IGWA daw nin partikular na kahulogan an ngaran nindo? Sa nagkapirang lugar sa kinaban, nakaugalean na an pagtao sa aki nin ngaran na pano nin kahulogan. An piniling ngaran tibaad nagpaparisa kan mga paniniwala asin pamantayan kan mga magurang o kan saindang mga linalaoman asin pangarap para sa futuro kan aki.

Bakong bago an kaugalean na pagtao nin mga ngaran na pano nin kahulogan. Sa mga panahon kan Biblia, an personal na mga ngaran parateng itinatao huli sa kahulogan kaiyan. An ngaran puedeng magparisa kan inaasahan na magigin papel sa buhay nin sarong tawo. Halimbawa, kan sabihon ni Jehova ki David an magigin papel kan saiyang aking si Salomon, Sia nagsabi: “Salomon [hale sa orihinal na termino na nangangahulogan “Katoninongan”] an saiyang magigin ngaran, asin tatawan ko nin katoninongan asin katrangkilohan an Israel sa saiyang kaaldawan.”—1 Cronica 22:9.

May beses na tinawan ni Jehova nin bagong ngaran an sarong tawo na magkakaigwa nin bagong papel. An baog na agom ni Abraham tinawan nin ngaran na Sara, na nangangahulogan “Prinsesa.” Taano? Si Jehova nagpaliwanag: “Bebendisyonan ko sia patin tatawan ko man ika nin sarong aking lalaki hale sa saiya; asin bebendisyonan ko sia asin sia magigin mga nasyon; magikan sa saiya an mga hade kan mga banwaan.” (Genesis 17:16) Malinaw nanggad, kun nasasabotan niato an dahelan kan pagtao nin bagong ngaran ki Sara, masasabotan man niato an bagong papel nia.

Kumusta man an pinakamahalaga sa gabos na ngaran—an Jehova? Ano an kahulogan kaiyan? Kan hapoton ni Moises an Dios manongod sa Saiyang ngaran, si Jehova nagsimbag: “Ako magigin ano man na gusto kong ako magin.” (Exodo 3:14) Arog kaini an pagkasabi kan traduksion ni Rotherham: “Ako Magigin siring sa ano man na boot ko.” Ihinahayag kan ngaran ni Jehova na sia Dios na igwa nin kadakol na papel. Sa simpleng pag-ilustrar: Tibaad kaipuhan nin sarong ina na gibohon an dakol na papel kada aldaw sa pag-asikaso sa saiyang mga aki—bilang nars, paraluto, paratokdo—depende sa pangangaipo. Kaagid man iyan ki Jehova, minsan ngani sa mas halangkaw na paagi. Tanganing maotob an saiyang mamomoton na katuyohan para sa katawohan, kaya niang magin ano man na booton nia, na ginigibo an ano man na papel na kinakaipuhan. Huli kaini, kalabot sa pakamidbid ki Jehova sa ngaran an pakasabot asin pagpahalaga sa dakol na papel nia.

Makamomondo, an kagayonan kan personalidad nin Dios dai aram kan mga dai nakakamidbid sa saiya sa ngaran. Minsan siring, paagi sa pag-adal sa Biblia, mapapahalagahan nindo an mga papel ni Jehova bilang madonong na Parahatol, makapangyarihan na Paraligtas, asin buka an palad na Paratao, sa pagsambit sana nin nagkapira. An pano nin kahulogan na ngaran ni Jehova tunay nanggad na nakakapukaw nin paghanga asin paggalang.

Minsan siring, bako pirmeng madali na mamidbid an Dios sa ngaran. Ipapaheling kan sunod na artikulo kun taano.