‘Saro Pang Tagay’
‘Saro Pang Tagay’
SI Allen nagpoon na magburat kan sia 11 anyos. * Sia asin an saiyang mga katood nagkakawat sa makahoy na lugar, na inaarog an mga karakter na naheling ninda sa mga pelikula. An mga karakter na inaarog ninda bakong totoo, alagad an arak na iniinom ninda totoo.
Si Tony 40 anyos kan luway-luway niang dugangan an saiyang iniinom poon sa saro o duwa sagkod sa lima o anom na baso kada banggi. Pag-abot nin panahon, dai na nia aram kun pirang baso nin inomon na de alkohol an naiinom nia sa laog nin sarong aldaw.
Si Allen nagpatabang dapit sa problema nia sa pag-inom. Si Tony nagsayuma sa tabang na iinaalok kan nagmamakolog na mga kapamilya asin katood. Si Allen buhay ngonyan tanganing isaysay an nangyari sa saiya; si Tony nagadan mga pirang taon na an nakaagi huli sa sarong aksidente sa lunadan pagkatapos nin sobrang pag-inom nin arak.
Dawa kun an saro nagbuburat nin solo, an mga epekto kan saiyang sobrang pag-inom siertong nakakaapektar sa buhay nin iba, na sa parate may makaturotristeng resulta. * An salang paggamit nin inomon na de alkohol sa parate sarong dahelan nin berbal asin pisikal na pag-abuso, mga pangongolog asin paggadan, mga aksidente sa auto asin trabaho, saka nin dakol na problema sa salud. Kada taon, binilyon na dolyar an ginagastos nin mga tawo sa pag-abuso sa inomon na de alkohol, dai na baga sambiton pa an personal asin emosyonal na danyos kaiyan sa mga indibiduwal, pamilya, asin aki.
Dawa siring, “bakong gabos na regular na nag-iinom may problema sa pag-inom,” an sabi kan U.S. National Institutes of Health, “asin bakong gabos na may problema sa pag-inom nag-iinom aroaldaw.” Dai narerealisar nin dakol na bakong alkoholiko na nagigin bisyo na ninda an sobrang pag-inom. An iba bakong regular na nag-iinom alagad kun minainom labi sa limang baso an nauubos.
Kun magdesisyon kamong uminom nin inomon na de alkohol, gurano kadakol an sobra na? Paano nindo maaaraman kun noarin dai na puede an ‘saro pang tagay’? (Talinhaga 23:29, 30, Contemporary English Version) Ipapaliwanag kan minasunod na mga artikulo an nakakatabang na impormasyon dapit sa temang ini.
[Mga Nota sa Ibaba]
^ par. 2 Sinalidahan an nagkapirang ngaran.
^ par. 5 Apat na beses na mas may posibilidad na magin alkoholiko an mga lalaki kisa sa mga babae. Minsan siring, an impormasyon sa seryeng ini nin mga artikulo aplikado sa mga lalaki asin babae.