Paano Mo Malalabanan an Negatibong Pagmate?

NASAKITAN ka na daw huli sa negatibong pagmate? Siisay baga an dai? Lakop sa panahon niato ngonyan an kadahasan, kasakitan sa pagbuhay, asin grabeng inhustisya. Bakong makangangalas na dakol an nagsasakit huli sa labi-labing pagmondo, grabeng pagkakonsensia, asin pakamate na sinda mayong halaga.

Puedeng magin peligroso an pagmateng iyan. Iyan puedeng makapaluya sa satong kompiansa asin abilidad na mangatanosan, saka makahale kan kaogmahan niato. An Biblia nagsasabi: “Nangluluya daw an boot mo sa aldaw nin kasakitan? An saimong kosog magigin kadikit.” (Talinhaga 24:10) Kaipuhan niato an satong kosog tanganing padagos na mabuhay sa kinaban na ini na pano nin problema. Kun siring, mahalagang marhay na padagos na kontrolon an negatibong pagmate. *

An Biblia nagtatao nin nagkapirang makosog na panglaban sa negatibong pagmate. Habo ni Jehova Dios, an Kaglalang asin Parasustenir kan gabos na may buhay, na sumuko ka huli sa grabeng pagkadesganar o kawaran nin paglaom. (Salmo 36:9) Kaya aramon niato an tolong paagi na makakatabang sa sato an saiyang Tataramon na malabanan an negatibong pagmate.

Girumdomon na an Dios Interesado sa Saimo

May mga nag-iisip na sibot-sibot an Dios sa ibang mga bagay kaya dai sia makakatao nin atension sa personal na pagmate ninda. Arog daw kaiyan an pagmate mo? An totoo, sinisierto sa sato kan Biblia na an satong Kaglalang interesado sa pagmate niato. An salmista nagsabi: “Si Jehova harani sa mga nalugadan an puso; asin an mga nasasakitan an espiritu iliniligtas nia.” (Salmo 34:18) Nakakaranga nanggad na maaraman na harani sa sato an pinakamakapangyarihan na Soberano kun kita nagsasakit!

An Dios bako man na mayong pakiaram o mayong pakilabot. An Biblia nagsasabi na “an Dios pagkamoot.” (1 Juan 4:8) Namomotan nia an mga tawo asin mapagrisa sia sa mga nagsasakit. Halimbawa, kan an mga Israelita oripon sa Egipto mga 3,500 na taon na an nakaagi, sia nagsabi: “Daing duwa-duwa na naheling ko an grabeng sakit kan sakuyang banwaan na nasa Egipto, asin nadangog ko an saindang pagtangis huli sa mga nagpupuersa sa sainda na magtrabaho; huli ta aram kong gayo an mga kolog na tinitios ninda. Asin mababa ako tanganing iligtas ko sinda.”—Exodo 3:7, 8.

Aram na marhay nin Dios an pagmate niato. Total, “sia an naggibo sa sato, asin bakong kita mismo.” (Salmo 100:3) Sa siring, dawa kun an pagmate niato dai kita nasasabotan kan satong kapwa, makakasierto kita na nasasabotan kita nin Dios. An Tataramon nin Dios nagsasabi: “An pagheling nin Dios bakong arog kan pagheling nin tawo, huling an tawo nagheheling sa kun ano an naheheling kan mga mata; alagad kun manongod ki Jehova, hineheling nia kun ano an puso.” (1 Samuel 16:7) Naheheling nin Dios dawa an kalaoglaoging pagmate niato.

Totoo, aram man ni Jehova an satong mga sala asin kaluyahan. Alagad makakapagpasalamat kita na mapagpatawad an mamomoton na Kaggibo sa sato. An pinasabongan na kagsurat sa Biblia na si David nagsabi: “Kun paanong an ama nagpapaheling nin pagkaherak sa saiyang mga aki, si Jehova nagpapaheling man nin pagkaherak sa mga natatakot sa saiya. Huli ta aram niang marhay an pagkaporma sa sato, na ginigirumdom na kita kabokabo.” (Salmo 103:13, 14) An pagheling nin Dios sa sato bakong arog kan tibaad pagheling niato sa satong sadiri. An hinahanap nia iyo an karahayan niato asin pinapalampas nia an maraot, basta  magsolsol kita sa mga kasalan niato.—Salmo 139:1-3, 23, 24.

