Binago kan Biblia an Saindang Buhay

Taano ta an sarong babae na nawaran nin pagtubod sa relihion ginagamit na ngonyan an dakol na panahon nia sa pagtabang sa iba na makanood manongod sa Dios? Ano an nagmotibar sa sarong lalaki na mahilig sa madahas na mga isport na magin mamomoton sa katoninongan? Paano nabago an pamumuhay nin sarong lalaki na nagdodroga, parainom, asin nagpaparapakisuntokan? Basahon an sinabi ninda.

IMPORMASYON

NGARAN: PENELOPE TOPLICESCU

EDAD: 40

GINIKANAN NA NASYON: AUSTRALIA

DATING DISKONTENTO SA RELIHION

AN BUHAY KO KAIDTO: Namundag ako sa Sydney, Australia, alagad kan ako dos anyos pa sana, nagbalyo sa New Guinea an samong pamilya. Nag-istar kami nin haros duwang taon sa Rabaul dangan nin walong taon sa Bougainville. Kan mga panahon na idto, mayo nin TV sa New Guinea, kaya kami kan tugang kong lalaki nagdakula na pirmeng nasa luwas​—⁠naglalangoy, nag-iisnorkel, asin nagkakamping.

Kan ako mga dies anyos, nagpoon akong magkainteres sa relihion. Si Nanay Katoliko, kaya isinuherir nia na mag-atender ako sa pagtotokdo sa Biblia kan saro sa mga madre sa samong lugar. Inako ko an Katolisismo asin nabunyagan ako sa edad na dies anyos.

Minsan siring, pagkabalik mi sa Australia asin kan nagtitinedyer na ako, nagpoon na akong magduda sa itinokdo sa sako dapit sa relihion. Kan panahon na ako nasa haiskul, pinag-adalan ko an suanoy na kasaysayan, asin kaming mag-ama nag-oolay nin halawig manongod sa ginikanan nin relihion asin sa mga estorya sa Biblia na hinohona mi na mga eroestorya o osipon sana. Sa kahurihurihi, binayaan ko an Katolisismo.

An sakong mga magurang nagsuwayan kan ako 16 anyos. Nasakitan si Nanay, asin sa kahurihurihi nag-istar ako sa sakong ama asin sa saiyang kasaroan. An sakong tugang na lalaki nagdanay ki Nanay, asin sinda nagbalyo sa ibang lugar. Grabe an kapungawan ko kan panahon na iyan. Duwang taon an nag-agi bago naparani giraray an boot ko sa sakong ina. Nagpoon akong mag-inom, magdroga, asin magduman sa mga parti. Nagpondo ako sa pag-eskuela, nagtrabaho, asin sinayang an sakong pagkahoben sa imoral na pamumuhay.

Kan ako mag-25 anyos, pinonan ko giraray na pag-isipan an Biblia. Nagpoon ako sa sarong  bagong trabaho asin nakamidbid ko si Lien, sarong magayon na daragita na pirmeng magalang sa saiyang among, minsan ngani ini daing modo nanggad sa saiya. Kan hinapot ko sia kun taano ta dai sia nagsisimbag nin maraot sa saiyang among, ipinaliwanag nia na nakikipag-adal sia sa Biblia sa mga Saksi ni Jehova asin nagmamaigot na iaplikar sa buhay nia an mga prinsipyo sa Biblia. Inalok ako ni Liene nin pag-adal sa Biblia. Huling dai ko sia nasabotan, an paghona ko an boot niang sabihon iyo na puede kong manodan sa laog sana nin sarong oras an gabos na aram nia manongod sa Biblia. Kan bangging iyan, tolong oras na sinimbag ni Liene an sakong mga hapot manongod sa Biblia. Naghanga ako na an gabos na simbag nia suportado nin mga teksto sa Biblia.

Nagigirumdoman ko kan ako nagmamaneho papuli sa harong kan bangging iyan pagkatapos kan pag-oolay mi ni Liene asin naaanggot ako sa Dios huli ta dai nia tolos ipinaaram sa sako an katotoohan manongod sa saiya. Aram kong an mga Saksi namumuhay na malinig sa moral asin iniisip ko na huri nang marhay na mahale ko an sakong mga bisyo. Naisip ko man na dai ko noarin man makakaya na maghulit sa harong-harong arog kan mga Saksi. Nagpadagos ako sa pakipag-adal sa Biblia sa mga Saksi, alagad an motibo ko iyo na hanapan nin sala an mga katokdoan ninda tanganing dai ako makonsensiang pondohon an sakong koneksion sa sainda. Sarong aldaw narealisar ko na mayo akong makukuang sala sa mga katokdoan ninda.

