An Banal na Espiritu—Sarong Puersa na Kaipuhan sa Saindong Buhay

“DAI mo ako ipagsikwal sa atubangan kan saimong lalawgon; asin an saimong banal na espiritu O dai mo paghaleon sa sakuya.” (Salmo 51:11) Ini an odok sa boot na pamibi ni Hadeng David pagkatapos na makakomiter sia nin makaturotristeng sala.

Parateng naeeksperyensiahan kaidto ni David an kapangyarihan kan banal na espiritu. Kan sia tinedyer pa, nakatabang iyan sa saiya na madaog si Goliat—sarong masakit daogon na soldados. (1 Samuel 17:45-50) Nakatabang man iyan sa saiya na isurat an nagkapira sa pinakamagagayon na salmong nakomponer kasuarin man. “An espiritu ni Jehova iyo an nagtaram paagi sa sako, asin an saiyang tataramon yaon sa sakong dila,” an paliwanag ni David.—2 Samuel 23:2.

Pinatunayan ni Jesu-Cristo mismo an papel kan banal na espiritu sa buhay ni David. Sa sarong pangyayari, sinabi ni Jesus sa mga nagdadangog sa saiya: “Paagi sa banal na espiritu, si David mismo nagsabi, ‘Si Jehova nagsabi sa sakong Kagurangnan: “Tumukaw ka sa sakong too sagkod na ibugtak ko an saimong mga kaiwal sa irarom kan saimong mga bitis.”’” (Marcos 12:36; Salmo 110:1) Aram ni Jesus na kan isurat ni David an saiyang mga salmo, sia giniyahan kan banal na espiritu. Matatabangan man daw kita kan iyo man sanang banal na espiritu?

 “Padagos na Maghagad, Asin Itatao Iyan sa Saindo”

Tibaad nungka kamong makakasurat nin salmo. Alagad kamo puede nanggad na mapaatubang sa mga olang na siring kadakula ki Goliat. Halimbawa, estudyare si Isabel. * Binayaan sia kan saiyang agom huli sa mas hoben na babae. Sia binayaan kaini na dakolon an utang, asin dai ini nagtao nin sustento sa saiya para sa saindang duwang sadit na aking babae. “An pagmate ko trinaydor ako asin trinato na garo basura,” an sabi nia. “Minsan siring, poon kan bayaan nia ako, namatean ko na sinusuportaran ako kan banal na espiritu nin Dios.”

Inasahan daw ni Isabel na automatikong aakoon nia an banal na espiritu? Dai, aroaldaw siang nakimaherak sa Dios na logod tawan sia kan espiritu Nia. Aram nia na kaipuhan nia an kosog na hale sa Dios tanganing tabangan siang atubangon an ngapit na may kosog nin boot, asikasohon nin tama an saiyang mga aki, asin pakosogon giraray an saiyang pagpahalaga sa sadiri. Isinapuso nia an mga tataramon ni Jesus: “Padagos na maghagad, asin itatao iyan sa saindo; padagos na maghanap, asin makakakua kamo; padagos na magtuktok, asin bubukasan iyan sa saindo.”—Mateo 7:7.

Namatean man ni Roberto na kaipuhan nia an espiritu nin Dios alagad sa laen na mga dahelan. Sia adikto sa tabako asin marihuana, na parate niang ginagamit. Linabanan nia nanggad nin duwang taon an saiyang pagkaadikto, asin nagkapirang beses na naotro nia iyan. “Kun magpondo ka sa pagdroga makakamate ka nin kapurisawan,” an paliwanag ni Roberto. “Aroaldaw na hahanaphanapon kan saimong hawak an droga.”

Si Roberto nagsabi pa: “Alagad determinado akong magbago tanganing mapaglingkodan ko an Dios sa paaging inaako nia. Pinagmaigotan kong panoon an sakong isip nin positibong mga bagay hale sa Biblia. Aroaldaw akong namimibi nin odok sa boot, na hinahagad sa Dios na logod tawan nia ako nin kosog na linigon an sakong buhay. Aram kong dai ako makakapanggana sa sadiri ko sanang kosog. Asin naheling ko kun paano sinimbag ni Jehova an sakong mga pamibi, nangorogna kun makuri an kamondoan ko kun naootro an sakong kaluyahan. Naniniwala ako na pinakosog giraray ako kan banal na espiritu nin Dios; kun mayo an saiyang espiritu, nungka ko kutanang napangganahan an sakong pagkaadikto.”—Filipos 4:6-8.

