1, 2. Ano an iniisip kan iba manungod sa Diyos?

INIISIP nin dakul na tawo na bakong mahalaga sa Diyos an saindang ginigibo. Sa katunayan, naniniwala an iba na mayong pakiaram an Diyos sa nangyayari sa mga tawo. Pagkatapos radason kan Super Typhoon Yolanda (Haiyan) an rehiyon nin Visayas sa Pilipinas kan Nobyembre 2013, sarong mayor nin sarong dakulang siyudad an nagsabi: “Sa hiling ko, nasa ibang lugar an Diyos.”

² Iniisip kan ibang tawo na dai nahihiling nin Diyos an saindang ginigibo. (Isa. 26:10, 11; 3 Juan 11) Arog sinda kan mga tawong ilinaladawan ni apostol Pablo kan siya magsabi: ‘Habo sindang magmidbid sa Diyos.’ An mga tawong iyan ‘pano nin gabos na katampalasanan, karatan, kapasluan, asin bisyo.’—Roma 1:28, 29, BPV. *

3. (a) Ano an mga dapat niyatong ihapot sa sadiri kun manungod sa Diyos? (b) Sa Bibliya, sa ano parating ipinapanungod an “kamot” ni Jehova?

³ Kumusta man kita? Bakong arog kan mga tawong nasambit sa itaas, aram niyato na nahihiling ni Jehova an gabos na ginigibo ta. Pero nagtutubod daw kita na interesado siya sa sato asin nahihiling daw niyato an saiyang matinabang na kamot sa satong buhay? Dugang pa,  kabilang daw kita sa sinasabi ni Jesus na mga tawong ‘mahihiling an Diyos’? (Mat. 5:8, BPV) Tanganing maaraman an kahulugan kaiyan, pag-ulayan nguna niyato an mga halimbawa sa Bibliya kan mga tawong nahiling asin dai nahiling sa saindang buhay an kamot nin Diyos. Dangan aaramon niyato kun paano ta malinaw na mahihiling an kamot ni Jehova sa satong buhay paagi kan satong mga mata nin pagtubod. Mantang pinag-uulayan ta an mga puntong ini, tandaan na sa Bibliya parating ginagamit an “kamot” nin Diyos para ipanungod sa saiyang aktibong kapangyarihan, na ginagamit niya para tabangan an saiyang mga lingkod asin daugon an saiyang mga kaiwal.—Basahon an Deuteronomio 26:8.

4. Taano ta dai nahiling kan mga kaiwal kan Israel an kamot nin Diyos?

⁴ Kaidto, dakul na tawo an nagkaoportunidad na mahiling asin madangog an mga ginibo nin Diyos para sa Israel. Paagi sa mga milagro, ilinigtas ni Jehova sa Ehipto an saiyang banwaan, asin dinaog an dakul na hadi na kalaban ninda. (Jos. 9:3, 9, 10) Sa ibong kan nahiling asin nadangog kan haros gabos na hadi sa sulnupan na kampi kan Jordan dapit ki Jehova, ‘nagkasararo an mga hading ini tanganing labanan si Josue asin an mga Israelita.’ (Jos. 9:1, 2, BPV) Dawa kan nakikipaglaban na an mga hading idto, nagkaoportunidad sindang mahiling an kamot nin Diyos. Huli sa dakulang kapangyarihan ni Jehova, ‘nag-untok an aldaw asin dai naghiro an bulan sagkod na nadaog kan Israel an saindang mga kaiwal.’ (Jos. 10:13, BPV) Pero tinugutan ni Jehova na ‘magtagas an saindang puso tanganing makipaglaban sinda sa Israel.’ (Jos. 11:20) Dai minidbid kan mga kaiwal kan Israel na an Diyos an nakikipaglaban para sa saiyang banwaan, kaya nadaog sinda.

5. Ano an dai minidbid kan maraot na si Hading Ahab?

⁵ Pag-abot nin panahon, nagkaoportunidad an maraot na si Hading Ahab nin Israel na mahiling nin nagkapirang beses an kamot nin Diyos. Sinabi sa saiya ni Elias: ‘Dai magkakaigwa nin uran minsan ambon sa mga taon na ini, kun bakong sa sakuyang tataramon!’ (1 Ha. 17:1) Malinaw na hali ki Jehova an mga tataramon na ini, pero dai iyan tinubod ni Ahab. Kan huri, nahiling ni Ahab an kalayo hali sa langit na uminubos sa atang ni Elias bilang simbag nin Diyos sa pamibi kaini. Dangan, sinabi ni Elias ki Ahab na tatapuson ni Jehova an tigmara asin sinabihan niya ini: ‘[Bumaba] ka tanganing dai ka [malaom] kan uran.’ (1 Ha. 18:22-45) Nahiling ni Ahab na nangyari an gabos na ini pero dai niya pa man giraray minidbid na mga ebidensiya ini kan dakulang kapangyarihan nin Diyos. Ini asin an iba pang nasambit nang mga halimbawa, nagtutukdo sa sato nin sarong importanteng leksiyon—kun nahihiling tang naghihiro sa satong buhay an kamot ni Jehova, dapat niyatong midbidon iyan.

