Rumani sa Dios

“Magin Kamong mga Paraarog sa Dios”

Efeso 4:32–5:2

KABOOTAN. Pagmalasakit. Pagpapatawad. Pagkamoot. Makamomondo, bihira kitang makanompong nin mga tawo na nagpapaheling nin siring na mga kualidad ngonyan. Kumusta man kamo? Namatean na daw nindo na ano man na paghihingoa an gibohon nindo dai kamo noarin man makakapatalubo nin marahay na mga kualidad? An puso na mapagtatsar sa sadiri tibaad mag-insistir na imposible na kamo makapatalubo nin kawiliwiling mga kualidad huli sa nagkapirang olang, arog kan nakatanom na maraot na mga ugale o makologon na mga eksperyensia kan nakaagi. Pero, itinotokdo kan Biblia an nakakapakosog sa boot na katotoohan na ini​—aram kan satong Kaglalang na igwa kita nin potensial na magpatalubo nin positibong mga kualidad.

An Tataramon nin Dios nagsasadol sa tunay na mga Kristiano: “Kun siring, magin kamong mga paraarog sa Dios, bilang mga aki na namomotan na marhay.” (Efeso 5:1) An mga tataramon na iyan pambihirang kapahayagan kan kompiansa nin Dios sa mga nagsasamba sa saiya. Sa paanong paagi? Linalang ni Jehova Dios an tawo oyon sa Saiyang ladawan, na kasugad Nia. (Genesis 1:26, 27) Sa siring, tinawan nin Dios an mga tawo nin mga kualidad na kaagid kan sa saiya. a Huli kaini, kun an Biblia nagsasadol sa mga Kristiano na ‘magin mga paraarog sa Dios,’ garo man sana sinasabi mismo ni Jehova sa sainda: ‘Naniniwala ako sa saindo. Aram ko na sa ibong kan saindong pagigin bakong sangkap, may kakayahan kamo minsan paano na magin arog sa sako.’

Anong nagkapirang kualidad nin Dios an puede niatong arogon? Sinisimbag iyan kan konteksto. Mangnohon na pinonan ni Pablo an konseho na arogon an Dios paagi sa mga tataramon na “kun siring.” An mga tataramon na ini nagkokonektar sa sinundan na bersikulo, na dian sinambit an kabootan, mamomoton na pagmalasakit, asin pagpapatawad. (Efeso 4:32; 5:1) Dangan, sa bersikulo pagkatapos kan konseho na arogon an Dios, sinabihan ni Pablo an mga Kristiano na pagmaigotan na magkaigwa nin pamumuhay na nagpapaheling nin bakong maimot na pagkamoot. (Efeso 5:2) Totoo nanggad, kun manongod sa pagpaheling nin kabootan, pagpahayag nin madinamayon na pagmalasakit, lubos na pagpapatawad, asin pagpaheling nin pagkamoot, igwa kita nin maaarog na halimbawa na nakakalabi sa gabos​—si Jehova Dios.

Taano ta maninigo niatong mawoton na magin arog nin Dios? Mangnohon an mapuersang pagmotibar na yaon sa mga tataramon ni Pablo: “Magin kamong mga paraarog sa Dios, bilang mga aki na namomotan na marhay.” Bako daw na nakakapukaw sa boot na isip-isipon iyan? Minamansay ni Jehova an mga nagsasamba sa saiya bilang mga aking namomotan niang marhay. Kun paanong tibaad hingoahon nin sarong aking lalaki na magin arog nanggad sa saiyang ama, ginigibo man kan tunay na mga Kristiano an saindang pinakamakakaya na magin arog sa saindang langitnon na Ama.

Dai pinipirit ni Jehova an mga tawo na arogon sia. Sa kabaliktaran, tinawan nia kita nin dignidad paagi sa pagtao sa sato nin libreng kabotan. Kaya, depende na sa saindo kun baga magigin kamong paraarog sa Dios o dai. (Deuteronomio 30:19, 20) Alagad dai nindo noarin man paglingawan na igwa kamo nin potensial na magpaheling nin diosnon na mga kualidad. Siempre, tanganing maarog an Dios dapat na aramon nguna nindo an manongod sa saiyang mga kualidad asin dalan. Matatabangan kamo kan Biblia na manodan an manongod sa gabos na kualidad asin dalan nin Dios na an mayong kapantay na personalidad nagpahiro sa minilyon na magin paraarog sa saiya.

[Nota sa Ibaba]