahon kan Bibliya, asin ano an dapat niyatong ihapot?

⁵ Mapadapit sa mga pang-agaw nin atensiyon o pandisturbo, paano naiiba an buhay ta ngunyan kun ikukumparar sa buhay kaidtong mga panahon kan Bibliya? “Ngunyan sana nangyari sa kasaysayan na ipinaghahambog kan katawuhan an pinakamarahay na paagi nin komunikasyon, marikason na mga makinang pang-imprenta, mga magasin na pano-pano nin ritrato, radyo, mga pelikula, telebisyon. . . . Aroaldaw ninda kitang pinapauranan nin bagong mga pandisturbo . . . Dai pa sana nahahaloy, maugma tang iniisip na nabubuhay kita sa ‘Panahon nin Kaliwanagan.’ Pero mantang naghahaloy, nagigin ining ‘Panahon nin Pandisturbo.’” Sinabi an mga tataramon na ini sa sarong grupo nin mga estudyante sa Estados Unidos labing 60 taon na an nakaagi. An isyu kan The Watchtower na Setyembre 15, 1958 nagsasabi: “Posibleng marhay na mas madakul an mga pandisturbo mantang nagrarani an kalaglagan kan kinaban na ini.” Totoo man nanggad! Kaya mahalagang ihapot niyato: Ano an magigibo ta para makalikay sa mga pandisturbo asin magin arog ni Maria na pirming nakapokus sa espirituwal na mga bagay?

6. Paano ginamit kan banwaan ni Jehova an teknolohiya kan kinaban?

⁶ Tanganing mapalakop an tunay na pagsamba, ginagamit kan daganon na kabtang kan organisasyon nin Diyos an teknolohiya kan kinaban. Halimbawa, bago asin durante kan Giyera Mundiyal I, ipinasali ninda an “Photo-Drama of Creation.” Sarong pelikula ini na naggamit nin makulor na mga slide asin haralipot na isinapelikulang pag-akto na may musika asin boses. Minilyon sa bilog na kinaban an naranga kan presentasyon na ini, na sa katapusan kaiyan ipinahiling an maabot na matuninong na Sangribong Taon na Paghadi ni Jesu-Cristo. Pagkatapos, ginamit an radyo tanganing ibrodkast an mensahe kan Kahadian asin nadangog iyan nin minilyon pa sa bilog na daga. Sa ngunyan, ginagamit niyato an kompyuter asin Internet tanganing ipalakop an maugmang bareta sa gabos na parte kan kinaban dawa sa hararayong isla.

7. (a) Taano ta peligroso an paggamit nin lubos sa kinaban? (b) Sa ano kita dapat na mag-ingat na marhay? (Hilingon an nota sa ibaba.)

 ⁷ Arog kan ipinapatanid kan Bibliya, peligroso an paggamit nin lubos sa mga bagay na inaalok kan kinaban. (Basahon an 1 Corinto 7:29-31.) May mga bagay na bako man sala pero puwedeng makaubos kan panahon nin sarong Kristiyano, arog kan mga aling-alingan, pagbasa nin mga libro, paghiling nin telebisyon, pamamasyar, pagduman sa mga mall, asin pag-aram kan pinakabagong mga gadyet o gamit. Nakakaubos man nin panahon asin nakakaadik pa ngani an social networking, pagpadara nin mga text saka e-mail, o pagsubaybay sa mga isport saka sa pinakabagong mga bareta. * (Par. 3:1, 6) Kun dai ta lilimitaran an panahon niyato sa bakong mahalagang mga bagay, tibaad mapabayaan ta an pinakaimportante sa gabos na aktibidad—an satong pagsamba ki Jehova.—Basahon an Efeso 5:15-17.

8. Taano ta mahalagang marhay an sadol na dai mamuot sa mga bagay na nasa kinaban?

⁸ Dinisenyo ni Satanas an saiyang kinaban na nakakaakit asin nakakaagaw kan satong atensiyon. Nagin totoo iyan kan inot na siglo, asin lalo na sa panahon niyato ngunyan. (2 Tim. 4:10) Kaya, kaipuhan niyatong sunudon an sadol na ini: ‘Dai kamo mamuot sa mga bagay na nasa kinaban.’ Kun padagos kitang magibo nin pagbabago para maiuyon an satong buhay sa sadol na iyan, dai maaagaw an atensiyon ta asin mararom an satong ‘pagkamuot sa Ama.’ Dangan, magigin mas madali para sa sato na gibuhon an kabutan nin Diyos asin sagkod lamang na magdadanay sa sato an saiyang pag-uyon.—1 Juan 2:15-17.

9. Ano an sinabi ni Jesus dapit sa satong piguratibong mata, asin paano siya nagin marahay na halimbawa sa bagay na ini?

⁹ Kauyon na marhay sa itinukdo asin ipinahiling na halimbawa ni Jesus an mamumuton niyang pagtatanos ki Marta. Dinagka niya an saiyang mga disipulo na papagdanayon na “nakapokus” an saindang piguratibong mata tanganing dai maagaw an atensiyon ninda mantang iniinot an intereses kan Kahadian. (Basahon an Mateo 6:22, 33. *) Dai napagabatan si Jesus nin materyal na mga bagay; mayo siyang sadiring harong o daga.—Luc. 9:58; 19:33-35.