Huli kaini, kun kita nagsasakit huling an pagmate niato mayo kitang halaga, kaipuhan tang magin determinado na labanan iyan. Dapat niatong girumdomon kun ano an pagheling sa sato nin Dios!—1 Juan 3:20.

Magkaigwa nin Haraning Relasyon sa Dios

Paano kita nakikinabang kun an pagheling niato sa satong sadiri arog kan pagheling sa sato nin Dios? Magigin mas madali sa sato na gibohon an sunod na lakdang tanganing malabanan an negatibong pagmate—an pagkaigwa nin haraning relasyon sa Dios. Talaga daw na posible iyan?

Bilang mamomoton na Ama, gustong-gusto ni Jehova Dios na kita magkaigwa nin haraning relasyon sa saiya. Dinadagka kita kan Biblia: “Rumani kamo sa Dios, asin sia marani sa saindo.” (Santiago 4:8) Uni an makangangalas na katunayan: Minsan ngani kita maluya asin makasalan, puede kitang magkaigwa nin harani asin personal na relasyon sa Soberano kan uniberso.

Ihinayag nin Dios an saiyang sadiri paagi sa Biblia tanganing sia mamidbid niato bilang persona. Paagi sa regular na pagbasa sa Biblia, manonodan niato an marahayon na mga kualidad nin Dios. * Mantang iniisip-isip niato nin hararom an siring na kaaraman, mamamatean niato na kita orog nanggad na harani ki Jehova. Mas masasabotan niato na sia talagang mamomoton asin mapagmalasakit na Ama.

Orog pa kitang makikinabang kun iisip-isipon niato nin hararom an nabasa niato sa Biblia. Kita nagigin mas harani sa satong Ama sa langit kun isinasaisip asin isinasapuso niato an saiyang kaisipan, na tinotogotan iyan na itanos, rangahon, asin giyahan kita. Nangorognang kaipuhan niatong gibohon iyan kun kita nasasakitan huli sa iniisip o pagmate na nakakahadit o nakakapurisaw sa sato. Arog kaini an pagkasabi kan salmista: “Kun ako nahahandal asin nahahadit, rinaranga asin pinapaogma mo ako.” (Salmo 94:19, An Marahay na Bareta Biblia) An Tataramon nin Dios nakakaranga nanggad. Kun mapakumbaba tang aakoon an saiyang mensahe nin katotoohan, maheheling niato na an negatibong pagmate luway-luway na nasasalidahan nin karangahan asin katoninongan na an Dios sana an makakatao. Huli kaini, rinaranga kita ni Jehova kun paanong linilinga nin mamomoton na magurang an nakolgan o nag-aaburidong aki.

An saro pang mahalagang paagi tanganing magkaigwa nin haraning relasyon sa Dios iyo an regular na pakipag-olay sa saiya. Sinisierto sa sato kan Biblia na ‘minsan ano an satong hagadon segun sa saiyang kabotan, dinadangog kita nin Dios.’ (1 Juan 5:14) Ano man an ikinakatakot o ikinakahadit niato, puede kitang mamibi sa Dios asin maghagad sa saiya nin tabang. Kun sinasabi niato sa Dios an nasa puso niato, kita nagkakaigwa nin katoninongan sa isip. Si apostol Pablo nagsurat: “Sa gabos na bagay paagi sa pamibi asin pagngayongayo na may pagpasalamat ipahayag nindo sa Dios an saindong mga kahagadan; asin an katoninongan nin Dios na  labi sa gabos na kaisipan mag-iingat sa saindong puso asin sa saindong pag-isip paagi ki Cristo Jesus.”—Filipos 4:6, 7.

