Noarin Madatong an Kahadean nin Dios?
Noarin Madatong an Kahadean nin Dios?
“KAGURANGNAN, ano ibabalik mo ngonyan an kahadean sa Israel?” (Gibo 1:6) Gustong-gustong maaraman kan mga apostol kun noarin papatindogon ni Jesus an saiyang Kahadean. Ngonyan, pakalihis nin mga 2,000 na taon, gustong-gusto pa man giraray na maaraman kan mga tawo: Noarin madatong an Kahadean nin Dios?
Huling ginibo ni Jesus na pinakatema kan saiyang paghuhulit an Kahadean, tibaad isipon nindo na tinokar nia an hapot na ini. Asin tinokar nia nanggad iyan! Dakol na beses siang nagtaram manongod sa espesipikong peryodo nin panahon na inapod nia na saiyang “presensia.” (Mateo 24:37) An presensiang iyan konektadong marhay sa pagpatindog kan Mesiyanikong Kahadean. Ano an presensiang ini? Isip-isipon niato an apat na katotoohan na ihinahayag kan Biblia manongod sa presensia ni Cristo.
1. An presensia ni Cristo haloy pang mapoon pagkagadan nia. Si Jesus nagtao nin ilustrasyon na dian inagid nia an saiyang sadiri sa sarong tawong “nagbiahe pasiring sa harayong daga tanganing magkua nin sa hadeng kapangyarihan,” o tanganing “magkaigwa nin sarong kahadean.” (Lucas 19:12, nota sa ibaba) Paano naotob an makahulang ilustrasyon na iyan? Bueno, si Jesus nagadan asin binuhay liwat; dangan nagbiahe sia pasiring sa “harayong daga,” an boot sabihon, sa langit. Siring kan ihinula ni Jesus sa kaagid na ilustrasyon, an saiyang pagbalik na may sa hadeng kapangyarihan mangyayari sana “pakalihis nin haloy na panahon.”—Mateo 25:19.
Nagkapirang taon pagkasakat ni Jesus sa langit, nagsurat si apostol Pablo: “An tawong ini [si Jesus] nagdolot nin sarong atang para sa mga kasalan nin daing kasagkoran asin nagtukaw sa too nin Dios, na poon kaidto naghahalat sagkod na an saiyang mga kaiwal ibugtak na magin tungtongan kan saiyang mga bitis.” (Hebreo 10:12, 13) Kaya halawig na peryodo nin paghalat an kasunod kan pag-abot ni Jesus sa langit. Sa katapustapusi natapos an paghalat kan ginibo ni Jehova Dios an saiyang Aki na magin Hade kan haloy nang ipinanugang Mesiyanikong Kahadean. Dian nagpoon an presensia ni Cristo. Maheheling daw nin mga tawo sa daga an importanteng pangyayaring ini?
2. An presensia dai maheheling nin mga tawo. Girumdomon, tinokar ni Jesus an tanda kan saiyang presensia. (Mateo 24:3) Kun an saiyang presensia maheheling nin mga tawo, kakaipuhanon pa daw an sarong tanda? Sa pag-ilustrar: Imahinaron nindo na nagbibiahe kamo tanganing maheling an kadagatan. Puedeng makaheling kamo nin mga karatula sa tinampo na nagtatao sa saindo nin direksion sa dalan, alagad kun yaon na kamo sa baybayon, na nakatindog sa gilid kan mahiwason na katubigan na matatanaw sagkod sa harayo, malalaoman daw nindong makaheling pa kamo nin karatula na nakatokdo sa enotan, na dian nakasurat sa darakulang letra an tataramon na “Kadagatan”? Siempre dai! Taano ta kakaipuhanon pa an sarong karatula na matokdo dian mantang naheheling asin aram na nindo iyan?
Ilinadawan ni Jesus an tanda kan saiyang presensia, bakong tangani na itokdo an sarong bagay na maheheling nin mga tawo paagi sa saindang mga mata, kundi tanganing tabangan sindang mabatid an sarong bagay na mangyayari sa langit. Sa siring, si Jesus nagsabi: “An kahadean nin Dios dai madatong na risang marhay.” (Lucas 17:20) Kun siring, paano ipapaheling kan tanda sa mga yaon sa daga na nagpoon na an presensia ni Cristo?
3. Magigin tanda kan presensia ni Jesus an sarong panahon nin grabeng kariribokan digdi sa daga. Sinabi ni Jesus na an magigin tanda sa daga kan saiyang presensia bilang Hade sa langit iyo an mga guerra, tiggutom, linog, peste, asin katampalasanan. (Mateo 24:7-12; Lucas 21:10, 11) Ano an magigin dahelan kan gabos na kasakitan na ini? An Biblia nagpapaliwanag na si Satanas, “an namamahala sa kinaban na ini,” may grabeng kaanggotan huli ta aram nia na halipoton na sana an saiyang panahon ngonyan na nagpoon na an presensia ni Cristo bilang Hade. (Juan 12:31; Kapahayagan 12:9, 12) Sa satong panahon, dakol nanggad an siring na naheheling na prueba kan grabeng kaanggotan ni Satanas asin kan presensia ni Cristo. Nangorogna poon kan 1914, an taon na minimidbid nin mga istoryador bilang panahon nin dakulang pagbabago, na naheling an pruebang ini na dai pa nangyari kaidto asin na lakop sa kinaban.
