An mga Gadan daw Makakatabang sa mga Buhay?

SI Tamba, sarong hoben na lalaki na taga Solnopan na Aprika, madali nang mag-exam sa eskuelahan. * Iiniinsistir kan saiyang ina na kaipuhan nia an tabang kan saiyang gadan nang mga paryente tanganing makapasar. Sa Palermo, Sicily, pinapasyaran nin mga turista an mga pantsong sa irarom kan daga na may naka-display na ginatos na bangkay na maingat na prineserbar. Dakol an naniniwala na paagi sa mga bangkay na ini na ginibong mummy tinatawan nin Dios nin proteksion an mga buhay. Kada taon, pinapasyaran nin mga tawo an Lily Dale, sarong banwaan sa solnopan na Estado nin Nueva York, E.U.A., na midbid huli sa kadakolan nin mga espiritistang nag-iistar duman. An mga turista nagduduman huling naglalaom sinda na puede nindang makakomunikar an gadan nang mga paryente o katood asin matatabangan sinda kan mga ini.

Sa bilog na globo, may mga naniniwala pa man giraray na an mga gadan makakatabang sa mga buhay. Ano sa paghona nindo? Tibaad itinokdo sa saindo an siring na paniniwala o may mga kadayupot kamo na nangangapot sa ideyang iyan. Natural sanang mapungaw kita sa mga namomotan niato na nagadan na. An mga espiritista nanunuga na makakatabang sinda dapit dian. Kinotar sa magasin na Time an sarong espiritista na nagsabing an rona nin mga espiritu “pirmeng andam na tumabang.” Totoo daw iyan? An mga gadan daw makakatabang talaga sa mga buhay? Tibaad masorpresa kamo sa malinaw na simbag kan Biblia.

An mga Gadan daw Buhay sa Sarong Lugar?

Ipinapaliwanag kan Biblia an kamugtakan kan mga gadan sa simple asin madaling masabotan na mga termino. Mangnohon an sinasabi kan Eclesiastes 9:5: “An mga buhay nakakaaram na sinda magagadan; alagad kun dapit sa mga gadan, mayo man lamang sinda nin pakaaram.” Posible daw na nakakamate pa an mga gadan? An bersikulo 6 nagsisimbag: “An saindang pagkamoot asin an saindang pagkaongis patin an saindang pangimon nawara na, asin sagkod sa panahon na daing talaan mayo na sindang kabtang sa ano man na kaipuhan na gibohon sa sirong kan saldang.” Mangnohon man na an bersikulo 10 kan iyo man sanang kapitulo nagsasabi na “mayo nin gibohon ni pagplano ni kaaraman ni kadonongan sa Sheol, an lugar na saimong padudumanan.” An Hebreong tataramon na “Sheol” na ginamit digdi nangangahulogan nin “pangkagabsan na lolobngan nin katawohan.” Interesante nanggad, an katumbas sa Griego kan tataramon na ini, an “Hades,” ginamit sa Kasuratan tanganing iparisa kun haen si Jesu-Cristo sa laog nin sarong panahon pagkagadan nia.—Gibo 2:31.

Dakol an tinabangan ni Jesus kan sia buhay pa, alagad aram nia na kaipuhan siang magadan. Inisip daw nia na makakatabang pa sia sa mga tawo kun sia nasa lolobngan na? Dai. An saiya mismong nagdadangadang na kagadanan kaidto ikinomparar nia sa banggi na sa panahon na iyan imposible na makagibo nin ano man. (Juan 9:4) Aram na marhay ni Jesus na kun an mga tawo mayo nang buhay, sinda “daing nagigibo pagkagadan.”—Isaias 26:14.

Si Jesus naggamit man nin pagkokomparar na nagtampok nin kaagid na punto manongod sa kagadanan. Kan magadan an amigo niang si Lazaro, iinagid ni Jesus sa pagtorog an kagadanan. (Juan 11:11-13) Dai niato inaasahan na matatabangan kita nin saro na torog, bako daw? An torog mayong pakaaram asin mayong magigibo para sa kiisay man.

An Kalag daw Nagdadanay na Buhay Pagkagadan?

Dakol an tinokdoan na an kalag sarong dai naheheling na kabtang nin sarong tawo na nagdadanay na buhay pagkagadan. Laen an itinotokdo kan Biblia. Sinasabi sa sato kan enot na libro sa Biblia, an  Genesis, kun ano an kalag. An Genesis 2:7 nagsasabi na kan lalangon an enot na tawo, sia “nagin buhay na kalag.” An tawo mismo sarong kalag; an mga hayop kalag man. (Genesis 1:20-25) Kaya, rasonable sana na kun an sarong tawo o hayop magadan, an kalag nagagadan. Pinapatunayan ini kan Biblia.—Ezequiel 18:4.

