Naghahapot an mga Parabasa . . .

An Gehena daw Lugar nin Pagpasakit sa Kalayo?

▪ Sa mga pagkasaysay sa Ebanghelyo, pinatanidan ni Jesus an saiyang mga disipulo dapit sa paghokom nin Gehena. Malinaw na an intension ni Jesus seryosohon ninda an patanid na iyan. Minsan siring, an sinabi daw nia sarong nagkakalayong impierno nin daing katapusan na pagpasakit?—Mateo 5:22.

Enot, siyasaton niato an termino mismong iyan. An Griegong termino na Geʹen·na katimbang kan Hebreong termino na geh Hin·nomʹ, na nangangahulogan nin “kababan nin Hinom,” o kan mas kompletong termino na geh veneh-Hin·nomʹ, na an boot sabihon “kababan kan mga aki ni Hinom.” (Josue 15:8; 2 Hade 23:10) An geograpikong lugar na ini, na midbid ngonyan na Wadi er-Rababi, sarong hararom asin hayakpit na kababan na nasa timog asin timog-solnopan kan Jerusalem.

Kan mga panahon kan mga hade nin Juda, kaidtong ikawalong siglo B.C.E., an lugar na ini ginagamit sa mga seremonyang pagano, kaiba an pagsulo sa mga aki bilang atang. (2 Cronica 28:1-3; 33:1-6) Ihinula ni propeta Jeremias na sa kababan man sanang iyan gagadanon kan mga Babilonyo an mga Judeano bilang paghokom gikan sa Dios huli sa saindang karatan. *—Jeremias 7:30-33; 19:6, 7.

Segun sa Judiong iskolar na si David Kimhi (mga 1160 sagkod mga 1235 C.E.), kan huri an kababan ginibong aponan nin basura kan siudad nin Jerusalem. An lugar nagserbing suloan nin basura na duman pirmeng may kalayo. An ano man na iapon duman biyong masusulo asin magigin abo.

Dakol na paratradusir sa Biblia an basta na sana trinadusir an Geʹen·na na “impierno.” (Mateo 5:22, An Banal na Biblia [edisyon na 2007]) Taano? Huling ikinokonektar ninda sa literal na kalayo sa kababan sa luwas kan Jerusalem an ideya kan mga pagano na an mga maraot hinohokoman sa kalayo durante kan saindang buhay pagkagadan. Minsan siring, an Gehena nungkang ikinonektar ni Jesus sa pagpasakit.

Aram ni Jesus na ikinakaongis kan saiyang langitnon na Ama na si Jehova an mismong ideya na pagsulo sa mga tawong buhay. Mapadapit sa paggamit kan Gehena kan panahon ni propeta Jeremias, an Dios nagsabi: “Itinogdok ninda an haralangkaw na lugar nin pagsamba sa Tofet, na yaon sa kababan kan aki ni Hinom, tanganing totongon sa kalayo an saindang mga aking lalaki asin aking babae, sarong bagay na dai ko ipinagboot asin dai man lamang suminabong sa sakong puso.” (Jeremias 7:31) Dugang pa, an ideya nin pagpasakit sa mga gadan kontra sa mamomoton na personalidad nin Dios saka sa malinaw na katokdoan kan Biblia na an mga gadan ‘mayo man lamang nin pakaaram.’—Eclesiastes 9:5, 10.

Ginamit ni Jesus an “Gehena” tanganing magsimbolisar sa biyong pagkalaglag na resulta kan paghokom nin Dios. Huli kaini, an “Gehena” igwa nin kahulogan na kaagid kan “danaw nin kalayo,” na sinambit sa libro nin Kapahayagan. Pareho iyan na nagsisimbolisar sa daing sagkod na pagkalaglag na imposible na an pagkabuhay liwat.—Lucas 12:4, 5; Kapahayagan 20:14, 15.

[Nota sa Ibaba]