Siisay an Makakaaram kan Ngapit?

“Ako an Dios . . . , an Saro na nagpapaisi kan mangyayari sa huri poon pa sa kapinonan, asin kan mga bagay na dai pa nahahaman poon pa kan suanoy.”​—Isaias 46:9, 10.

SA DAING kasegurohan na mga panahon na ini, an kasaysayan asin presenteng dalagan nin mga bagay pinag-aadalan nin mga analisador sa politika, ekonomiya, asin sosyedad sa paghihingoang aramon an mangyayari sa ngapit. An iba man, huling desesperadong maaraman kun ano an personalmenteng nakatagama sa sainda sa ngapit, naglalaom sa astrolohiya o espiritismo para sa mga simbag. An siring na mga tawo parateng nadedesganar sa mga resulta. Biyong imposible daw na maaraman kun ano an mangyayari sa kinaban na ini, sa satong pamilya, asin sa sato bilang indibiduwal? Sa kabilogan, igwa daw nin siisay man na talagang makakaaram nin patienot kan ngapit?

Sa saiyang mga tataramon ki propeta Isaias, na kinotar sa enotan, ilinadawan kan Dios na Makakamhan sa Gabos, si Jehova, an saiya mismong kakayahan na ihula an ngapit. Paagi ki Isaias, ihinula nin Dios an pakatalingkas kan suanoy na mga Israelita hale sa pagkabihag sa Babilonya asin an pagbalik ninda tanganing itogdok liwat an Jerusalem asin an templo. Gurano kaeksakto an hulang ini? Mga 200 na taon antes pa, nginaranan nin tama ni Isaias an makongkistar sa Babilonya, si Ciro. Apuera kaini, eksaktong ilinadawan ni Isaias an estratehiya ni Ciro​—an pagpasuki kan Salog nin Eufrates, na nagserbing proteksion kan siudad. Sinabi pa ngani nia antes pa na maaabotan ni Ciro na daing ingat na nawalat na bukas an dakulaon asin duwa kadahon na mga pinto sa lanob kan siudad, na makakakontribwir sa pasil na kapangganahan ni Ciro.​—Isaias 44:24–45:7.

Kun ikokomparar sa Dios, an tawo mayong kakayahan na aramon an ngapit. “Dai ka maghambog dapit sa masunod na aldaw,” nagsurat an madonong na si Hadeng Salomon, “huli ta dai mo naaaraman kun ano an mangyayari sa sarong aldaw.” (Talinhaga 27:1) Totoo pa man giraray an obserbasyon na iyan. Mayong tawo na makakaaram antes pa dawa kan saiya mismong ngapit. Ano an kalaenan nin Dios? Lubos niang nasasabotan an gabos na linalang nia, pati na an naturalesa asin tendensia nin tawo. Kun bobooton nia, kaya niang aramon nin eksakto kun paano magawe an mga indibiduwal asin an bilog na mga nasyon. Dugang pa, igwa sia nin daing sagkod na kakayahan na kontrolon an resulta nin mga pangyayari. Kun ihinuhula nia paagi sa saiyang mga propeta na may sarong bagay na mangyayari, sia nagigin “an Saro na nagpapangyaring magin totoo an tataramon kan saiyang lingkod, asin an Saro na lubos na nag-ootob sa konseho kan saiya mismong mga mensahero.” (Isaias 44:26) Si Jehova Dios sana an totoong makakasabi kaiyan.

Nabuhay si Isaias labing 700 na taon bago si Jesus, an Mesiyas. Pero, naghula si Isaias manongod sa pagdatong kan Mesiyas. Minsan siring, partikularmente poon kan ika-18 siglo padagos, kinuestion nin mga kritiko sa Biblia an pagkamasasarigan kan libro nin Isaias. Sinabi ninda na an mga hula ni Isaias bako talagang makahula kundi ginibo sana nin kagsurat pakatapos na kan pangyayari. Totoo daw iyan? Kan 1947 nadiskobre sa sarong kueba na harani sa Gadan na Dagat an sarong kopya kan libro nin Isaias, kaiba an iba pang suanoy na mga rolyo. Dineterminaran nin mga nag-eespesyalisar na  ginibo an kopyang ini labing sanggatos na taon bago mamundag an ihinulang Mesiyas, o Cristo. Iyo, ihinayag kan Biblia an ngapit!

Dai kutana ikakahula ni Isaias asin nin iba pang mga kagsurat sa Biblia an mga mangyayari sa ngapit kun basado sana sa sadiri nindang pakarorop. Imbes, sinda “nagtaram hale sa Dios mantang sinda pinapahiro kan banal na espiritu.” (2 Pedro 1:21) Sa masunod na mga artikulo, makonsentrar kita sa nagkapirang detalye kan buhay ni Jesus na ihinula paagi ki Isaias. Dangan eestudyaran niato an mga pangyayaring ihinula ni Jesus asin kan saiyang mga disipulo na mangyayari sa satong panahon asin sa ngapit.