Arogon an Saindang Pagtubod

Sia ‘Naghorophorop sa Saiyang Puso’

SI Maria bakong komportable sa pagkakatukaw sa sadit na hayop na pantrabaho. Dakol na oras na siang nakasakay dian. Sa eroenotan sana, si Jose dirediretso sa paglakaw, na sinususog an tinampo pasiring sa harayong Betlehem. Sa giraray, namatean ni Maria na naghihiro an omboy sa tulak nia.

Huring bulan na kan pagbados ni Maria; sa panahon na ini, sia malinaw na ilinaladawan kan Biblia sa pananaram na “nasa kabulanan na.” (Lucas 2:5) Mantang nag-aagi an mag-agom sa sunod-sunod na kaomahan, tibaad an nagkapira sa mga paraoma napapaheling sa sainda mientras na an mga ini nag-aarado o nagsasabwag asin nagngangalas sinda kun taano ta nagbabaklay pa an sarong babae na siring an kamugtakan. Ano an nagmotibar ki Maria na magduman sa lugar na harayoon sa saiyang harong sa Nazaret?

Nagpoon an gabos mga pirang bulan bago kaini, kan an hoben na Judiang ini mag-ako nin asignasyon na daing kaagid sa bilog na kasaysayan nin tawo. Sia an mangangaki sa magigin Mesiyas, an Aki nin Dios! (Lucas 1:35) Kan nagdadangadang na an aldaw kan saiyang pangangaki, kinaipuhan na gibohon an pagbaklay na ini. Durante kan pagbaklay na ini, napaatubang si Maria sa dakol na pagbalo sa saiyang pagtubod. Helingon niato kun ano an nakatabang sa saiya na magdanay na makosog sa espirituwal.

An Pagbaklay Pasiring sa Betlehem

Bako sanang si Maria asin Jose an nagbabaklay. Nagboot pa sana si Cesar Augusto na magkaigwa nin rehistrasyon sa nasyon, asin kaipuhan na an mga tawo magbaklay pasiring sa saindang ginikanan na banwaan bilang pagsunod. Ano an nagin reaksion ni Jose? An salaysay nagsasabi: “Siempre, si Jose nagtukad man hale sa Galilea, hale sa siudad nin Nazaret, pasiring sa Judea, sa siudad ni David, na inaapod na Betlehem, dahelan sa saiyang pagigin miembro kan kamag-anakan asin pamilya ni David.”​—Lucas 2:1-4.

Bakong nagkanorongod sana na sa panahon na ini nagpaluwas nin dekreto si Cesar. Sarong hula na isinurat mga pitong siglo bago kaini an nagsabi na mamumundag an Mesiyas sa Betlehem. Nangyari kaidto na igwa nin sarong banwaan na an ngaran Betlehem na 11 kilometros sana an rayo sa Nazaret. Minsan siring, malinaw na sinabi kan hula na mamumundag an Mesiyas sa “Betlehem Efrata.” (Miqueas 5:2) Ngonyan, mga 150 kilometros na kabubuldan an rayo kan Nazaret sa sadit na baryong iyan sa timog. Iyan an Betlehem na kaipuhan na dumanan ni Jose, huling iyan an istaran kan mga apoon ni Hadeng David​—an pamilya na kinabibilangan ni Jose sagkod kan saiyang agom.

Susuportaran daw ni Maria si Jose sa desisyon kaini na magsunod? An totoo, magigin depisil para sa saiya an pagbaklay. Posibleng marhay na enot na kabtang kan tigrakdag kan taon, kaya posible na magkaigwa nin maluyang pag-oran huling an tig-init luway-luway nang natatapos. Dugang pa, angay an pananaram na ‘nagtukad hale sa Galilea,’ huling an Betlehem nasa kalangkawan na labing 760 metros an langkaw​—biyong patukad asin masakit baklayon sa laog nin nagkapirang aldaw. Sa kamugtakan ni Maria tibaad mas halawig pa an pagbaklay huling kaipuhan nia na magpahingalo nin dakol na beses. Ngonyan, orog kasuarin man, tibaad mawoton nin sarong hoben na babae na magdanay na harani sa harong, na dian yaon an saiyang pamilya asin mga katood na andam siang tabangan kun magpoon na an saiyang kolog sa pangangaki. Daing duda, kaipuhan ni Maria an kosog nin boot tanganing gibohon an pagbaklay na ini.

