An Tawong Buminago kan Kinaban

Binilyon na tawo an nabuhay asin nagadan sa dagang ini. An kadaklan mayo nin nagibong ano man na dai malilingawan. Minsan siring, may pira na nakaimpluwensia sa kasaysayan—asin posibleng marhay na sa saimong aroaldaw na buhay.

BUMINANGON ka pagkaaga asin nag-andam tanganing magtrabaho. Mantang nag-aandam ka, binukasan mo an ilaw. Nagkua ka nin libro o magasin na mababasa sa bus. Nagirumdoman mong magtomar kan irinesetang antibiotiko na panglaban sa impeksion. Minapoon pa sana an aldaw mo, pero nakinabang ka na sa nagibo nin pirang bantog na tawo.

Michael Faraday An pisikong Ingles na ini, na namundag kan 1791, an nag-imbento kan de-koryenteng motor asin kan dinamo. An mga nadiskobre asin naimbento nia nakatabang tanganing magamit nin mga tawo an koryente.

Ts’ai Lun Sia sarong opisyal sa palasyo kan emperador nin Tsina asin ibinibilang na nakatabang sa pagpaoswag sa paggibo nin papel kaidtong mga 105 C.E. na nakatabang sa lagdoan na pagprodusir nin papel.

Johannes Gutenberg Kan mga 1450, an Aleman na imbentor na ini an naggibo kan enot na makinang pang-imprenta na naggagamit nin hale-haleng mga letra (movable type). Huli sa makinang iyan, nagin barato an pag-imprenta kaya madali nang makakua nin impormasyon dapit sa manlaenlaen na tema.

Alexander Fleming Kan 1928, nadiskobre kan parasiyasat na ini hale sa Scotland an sarong antibiotiko na inapod niang penisilin. An mga antibiotiko ginagamit na ngonyan nin dakol tanganing bolongon an mga impeksion na huli sa bakterya.

Mayong duda na an mga nadiskobre asin naimbento nin pirang tawo nakatabang sa binilyon na tawo na magkaigwa nin nagkapirang pakinabang o nin mas marahay na salud.

Minsan siring, may sarong tawo na nakakalabi sa gabos na iba pa. Dai sia namidbid huli sa ano man na nadiskobre sa siensia o medisina. Imbes, an tawong ini na may hamak na pinaghalean asin nagadan haros 2,000 na taon na an nakaagi nagwalat nin mensahe—sarong mapuersang mensahe nin paglaom asin pagranga. Kun an babasaran iyo an nagin epekto kan saiyang mensahe sa buhay nin mga tawo sa bilog na daga, dakol an maoyon na sia talaga an tawong buminago kan kinaban.

An tawong iyan iyo si Jesu-Cristo. Anong mensahe an ihinulit nia? Asin ano an puedeng magin epekto kan mensaheng iyan sa saimong buhay?