Sarong Kahagadan kan Bilog na Kinaban

IMAHINARA an ginatos na milyon, bilyon pa ngani, na tawo, na gabos parareho an hinahagad. Hinahagad ninda sa pinakahalangkaw na autoridad sa uniberso na itao kaini an sarong espesipikong kahagadan. Pero, pipira sana sa sainda an nakakaaram kun ano talaga an hinahagad ninda. Puede daw talagang mangyari an siring na bagay? An totoo, nangyayari iyan aroaldaw. Ano an hinahagad kan gabos na tawong ini? An pagdatong kan Kahadean nin Dios!

Oyon sa sarong pagkalkulo, igwa nin mga 37,000 na relihion na inaapod an saindang sadiri na Kristiano, na naghihingakong si Jesu-Cristo an saindang Poon. Igwa nin labing duwang bilyon na miembro an mga relihion na iyan. Dakol sa sainda an namimibi kan parateng inaapod na Ama Niamo o an Pamibi kan Kagurangnan. Aram daw nindo an pamibing ini? Siring kan pagkatokdo kaiyan ni Jesus sa saiyang mga parasunod, nagpopoon iyan nin arog kaini: “Ama niamo na nasa langit, pakangbanalon logod an saimong ngaran. Dumatong logod an kahadean mo. Gibohon logod an kabotan mo, kun paano sa langit, siring man sa daga.”—Mateo 6:9, 10.

Sa laog nin dakol na siglo na ngonyan, an mga parasamba may paggalang na inoorootro an mga tataramon na iyan sa mga simbahan. Tuom na inoorootro man ninda iyan bilang mga pamilya asin bilang mga indibiduwal, sa maogma asin mamondong mga panahon. Bilog na puso nindang sinasambit an mga tataramon na iyan, na may pagkasinsero pa ngani. Dakol na iba pa an nagtuom kaiyan asin sinasambit iyan na daing gayo iniisip o dai ngani iniisip an kahulogan kaiyan. Bako sanang an mga miembrong ini nin Kakristianohan an naglaom asin namibi na dumatong logod an Kahadean nin Dios.

Sarong Kaparehong Kahagadan kan mga Bakong Kristiano

An sarong midbid na marhay na pamibi kan Judiong relihion iyo an Kaddish na sinasambit nin mga nakikilobong. Minsan ngani dai direktang tinotokar kaiyan an kagadanan o kamondoan, parateng sinasambit iyan sa mga panahon nin pagkagadan nin namomotan. An pamibi naghahagad: “Logod na establisaron nia [nin Dios] an saiyang Kahadean sa panahon na nabubuhay ka . . .  tolos pa ngani.” * An saro  pang suanoy na pamibi sa sinagoga nagsasabi manongod sa paglaom para sa Kahadean kan Mesiyas na hale sa kamag-anakan ni David.

Para sa iba na kabilang sa mga relihion na bakong Kristiano, nakakaakit an ideya manongod sa Kahadean nin Dios. Oyon sa The Times of India, an sarong prominenteng taga India na namomoon sa relihion kan ika-19 siglo, na interesadong pagkaoroyonon an mga relihion nin mga Hindu, Muslim, asin Kristiano, nagsabi: “An tunay na kahadean nin Dios dai maootob apuera sana kun an sirangan asin solnopan pagsaroon.” Asin an prinsipal nin sarong Islamikong kolehio sa Strathfield, Australia, nagsurat kasuarin pa sana sa sarong peryodiko: “Arog kan gabos na Muslim, naniniwala ako [na] si Jesus mabalik asin eestablisaron nia an tunay na Kahadean nin Dios.”

Daing duwa-duwa, binilyon na ngonyan an naglalaom asin naghahagad na dumatong logod an Kahadean nin Dios. Alagad isip-isipa an interesanteng impormasyon.

Posibleng marhay na aram nindo na kaming mga Saksi ni Jehova, na kagpublikar kan magasin na ini, naghaharongharong sa saindong komunidad tanganing makipag-olay sa mga tawo manongod sa Biblia. Sa panahon na isinusurat an artikulong ini, ginigibo niamo an gibohon na ini sa bilog na kinaban, sa 236 na kadagaan asin sa labing 400 na lenguahe. An pangenot na tema kan samong paghuhulit iyo an Kahadean nin Dios. Sa katunayan, mangnohon na an bilog na titulo kan magasin na ini iyo An Torrengbantayan Nagpapahayag kan Kahadean ni Jehova. Parate kaming naghahapot sa mga tawo kun baga namimibi sinda na dumatong logod an Kahadean na iyan. Kadakol nanggad an nagsisimbag nin iyo. Minsan siring, kun hinahapot an mga tawo kun ano an Kahadean na iyan, an kadaklan garo man sana nagsisimbag, “Dai ko aram,” o an saindang simbag bakong malinaw asin mayong kasiertohan.

Taano ta kadakol an naghahagad nin sarong bagay na dai ngani ninda aram an kahulogan? Iyan daw huling an Kahadean nin Dios komplikado asin bakong malinaw na ideya? Dai. An Kahadean lubos asin malinaw na ipinapaliwanag sa Biblia. Apuera kaini, an mensahe kan Biblia manongod sa Kahadean makakatao sa saindo nin tunay na paglaom sa makamomondong mga panahon na ini. Sa masunod na artikulo, maheheling niato kun paano ipinapaliwanag kan Biblia an paglaom na iyan. Dangan maheheling niato kun noarin sisimbagon an pamibi ni Jesus na dumatong logod an Kahadean.

[Nota sa Ibaba]