ARAM mo daw kun ano an Kahadean na ini?— * Iyan an itinokdo ni Jesus na ipamibi ta. Tinokdoan nia kita na hagadon sa Dios: “Dumatong logod an kahadean mo.” (Mateo 6:9, 10) Sa haros 2,000 na taon, an mga parasunod ni Jesus namimibi sa Dios na dumatong logod an Saiyang Kahadean. Ipinapamibi mo man daw iyan?—

Tanganing masabotan mo kun ano an kahadean, kaipuhan mong maaraman kun ano an hade. An hade saro na namamahala. An lugar na pinapamahalaan nia inaapod na saiyang sakop. An bilog na daga sakop kan Kahadean nin Dios. Pagdatong kan Kahadean nin Dios, makakamtan kan lambang tawo sa daga pag-abot nin panahon an mga bendisyon na itatao kan saiyang pamamahala.

An Kahadean nin Dios sarong gobyerno sa langit. Sa Biblia, may sinasabi an Isaias 9:6 manongod sa Tagapamahala kan gobyernong ini. Helinga an sinasabi kaiyan dapit sa saiya: ‘Namundag sa sato an sarong aki, asin an sa prinsipeng pamamahala mamumugtak sa saiyang abaga. Asin sia aapodon na Prinsipe nin Katoninongan.’

Aram mo daw kun ano an prinsipe?— Iyo, sia aki nin sarong hade. Siisay an pinakahalangkaw na Hade sa langit?— Kun si Jehova an simbag mo, tama ka. Inaapod sia kan Biblia na “an Kaharohalangkawe sa bilog na daga.” (Salmo 83:18) Sa Biblia, si Jesus parateng inaapod na “Aki nin Dios.” An sarong dahelan iyo na si Jehova an nagtao ki Jesus nin buhay. Si Jehova an tunay na Ama ni Jesus.—Lucas 1:34, 35; Juan 1:34, 49; 3:17; 11:27; 20:31; Gibo 9:20.

An Kahadean nin Dios, na itinokdo sa sato ni Jesus na ipamibi, sarong espesyal na klase nin gobyerno. Iyan “sa prinsipeng pamamahala” huling ginibo ni Jehova an saiyang Aki, si Jesus, na Tagapamahala o Hade kan Kahadean. Alagad aram mo daw na igwa nin iba pang pipilion na mamahala bilang mga hade kaiba ni Jesus sa Kahadean kan saiyang Ama?— Pag-olayan niato an manongod sa sainda.

Kan si Jesus madali nang magadan, sinabihan nia an maimbod na mga apostol na sia maduman sa “harong” kan saiyang Ama sa langit. “Ako maduman tanganing mag-andam nin lugar para sa saindo,” an sabi nia, “tanganing kun saen ako, duman man kamo.” (Juan 14:1-3) Aram mo daw kun ano an gigibohon sa langit kan mga apostol asin kan iba pang pinili na makakaibanan ni  Jesus?— Sinda “mamamahala bilang mga hade kaiba nia.” Sinasabi pa ngani kan Biblia kun pira an mamamahala bilang mga hade kaiba ni Jesus. Sinda 144,000 gabos.—Kapahayagan 14:1, 3; 20:6.

Ano sa heling mo an magigin kamugtakan sa daga kun namamahala na an Prinsipe nin Katoninongan asin an 144,000 na pinili?— Marahayon nanggad! Mayo nang guerra. An mga hayop magigin maboot sa lambang saro patin sa sato. Mayo nang magkakahelang o magagadan. An mga buta makakaheling, an mga bungog makakadangog, asin an mga pilay madalagan saka malukso siring sa usa. An daga magtatao nin abundang kakanon para sa gabos. Asin an gabos na tawo magkakaminorootmootan arog kan itinokdo ni Jesus na dapat gibohon kan saiyang mga disipulo. (Juan 13:34, 35) Basahon niato ngonyan an mga bersikulo sa libro nin Isaias na nakalista digdi manongod sa marahayon na mga bagay na mangyayari.—Isaias 2:4; 11:6-11; 25:8; 33:24; 35:5, 6; 65:21-24.

Poon pa kan tokdoan ni Jesus an mga tawo na mamibi na “dumatong logod an kahadean mo,” minilyon na an nakanood manongod sa Kahadean na iyan. An kaaraman na ini an buminago sa saindang buhay. Dai na mahahaloy, kun an Kahadean na iyan dumatong na asin salidahan an gabos na gobyerno sa daga, magkakaigwa nin katoninongan, marahay na hawak, asin kaogmahan an gabos na naglilingkod ki Jehova Dios asin sa saiyang piniling Tagapamahala, si Jesu-Cristo.—Juan 17:3.