Minsan siring, an nagkapira tibaad maghapot, ‘Paano man an dakol na estorya dapit sa mga tawong nakakomunikar an mga gadan, nadangog an tingog kan mga ini, o naheling pa ngani an mga ini?’ An siring na mga pagkasaysay ordinaryo na sana sa dakol na kabtang kan kinaban. Iyan nagtatao nanggad nin paglaom sa nagadanan na mga paryente o dayupot na mga katood, na nagpapahiro sa dakol na maghanap nin espiritista na kaya daang makikomunikar sa mga gadan.

Totoo daw an siring na mga estorya? Kun iyo, bako daw na magigin kontra ini sa mga nasambitan sa enotan na basado sa Biblia? Ilinadawan ni Cristo Jesus an Tataramon nin Dios bilang katotoohan. (Juan 17:17) Mayo nin pagkakakorontrahan sa katotoohan. An totoo, may malinaw na paggiya sa Biblia kun paano niato maninigong mansayon an mga paghihingako na an mga gadan makakatabang sa mga buhay. Sinasabi sa sato kan Biblia an manongod sa saro na nagprobar na magpatabang sa mga gadan. An maingat na pagbasa sa pagkasaysay na iyan maghahayag kan katotoohan.

Nagpatabang sa mga Gadan an Sarong Hade

Sa sarong kampo de batalya sa amihanan na Israel, si Hadeng Saul asin an saiyang hukbo napaatubang sa makatatakot na hukbo nin mga Filisteo. Kan maheling ni Saul an kampo kan mga Filisteo, “an saiyang puso nagpoon na magtakig nin makuri.” Sa panahon na ini kan saiyang pagkahade, binayaan na ni Saul an tunay na pagsamba. Bilang resulta, dai sinimbag ni Jehova an mga paghagad nia nin tabang. Saen si Saul madolok para sa tabang? An propeta nin Dios na si Samuel gadan na.—1 Samuel 28:3, 5, 6.

Si Saul nagdolok sa sarong espiritista sa En-dor. Nakimaherak sia sa espiritista na ‘patungahon si Samuel’ hale sa mga gadan. Pinangyari kan espiritista an sarong aparisyon. Sinabi kan “Samuel” na ini ki Saul na manggagana an mga Filisteo asin na si Saul asin an saiyang mga aki magagadan sa ralaban. (1 Samuel 28:7-19) Si Samuel daw talaga idto na nagbalik hale sa mga gadan?

Isip-isipa ini. Sinasabi kan Biblia na kun an tawo magadan “minabalik sia sa saiyang daga” asin “an saiyang mga pag-isip napapara.” (Salmo 146:4) Aram pareho ni Saul asin Samuel na kinokondenar nin Dios an pakikikomunikar sa mga espiritista. An totoo, bago kaidto pinangenotan ni Saul an paghale kan espiritistikong mga gibohon sa nasyon!—Levitico 19:31.

Mangatanosan dapit dian. Kun an maimbod na si Samuel buhay pa bilang espiritu, babalgahon daw nia an ley nin Dios asin makikikooperar sa sarong espiritista tanganing kaolayon si Saul? Si Jehova nagsayumang makipag-olay ki Saul. Kun siring, mapipirit daw nin sarong espiritista an Makakamhan sa Gabos na Dios na makikomunikar ki Saul paagi sa gadan na si Samuel? Dai. Malinaw nanggad na sa ano man na paagi an “Samuel” na ini bako an maimbod na propeta nin Dios. Idto sarong espiritu—sarong maraot na demonyo na nagsaginsagin na sia an gadan na si Samuel.

An mga demonyo mga anghel na nagrebelde sa autoridad nin Dios kan nagpopoon pa sana an kasaysayan nin tawo. (Genesis 6:1-4; Judas 6) Naoobserbaran kan mga demonyo an mga tawo mantang nabubuhay an mga ini; aram ninda kun paano magtaram asin maghiro an lambang saro saka kun  ano an itsura kan mga ini. Gustong-gusto nindang palakopon an ideya na bakong totoo an sinasabi kan Biblia. Bakong makangangalas na an Biblia nagpapatanid tumang sa ano man na pakikikomunikar sa siring na mga puersang espiritu! (Deuteronomio 18:10-12) An maraot na mga espiritung ini aktibo pa ngonyan.