KUN PAANO BINAGO KAN BIBLIA AN SAKONG BUHAY: Mientras na nanonodan ko an moral na mga pamantayan sa Biblia, mas lalo akong nakokonsensia. Tanganing mapatoninong an sakong konsensia, ipinondo ko an pagdroga. Alagad nagbalyo ako sa ibang nasyon sa laog nin kadikit na panahon asin nagpoon na naman akong magparaduman sa mga parti asin mag-inom. Garo baga kada magprobar akong ioyon an sakong pamumuhay sa mga prinsipyo sa Biblia, ako minabalik sa dati kong mga bisyo. Sa pagkasupog, ako namimibi ki Jehova, alagad namomondo pa man giraray ako.

Kan maaraman ko an manongod sa ginibo ni Hadeng David ki Bat-seba asin kun paano sinda pinahelingan ni Jehova nin pagkaherak, nakatabang iyan sa sako. May kosog nin boot na inadmitir ni David an saiyang sala kan sia hinatolan, na dai nagmamaigot na ipangatanosan an saiyang mga ginibo. Asin mapakumbaba niang inako an disiplina sa saiya. (2 Samuel 12:​1-13) Kada magkasala ako, iniisip ko an estoryang iyan asin nagin mas pasil an paghagad ko nin tawad ki Jehova. Dangan nagdesisyon akong mamibi bago ako magpadaog sa sugot imbes na pagkatapos, asin nakatabang iyan nin dakula sa sako.

KUN PAANO AKO NAKINABANG: Dati pirme akong madaling maanggot. Minsan siring, an teksto sa Efeso 4:​29-31 nakatabang sa sako na masabotan na kaipuhan kong likayan an ‘kapaitan asin kaanggotan asin grabeng pagkaanggot.’ Mantang nakakanood akong kontrolon an templada kan sakong payo, nakakanood na man akong kontrolon an sakong dila. Dugang pa, an hatol ni Jesus na ‘pabayaan na an saindong tataramon na Iyo mangahulogan nin Iyo’ nakatabang sa sako na magin mas determinado.​—⁠Mateo 5:⁠37.

An sakong ina, na kan enot kontra sa pakikiibaiba ko sa mga Saksi, nagsabi sa sako kan huri na ipinag-oorgolyo nia ako. Sinabi pa ngani nia, “Aram kong kun ano ka ngonyan bakong huli sa paagi nin pagpadakula sa saimo kundi huli sa nanodan mo manongod ki Jehova.” Naogma akong marhay na madangog siang magsabi kaiyan.

An pagmate ko ngonyan igwa na nin katuyohan asin kahulogan an sakong buhay. Kaming mag-agom siyam na taon nang bilog na panahon na paratokdo sa Biblia. Iyo, naghuhulit ako sa harong-harong, asin namamatean ko ngonyan na ini na an pinakanakakakontentong gibohon na nagibo ko kasuarin man.

 IMPORMASYON

NGARAN: DENIS BUSIGIN

EDAD: 30

GINIKANAN NA NASYON: RUSYA

DATING MAHILIG SA KARATE

AN BUHAY KO KAIDTO: Namundag ako sa siudad nin Perm’ asin nagdakula ako sa Furmanov, sarong siudad na mga 40,000 an habitante sa rehion nin Ivanovo, Rusya. An Furmanov magayon na siudad na may dakol na magagayon na poon nin kahoy na nagigin amarilyo asin pula kun tigrakdag. Durante kan dekada nin 1980 asin 1990, luminangkaw an bilang nin krimen sa siudad. An samong pamilya namuhay nin simpleng-simple sa kadikit na ginaganar. Kaiba ko an sakong mga magurang asin nguhod na tugang na lalaki sa sarong kuartong apartment, kaya iyan medyo piot.