6, 7. Ano an malinaw na nahiling kan mga Gibeonita asin ni Rahab kan panahon ni Josue?

⁶ Sa kabaliktaran, nahiling kan iba an kamot nin Diyos dawa nasa pareho sindang sitwasyon kan maraot na mga hading idto. Halimbawa, bakong arog kan dakul na nasyon na nakipaglaban sa Israel kan panahon ni Josue, an mga Gibeonita nakipagkatuninungan sa Israel. Taano? Sinabi ninda: ‘An saimong mga uripon nagharali huli sa [ngaran] ni Jehova na saimong Diyos, huli ta nadangog niyamo an saiyang [kabantugan] asin an gabos na bagay na ginibo niya.’ (Jos. 9:3, 9, 10) May kadunungan nindang minidbid na an tunay na Diyos an kasurog kan Israel.

⁷ Nahiling man ni Rahab an kamot nin Diyos sa mga pangyayari kan panahon niya. Pagkatapos na mabaretaan kun paano ilinigtas ni Jehova an saiyang banwaan, sinabi niya sa duwang espiyang Israelita: ‘Naiisihan ko na itatao sa saindo ni Jehova an dagang ini.’ Dawa aram niya na mamemeligro siya, ipinahiling pa man giraray niya na nagtutubod siyang kaya ni Jehova na iligtas siya asin an saiyang pamilya.—Jos. 2:9-13; 4:23, 24.

8. Paano nahiling kan ibang Israelita an kamot nin Diyos?

 ⁸ Bakong arog kan maraot na si Hading Ahab, minidbid kan ibang Israelita na gibo kan kamot nin Diyos an nahiling nindang kalayo na buminaba sa langit bilang simbag ni Jehova sa pamibi ni Elias. Kan mahiling ninda na inubos kan kalayo an atang, sinda nagsarabi: ‘Si Jehova iyo an [tunay] na Diyos!’ (1 Ha. 18:39) Para sa sainda, dai maninigaran na huli iyan sa kapangyarihan nin Diyos!

9. Paano ta mahihiling si Jehova asin an saiyang kamot ngunyan?

⁹ Tinabangan kita kan marahay asin maraot na mga halimbawa na pinag-ulayan niyato na masabutan an kahulugan kan mga tataramon na ‘mahiling an Diyos’ o mahiling an kamot nin Diyos. Mantang namimidbid niyato si Jehova asin naaaraman an saiyang mga kuwalidad, nahihiling ta an saiyang kamot paagi sa ‘mga mata kan satong puso.’ (Efe. 1:18) Siguradong gusto niyatong magin arog kan maimbod na mga tawo kaidto asin ngunyan na malinaw na nakahiling ki Jehova na tinatabangan an saiyang banwaan. Pero, talaga daw na may ebidensiya kita na tinatabangan nin Diyos an mga tawo ngunyan?

10. Ano an ebidensiya niyato na tinatabangan ni Jehova an mga tawo ngunyan? (Hilingon an ritrato sa kapinunan kan artikulo.)

¹⁰ Kadakul kitang rason tanganing magtubod na padagos na tinatabangan ni Jehova an mga tawo. Pauruutro kitang nakakadangog nin mga eksperyensiya nin mga indibidwal na namibi para sa espirituwal na tabang asin sinimbag sinda nin Diyos. (Sal. 53:2) Mantang naghaharong-harong si Allan sa sarong sadit na isla sa Pilipinas, nanumpungan niya an sarong babayi asin bigla ining napahibi. Sinabi ni Allan: “Kan aga man sanang idto, namibi siya ki Jehova na lugod mahanap siya kan mga Saksi. Kan tin-edyer siya, nakipag-adal siya sa Bibliya sa mga Saksi pero napundo kan mag-agom siya asin magbalyo sa isla. Sinimbag tulos nin Diyos an pamibi niya kaya napahiro kaiyan an saiyang puso.” Mayo pang sarong taon, idinusay na niya an saiyang buhay ki Jehova.