Ngonyan tibaad nasasabotan na niato kun taano ta dakol an nagsasabi na “nadangog” o “naheling” ninda an gadan nang mga namomotan ninda. Minsan ngani kun beses an siring na mga aparisyon garo baga marahay, determinado an maraot na mga puersang espiritu na dayaon an mga tawo. * (Efeso 6:12) Siring man, isip-isipa ini: Si Jehova sarong mamomoton na Dios na nagmamakolog sa sato. Kun an mga gadan buhay sa sarong lugar asin makakatabang sa saindang mga kapamilya asin katood, ipagbabawal daw kan satong mamomoton na Kaglalang an siring na pakikikomunikar asin aapodon daw nia iyan na “makauuyam nin makuri”? Siertong dai! (1 Pedro 5:7) Kun siring, igwa daw nin ano man na masasarigan na gikanan nin tabang?

Tunay na Tabang Para sa mga Buhay Asin mga Gadan

Nasabotan niato sa mga sinambit sa enotan na an mga gadan dai nanggad makakatabang sa mga buhay. Apuera kaini, an paghihingoa na magpatabang sa mga gadan mas grabe pa kisa sa pagigin daing pakinabang sana; iyan sobra kapeligroso, huling binabalga kaiyan an ley nin Dios asin isinasapeligro kita sa impluwensia nin mga demonyo.

Ginigiyahan kita kan Biblia sa pinakamarahay na Gikanan nin tabang—an satong Kaglalang, si Jehova. Kaya nia kitang kaldahon sa kagadanan mismo. (Salmo 33:19, 20) Ngonyan, sia andam na tumabang sa sato. Sa siring, an itinatao nia tunay na paglaom, na laen sa falsong mga paglaom hale sa mga espiritista.

Si Tamba, na nasambitan sa enotan, nakaeksperyensia mismo kan pagkakalaen kan falsong mga paglaom na itinatao nin mga espiritista asin kan katotoohan na itinatao sa sato ni Jehova. An mga espiritista nagsabi na kun dai sia maatang sa saiyang gadan nang mga apoon, sia mabagsak sa exam sa eskuelahan. Si Tamba nakikipag-adal na kaidto nin Biblia sa Mga Saksi ni Jehova. Nanodan na nia an tunay na kamugtakan kan mga gadan asin na an nasa likod kan nagsasaginsagin na gadan nang mga apoon iyo an marompot na mga espiritu. Sa ibong kan pagparapirit kan saiyang ina na magpatabang sia sa espiritista, si Tamba nagsayuma, na sinasabi sa saiyang ina, “Kun magbagsak ako, mas papakarhayon ko na sana sa sunod na taon.”

Ano an resulta? Sia an may pinakahalangkaw na grado sa exam! An saiyang ina napangalas, dai na nagtubod sa mga espiritista, asin nungka nang nagsambit kan arog kaiyan na mga pag-atang. Nanodan ni Tamba na pinapatanidan kita ni Jehova na likayan na “makihumapot sa mga gadan para sa mga buhay.” (Isaias 8:19) An pag-adal sa Biblia nagtao ki Tamba nin kompiansa na kun ikakaogma niang marhay an ley nin Dios, sia magigin mapanggana.—Salmo 1:1-3.

Pero, kumusta man an manongod sa mga namomotan niato na nagadan na? Mayo na daw nin paglaom para sa sainda? Apuera sa pagtabang sa sato na mga buhay, nanunuga si Jehova na tatabangan nia an mga nasa lolobngan. Pagkatapos na iladawan kun gurano kadaing magigibo an mga gadan, mangnohon an ihinahayag ni propeta Isaias sa kapitulo 26, bersikulo 19: “An saimong mga gadan magkakaburuhay. . . . Magmata asin kumurahaw kamo na may kagayagayahan, kamong mga nag-eerok sa kabokabo!” Sinabi pa kan hulang iyan na “an mga daing nagigibo pagkagadan” mabubuhay giraray.

Imahinara iyan! An daing maginibong binilyon na nagtotorog sa lolobngan bubuhayon giraray! Sa katunayan, ihinahayag kan Biblia na si Jehova may “paghimuyawot” na buhayon liwat an mga gadan. (Job 14:14, 15) An siring na mga panuga daw garo baga imposible? Si Jesu-Cristo nakakasierto nanggad sa paglaom na ini kaya an mga gadan ilinadawan nia na buhay na sa pagheling ni Jehova.—Lucas 20:37, 38.

Gusto mo daw na magkaigwa man kan paglaom na ini? * Padagos na kumua nin tamang kaaraman sa Biblia. Mantang nag-aadal ka, makokombensir ka na si Jehova makakatabang sa mga buhay saka sa mga gadan asin na an saiyang mga panuga “maimbod asin totoo.”—Kapahayagan 21:4, 5.

[Mga Nota sa Ibaba]

[Blurb sa pahina 19]

Natural sanang mapungaw kita sa mga namomotan niato na nagadan na

[Ritrato sa pahina 20]

Si propeta Samuel daw nabuhay hale sa mga gadan asin nakikomunikar ki Hadeng Saul?