Paglayog na “May mga Pakpak na Siring sa mga Agila”

Arog ni Isabel asin Roberto, an minilyon na Saksi ni Jehova naeeksperyensiahan sa saindang buhay an kapangyarihan kan banal na espiritu. An aktibong puersa ni Jehova—an puersa na ginamit sa paglalang kan uniberso—puedeng itao sa saindo kun gusto nindo. An Dios andam asin gustong ihiras sa saindo an saiyang espiritu kun maigot nindong hinahagad iyan. Alagad tanganing mag-ako kan espiritung iyan, kaipuhan nindong pag-adalan an katotoohan manongod sa saiya asin sinserong hingoahon na gibohon an saiyang kabotan.—Isaias 55:6; Hebreo 11:6.

Paagi sa nagpapakosog na puersa kan banal na espiritu, puede nindong akoon an kosog tanganing mapangganang paglingkodan an Dios asin atubangon an ano man na puedeng magin mga kadepisilan sa saindong buhay. Ini an sinisierto sa sato kan Biblia: “[Si Jehova] nagtatao nin puersa sa napapagal; asin an mayo nin dinamikong enerhiya ginigibo niang abunda an bilog na kosog. . . . An mga naglalaom ki Jehova magkakamit nin bagong puersa. Sinda maralayog na may mga pakpak na siring sa mga agila. Sinda madaralagan asin dai makakapoy; sinda maralakaw asin dai magkakaparagal.”—Isaias 40:28-31.

[Nota sa Ibaba]

[Blurb sa pahina 8]

‘Aroaldaw akong namimibi nin odok sa boot, na hinahagad sa Dios na logod tawan nia ako nin kosog. Aram kong dai ako makakapanggana sa sadiri ko sanang kosog. Asin naheling ko kun paano nia sinimbag an sakong mga pamibi’

 [Kahon/Mga Ritrato sa pahina 7]

AN PAGPUNSIONAR KAN BANAL NA ESPIRITU

An banal na espiritu ginamit nin Dios tanganing lalangon an daga asin an iba pang kabtang kan uniberso. “Kanigoan kadakol kan saimong gibo, O Jehova! Iyan gabos ginibo mo sa kadonongan. An daga pano kan saimong mga ginibo,” an entusiastikong ipinahayag kan salmista. “Kun isugo mo an saimong espiritu, sinda nalalalang.”—Salmo 104:24, 30; Genesis 1:2; Job 33:4.

An banal na espiritu nagpasabong sa diosnon na mga lalaki tanganing isurat an Biblia. “An gabos na Kasuratan ipinasabong nin Dios asin kapakipakinabang,” an isinurat ni apostol Pablo. (2 Timoteo 3:16) An Griegong tataramon na trinadusir na “ipinasabong nin Dios” literal na nangangahulogan na “hinangosan nin Dios.” Giniyahan kan hinangos, o espiritu, ni Jehova an kaisipan kan mga kagsurat kan Biblia, kaya ikinapaabot ninda “an tataramon nin Dios.”—1 Tesalonica 2:13.

An banal na espiritu nagtao nin kapangyarihan sa mga lingkod nin Dios tanganing ihula nin tama an ngapit. Si apostol Pedro nagpaliwanag: “Daing hula nin Kasuratan na gikan sa ano man na sadiring interpretasyon. Huli ta an hula dai kasuarin man dinara paagi sa kabotan nin tawo, kundi an mga tawo nagtaram hale sa Dios mantang sinda pinapahiro kan banal na espiritu.”—2 Pedro 1:20, 21; Joel 2:28.

An banal na espiritu nagtabang ki Jesus asin sa iba pang mga tawong may pagtubod tanganing ihulit an maogmang bareta kan Kahadean nin Dios asin gumibo nin mga milagro. Si Jesus nagsabi: “An espiritu ni Jehova yaon sa sako, huli ta linahidan nia ako na magpahayag kan maogmang bareta sa mga dukha, isinugo nia ako na maghulit nin pagkabutas sa mga bihag asin nin pagkauli kan pagheling sa mga buta.”—Lucas 4:18; Mateo 12:28.

 [Kahon/Mga Ritrato sa pahina 9]

MGA PAAGI NA PUEDE KITANG TABANGAN KAN BANAL NA ESPIRITU

An banal na espiritu puede kamong pakosogon na labanan an mga sugot asin pangganahan an nakakaraot na mga gibo. Si apostol Pablo nagsabi: “Maimbod an Dios, asin dai nia itotogot na kamo masugotan nin labi sa saindong makakaya, kundi kaibahan kan sugot matao man sia nin luluwasan tanganing iyan matagalan nindo.”—1 Corinto 10:13.

An banal na espiritu puede kamong tabangan na pataluboon an diosnon na mga kualidad. “An mga bunga kan espiritu iyo an pagkamoot, kagayagayahan, katoninongan, pakatios, kabootan, karahayan, pagtubod, kahoyoan, pagpupugol sa sadiri.”—Galacia 5:22, 23.

An banal na espiritu puede kamong pakosogon na tagalan an mga pagbalo. “Igwa ako kan kosog para sa gabos na bagay huli sa saiya na nagtatao nin puersa sa sako.”—Filipos 4:13.