Naghahapot an mga Parabasa

An Kahadean daw nin Dios Nasa Puso Nindo?

Dakol ngonyan an naniniwala na an simbag sa hapot na iyan, iyo. Halimbawa, sinasabi kan The Catholic Encyclopedia: “An kahadean nin Dios nangangahulogan na . . . an pamamahala nin Dios sa satong puso.” Parateng itinotokdo kan klero an ideyang ini. Talaga daw na itinotokdo kan Biblia na an Kahadean nin Dios nasa puso nin mga tawo?

Iniisip nin nagkapira na si Jesus mismo an enot na nagpalakop kan ideya na an Kahadean nin Dios nasa puso nin mga tawo. Sinabi nanggad ni Jesus: “Uya! An kahadean nin Dios nasa tanga nindo.” (Lucas 17:21) An nagkapirang traduksion kaini nagsasabi: “An kahadean nin Dios yaon sa saindo” o “nasa laog nindo” pa ngani. Tama daw an mga traduksion na iyan kan mga tataramon ni Jesus? Talaga daw na an boot niang sabihon iyo na an Kahadean nin Dios nasa puso nin mga tawo?

Enot, isip-isipa kun ano an puso nin tawo. Kun sinasambit sa Biblia, an piguratibong puso nangangahulogan na panlaog na pagkatawo, an gikanan nin mga kaisipan, ugale, asin saboot nin sarong tawo. An ideya na an sarong bagay na siring kamamuraway kan Kahadean nin Dios nasa puso nin tawo—sa paagi na iyan nakakapabago asin nagpapagin noble sa mga tawo, bilang halimbawa—tibaad garo baga nakakaakit, alagad rasonable daw iyan?

An Biblia nagsasabi sa sato: “Madaya an puso nin labi sa ano pa man na bagay asin desesperado.” (Jeremias 17:9) Si Jesus mismo nagsabi: “Gikan sa laog, gikan sa puso nin mga tawo, minaluwas an nakakaraot na mga pangangatanosan: mga pakikisaro, mga paghabon, mga paggadan, mga pagsambay, mga kaaraan, mga gibo nin karatan.” (Marcos 7:20-22) Isip-isipa: Bako daw na an dakulang kabtang kan kasakitan na naheheling niato sa kinaban ngonyan mapapatunayan na naggikan sa makasalan na puso nin mga tawo? Kaya paanong an sangkap na Kahadean nin Dios hale sa siring na gikanan? Totoo, an puso nin tawo dai man talaga makakaprodusir kan Kahadean nin Dios kun paanong an binit dai man talaga makakaprodusir nin mga igos.—Mateo 7:16.

Ikaduwa, isip-isipa an mga nagdadangog ki Jesus na para sa sainda sinabi nia an mga tataramon na nasa Lucas 17:21. Mababasa niato sa sinusundan na bersikulo: “Kan hapoton kan mga Fariseo kun noarin madatong an kahadean nin Dios, sia nagsimbag sa sainda.” (Lucas 17:20) An mga Fariseo kaiwal ni Jesus kaidto. Sinabi ni Jesus na an mga parasaginsagin na idto dai makakalaog sa Kahadean nin Dios. (Mateo 23:13) Ngonyan kun an mga Fariseo dai makakalaog sa Kahadean nin Dios, posible daw na an Kahadean nasa puso ninda? Imposible! Kun siring, ano an boot sabihon ni Jesus?

Sa pagtradusir sa mga tataramon na ini ni Jesus, dakol na maingat na traduksion kan Biblia an naggagamit nin mga tataramon na kapareho kan yaon sa New World Translation. May mga nagsasabi na an Kahadean “yaon sa tahaw nindo” o “nasa tanga nindo.” Paanong an Kahadean nin Dios yaon sa tahaw kan mga tawong idto kan panahon na idto, kaiba na an mga Fariseo? Bueno, si Jesus an saro na ninombrahan ni Jehova Dios na magin Hade kan Kahadean. Bilang an Designadong Hade, si Jesus nasa tanga mismo kan mga tawong idto. Itinokdo nia an manongod sa Kahadean nin Dios asin naggibo pa ngani sia nin mga milagro, na patienot na ipinapaheling sa sainda kun ano an gigibohon kan Kahadean na iyan. Kun siring, sa tunay nanggad na kahulogan kaiyan, an Kahadean nasa tanga ninda.

Malinaw nanggad, mayo nin sono sa Kasuratan na patunay sa ideya na an Kahadean nin Dios nasa puso nin mga tawo. Imbes, iyan tunay na gobyerno, saro na magibo nin pambihirang mga pagbabago sa daga, siring kan ihinula kan mga propeta.—Isaias 9:6, 7; Daniel 2:44.