11, 12. (a) Paano tinatabangan ni Jehova an saiyang mga lingkod? (b) Isaysay an eksperyensiya nin sarong sister na tinabangan nin Diyos.

¹¹ Dakul na nagin lingkod nin Diyos an nahiling an ebidensiya kan saiyang matinabang na kamot kan makabutas sinda sa nakakaadik na mga bisyo arog kan pagsigarilyo, paggamit nin droga, o paghiling nin pornograpiya. May mga nagsabi na pauruutro nindang pinurbaran na ipundo iyan sa sadiri sana ninda pero dai ninda nakaya. Pero kan hagadon ninda an tabang ni Jehova, tinawan niya sinda nin “puwersa na labi sa ordinaryo,” asin sa katapos-tapusi, nadaog ninda an saindang kaluyahan.—2 Cor. 4:7, NW; Sal. 37:23, 24.

¹² Tinabangan man ni Jehova an dakul na lingkod niya na makayanan an personal na mga problema. Halimbawa, naeksperyensiyahan ini ni Amy kan siya maasignaran na magtabang sa pagtugdok nin Kingdom Hall asin missionary home sa sarong sadit na isla sa Pasipiko. Sinabi niya: “Sa sarong sadit na hotel kami nagdadagos, saka aroaldaw kaming naglalakaw sa bahang mga tinampo pasiring sa itinutugdok mi.” Kaipuhan man niyang makibagay sa mga kaugalian duman, asin parati sindang mayong kuryente o tubig. Sinabi pa ni Amy: “An maraot pa kaini, nakurahawan ko an sarong sister na katrabaho mi. Nagpuli akong grabe an pagbasol. Sa madiklom kong kuwarto sa hotel, ipinamibi ko ki Jehova an gabos kong namamatian asin naghagad ako nin tabang.” Kan magkakuryente na, binasa ni Amy an Torrengbantayan na may artikulo dapit sa programa nin gradwasyon sa Gilead na tinutukar an gabos na bagay na inaagihan niya: Bagong kultura, pagkapungaw, asin bagong mga tawong papakiibanan. Sinabi niya: “Kan bangging idto, garo ako kinakaulay ni Jehova. Napakusog ako kaiyan na magpadagos sa asignasyon ko.”—Sal. 44:25, 26; Isa. 41:10, 13.

13. Ano an ebidensiya niyato na tinatabangan ni Jehova an saiyang banwaan sa “pagdepensa saka legal na pag-establisar” kan maugmang bareta?

 ¹³ An saro pang ebidensiya kan pagtabang kan makapangyarihan na kamot ni Jehova iyo an pagigin mapanggana kan Mga Saksi ni Jehova sa “pagdepensa saka legal na pag-establisar” kan maugmang bareta. (Fil. 1:7, NW) Pinurbaran kan nagkapirang gobyerno na biyong papunduhon an gibuhon kan banwaan nin Diyos. Pero kun iisipon ta an kapangganahan kan Mga Saksi ni Jehova sa dai mababa sa 268 kaso sa haralangkaw na korte, kaiba na an 24 kaso sa European Court of Human Rights puon sana kan taon 2000, nagigin malinaw na mayo nin siisay man na makakapugol sa kamot nin Diyos.—Isa. 54:17; basahon an Isaias 59:1.

14. Paano ta nahihiling an kamot nin Diyos sa satong gibuhon na paghuhulit asin sa satong pagkasararo?

¹⁴ Huli sana sa tabang nin Diyos kaya naihuhulit an maugmang bareta sa bilog na kinaban. (Mat. 24:14; Gui. 1:8) Idugang pa diyan an pagkasararo ngunyan kan mga lingkod ni Jehova hali sa manlain-lain na nasyon—sarong bagay na dai kayang arugon kan kinaban—na huli kaiyan, dawa bakong Saksi nakakapagsabi: ‘An Diyos nasa saindo man nanggad.’ (1 Cor. 14:25) Kaya, kadakul kitang ebidensiya na tinatabangan nin Diyos an saiyang banwaan. (Basahon an Isaias 66:14.) Pero, kumusta ka man? Malinaw mo daw na nahihiling an kamot ni Jehova sa saimong buhay?

