Mamamahala an Nagkapira, Makikinabang an Dakol
Mamamahala an Nagkapira, Makikinabang an Dakol
POON kan panahon kan mga apostol, an Dios nagpipili sa katawohan nin limitadong bilang nin maimbod na mga Kristiano, na inaampon sinda bilang mga aki. Lubos nanggad an pagbabago na naeeksperyensiahan kan inampon na mga aking ini kaya iyan ilinaladawan kan Tataramon nin Dios na pagkamundag giraray. An katuyohan kan pagkamundag giraray iyo na andamon an siring na namundag giraray na mga lingkod nin Dios na magin mga namamahala sa langit. (2 Timoteo 2:12) Tanganing magin namamahala, sinda binubuhay liwat pasiring sa langitnon na buhay. (Roma 6:3-5) Sa langit, “sinda mamamahala bilang mga hade sa daga” kaiba ni Cristo.—Kapahayagan 5:10; 11:15.
Minsan siring, sinasabi man kan Tataramon nin Dios na apuera sa mga namundag giraray, may iba pa na mag-aako nin daing katapusan na kaligtasan. Sinasabi kan Biblia (sa Hebreong Kasuratan saka sa Kristianong Griegong Kasuratan) an katotoohan na katuyohan nin Dios na iligtas an duwang grupo nin mga tawo—sarong medyo sadit na grupo nin mga mamamahala na mabubuhay sa langit asin sarong dakulang grupo nin mga sakop na mabubuhay digdi sa daga. Halimbawa, mangnohon an sinurat ni apostol Juan sa mga kapagtubod na namundag giraray. Sinabi nia mapadapit ki Jesus: “Sia sarong pampagian nin boot na atang para sa satong mga kasalan, pero bako sanang kan sa sato [an sadit na grupo] kundi siring man kan sa bilog na kinaban [an dakulang grupo].”—1 Juan 2:2.
Kaagid kaiyan, si apostol Pablo nagsurat: “An odok na pag-antisipar kan mga linalang [an dakulang grupo] naghahalat sa paghahayag kan mga aki nin Dios [an sadit na grupo].” (Roma 8:19-21) Paano maninigong saboton an mga tataramon na ini kan mga apostol na si Juan asin si Pablo? Siring kaini: An mga namundag giraray magigin kabtang kan gobyerno sa langit. Sa anong katuyohan? Tanganing magpaabot nin daing katapusan na mga pakinabang sa minilyon na tawo, an mga sakop kan gobyerno nin Dios na mabubuhay digdi sa daga. Huli kaiyan, tinokdoan ni Jesus an mga disipulo nia na mamibi: “Dumatong logod an kahadean mo. Gibohon logod an kabotan mo, kun paano sa langit, siring man sa daga.”—Mateo 6:10.
An iyo man sanang katotoohan na ini mapadapit sa kaligtasan na itatao sa duwang grupo sinambit man sa Hebreong Kasuratan. Halimbawa, mangnohon an sinabi ni Jehova sa apoon ni Jesus na si Abraham: “Paagi sa saimong banhi [an sadit na grupo] an gabos na nasyon sa daga [an dakulang grupo] magbebendisyon nanggad kan saindang sadiri.” (Genesis 22:18) Iyo, magkakamit nin mga bendisyon an gabos na nasyon paagi sa “banhi” ni Abraham.
Siisay an “banhi” na iyan? Si Jesu-Cristo, kaiba an mga namundag giraray, an inampon na mga aki nin Dios. Si apostol Pablo nagpaliwanag: “Kun kamo ki Cristo, kamo talagang banhi ni Abraham.” (Galacia 3:16, 29) Asin ano an mga bendisyon na kakamtan nin mga tawo kan gabos na nasyon paagi sa “banhi”? An pribilehio na mag-ako kan pag-oyon nin Dios asin magkaigwa nin buhay na daing katapusan sa paraisong daga. Si salmistang David naghula: “An mga matanos mismo makakasadiri kan daga, asin sinda mag-eerok dian sagkod lamang.”—Salmo 37:29; Isaias 45:18; Kapahayagan 21:1-5.
Tunay nanggad, an pamamahala sa langit nakatagama para sa nagkapira, alagad an mga pakinabang paagi sa langitnon na pamamahala—an buhay na daing katapusan digdi sa daga asin an gabos na bendisyon na kaiba kaiyan—itatao sa dakol. Logod na ika asin an pamilya mo magin kabilang sa mga mag-aako kan daing katapusan na mga pakinabang na ipapaabot kan Kahadean nin Dios.
[Ritrato sa pahina 12]
Minilyon an bebendisyonan nin buhay na daing katapusan digdi sa daga. Magigin kabilang ka daw sa sainda?