 Minsan siring, isinurat ni Lucas na si Jose nagduman “tanganing magparehistro kaiba ni Maria.” Sinabi man nia na si Maria “ipinaagom [ki Jose] siring sa ipinanuga.” (Lucas 2:4, 5) Nakaimpluwensiang marhay sa mga desisyon ni Maria an saiyang pagigin agom ni Jose. Minansay ni Maria an saiyang agom bilang saiyang espirituwal na payo asin maogma niang ginigibo an itinao nin Dios na papel sa saiya bilang katabang ni Jose paagi sa pagsuportar nia ki Jose sa mga desisyon kaini. * Kaya napangganahan nia an posibleng pagbalo na ini sa saiyang pagtubod paagi sana sa pagigin makinuyog.

Ano pa daw an nagmotibar ki Maria na kumuyog? Aram daw nia an hula manongod sa Betlehem bilang an lugar na duman mamumundag an Mesiyas? Daing sinasabi an Biblia. Posible na aram nia an manongod sa hula, huling minalataw na an bagay na iyan aram kan gabos na namomoon sa relihion asin dawa kan mga tawo sa pangkagabsan. (Mateo 2:1-7; Juan 7:40-42) Kun mapadapit sa Kasuratan, may kaaraman dian si Maria. (Lucas 1:46-55) Ano man an dahelan, baga man si Maria nagdesisyon na magbaklay tanganing kuyogon an saiyang agom, an sekular na pagboot, o an mismong hula ni Jehova​—o huli sa kombinasyon kan mga iyan—​sia nagtao nin marahayon na halimbawa. Pinapahalagahan na marhay ni Jehova an pagigin mapakumbaba asin makinuyog nin mga lalaki sagkod babae. Sa panahon niato, na an pagpapasakop sa parate garo baga saro sa moral na mga karahayan na dai pinapahalagahan, an halimbawa ni Maria nakakaparigon sa boot para sa maimbod na mga tawo sa gabos na lugar.

An Pagkamundag ni Cristo

Seguradong naginhawahan si Maria kan maheling na nia an Betlehem sa harayo. Mientras na sinda nagtutukad sa mga bakilid, na nag-aagi sa kakahoyan nin olibo​—na kaiba sa huring mga pananom na aanihon—​tibaad inisip-isip nanggad ni Maria asin Jose an manongod sa kasaysayan kan sadit na baryong ini. Dawa ngani saditon iyan, kabilang iyan sa mga siudad sa Juda, arog kan pagkasabi kan propetang si Miqueas. Minsan siring, dian namundag si Booz, Noemi, asin sa huri si David, na sinda gabos mas naenot na nabuhay nin labing sarong ribong taon.

Naheling ni Maria asin Jose na matawo an baryo. An iba nag-abot nin mas amay kisa sa sainda tanganing magparehistro, kaya mayo na nin bakante para sa sainda sa mga kuartong dinadagosan. * Napiritan na sana sindang magpalihis kan bangging iyan sa sarong kuadra. Maiimahinar nanggad niato an kahaditan ni Jose mantang naheheling nia an saiyang agom na nagsasakit huli sa grabeng kolog na dai pa kaini namatean kasuarin man, na kaidto nag-oorog pa an kolog. Sa gabos na lugar, digdi pa sa kuadra nagpoon an saiyang kolog sa pangangaki.

An mga babae sa gabos na lugar puedeng magkaigwa nin empatiya ki Maria. Mga 4,000 na taon bago kaini, ihinula ni Jehova na an gabos na babae makakaeksperyensia nin kolog kun nangangaki huli sa minanang kasalan. (Genesis 3:16) Mayong ebidensia na nagsusuherir na eksepsion digdi si Maria. Dai espesipikong ilinadawan ni Lucas an kolog na namatean ni Maria, pero an sinabi sana nia: “Ipinangaki nia an saiyang aking lalaki, an panganay.” (Lucas 2:7) Iyo, an saiyang “panganay” namundag na​—an enot sa dakol na aki ni Maria, na kisiera pito gabos. (Marcos 6:3) Alagad an sarong ini pirmeng mapapalaen. Bako sanang sia an panganay ni Maria kundi sia an mismong “panganay [ni Jehova] sa gabos na  linalang,” an bugtong na Aki nin Dios!​—Colosas 1:15.

Sa puntong ini, idinagdag sa salaysay an sarong bantog na detalye: “Pinatos nia ini nin mga lampin asin pinahigda ini sa sarong bahogan.” (Lucas 2:7) Sa bilog na kinaban, ilinaladawan an pagkamundag na ini ni Jesus sa bakong realistikong paagi, arog kan sa Belen, mga drama, asin ipininta. Alagad, isip-isipa kun ano talaga an nangyari. An bahogan iyo an kinakakanan nin mga hayop na pang-oma. Kun siring, an dinagosan kan pamilya sarong kuadra, sarong lugar na bakong marahay an parong o bakong malinig​—kaidto o ngonyan man. Tunay nanggad, siisay na magurang an pipilion an siring na lugar tanganing dian mamundag an saiyang aki kun igwa man sanang iba na puede? Gusto kan kadaklan na magurang an pinakamarahay para sa saindang mga aki. Lalo na nanggad na gustong itao ni Maria asin Jose an pinakamarahay para sa Aki nin Dios!