Kun may sinusunod kang iskedyul nin pagbasa sa Biblia, pag-isip-isip nin hararom, asin personal na pamimibi, daing duda na maheheling mo na nagkakaigwa ka nin haraning relasyon sa saimong Ama sa langit. An relasyon na iyan epektibong panglaban sa negatibong pagmate. Ano pa an ibang makakatabang?

Magkonsentrar sa Seguradong Paglaom sa Maabot na Panahon

Dawa kun masakiton an kamugtakan niato, puede tang isentro an satong isip sa marahay na mga bagay. Paano man? An Dios nagtatao sa sato nin seguradong paglaom sa maabot na panahon. Arog kaini an pagkasumaryo ni apostol Pedro sa makangangalas na paglaom na ini: ‘Igwa nin bagong kalangitan asin sarong bagong daga na hinahalat niato segun sa panuga nin Dios, asin sa mga ini magdadanay an katanosan.’ (2 Pedro 3:13) Ano an boot sabihon kaiyan?

An ekspresyon na “bagong kalangitan” sa katunayan nanonongod sa sarong gobyerno—an Kahadean nin Dios sa langit na pinamamahalaan ni Jesu-Cristo. An “bagong daga” nanonongod sa sarong bagong sosyedad nin mga tawo digdi sa daga na inooyonan nin Dios. Sa pamamahala kan “bagong kalangitan,” mawawara na sa bagong sosyedad sa daga an gabos na dahelan nin negatibong pagmate. Mapadapit sa mga maimbod na mabubuhay sa panahon na iyan, sinisierto sa sato kan Biblia na “papahidon [nin Dios] an gabos na luha sa saindang mga mata, asin an kagadanan mawawara na, mayo na man nin pagmondo o pagtangis o kolog.”—Kapahayagan 21:4.

Siertong maoyon ka na an paglaom na iyan nakakaogmang marhay asin nakakaparigon. Iyan an dahelan kun taano ta inaapod sa Biblia na “maogmang paglaom” an oportunidad sa maabot na panahon na itinao nin Dios sa tunay na mga Kristiano. (Tito 2:13) Kun nakakonsentrar an satong isip sa mga panuga nin Dios sa maabot na panahon para sa katawohan—asin sa mga dahelan kun taano  ta masasarigan asin segurado an mga panugang iyan—hinahale niato an negatibong kaisipan.—Filipos 4:8.

An satong paglaom na kaligtasan ikinokomparar kan Biblia sa sarong helmet. (1 Tesalonica 5:8) Kan suanoy na mga panahon, an sarong soldados dai mangangahas na makiguerra kun sia mayong helmet. Aram nia na poproteksionan sia kaiyan sa dakol na tama nin armas asin papadaplison kaiyan an dakol na pana. Kun paanong an helmet proteksion sa payo, an paglaom proteksion man sa isip. An pag-isip kan mga bagay na nagtatao sa sato nin paglaom makakatabang sa sato na dai magin negatibo, matakot, o mawaran nin paglaom.

Kaya, posible na malabanan an negatibong pagmate. Kaya mo iyan! Isip-isipang marhay kun ano an pagmansay sa saimo nin Dios, magin mas harani sa saiya, asin magkonsentrar sa saimong paglaom sa maabot na panahon. Dangan makakasierto ka na maheheling mo an panahon na mawawara na sagkod lamang an negatibong pagmate!—Salmo 37:29.

[Mga Nota sa Ibaba]

[Blurb sa pahina 19]

“Aram kong gayo an mga kolog na tinitios ninda.”​—EXODO 3:7, 8

[Blurb sa pahina 20]

“Kun ako nahahandal asin nahahadit, rinaranga asin pinapaogma mo ako.”​—SALMO 94:19, AN MARAHAY NA BARETA BIBLIA

[Blurb sa pahina 21]

“An katoninongan nin Dios na labi sa gabos na kaisipan mag-iingat sa saindong puso asin sa saindong pag-isip.”​—FILIPOS 4:7

[Kahon/Ritrato sa pahina 20, 21]

Nakakarangang mga Teksto sa Biblia Manongod ki Jehova Dios

“Jehova, Dios na maheherakon asin maugayon, maluway sa pagkaanggot asin abunda sa mamomoton na kabootan asin katotoohan.”—EXODO 34:6.