10. Anong marahay na halimbawa an ipinahiling ni Jesus sa kapinunan kan saiyang ministeryo?

 ¹⁰ Dakul na pangyayari kan ministeryo ni Jesus an puwede kutanang nakaagaw kan saiyang atensiyon, pero dai siya nagpadara sa mga iyan. Sa kapinunan kan saiyang ministeryo, pagkatapos niyang magtukdo sa dakul na tawo sa Capernaum asin gumibo nin mga milagro, pinakiulayan ninda siya na dai na maghali sa siyudad. Pero ano an reaksiyon ni Jesus sa nakakapataba sa pusong pakiulay na ini? Sinabi niya: ‘Kaipuhan ko man na maghulit kan marahay na bareta kan Kahadian nin Diyos sa ibang mga banwaan, huli ta dahil kaini ako isinugo.’ (Luc. 4:42-44) Talagang iyan an ginibo ni Jesus. Linakaw niya an hararayong lugar sa Palestina para maghulit asin magtukdo. Perpekto si Jesus, pero huli sa kaigutan niya sa paglilingkod sa Diyos, minsan napapagal man siya asin kaipuhan magpahingalo.—Luc. 8:23; Juan 4:6.

11. Ano an sinabi ni Jesus sa sarong lalaki na may iriwal sa pamilya, asin ano an ipinatanid ni Jesus?

¹¹ Sa sarong pagkakataon, mantang nagtutukdo si Jesus sa saiyang mga parasunod kun paano aatubangon an mga pagkontra, sarong lalaki an nagsaliot: ‘Paratukdo, pagbutan [mo] an sakong tugang na hirasan ako kan pamana.’ Pero habo ni Jesus na maimbuwelto sa personal na iriwal na ini. Kaya sinabi niya: ‘Lalaki, siisay an nagbugtak sako na magin hukom, o parahiras sa saindo?’ Dangan, nagpadagos si Jesus sa pagtutukdo niya asin pinatanidan an mga nagdadangog na kun mapokus sinda sa pagkakaigwa nin dakul na materyal na bagay, maaagaw kaini an saindang atensiyon sa paglilingkod sa Diyos.—Luc. 12:13-15.

12, 13. (a) Kan madali nang magadan si Jesus, ano an hinangaan kan nagkapirang Griegong proselita? (b) Ano an simbag ni Jesus sa sarong pakiulay na puwedeng makaagaw kan saiyang atensiyon?

¹² Pano nin tensiyon an huring semana kan buhay ni Jesus digdi sa daga. (Mat. 26:38; Juan 12:27) Kadakul pa siyang dapat gibuhon, saka aram niyang mapapaatubang siya sa makasusupog na pagbista asin maringis na kagadanan. Halimbawa, kan Domingo, Nisan 9 kan taon 33 C.E., arog kan ihinula, naglaog si Jesus sa Jerusalem sakay nin sarong ugbon na asno asin irinukyaw siya kan kadaklan bilang “saro na minadatong bilang Hadi sa ngaran ni Jehova.” (Luc. 19:38, NW) Sa suminunod na aldaw, naglaog si Jesus sa templo asin kusog-buot na pinalayas an mahanab na mga negosyante na ginagamit an harong nin Diyos para mangikil nin kuwarta sa mga kapwa ninda Judio.—Luc. 19:45, 46.

¹³ Kaiba sa mga nagpa-Jerusalem an nagkapirang Griegong proselita na napahangang marhay sa ginibo ni Jesus kaya nakiulay sinda ki apostol Felipe kun puwede nindang makaulay si Jesus. Pero, habo ni Jesus na mairayo an atensiyon niya sa nagdadangadang na mas mahalagang bagay na mangyayari sa saiya. Siguradong dai niya gustong magin popular tangani sanang makalikay sa kagadanan, bilang sarong atang, sa kamot kan mga kaiwal nin Diyos. Kaya pagkatapos na ipagirumdom na madali na siyang magadan, sinabi niya ki Andres asin Felipe: “An siisay man na namumuot sa saiyang buhay ipinapahamak iyan, alagad an siisay man na nauungis sa saiyang buhay sa kinaban na ini maiingatan iyan para sa buhay na daing katapusan.” Imbes na paonrahan an pakiulay kan mga Griegong idto, sinabi niya na mas marahay kun aarugon ninda an saiyang pagigin mapagsakripisyo. Dangan, nanuga siya: “Kun an siisay man gustong maglingkod sa sako, tatawan siya nin onra kan Ama.” Siguradong naipaabot ni Felipe sa mga Griegong idto an nakakapakusog sa buot na mensaheng ini.—Juan 12:20-26, NW.