Minsan siring, dai nagraot an saindang boot huli sa dai ninda kayang itao; ginibo sana ninda an pinakamakakaya ninda segun sa kun ano an igwa sinda. Halimbawa, mangnoha na si Maria mismo an nag-asikaso sa omboy, na pinatos nia ining marhay nin mga lampin, dangan maingat nia ining pinahigda sa bahogan tanganing makatorog, na sinesegurado niang maimbong asin ligtas ini. Dai tinogotan ni Maria an kahaditan huli sa saiyang presenteng kamugtakan na makadisturbo sa pagtao nia kan pinakamakakaya nia. Aram man nia sagkod ni Jose na an pagsuportar sa aking ini sa pagsamba kaini sa Dios iyo an pinakaimportanteng bagay na magigibo ninda para sa saiya. (Deuteronomio 6:6-8) Ngonyan, an madonong na mga magurang nagbubugtak nin kaagid na mga prioridad mantang pinapadakula ninda an saindang mga aki sa kinaban na ini na dai nagpapahalaga sa paglilingkod sa Dios.

Sarong Pagdalaw na Nagbunga nin Pagparigon sa Boot

Sarong biglang pagkaribok huli sa kaogmahan an nagpabago sa matoninong na kamugtakan. An mga pastor dali-daling nagpasiring sa kuadra, na gustong-gustong maheling an pamilya lalong-lalo na an aki. Garo nagsusulwak sa kaogmahan an mga lalaking ini asin an saindang mga lalawgon garo nagliliwanag sa kagayagayahan. Dali-dali sindang naghale sa bakilid nin kabubuldan na duman kaiba ninda an saindang mga aripompon. * Sinabi ninda sa nasorpresang mga magurang an manongod sa makangangalas na pangyayari na naeksperyensiahan pa sana ninda. Durante kan kamatangaan nin banggi, sa may bakilid, sarong anghel an biglang nagpaheling sa sainda. An kamurawayan ni Jehova nagliwanag sa bilog na palibot, asin an anghel nagsabi sa sainda na an Cristo, o Mesiyas, namundag pa sana sa Betlehem. Manonompongan ninda an aki na nakahigda sa sarong bahogan, na napapatos nin mga lampin. Dangan, may mas pambihira pa ngani​—sarong makosog na koro nin mga anghel an nagpaheling, na nag-aawit manongod sa kamurawayan ni Jehova!

Bakong makangangalas na dali-daling nagpasiring sa Betlehem an hamak na mga tawong ini! Seguradong napalukso an saindang puso kan maheling an sarong bagong mamundag na omboy na nakahigda duman, arog kan pagkaladawan kan anghel. Dai sana ninda sinadiri an maogmang baretang ini. “Ipinaaram ninda an isinabi . . . Asin an gabos na nakadangog nagngalas sa mga bagay na isinabi sa sainda kan mga pastor.” (Lucas 2:17, 18) An mga namomoon sa relihion kan panahon na idto minalataw na minemenos an mga pastor. Alagad maliwanag na pinapahalagahan ni Jehova an mapakumbaba asin maimbod na mga lalaking ini. Alagad, ano daw an nagin epekto ki Maria kan pagdalaw na ini?

Seguradong pagal-pagal si Maria huli sa sakit nin pangangaki, pero atento siang naghinanyog sa lambang tataramon. Asin labi pa dian an ginibo nia: “Rinimpos ni Maria an gabos na isinabing ini, na naghohorophorop sa saiyang puso.” (Lucas 2:19) Tunay nanggad na an hoben na babaeng ini sarong tawo na hararom na iniisip-isip an mga bagay. Aram nia na mahalagang marhay an mensaheng ini hale sa anghel. Gusto kan saiyang Dios, si Jehova, na maaraman asin masabotan nia kun siisay an aki niang ini saka kun ano an kahalagahan kaini. Kaya dai sana sia naghinanyog. Isinapuso nia an gabos na tataramon tanganing mapensar nia ini nin paorootro sa maabot pang mga bulan asin taon. Iyan an pangenot na dahelan kun taano ta nagkaigwa nin pagtubod si Maria na ipinaheling nia sa bilog niang buhay.