Kan ako siete anyos, nagpoon akong mag-adal nin karate. Gustong-gusto ko an isport na iyan; nakasentro dian an bilog na buhay ko. Pirme akong nasa dyimnasium sa gabos na libreng oras ko, kaya an gabos na amigo ko mahilig sa isport. Sa edad na 15, ako nagin red belter sa karate, asin pakalihis nin sarong taon ako nagin brown belter. Kaiba ako sa grupo nin mga karatista na kabale sa kampeonato sa Rusya asin Eurasia. Magayon an sakong puturo, alagad kan ako 17 anyos na, nagbago an bilog na buhay ko.

Kami kan nagkapira kong amigo nakagibo nin krimen asin nadakop kami. Nasentensiahan ako nin duwang taon na pagkabilanggo. Depisil an buhay sa bilanggoan. Minsan siring, nasa bilanggoan ako kan enot akong makaheling nin Biblia. Binasa ko an Genesis, Salmo, asin Bagong Tipan. Tinuom ko pa ngani an Ama Niamo asin namimibi ako kaiyan barobanggi bago magtorog, na iniisip na maski paano makakatabang iyan sa sako.

Nakaluwas ako sa bilanggoan kan 2000, alagad mayo nin direksion asin katuyohan an buhay ko. Nagpoon akong magdroga. Kan panahon man na idto nagadan an sakong ina. Sia an pinakanamomotan ko, asin depisil para sa sako an pagkawara nia. Minsan siring, napondo ko an sakong pagdroga asin nagpoon giraray akong magduman sa dyimnasium. Nagbalyo man ako sa siudad nin Ivanovo. Duman nakakua ako nin trabaho sa groseri. An chief assistant kan groseri saro sa Mga Saksi ni Jehova. Ipinaliwanag nia sa sako an nagkapirang pundamental na katotoohan sa Biblia asin iinareglo nia na dalawon ako nin saro pang Saksi tanganing regular akong tokdoan sa Biblia.

KUN PAANO BINAGO KAN BIBLIA AN SAKONG BUHAY: Durante kan sakong mga pag-adal sa Biblia, napahirong marhay an boot ko kan maaraman ko an katuyohan nin Dios na gibohon na paraiso an daga, asin gusto kong makualipikar na magin kabtang kan ngapit na iyan. Dai nahaloy naaraman ko na si Jehova Dios igwa nin halangkaw na mga pamantayan na gusto niang sunodon nin mga tawo. Sadiri ko sana an inisip ko sa kadaklan na kabtang kan sakong buhay. Alagad naaraman ko na gusto ni Jehova na isipon ko an iba asin na magkaigwa ako nin mga kualidad na mayo sa sako kan panahon na iyan​—⁠mga kualidad na kaiba an kabootan asin an pagkamoot sa katoninongan.

Kan ponan kong isipon na marhay an manongod sa gabos na ginibo ni Jehova para sa sako​—⁠siring kan pagtao kan saiyang Aki bilang atang para sa sakong mga kasalan​—⁠an pagpasalamat sa pagkamoot nin Dios nagpahiro sa sako na gumibo nin mga pagbabago sa sakong buhay. Halimbawa, naaraman ko sa Salmo 11:5 na ikinakaongis ni Jehova an kadahasan. Kaya nagpondo na ako sa  pagheling nin mga programa sa TV na nagtatampok nin kadahasan asin pagkaongis. Asin dawa nadedepisilan ako, ipinondo ko an madahas na mga isport. An prinsipyo sa 1 Corinto 15:33 nakatabang sa sako na masabotan na an pinipili kong magin kairiba may dakulang epekto sa sako. An katunayan na nabilanggo ako nagpapatotoo kan prinsipyong iyan. Kaya nagdesisyon akong magpondo na sa pakikiibaiba sa mga tawo na an buhay nakasentro sa madahas na mga isport.

KUN PAANO AKO NAKINABANG: An pakikiibaiba sa mga Saksi ni Jehova asin pag-adal sa Biblia nakatabang sa sako na magin onesto. Halimbawa, basado sa Hebreo 13:​5, naaraman ko na kaipuhan na magin kontento asin labanan an pagkamoot sa kuarta. An pag-aplikar sa sadol na ini nakatabang sa sako na isikwal an pagputik asin paghabon.

Pirmeng mahalaga sa sako an pakikikatood. Kan nakaagi, nakaheling ako nin mga pagkakatood na naraot huli sa kahanaban o pagkatakot. An mga Saksi ni Jehova bakong perpekto, alagad naaraman ko na iginagalang ninda an mga pamantayan nin Dios asin nagmamaigot na marhay na iaplikar sa pagtratar ninda sa iba an saiyang hatol. Sa sainda ako nakanompong nin tunay na mga katood.

