Makanood sa Tataramon nin Dios

Taano ta Dapat Makanood Gikan sa Dios?

An artikulong ini nagpapalataw nin mga hapot na tibaad iniisip-isip mo asin ipapaheling kaini kun saen mo mababasa sa Biblia an simbag. Maoogma an mga Saksi ni Jehova na ipakipag-olay sa saimo an mga simbag na ini.

1. Taano ta dapat makanood gikan sa Dios?

An Dios igwa nin maogmang bareta dapit sa bagay na orog karahay para sa katawohan. Sinasabi nia sa sato an manongod sa mga iyan paagi sa Biblia. An Biblia siring sa sarong surat hale sa satong mamomoton na Ama sa langit.—Basahon an Jeremias 29:11.

2. Ano an maogmang bareta?

Kaipuhan nin katawohan an marahay na gobyerno. Mayo nin tawong namamahala an nakapaginhawa kasuarin man sa katawohan paagi sa paghale kan kadahasan, inhustisya, helang, o kagadanan. Alagad igwa nin maogmang bareta. Tatawan nin Dios nin marahay na gobyerno an katawohan na matao nin katalingkasan hale sa gabos na dahelan nin pagsakit.—Basahon an Daniel 2:44.

3. Taano ta mahalagang marhay na makanood gikan sa Dios?

Dai na mahahaloy, hahaleon nin Dios sa daga an mga tawo na dahelan nin pagsakit. Mientras tanto, tinotokdoan nia an minilyon na mahoyo na magkaigwa nin mas marahay na pamumuhay, na basado sa pagkamoot. Gikan sa Tataramon nin Dios, an mga tawo nakakanood kun paano kakayanon an mga problema sa buhay, kun paano makakanompong nin tunay na kaogmahan, asin kun paano mapapaogma an Dios.—Basahon an Sofonias 2:3.

  4. Siisay an Autor kan Biblia?

An Biblia kompuesto nin 66 na saradit na libro. Mga 40 lalaki an nagsurat kaiyan. An enot na limang libro isinurat ni Moises mga 3,500 na taon na an nakaagi. An huring libro isinurat ni apostol Juan labing 1,900 na taon na an nakaagi. Alagad an isinurat kan mga kagsurat sa Biblia iyo an kaisipan nin Dios, bako an kaisipan ninda. Kaya an Dios an Autor kan Biblia.—Basahon an 2 Timoteo 3:16; 2 Pedro 1:21.

Aram niato na an Biblia hale sa Dios huling eksaktong ihinuhula kaiyan an ngapit sa detalyadong paagi. Mayo nin tawong makakagibo kaiyan. (Isaias 46:9, 10) Siring man, malinaw na maheheling sa Biblia an mamomoton na personalidad nin Dios. May kapangyarihan iyan na bagohon an buhay nin mga tawo para sa ikakarahay ninda. An mga katunayan na ini nakakombensir sa minilyon na an Biblia Tataramon nin Dios.—Basahon an Josue 23:14; 1 Tesalonica 2:13.

5. Paano mo masasabotan an Biblia?

Si Jesus nagin bantog bilang paratokdo kan Tataramon nin Dios. Minsan ngani pamilyar sa Biblia an kadaklan sa mga nakaolay nia, kaipuhan ninda an tabang tanganing masabotan iyan. Tanganing tabangan sinda, nagsambit si Jesus nin sunod-sunod na teksto sa Biblia asin ipinaliwanag “an kahulogan kan Kasuratan.” An tampok na ini na “Makanood sa Tataramon nin Dios” magamit nin kaparehong paagi tanganing tabangan ka.—Basahon an Lucas 24:27, 45.

Pirang bagay sana an kawiliwiling gayo na arog kan pakanood gikan sa Dios manongod sa katuyohan nin buhay. Alagad an nagkapira tibaad dai maogma sa pagbasa mo kan Biblia. Dai pangluyahan nin boot. An paglaom mo na magkamit nin buhay na daing katapusan nakadepende sa pagmidbid mo sa Dios.—Basahon an Mateo 5:10-12; Juan 17:3.

Para sa dugang pang impormasyon, helingon an kapitulo 2 kan librong ini, Ano Man Nanggad an Itinotokdo kan Biblia? na ipinublikar kan Mga Saksi ni Jehova.