An gabos na iyan tibaad garo baga maraot na bareta, alagad bakong maraot na bareta iyan. Nangangahulogan iyan na an Mesiyanikong Kahadean namamahala na ngonyan sa langit. Dai na nanggad mahahaloy, an gobyernong iyan mamamahala digdi mismo sa bilog na daga. Pero, paano maaaraman kan mga tawo an manongod sa Kahadean na iyan tanganing akoon ninda an pamamahala kaiyan asin magin mga sakop kaiyan?
4. Magigin tanda kan presensia ni Jesus an paghuhulit na lakop sa kinaban. Sinabi ni Jesus na an saiyang presensia magigin arog kan “mga aldaw ni Noe.” * (Mateo 24:37-39) Si Noe bako sanang paratogdok nin arka; sia man “sarong parahulit nin katanosan.” (2 Pedro 2:5) Pinatanidan ni Noe an mga tawo na nagdadangadang na an paghokom nin Dios. Sinabi ni Jesus na gigibohon man kan saiyang mga parasunod sa daga an kaagid kaiyan durante kan saiyang presensia. Sia naghula: “An maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan.”—Mateo 24:14.
Arog kan nasabotan niato sa naenot na artikulo, lalaglagon kan Kahadean nin Dios an gabos na gobyerno sa kinaban na ini. An paghuhulit nagpapatanid sa mga tawo na an langitnon na gobyernong ini madali nang humiro, na tinatawan an gabos nin oportunidad na makadulag sa nagdadangadang na paglaglag asin magin mga sakop kan Kahadean na iyan. Kun siring, an importanteng hapot iyo an, Paano kamo mahimate?
An Kahadean daw nin Dios Mangangahulogan nin Maogmang Bareta Para sa Saindo?
An mensahe na ihinulit ni Jesus saro na may daing kaparehong paglaom. Pagkatapos kan pagrebelde sa Eden rinibong taon na an nakaagi, nagin katuyohan ni Jehova Dios na magpatindog nin sarong gobyerno na iyo an magtatanos sa mga bagay-bagay, na ibabalik an maimbod na mga tawo sa kamugtakan na katuyohan nin Dios para sa sainda poon sa kapinonan—an buhay na daing sagkod sa sarong paraiso digdi sa daga. Ano pa an puedeng magin orog na nakakaogmang marhay kisa sa pakaaram na an haloy nang ipinanugang gobyernong ini namamahala na ngonyan mismo sa langit? Iyan bakong malibog asin teoretikong ideya kundi buhay na katunayan!
Ngonyan, an Hade na ninombrahan nin Dios namamahala sa tahaw kan saiyang mga kaiwal. (Salmo 110:2) Sa maraot na kinaban na ini na siblag sa Dios, inootob kan Mesiyas an kamawotan kan saiyang Ama na hanapon an gabos na gustong makamidbid sa Dios kun ano man nanggad an saiyang personalidad asin sumamba sa saiya “sa espiritu asin katotoohan.” (Juan 4:24) An paglaom na mabuhay sagkod lamang sa irarom kan pamamahala kan Kahadean nin Dios makukua nin mga tawo na hale sa gabos na rasa, edad, asin kamugtakan sa sosyedad. (Gibo 10:34, 35) Sinasadol niamo kamo na akoon an marahayon na oportunidad na inaalok sa saindo. Mag-adal na ngonyan manongod sa Kahadean nin Dios, tanganing kamtan nindo an buhay sa irarom kan matanos na pamamahala kaiyan sagkod lamang!—1 Juan 2:17.
[Nota sa Ibaba]
^ par. 10 An sinabi ni Jesus nagtatabang na itanos an salang ideya na itinatao kan salang pagkatradusir kan nagkapirang bersion kan Biblia sa terminong “presensia.” May mga traduksion na itrinadusir iyan na “pagpadigdi,” “pagdatong,” o “pagbalik,” na gabos iyan nagpaparisa nin madali sanang pangyayari sa laog nin sarong panahon. Pero, mangnohon na dai inagid ni Jesus an saiyang presensia sa Baha kan panahon ni Noe, na sarong pangyayari sa laog nin sarong panahon, kundi sa “mga aldaw ni Noe,” na pangkulminasyon na peryodo nin panahon. Arog kan suanoy na kapanahonan na iyan, an presensia ni Cristo magigin sarong peryodo nin panahon na durante kaiyan an mga tawo sibot-sibot sa pangaroaldaw na mga aktibidad sa buhay kaya dai na ninda iniintindi an patanid na itinatao.
[Mga Ritrato sa pahina 8, 9]
An maraot na mga bareta na nadadangog niato aroaldaw nagpapatunay na may marahay na mga bagay na madali nang mangyari
[Credit Line]
Badil na ginagamit laban sa pagsalakay nin mga eroplano: Retrato kan U.S. Army