An Itinokdo ni Jesus Dapit sa Sadiri Nia

“Si Jesus mayo nin ano man na pagduda sa kun siisay sia, kun saen sia hale, kun taano ta nagdigdi sia sa satong kinaban, asin kun ano an mangyayari sa saiya sa ngapit.”​—OYON SA AUTOR NA SI HERBERT LOCKYER.

BAGO niato mahimong akoon asin tubodon an mga itinokdo ni Jesus, may kaipuhan kitang maaraman dapit sa saiya. Siisay man nanggad si Jesus? Saen sia hale? Ano an katuyohan nia sa buhay? Sa mga Ebanghelyo—Mateo, Marcos, Lucas, asin Juan—maaaraman niato an simbag hale mismo ki Jesus.

Sia buhay na bago mamundag sa daga Si Jesus nagsabi: “Bago nabuhay si Abraham, buhay na ako.” (Juan 8:58) Nabuhay si Abraham mga 2,000 na taon bago mamundag si Jesus. Pero, buhay na si Jesus bago pa mabuhay an maimbod na patriarkang iyan. Pero, saen kaidto nabubuhay si Jesus? “Ako naghilig hale sa langit,” an paliwanag nia.—Juan 6:38.

An Aki nin Dios Dakol an aking anghel ni Jehova. Pero, iba si Jesus. Inapod nia an sadiri nia na “bugtong na Aki nin Dios.” (Juan 3:18) Iyan nangangahulogan na si Jesus sana an direktang linalang nin Dios. An bugtong na Aki an ginamit nin Dios sa paglalang kan gabos na iba pang bagay.—Colosas 1:16.

“An Aki nin tawo” Sa pagpanongod ni Jesus sa sadiri nia, mas parate nia ining ginamit kisa sa ibang pananaram. (Mateo 8:20) Sa siring, ipinaheling nia na bako siang anghel na nagsulot nin pisikal na hawak o Dios na nagpakangtawo. Imbes, tawo talaga sia kaidto. Paagi sa banal na espiritu nin Dios, ibinalyo Nia an buhay kan saiyang Aki hale sa langit pasiring sa daga, na nagpangyaring mangidam an birhen na si Maria. Kaya, si Jesus namundag na tawong sangkap asin mayong kasalan.—Mateo 1:18; Lucas 1:35; Juan 8:46.

An ipinanugang Mesiyas “Aram ko na an Mesiyas madatong,” an sabi nin sarong Samaritana ki Jesus. Si Jesus nagsimbag: “Ako na nagtataram sa saimo iyo sia.” (Juan 4:25, 26) An tataramon na “Mesiyas,” arog kan tataramon na “Cristo,” nangangahulogan na “Linahidan.” Si Jesus linahidan, o ninombrahan nin Dios, tanganing magkaigwa nin espesyal na papel sa kaotoban kan mga panuga nin Dios.

An pangenot na misyon nia Si Jesus nagsabi: ‘Dapat na ipahayag ko an maogmang bareta kan kahadean nin Dios, huli ta dahel kaini ako isinugo.’ (Lucas 4:43) Minsan ngani dakol siang ginibong marahay para sa mga tawong nangangaipo, an paghuhulit dapit sa Kahadean nin Dios an nagin pangenot sa buhay nia. Ipapaliwanag kan saro sa masurunod na artikulo kun ano an itinokdo nia dapit sa Kahadean na iyan.

Malinaw na si Jesus bakong ordinaryong tawo. * Arog kan maheheling niato, an buhay nia kaidto sa langit nagtao nin dagdag na kahulogan dapit sa mga sinabi nia digdi sa daga. Nakakangalas daw na naghulit sia nin mensahe na may epekto sa buhay nin minilyon sa bilog na kinaban?

[Nota sa Ibaba]