Kun Paano Nindo Masasabotan an Biblia

3. Akoon an Tabang nin Iba

Kan an paradiskobre nin ibang lugar na si Edward John Eyre magbaklay pasiring sa ibong na poro kan dai iniistaran na Kapatagan nin Nullarbor, si Eyre tinokdoan kan mga Aborigen kun paano magkua nin tubig sa mga bulod-bulod nin baybay asin poon nin eukalipto. An pag-ako ni Eyre nin tabang hale sa mga nakakasabot kan kamugtakan kan lugar na iyan nagligtas kan saiyang buhay pakatapos kaiyan.

SIRING kan ipinapaheling kan halimbawang ini, sa parate kaipuhan an tabang nin sarong mas eksperyensiado tanganing mapangganang matapos an sarong depisil na gibohon. Totoo man iyan pagpinonan nindong basahon an Biblia.

Dai inasahan ni Jesus na masasabotan kan saiyang mga parasunod an Biblia kun mayo nin tabang nin iba. Sa sarong pangyayari, “binuksan nia nin lubos an saindang isip tanganing masabotan an kahulogan kan Kasuratan.” (Lucas 24:45) Aram ni Jesus na an mga nagbabasa kan Biblia nangangaipo nin tabang na masabotan an sono sa Kasuratan na mga katokdoan.

Tabang Hale Kiisay?

Isinugo ni Jesus an saiyang tunay na mga parasunod na itao an tabang na ini. Bago magsakat si Jesus sa langit, sia nagboot: “Kun siring, paduman kamo asin gumibo kamo nin mga disipulo sa mga tawo kan gabos na nasyon, . . . na tokdoan nindo sinda na otobon an gabos na bagay na ipinagboot  ko sa saindo.” (Mateo 28:​19, 20) Kalabot sa pangenot na gibohon kan mga Kristiano an pagtotokdo, na kaiba an pagpaliwanag kun paano ikakaaplikar sa aroaldaw na buhay an mga prinsipyo sa Biblia. An tunay na mga Kristiano nagtatabang sa iba na masabotan an Biblia.

Dai nahaloy pakatapos na itao ni Jesus sa saiyang mga parasunod an asignasyon na iyan, may interesanteng marhay na nangyari. May sinasabi an Biblia dapit sa sarong opisyal kan reyna nin Etiopia na nagbabasa nin sarong kabtang kan hula ni Isaias. May nabasa siang teksto na dai nia nasabotan. Segun sa pagkasaysay kan Biblia, an teksto na dai nia nasabotan nagsasabi: “Siring sa sarong karnero sia dinara pasiring sa bunoan, asin siring sa kordero na daing girong sa atubangan kan saiyang paratusar, dai man nia binuka an saiyang ngoso. Sa panahon kan saiyang kasupganan an paghokom hinale sa saiya. Siisay an magsasaysay kan mga detalye kan saiyang kapag-arakian? Huli ta an saiyang buhay hinale sa daga.”​—⁠Gibo 8:​32, 33; Isaias 53:​7, 8.

Hinapot kan opisyal si Felipe, na sarong eksperyensiadong Kristiano na may kabatidan sa Kasuratan: “Manongod kiisay sinasabi ini kan propeta? Manongod sa saiya mismo o manongod sa  ibang tawo?” (Gibo 8:34) An sinserong Etiope hale na sa Jerusalem tanganing sumamba, asin sia posibleng marhay na namibi tanganing humagad nin paggiya. Malinaw nanggad, sia nagbabasa na may makosog na interes asin kahoyoan. Alagad dai pa man giraray masabotan kan opisyal an tekstong ini. Mapakumbaba siang naghagad nin tabang ki Felipe. Ikinaogma nin labi-labi kan lalaking iyan an paliwanag ni Felipe kaya sia mismo napahiro na magin Kristiano.​—⁠Gibo 8:​35-39.

Ipinapadagos kan Mga Saksi ni Jehova an gibohon ni Felipe asin kan iba pang enot na mga Kristiano. Sa labing 235 kadagaan, an mga Saksi boluntaryong nagtatabang sa iba na masabotan kun ano talaga an itinotokdo kan Biblia. Ginigibo ninda ini paagi sa pag-adal sa Kasuratan basado sa topiko. Kalabot sa progresibong pag-adal na ini sa Biblia an pag-analisar kun ano an sinasabi kan Biblia manongod sa sarong partikular na topiko, o tema. *​—⁠Helingon an kahon na  “Nakakakontentong Simbag sa mga Hapot sa Biblia.”

‘Nasimbag an Gabos na Hapot Ko’

Si Steven, Valvanera, asin Jo-Anne, na sinambit sa enot na artikulo, nagpoon na makipag-adal sa Biblia sa mga Saksi ni Jehova. “Napangalas ako kan maheling ko na paagi sana sa pagkomparar nin nagkapirang sono sa Kasuratan na prinsipyo o pagkasaysay, sa parate yaon man sana palan dian an simbag,” an sabi ni Steven. “Bago ako nakipag-adal sa Biblia, mayo nin siisay man na nagtokdo sa sako kun paano iyan gigibohon. Nakakaginhawang marhay na maaraman na dai kaipuhan na magparadebate asin magparakorontrahan nin opinyon dapit sa Biblia.”

Minaoyon man dian si Valvanera. “An gabos na pinag-aadalan madaling masundan asin rasonable,” an sabi nia. “An mga bagay totoo, bako sanang huling iyan an sinasabi kan relihion ninda, kundi huling igwa nin rasonableng paliwanag sa gabos na bagay.” Si Jo-Anne nagsabi: “Kan an gabos na hapot ko masimbag basado sa Biblia, nakamate nanggad ako nin hararom na paggalang sa Autor​—⁠huling aram na nia an mangyayari kaya ipinasurat nia an angay na simbag sa ano man na hapot nin tawo.”

May midbid daw kamong Saksi ni Jehova? Taano ta dai makiolay sa saiya na ipaheling sa saindo kun paano ginigibo an pag-adal na ini? Kun mayo kamong kamidbid na Saksi ni Jehova, sumurat tabi sa saro sa mga adres na yaon sa pahina 4 kan magasin na ini. Paagi sa banal na espiritu nin Dios, bukas na isip, asin tabang nin sarong kualipikadong paratokdo sa Biblia, an Tataramon nin Dios bako man talagang depisil pag-adalan. Puede nindong masabotan an Biblia!

[Nota sa Ibaba]

[Kahon/Ritrato sa pahina 8]

 Nakakakontentong Simbag sa mga Hapot sa Biblia

Nagkapira sa mga topiko na ipinapaliwanag kan Mga Saksi ni Jehova sa saindang pagtotokdo sa Biblia:

• Ano an katuyohan nin Dios para sa daga?

• Haen an mga gadan?

• Nabubuhay na daw kita sa “huring mga aldaw”?

• Taano ta tinotogotan nin Dios an pagsakit?

• Paano ko magigibong magin maogma an sakong buhay pampamilya?

[Ritrato sa pahina 7]

Tanganing masabotan an Biblia . . . mamibi na logod tabangan kamo kan espiritu nin Dios, magbasa na may bukas na isip, akoon an tabang nin iba