Aarogon daw nindo an halimbawa ni Maria? Pinano  ni Jehova nin mahalagang marhay na espirituwal na katotoohan an mga pahina kan saiyang Tataramon. Minsan siring, makikinabang sana kita nin dakula sa mga katotoohan na iyan kun tatawan nguna niato iyan nin atension. Magigibo niato iyan paagi sa regular na pagbasa sa Biblia​—bako sanang bilang sarong literatura kundi bilang an ipinasabong na Tataramon nin Dios. (2 Timoteo 3:16) Dangan, arog ni Maria, kaipuhan niatong isapuso an espirituwal na mga katotoohan asin horophoropon iyan. Kun hinohorophorop niato an satong binabasa sa Biblia, na ineestudyaran an mga paagi na mas lubos niatong ikakaaplikar an sadol ni Jehova, tinatawan niato an satong pagtubod nin espirituwal na sustansia na kaipuhan kaiyan tanganing magtalubo.

Dakol Pang Sinabi na Dapat Rimposon

Sa ikawalong aldaw kan omboy, ipinaturi sia ni Maria asin Jose siring sa kahagadan kan Ley ni Moises asin nginaranan siang Jesus siring sa sinabi sa sainda. (Lucas 1:31) Dangan, sa ika-40 aldaw, dinara sia ninda sa templo sa Jerusalem, mga pirang kilometro an rayo hale sa Betlehem, asin iprinesentar ninda an mga dolot nin pagdalisay na itinotogot kan Ley para sa mga dukha​—duwang agbaan o duwang salampati. Kun nakamate man sinda nin pagkasupog huli sa pagdolot nin mas sadit kisa sa lalaking karnero asin sarong agbaan na kayang idolot nin ibang mga magurang, liningawan na nguna ninda an siring na pagmate. Ano man an nangyari, nag-ako sinda nin mapuersang pagparigon sa boot mientras na sinda yaon duman.​—Lucas 2:21-24.

Sarong gurang na lalaki na an ngaran Simeon an nagdolok sa sainda asin dakol pa ngani an sinabi ki Maria na papahalagahan kaini sa saiyang puso. Pinanugaan si Simeon na maheheling nia an Mesiyas bago sia magadan, asin ipinarisa sa saiya kan banal na espiritu ni Jehova na an omboy na si Jesus iyo an ihinulang Paraligtas. Pinatanidan man ni Simeon si Maria dapit sa kolog na kaipuhan niang tagalan sa maabot na panahon. Sinabi nia na mamamatean ni Maria na garo baga sarong halabang espada an papalagbason sa saiya. (Lucas 2:25-35) Dawa an nagpapatanid na mga pananaram na iyan posibleng nakatabang ki Maria na magtagal kan umabot an masakit na panahon na iyan pakalihis nin labing tolong dekada. Pagkatapos ni Simeon, an sarong propetisa na an ngaran Ana naheling man an omboy na si Jesus asin sia nagpoon na magtaram manongod sa saiya sa gabos na nagpapahalaga sa paglaom na kaligtasan kan Jerusalem.​—Lucas 2:36-38.

Marahay nanggad an nagin desisyon ni Jose asin Maria sa pagdara sa saindang omboy sa templo ni Jehova sa Jerusalem! Para sa saindang aki, an mga pangyayaring ini kapinonan nin bilog na buhay na pagigin pirmeng presente sa templo ni Jehova. Mientras na yaon duman, ginibo ninda an gabos nindang makakaya sa paglilingkod sa Dios segun sa saindang kakayahan asin nag-ako sinda nin mga tataramon na nagtatao nin instruksion asin pagparigon sa boot. Siertong mas makosog an pagtubod ni Maria kan maghale sia sa templo kan aldaw na iyan, na an saiyang puso pano nin espirituwal na mga katotoohan na mahohorophorop asin ikakasabi sa iba.

Sarong marahayon na bagay na maheling an mga magurang ngonyan na inaarog an halimbawang iyan. Sa Mga Saksi ni Jehova, regular na iiniiba nin mga magurang an saindang mga aki sa Kristianong mga pagtiripon. An siring na mga magurang ginigibo an pinakamakakaya ninda sa paglilingkod sa Dios, na nagtatao sa saindang mga kapagtubod nin nakakaparigon sa boot na mga tataramon. Asin paghale ninda sa mga pagtiripon na ini, sinda mas makosog, mas maogma, asin pano nin marahay na mga bagay na ikakasabi sa iba. Maogma kamong iniimbitaran na makipagtipon sa sainda. Kun gigibohon nindo iyan, maheheling nindo na, arog ni Maria, orog pang makosog an saindong pagtubod.

[Mga Nota sa Ibaba]

[Ritrato sa pahina 25]

Binendisyonan si Simeon na maheling an ihinulang Paraligtas