“An saiyang mga mata naglilibot sa bilog na daga tanganing ipaheling an saiyang kosog para sa mga bilog an puso para sa saiya.”—2 CRONICA 16:9.

“Si Jehova harani sa mga nalugadan an puso; asin an mga nasasakitan an espiritu iliniligtas nia.”—SALMO 34:18.

“Ika, O Jehova, marahay asin andam na magpatawad.” —SALMO 86:5.

“Si Jehova marahay sa gabos, asin an saiyang mga pagkaherak yaon sa gabos niang ginibo.”—SALMO 145:9.

“Ako, si Jehova na saimong Dios, nagkakapot sa saimong toong kamot, an Saro na nagsasabi sa saimo, ‘Dai ka matakot. Ako mismo an matabang sa saimo.’”—ISAIAS 41:13.

“Omawon logod . . . an Ama nin maboot na mga pagkaherak asin an Dios nin gabos na karangahan.”—2 CORINTO 1:3.

“Tatawan niato nin kasiertohan an satong puso sa atubangan nia kun mapadapit sa ano man na bagay na tibaad kondenaron kita kan satong puso, huli ta an Dios orog kadakula kisa sa satong puso asin nakakaaram kan gabos na bagay.”—1 JUAN 3:19, 20.

[Kahon/Mga Ritrato sa pahina 22]

Nakakayanan Ninda an Negatibong Pagmate

“Alkoholiko an sakong ama, asin grabe an pagsakit ko huli sa saiya. Sa haloy na panahon, namatean ko na dai akong halaga. Alagad kan ako makipag-adal sa Biblia sa saro sa Mga Saksi ni Jehova, nanodan ko an panuga na buhay na daing katapusan sa daga. Naogma akong marhay huli sa paglaom na ini. An pagbasa sa Biblia nagin regular na kabtang kan buhay ko. Pirme akong may Biblia. Kun puro na sana negatibo an namamatean ko, binubuksan ko iyan asin binabasa an nakakarangang mga teksto. An pagbasa nin mga teksto manongod sa magagayon na kualidad nin Dios nagtataong garantiya sa sako na ako mahalaga nanggad sa saiya.”—Katia, 33 anyos. *

“Naadik ako sa inomon na de alkohol, marihuana, cocaine, crack cocaine, asin nagsisinghot ako nin rugby. Huling naubos an haros gabos na pagsasadiri ko, nagin akong parapakilimos. Alagad kan akoon ko an pakipag-adal sa Biblia sa mga Saksi ni Jehova, lubos kong binago an buhay ko. Namidbid ko an Dios bilang Persona. Minsan ngani linalabanan ko pa man giraray an pagkakonsensia asin pakamate nin kawaran nin halaga, nanodan kong magtiwala sa pagkaherak asin mamomoton na kabootan nin Dios. Segurado ako na an Dios padagos na magtatao sa sako nin kosog na makayanan an negatibong pagmate. An pakanood kan katotoohan sa Biblia an pinakamarahay na nangyari sa sako kasuarin man.”—Renato, 37 anyos.

“Poon kan ako aki pa, pirme ko nang ikinokomparar an sadiri ko sa sakong matuang tugang na lalaki. Pirme kong namamatean na ako mas maluya sa saiya. Grabe pa man giraray an sakong kawaran nin kompiansa sa sadiri, na dai nagtitiwala sa abilidad ko. Alagad determinado akong makayanan ini. Padagos akong namimibi ki Jehova, asin tinatabangan nia ako na makayanan an pakamate nin kawaran nin kakayahan. Nakakaparigon sa boot na maaraman na an Dios talagang namomoot asin nagmamakolog sa sako!”—Roberta, 45 anyos.

[Nota sa Ibaba]