Naghahapot an mga Parabasa . . .

Taano ta Iinaalok nin Dios sa mga Tawo an Regalong Buhay na Daing Katapusan?

▪ Sinasabi kan Biblia na tinatawan kita nin Dios kan oportunidad na mag-ako nin “buhay na daing katapusan.” (Juan 6:40) Pero, ano an nagmomotibar sa saiya na ialok an siring na oportunidad? Iyan daw pagpaheling sana nin hustisya?

Kalabot sa hustisya an pagtratar sa mga tawo oyon sa kun ano an rasonable asin tama. Talaga daw na maninigo kita sa buhay? Dai. An Biblia nagsasabi: “Mayo nin tawong matanos sa daga na padagos na naggigibo nin marahay asin dai nagkakasala.” (Eclesiastes 7:20) May kaibang penalidad an kasalan. Pinatanidan nin Dios an enot na tawo, si Adan, na sa aldaw na sia magkasala sia siertong magagadan. (Genesis 2:17) Kan huri, si apostol Pablo pinasabngan na magsurat: “An ibinabayad nin kasalan kagadanan.” (Roma 6:23) Kaya kun an gabos na naggikan ki Adan maninigo nanggad sa kagadanan, taano ta iinaalok nin Dios an posibilidad na buhay na daing katapusan?

An alok na buhay na daing katapusan “daing bayad na regalo.” Iyan kapahayagan kan kadakulaan asin hiwas kan pagkamoot asin kan dai na kutana maninigong kabootan nin Dios. An Biblia nagsasabi: “An gabos nagkasala asin nagkulang sa kamurawayan nin Dios, asin iyan bilang daing bayad na regalo na sinda ipinapahayag na matanos paagi sa saiyang dai na kutana maninigong kabootan paagi sa pagkabutas huli sa pantubos na ibinayad ni Cristo Jesus.”—Roma 3:23, 24.

Minsan ngani kita gabos maninigo sa kagadanan, pinili nin Dios na itao an buhay na daing katapusan sa mga namomoot sa saiya. Iyan daw bakong makatanosan? An Biblia nagsasabi: “Ano an sasabihon niato, kun siring? Igwa daw nin inhustisya sa Dios? Nungka logod na mangyari iyan! Huli ta sia nagsasabi ki Moises: ‘Maheherak ako sa siisay man na kinakaherakan ko, asin magmamalasakit ako sa siisay man na pinagmamalasakitan ko.’ . . . Siisay ka man nanggad na nakikipagsimbagan sa Dios?”—Roma 9:14-20.

Sa nagkapirang lugar kan kinaban, an sarong halangkaw na opisyal nin gobyerno o huwes puedeng magtao nin pardon sa sarong kriminal na napatawan nin magabat na sentensia. Kun an kriminal boluntad na magsunod sa mga areglo kan padusa sa saiya asin magpaheling nin pagbabago sa ugale asin gawe-gawe, puedeng magdesisyon an sarong huwes o presidente na tawan sia nin pardon paagi sa pagpagian kan saiyang sentensia o biyong pagkanselar kaiyan. An aksion na ini masasabi nanggad na sarong kapahayagan nin dai na kutana maninigong kabootan.

Sa kaagid na paagi, puedeng magdesisyon si Jehova na dai iimponer sa gabos na makasalan an padusang maninigo sa sainda. Imbes, motibado nin pagkamoot, puede niang tawan nin buhay na daing katapusan an mga namomoot sa saiya asin nagsusunod sa saiyang mga pamantayan. An Biblia nagsasabi: “An Dios daing ipinapaorog, kundi sa lambang nasyon an tawo na natatakot sa saiya asin naggigibo nin katanosan saiyang inaako.”—Gibo 10:34, 35.

An kadarudakulaing akto nin pagkamoot ni Jehova para sa sato iyo an pagsugo nia sa saiyang Aki tanganing magsakit asin magadan para sa sato. Sinabi ni Jesus dapit sa saiyang Ama: “An Dios namoot na gayo sa kinaban kaya itinao nia an saiyang Aking bugtong, tanganing an lambang nagtutubod sa saiya dai malaglag kundi magkaigwa nin buhay na daing katapusan.”—Juan 3:16.

An gabos na talagang namomoot ki Jehova asin naggigibo kan saiyang kabotan pararehong inaako nin Dios, ano man an saindang pinaghalean. Sa siring, an paglaom na buhay na daing katapusan sa pangenot sarong kapahayagan nin dai na kutana maninigong kabootan, sarong akto nin daing kabaing na pagkamoot nin Dios.

[Blurb sa pahina 29]

Iyan sa pangenot sarong kapahayagan nin dai na kutana maninigong kabootan, sarong akto nin daing kabaing na pagkamoot