14. Dawa iniinot ni Jesus sa saiyang buhay an paghuhulit, ano an nagpapahiling na nagin timbang siya?

¹⁴ Dawa habo ni Jesus na maagaw an saiyang atensiyon sa panginot niyang gibuhon na paghuhulit kan maugmang bareta, bako man puro paghuhulit na sana an iniisip niya. Halimbawa, inako niya an sarong imbitasyon sa kasal asin milagroso pa nganing ginibong arak an tubig para magin mas maugma an okasyon. (Juan 2:2, 6-10)  Kan imbitaran siya kan saiyang dayupot na mga amigo asin potensiyal na mga disipulo para sa pamanggihan, inako man niya iyan. (Luc. 5:29; Juan 12:2) Asin an pinakamahalaga, nagtagama si Jesus nin panahon para mamibi, maghurop-hurop, asin magpahingalo.—Mat. 14:23; Mar. 1:35; 6:31, 32.

15. Ano an isinadol ni apostol Pablo, asin paano siya nagpahiling nin marahay na halimbawa?

¹⁵ Iinagid ni apostol Pablo an dusay na mga Kristiyano sa mga paradalagan sa sarong halawig na paurumbasan asin sinabi niya: ‘[Halion] ta man an gabos na kagabatan.’ (Basahon an Hebreo 12:1.) Siguradong ginibo ni Pablo an ihinulit niya; binayaan niya an sarong marahayon na karera sa Judaismo na diyan puwede siyang yumaman asin magin bantog. Nagpokus siya sa ‘mga bagay na urog [na mahalaga]’ asin nagin mahigos sa paglilingkod sa Diyos. Nagbiyahe siya sa dakul na lugar arog kan Siria, Asia Minor, Macedonia, asin Judea. Mapadapit sa saiyang paglaom na buhay na daing katapusan sa langit, si Pablo nagsurat: ‘Linilingawan ko an mga bagay na nasa hudyan, asin [inaabot] an mga bagay na nasa inutan. [Pinagmamaigutan kong makaabot] sa pasuhan [para] sa balos.’ (Fil. 1:10; 3:8, 13, 14) Lubos na inaprobetsaran ni Pablo an saiyang pagigin mayong agom asin danay na nakapaglingkod sa Kagurangnan na dai naaagaw an atensiyon.—1 Cor. 7:32-35.

16, 17. May agom man kita o mayo, paano ta maaarog an halimbawa ni Pablo? Magsaysay nin eksperyensiya.

¹⁶ Arog ni Pablo, an ibang lingkod nin Diyos ngunyan piniling magdanay na mayong agom tanganing dikit an saindang responsabilidad sa pamilya asin urog na makapaglingkod ki Jehova. (Mat. 19:11, 12) An mga lingkod nin Diyos na igwang agom, sa parati, mas dakul an responsabilidad sa pamilya. Pero, may agom man kita o mayo, gabos kita puwedeng halion “an gabos na kagabatan” asin maglingkod sa Diyos na mayong gayong nakakaagaw nin atensiyon sagkod na posible. Tibaad kaipuhan tang bawasan an kinatudan na niyatong mga gibuhon na nakakaubos nin panahon asin magkaigwa nin mga pasuhan para madugangan an panahon ta sa paglilingkod sa Diyos.

¹⁷ Halimbawa, an mag-agom na si Mark asin Claire na taga Wales, parehong nagpayunir pagkatapos nindang maggradwar sa eskuwelahan. Pagkatapos nindang ikasal, nagpadagos pa man giraray sinda sa pagpapayunir. Sinabi ni Mark: “Mas pinasimple mi an samong buhay. Ipinabakal mi an harong mi na may tulong kuwarto saka nagpundo kami sa part time ming trabaho para makapagboluntaryo sa internasyonal na mga proyekto nin pagtugdok.” Sa nakaaging 20 taon, nalibot na ninda an bilog na Aprika tanganing magtabang sa pagtugdok nin mga Kingdom Hall. May panahon kaidto na 15 dolyar na sana an kuwarta ninda, pero dai sinda pinabayaan ni Jehova. Sinabi ni Claire: “Ugmahon kami na aroaldaw kaming nakakapaglingkod ki Jehova. Sa pag-agi nin panahon, kadakul ming nagin amigo, saka dai kami nagkulang nin ano man. An sadit ming mga isinakripisyo dai lamang maikukumparar sa kaugmahan na nakukua mi sa bilog na panahon na paglilingkod ki Jehova.” Arog man kaiyan an naeeksperyensiyahan kan dakul na nasa bilog na panahon na paglilingkod. *

18. Anong mga hapot an puwede niyatong pag-isipan?

¹⁸ Kumusta ka man? Ano an puwede mong gibuhon pag narisa mong nawara na an dati mong kaugmahan sa pag-inot kan intereses kan Kahadian huli sa mga pandisturbo? Tibaad kaipuhan mong pauswagon an paagi mo nin personal na pagbasa asin pag-adal sa Bibliya. Paano? Ipapaliwanag iyan sa masunod na artikulo.