Makanood sa Tataramon nin Dios

Ano an Kahadean nin Dios?

Sa artikulong ini, igwa nin mga hapot na tibaad naiisip mo asin ipinapaheling digdi kun saen mo mababasa sa Biblia an simbag. Maoogma an mga Saksi ni Jehova na ipakipag-olay sa saimo an mga simbag na ini.

1. Ano an Kahadean nin Dios?

An Kahadean nin Dios sarong gobyerno sa langit. Iyan an masalida sa gabos na iba pang gobyerno asin gigibohon kaiyan an kabotan nin Dios sa langit asin daga. Kaya, an Kahadean nin Dios iyo an solusyon sa pangangaipo niato dapit sa marahay na gobyerno.—Basahon an Daniel 2:44; Mateo 6:9, 10.

An sarong kahadean dapat na igwa nin hade. Ninombrahan ni Jehova an saiyang Aki, si Jesus, na magin Hade kan Saiyang Kahadean.—Basahon an Lucas 1:30-33.

2. Taano ta si Jesus an pinakamarahay na Tagapamahala?

An Aki nin Dios iyo an pinakamarahay na Hade huling sia maboot, marigon sa kun ano an tama, asin igwa kan kinakaipuhan na kapangyarihan sa pagtabang sa mga tawo. (Mateo 11:28-30) Pagkatapos na buhayon sia liwat, si Jesus suminakat sa langit asin nagpoon na maghalat mantang nasa too ni Jehova. (Hebreo 10:12, 13) Sa katapustapusi, tinawan sia nin Dios nin kapangyarihan tanganing mamahala na mantang nasa langit.—Basahon an Daniel 7:13, 14.

3. Sairisay pa an mamamahala kaiba ni Jesus?

An grupo na inaapod na “magña santo,” o mga banal, pinipili nin Dios tanganing mamahala sa langit kaiba ni Jesus. (Daniel 7:27) An mga enot na pinili tanganing magin mga banal iyo an maimbod na mga apostol ni Jesus. Sagkod ngonyan, padagos na nagpipili si Jehova nin maimbod na mga lalaki asin babae bilang mga banal. Arog ni Jesus, sinda binubuhay liwat bilang mga espiritu.—Basahon an Juan 14:1-3; 1 Corinto 15:42-45.

Pira an maduman sa langit? Inapod sinda ni Jesus na “sadit na aripompon.” (Lucas 12:32, NW) Sinda magigin 144,000 gabos, asin kaiba ni Jesus, pamamahalaan ninda an daga.—Basahon an Kapahayagan 5:9, 10; 14:1.

  4. Kasuarin nagpoon na mamahala an Kahadean nin Dios?

Nagin Hade si Jesus kan 1914. * Dai nahaloy pagkatapos kaiyan, iinapon nia sa daga si Satanas asin an saiyang mga demonyo. (Kapahayagan 12:7-10, 12) Poon kaidto, naggrabeng marhay an mga problema kan katawohan. An mga giera, linog, tiggutom, epidemya, asin karatan kabtang kan tanda na an presenteng sistema nin mga bagay nasa huring mga aldaw na kaini. (2 Timoteo 3:1-5) An gabos na gustong makinabang sa Kahadean nin Dios maninigong makanood kun paano magin parasunod kan Hade na si Jesus.—Basahon an Lucas 21:7, 10, 11, 31, 34, 35.

5. Ano an gigibohon kan Kahadean nin Dios?

Paagi sa paghuhulit sa bilog na kinaban, tinatabangan na kan Kahadean nin Dios an minilyon na hale sa gabos na nasyon na manodan an mga dalan nin Dios. (Mateo 24:14) Poprotehiran kaiyan an “sarong dakulang kadaklan” nin maimbod na mga sakop ni Jesus kun laglagon na kaini an presenteng maraot na sistema nin mga bagay sa daga.—Basahon an Kapahayagan 7:9, 10, 13-17.

Sa laog nin 1,000 taon, luway-luway na gigibohon kan Kahadean na magin paraiso an daga. Sa katapustapusi, itatao giraray ni Jesus sa saiyang Ama an Kahadean. (1 Corinto 15:24-26) May midbid ka daw na gusto mong baretaan manongod sa Kahadean nin Dios?—Basahon an Salmo 37:10, 11, 29.

Para sa dagdag na impormasyon, helingon an kapitulo 8 asin 9 kan librong ini Ano Man Nanggad an Itinotokdo kan Biblia? na ipinublikar kan Mga Saksi ni Jehova.

[Nota sa Ibaba]