Mga Luha sa Supot na Anit

AN HOBEN na lalaki sarong dulag. Huling sia nalulunosan asin napupurisaw, na nagkikintab an mga mata huli sa luha, nag-arang sia para sa kabootan asin pagmalasakit kan saiyang Dios, si Jehova, na nakikimaherak sa Saiya: “Bugtakan an sakuyang mga luha sa saimong supot na anit.” (Salmo 56:8) An lalaking iyan iyo si David, na sa huri magigin hade nin Israel. Alagad anong supot na anit an sinasabi nia kaidto, asin paano ikakabugtak dian nin Dios an satong mga luha?

Pamilyar si David sa supot na anit. Iyan sarong lalagan nin tubig, lana, arak, o pati mantikilya. An mga nagbabaklay sa Sahara, arog kan mga Tuareg, naggagamit pa man giraray nin mga supot na anit, na gibo sa bilog na anit nin kanding o karnero. An siring na mga supot puedeng lagan nin dakol na tubig, depende sa kadakulaan kan hayop. Dakol an nakakaaram na napapagdanay nin mga supot na anit an pagigin malipot kan tubig, dawa sa desierto na grabe an init kan saldang. Kan nakaaging panahon, sa pangkagabsan isinasakay iyan sa mga asno o kamelyo. Sa mga panahon na ini, tibaad makaheling pa ngani kamo nin supot na anit na yaon sa atubangan nin sarong lunadan na puede maski sa lubak-lubak na dalan!

An nakakapukaw sa boot na mga tataramon ni David manongod sa supot na anit puede man na magkaigwa nin kahulogan para sa sato. Sa paanong paagi? Bueno, ipinapaliwanag kan Biblia na kontrolado ni Satanas an kinaban na ini asin na ‘dakula an saiyang kaanggotan’ sa panahon niato. Bilang resulta, an daga nakakaeksperyensia nin grabe nanggad na kasakitan. (Kapahayagan 12:12) Sa dahelan na iyan, dakol na arog ki David an napapaatubang sa emosyonal, mental, o pisikal na kasakitan​—nangorogna an mga nagmamaigot na mapaogma an Dios. Arog daw kamo kaiyan? An siring na maimbod na mga tawo na makosog an boot, na “nagtatangis pa ngani,” nungkang nagpopondo sa pagmamaigot na mamuhay na may integridad. (Salmo 126:6) Makakasarig sinda na naheheling kan saindang langitnon na Ama bako sanang an mga pagbalong inaatubang ninda, kundi pati an epekto sa saindang emosyon kan mga pagbalong iyan. Talagang nasasabotan nia an kolog na nagpapasakit nin makuri sa saiyang mga lingkod, asin may pagmalasakit niang ginigirumdom an saindang mga luha asin kasakitan, na sa piguratibong paagi tinitipon iyan sa saiyang supot na anit.