“ANO, andam ka na?” May naghapot na daw kaiyan saimo?— Bueno, gustong maaraman kan tawong naghapot kun preparado ka na. Halimbawa, tibaad an boot sabihon kan tawong iyan: ‘Dinara mo an saimong mga librong pag-aadalan? Binasa mo na an saimong mga leksion?’ Siring kan maheheling niato, andam si Timoteo.

Gusto man si Timoteo. Aram mo daw kun ano an boot sabihon kaiyan?— Kan imbitaran si Timoteo na maglingkod sa Dios, an saboot nia kapareho kan sa saro pa sa mga lingkod nin Dios, na nagsabi: “Uya ako! Sugoa ako.” (Isaias 6:8) Huling si Timoteo andam asin gusto na maglingkod, nagkaigwa sia nin nakakaogmang buhay. Gusto mo daw na madangog an manongod dian?—

Si Timoteo namundag sa Listra na ginatos na kilometro an rayo sa Jerusalem. An saiyang lolang si Loida asin an saiyang ina, si Eunice, mahigos na mga paraadal sa Kasuratan. Dawa kan omboy pa si Timoteo, pinonan na ninda siang tokdoan manongod sa Tataramon nin Dios.​—2 Timoteo 1:5; 3:15.

Tibaad tinedyer pa si Timoteo kan si apostol Pablo, kaiba si Bernabe, magsongko sa Listra durante kan saiyang enot na halawig na pagbiahe tanganing maghulit. Posibleng marhay na sa panahon na ini nagin Kristiano an ina asin lola ni Timoteo. Gusto mo daw na madangog an manongod sa kasakitan na inatubang ni Pablo asin Bernabe?—Bueno, an mga tawong habo sa mga Kristiano ginapo si Pablo, pinatumba sia, asin ginuyod sia paluwas sa siudad. An paghona ninda gadan na sia.

An mga nagturubod sa itinotokdo ni Pablo nagtiripon sa palibot nia, asin sia nagbuhat. Kan sunod na aldaw, naghale si Pablo asin Bernabe, alagad nagbalik sinda sa Listra pakalihis nin kadikit na panahon. Kan magbalik sinda, si Pablo nagpahayag asin nagsabi sa mga disipulo: “Kita kaipuhan na lumaog sa kahadean nin Dios paagi sa dakol na kasakitan.” (Gibo 14:8-22) Aram mo daw an boot sabihon ni Pablo?— An boot niang sabihon iyo na an iba magigin dahelan nin kasakitan para sa mga naglilingkod sa Dios. Kan huri, nagsurat si Pablo ki Timoteo: ‘An gabos na nagmamawot na mamuhay nin diosnon pepersegiron.’​—2 Timoteo 3:12; Juan 15:20.

 Pakahale ni Pablo asin Bernabe sa Listra, nagpuli sinda. Pakalihis nin nagkapirang bulan, pinili ni Pablo si Silas tanganing magbiahe kaiba nia, asin magkaibanan sindang nagbalik tanganing parigonon an boot kan bagong mga disipulo sa mga lugar na sinongko na ni Pablo. Kan mag-abot sinda sa Listra, siertong ogmahon si Timoteo na maheling giraray si Pablo! Mas naogma pa ngani si Timoteo kan imbitaran siang magbiahe kaiba ni Pablo asin Silas. Inako ni Timoteo an imbitasyon. Sia andam asin gusto na umiba.​—Gibo 15:40–16:5.

An tolo nag-iribanan, na nagbabaklay nin dakol na kilometro, dangan nagsakay sinda sa barko. Pakaabot sa baybayon, nagbaklay sinda pasiring sa Tesalonica sa Grecia. Digdi dakol an nagin Kristiano. Alagad an iba anggot asin nagbilog nin pagsururog. Namemeligro an buhay ni Pablo, Silas, asin Timoteo, kaya nagpasiring sinda sa Berea.​—Gibo 17:1-10.

Nahahadit si Pablo manongod sa bagong nagturubod sa Tesalonica, kaya sinugo nia si Timoteo na magbalik duman. Aram mo daw kun taano?— Kan huri, ipinaliwanag ni Pablo sa mga Kristiano sa Tesalonica: ‘Tangani na parigonon kamo asin tangani na rangahon kamo tanganing mayo nin siisay man na madesganar.’ Aram mo daw kun taano ta sinugo ni Pablo an hoben na si Timoteo sa siring kapeligrosong asignasyon?— Bueno, si Timoteo daing gayo midbid kan mga paratumang, asin gusto niang magduman. Kinaipuhan kaiyan nin dakulang kosog nin boot! Ano an nagin resulta kan pagsongko? Kan si Timoteo magbalik ki Pablo, sinabi nia ki Pablo kun gurano kaimbod kan mga taga Tesalonica. Kaya si Pablo nagsurat sa sainda: “Naranga kami may koneksion sa saindo.”​—1 Tesalonica 3:2-7.

Si Timoteo naglingkod kaiba ni Pablo sa suminunod na sampulong taon. Dangan ibinilanggo si Pablo sa Roma, asin si Timoteo, na kasuarin pa sana pinaluwas sa bilanggoan, nagduman tanganing makaibanan sia. Mantang nasa bilanggoan si Pablo, nagsurat sia sa mga taga Filipos, na tibaad ginagamit si Timoteo bilang sekretaryo. Si Pablo nagsabi: ‘Ako naglalaom na ikasobol ko si Timoteo sa saindo, huli ta mayo na ako nin iba na maimbod na marhay asin maglilingkod sa saindo nin orog karahay.’​—Filipos 2:19-22; Hebreo 13:23.

Siertong nagpaogma nanggad ki Timoteo an mga tataramon na iyan! Namotan nanggad na marhay ni Pablo si Timoteo huli ta ini andam asin gusto na maglingkod. Linalaoman mi na magigin arog ka man kaiyan.