Si Jesu-Cristo​—Ika Asin an Saiyang Mensahe

“Ako napadigdi tanganing sinda magkaigwa nin buhay asin magkaigwa kaiyan nin abunda.”—JUAN 10:10.

SA PANGENOT, si Jesu-Cristo nagdigdi sa daga tanganing magtao, bakong mag-ako. Paagi sa saiyang ministeryo, nagtao sia sa katawohan nin regalo na daing kaagid an halaga—sarong mensahe na naghahayag kan katotoohan dapit sa Dios asin sa Saiyang kabotan. An mga naghihimate sa mensaheng iyan puedeng magkamit nin marahay na buhay ngonyan, arog kan mapapatunayan nin minilyon na Kristiano. * Alagad an pinakasentro kan mensaheng ihinulit ni Jesus iyo an pinakamahalagang regalo—an sangkap na buhay na itinao nia para sa sato. An satong daing sagkod na ikakarahay nakadepende sa paghimate niato sa pangenot na aspektong ini kan saiyang mensahe.

Kun ano an itinao nin Dios asin ni Cristo Aram ni Jesus na magagadan sia sa kamot kan saiyang mga kaiwal sa makolog na paagi. (Mateo 20:17-19) Pero, sa bantog niang mga tataramon sa Juan 3:16, sia nagsabi: “An Dios namoot na gayo sa kinaban kaya itinao nia an saiyang Aking bugtong, tanganing an lambang nagtutubod sa saiya dai malaglag kundi magkaigwa nin buhay na daing katapusan.” Si Jesus nagsabi man na sia nagdigdi “tanganing . . . itao an saiyang kalag [o, buhay] bilang pantubos na karibay nin dakol.” (Mateo 20:28) Taano ta sinabi nia na an saiyang buhay itatao imbes na kukuanon?

An dai mapapantayan na pagkamoot nin Dios nagpahiro sa saiya na gumibo nin probisyon tanganing an mga tawo makalda sa minanang kasalan asin sa mga resulta kaiyan—an pagkabakong sangkap asin kagadanan. Ginibo ini nin Dios paagi sa pagsugo sa saiyang Aking bugtong digdi sa daga tanganing magadan bilang atang. Si Jesus gikan sa boot na nagsunod, na itinao an sangkap na buhay nia bilang tawo para sa sato. An probisyon na ini, na inaapod na pantubos, iyo an nakakalabi sa gabos na regalo nin Dios sa katawohan. * Iyan sarong regalo na puedeng maggiya sa buhay na daing katapusan.

Kun ano an kaipuhan mong gibohon An regalo daw na pantubos personalmenteng para sa saimo? Depende iyan sa saimo. Sa pag-ilustrar: Imahinara na may nagtatao sa saimo nin regalo na magayon an pagkapatos. Tunay nanggad na magigin saimo sana an regalo kun kukuanon asin aakoon mo iyan. Kaagid kaiyan, itinatao ni Jehova sa saimo an pantubos, alagad personalmenteng mapapasaimo sana an regalong ini kun kukuanon asin aakoon mo iyan. Paano?

Si Jesus nagsabi na an mga “nagtutubod” sa saiya an mag-aako nin buhay na daing katapusan. Kalabot sa pagtubod an saimong paagi nin pamumuhay. (Santiago 2:26) An pagtubod ki Jesus nangangahulogan nin pamumuhay kaoyon kan mga sinabi asin ginibo nia. Tanganing magibo iyan, dapat na mamidbid mong marhay si Jesus asin an saiyang Ama. “Ini nangangahulogan nin buhay na daing katapusan,” an sabi ni Jesus, “an saindang paglaog sa isip nin kaaraman dapit sa saimo, na iyo sanang tunay na Dios, asin dapit sa saro na saimong sinugo, si Jesu-Cristo.”—Juan 17:3.

Mga 2,000 na taon na an nakaagi, ipinaabot ni Jesus an sarong mensahe na nagpapabago sa buhay nin minilyon na tawo sa bilog na kinaban. Gusto mo daw maaraman nin orog pa an dapit sa mensaheng iyan asin kun paano ka saka an saimong mga namomotan makikinabang dian, bako sanang ngonyan, kundi sagkod lamang? Maoogma an mga Saksi ni Jehova na tabangan ka.

An minasunod na mga artikulo orog pang magpapaliwanag sa saimo dapit ki Jesu-Cristo, an tawong naghulit nin mensahe na makakapagpabago kan saimong buhay sagkod lamang.

[Mga Nota sa Ibaba]