Iniisip-isip ko kun ano na an buhay ko kun dai ko nanodan na mamuhay kaoyon kan mga pamantayan sa Biblia. Tibaad ako nasa bilanggoan giraray o dahelan nin kakologan asin pagsakit nin iba. Pero ngonyan, igwa na ako nin magayon na agom asin duwang aking lalaki, asin bilang pamilya, tunay na naoogma kami sa pagtabang sa iba na makanood kan katotoohan manongod sa Dios.

IMPORMASYON

NGARAN: JOSE CARLOS PEREIRA DA SILVA

EDAD: 31

GINIKANAN NA NASYON: BRAZIL

DATING NAGPAPARAPAKISUNTOKAN

AN BUHAY KO KAIDTO: Nagdakula ako sa maating iskuater sa Americana, São Paulo. Mayo kami nin malinig na tubig na inomon o tamang sanitasyon. An lugar na iyan midbid sa kadahasan asin dakol na krimen.

Nagdakula akong madahas asin agresibo. Pirme akong naiimbuelto sa mga labolabo, kaya kinatakotan ako nin mga tawo sa samong pagtaraed. Maheheling sa sakong gubing, itsura, asin gawe-gawe na ako maisog. Makosog akong mag-inom, sa parate sagkod na madismayo ako. Arog kan sakong mga tugang na lalaki, nagdodroga ako. Sa katunayan, an saro sa sakong mga tugang nagadan sa oberdos.

KUN PAANO BINAGO KAN BIBLIA AN SAKONG BUHAY: Kan mamidbid ko an mga Saksi ni Jehova, ipinaheling ninda sa sako sa Biblia na gigibohon nin Dios na paraiso an bilog na kinaban. (Lucas 23:​42, 43; Kapahayagan 21:​3, 4) Naaraman ko man na an mga gadan mayo man lamang nin pakaaram, kaya dai pinapadusahan nin Dios an mga maraot sa nagkakalayong impierno. (Eclesiastes 9:​5, 6) Nakapaginhawa nanggad ini sa sako. An nanodan ko manongod sa Dios nagtao sa sako nin makosog na pagmawot na bagohon an sakong pamumuhay. Alagad bakong pasil na magbago​—⁠na magpondo sa pagdroga, pag-inom, pagparapakisuntokan, asin sa kinatodan kong pagparataram nin maraot.

 Minsan siring, naparigon na marhay an sakong boot kan mga tataramon ni apostol Pablo na nakasurat sa 1 Corinto 6:​9-11. Ipinapaheling kan tekstong iyan na an nagkapira sa mga Kristiano kan enot na siglo dating igwa nin nagkapirang maraot na ugale na yaon sa sako. Alagad an tekstong iyan nagsasabi man: “Arog kaiyan kaidto an nagkapira sa saindo. Alagad kamo nahugasan na, alagad kamo pinakangbanal na, alagad kamo ipinahayag nang matanos sa ngaran kan satong Kagurangnan na Jesu-Cristo asin sa espiritu kan satong Dios.” An mga tataramon na iyan nagtao sa sako nin paglaom na magigibo ko man an kinakaipuhan na mga pagbabago sa sakong buhay tanganing mapaogma an Dios.

Kan magpoon akong makiasosyar sa mga Saksi ni Jehova, nakombensir ako na inootob ninda an tunay na relihion. Aram ninda na ako dating madahas asin agresibo, pero mainit asin mamomoton pa man giraray ninda akong inako na makaibaiba ninda.

KUN PAANO AKO NAKINABANG: Kun dai ako nag-adal kan Biblia asin nagbago kan sakong estilo nin pamumuhay, tibaad gadan na ako ngonyan. Imbes, naoogma ako na natabangan ko an saro sa sakong mga tugang na lalaki na makanood manongod sa Biblia asin makabutas sa saiyang adiksion sa droga. Asin nadagka ko man na mag-adal sa Biblia an iba ko pang paryente. Nagpapasalamat akong marhay na ikinadusay ko an sakong buhay sa paglilingkod sa Dios, na nagmamalasakit na marhay sa sato!

[Blurb sa pahina 24]

“Nagdesisyon akong mamibi bago ako magpadaog sa sugot imbes na pagkatapos, asin nakatabang iyan nin dakula sa sako”