15. Ipaliwanag kun taano ta dai niyato minsan nahihiling nin malinaw an kamot nin Diyos sa satong buhay.

¹⁵ Ano an nagkapirang dahilan kun taano ta dai niyato minsan nahihiling nin malinaw an kamot nin Diyos sa satong buhay? Puwede kitang magkaigwa nin kadakul na problema. Pag nangyari iyan, tibaad malingawan ta kun paano kita tinabangan ni Jehova kaidto. Kan sabihon ni Reyna Jezebel na ipapagadan niya si propeta Elias, temporaryong nalingawan dawa kan propeta kun paano siya kaidto tinabangan nin Diyos. Sinabi kan Bibliya dapit ki Elias: ‘Nagmawot siyang magadan.’ (1 Ha. 19:1-4) Ano an nagin solusyon sa problema ni Elias? Kinaipuhan niyang maglaom ki Jehova para sa kusog nin buot.—1 Ha. 19:14-18.

16. Arog ni Job, ano an magigibo niyato tanganing mahiling an Diyos?

¹⁶ Nagpokus na marhay si Job sa saiyang mga problema kaya dai niya nahiling an saiyang sitwasyon arog kan paghiling nin Diyos diyan. (Job 42:3-6) Arog ni Job, tibaad kaipuhan man niyatong urog na maghinguwa tanganing mahiling an Diyos. Paano? Kaipuhan niyatong hurop-hurupon kun ano an sinasabi kan Bibliya manungod sa satong mga problema. Mantang naaaraman niyato kun paano kita tinatabangan ni Jehova, magigin mas totoo siya sa sato. Dangan arog ni Job, masasabi niyato: “An naaraman ko sana dapit saimo iyo an [sinabi] sako kan iba, alagad ngunyan, nahihiling taka kan sadiri kong mga mata.” (BPV)

17, 18. (a) Paano ta mahihiling na tinatabangan kita ni Jehova? (b) Isaysay an sarong eksperyensiya na nagpapahiling kun paano kita ngunyan tinatabangan nin Diyos.

 ¹⁷ Paano ta mahihiling an kamot ni Jehova sa satong buhay? Uni an nagkapirang halimbawa: Tibaad para sa saimo, nanumpungan mo an katotoohan huli sa tabang nin Diyos. Nakaatender ka na daw sa Kristiyanong pagtiripon asin kan madangog mo an sarong kabtang, nasabi mo: “Iyan mismo an kaipuhan ko”? O tibaad nahiling mo na kun paano sinimbag an saimong pamibi. Tibaad nagdesisyon kang pahiwason an saimong ministeryo asin nangalas ka kun paano ka tinabangan ni Jehova para magibo iyan. O naeksperyensiyahan mo na daw na mag-resign sa trabaho huling nakakaulang iyan sa espirituwal na mga gibuhon dangan napatunayan mong totoo an panuga nin Diyos na, ‘Dai taka sa ano man na paagi pababayaan’? (Heb. 13:5) Kun puka kita sa espirituwal, mahihiling ta kun paano kita tinatabangan ni Jehova sa dakul na paagi.

¹⁸ Isinaysay ni Sarah na taga Kenya an saiyang eksperyensiya: “Ipinamibi ko an saro kong Bible study na garo wara sa buot niya an pag-adal mi. Hinapot ko si Jehova kun dapat ko nang ipundo an pag-study sa saiya. Pagkasabi kong ‘Amen,’ biglang nagtanog su telepono. Nag-apod an study ko asin naghapot kun puwede siyang umiba sako sa pagtiripon! Nabigla talaga ako!” Kun alisto ka, mahihiling mo man kun sa anong mga paagi ka tinatabangan nin Diyos. Si Rhonna, sarong sister na taga Asia, nagsabi: “Kaipuhan mong manudan kun paano mahiling an paggiya ni Jehova. Pero pag nagibo mo iyan, mangangalas ka pag naaraman mo kun gurano siya kainteresado sa sato!”

19. Ano pa an kaipuhan niyatong gibuhon para mapabilang sa mga nakakahiling sa Diyos?

¹⁹ Sinabi ni Jesus: “Maugma an mga dalisay an puso, huli ta mahihiling ninda an Diyos.” (Mat. 5:8, NW) Paano magigin “dalisay an puso” niyato? Dapat na papagdanayon tang malinig an satong kaisipan asin ipundo an ano man na salang paggawi. (Basahon an 2 Corinto 4:2.) Mantang pinapakusog ta an satong espirituwalidad asin ipinapahiling an matanos na mga paggawi, mapapabilang kita sa mga nakakahiling sa Diyos. Pag-uulayan niyato sa masunod na artikulo kun paano makakatabang an satong pagtubod tanganing mahiling niyato nin mas malinaw an kamot ni Jehova sa satong buhay.