Sarong Paramasid na Nakakaheling kan Satong Halaga
Rumani sa Dios
Sarong Paramasid na Nakakaheling kan Satong Halaga
‘TIBAAD kondenaron kita kan satong puso.’ Paagi sa mga tataramon na iyan, sinasabi kan Biblia na kun beses tibaad pangyarihon kan satong puso na kita magin labi-labi kamapagkritika sa satong sadiri. Sa katunayan, tibaad ipirit kaiyan na kita bakong maninigo sa pagkamoot asin pagmakolog nin Dios. Pero, sinisierto giraray sa sato kan Biblia: “An Dios orog kadakula kisa sa satong puso asin nakakaaram kan gabos na bagay.” (1 Juan 3:19, 20) Mas midbid kita nin Dios kisa sa pakamidbid niato sa satong sadiri. An pagmansay nia sa sato tibaad laen na marhay sa pagmansay niato sa satong sadiri. Kun siring, ano an halaga niato sa pagheling kan saro na talagang importante—si Jehova Dios? An simbag makukua sa sarong nakakapukaw sa boot na ilustrasyon na ginamit ni Jesus sa duwang magkalaen na pangyayari.
Sarong beses, sinabi ni Jesus na “ipinapabakal an duwang dignos nin sarong sinsilyo na kadikit an halaga.” (Mateo 10:29, 31) Oyon sa Lucas 12:6, 7, sinabi man ni Jesus: “An limang dignos ipinapabakal nin duwang sinsilyo na kadikit an halaga, bako daw? Alagad mayo ni saro sa sainda na nalilingawan nin Dios. . . . Dai kamo matakot; orog kamong mahalaga kisa sa dakol na dignos.” An simple alagad mapuersang ilustrasyon na ini nagtotokdo sa sato kun paano minamansay ni Jehova an lambang saro sa saiyang mga parasamba.
An mga dignos kabilang kaidto sa pinakabarato sa gabos na gamgam na kinakakan. Daing duda na naobserbaran ni Jesus sa sadan an dukhang mga babae—tibaad pati an saiya mismong ina—na nagbabakal kan saraditon na gamgam na ini tanganing ipakakan sa saindang pamilya. Sa sarong assarion, na sarong sinsilyo na an presenteng kantidad mayo pang dos pesos, an sarong parabakal makakabakal nin duwang dignos. Baratohon an mga gamgam na ini kaya sa duwang sinsilyo, an parabakal nag-aako bako nin apat kundi limang dignos, na may sarong dagdag na mayo na nin dugang na bayad.
Ipinaliwanag ni Jesus na mayo ni sarong dignos na “nalilingawan nin Dios” o nahuhulog “sa daga na dai” naaaraman kan Ama. (Mateo 10:29) Naririsa ni Jehova kun an sarong dignos mahulog sa daga na tibaad huli ta iyan nalugadan o minababa sa daga tanganing maghanap nin matutuka. An garo baga bakong mahalagang mga gamgam, na bako man na saditon tanganing lalangon ni Jehova, bako man na saditon na dai nia magirumdoman. Sa katunayan, pinapahalagahan nia an mga iyan, huli ta iyan mahalagang marhay na nabubuhay na mga bagay. Naheheling daw nindo an punto kan ilustrasyon ni Jesus?
Sa pagtotokdo ni Jesus, sia parateng naggagamit nin mga pagkokomparar tanganing ipaheling an pagkakalaen, na itinatao an sadit na leksion dangan ipinapaheling kun paano man iyan ikakaaplikar sa sarong bagay na mas dakula an halaga. Halimbawa, si Jesus nagsabi man: “An mga uwak dai nagtatanom ni nag-aani, asin mayo man sinda nin kamalig ni tambobong, alagad ta pinapakakan sinda nin Dios. Gurano pa daw kalabi an saindong halaga kisa mga gamgam?” (Lucas 12:24) Ngonyan nagigin malinaw an punto kan mga tataramon ni Jesus manongod sa mga dignos: Kun nagmamakolog si Jehova sa saraditon na gamgam na ini, orog nanggad siang magmamakolog sa mga tawong namomoot asin nagsasamba sa saiya!
Huli sa mga tataramon ni Jesus, dai niato kaipuhan na mamatean na kita bako nanggad na maninigo na mariparo asin pagmakolgan kan Dios na “orog kadakula kisa sa satong puso.” Bako daw na nakakarangang maaraman na puedeng maheling sa sato kan Kaglalang niato an tibaad dai niato naheheling sa satong sadiri?
[Picture Credit Line sa pahina 9]
Mga dignos: © ARCO/D. Usher/age fotostock