Igwa daw nin Tunay na Kahulogan an Buhay?

“IGWA daw nin kahulogan an buhay?” Kadakol nang tawo an naghapot kaiyan. Makamomondo, ano man an pananaw ninda sa buhay, dai malilikayan nin dakol na maeksperyensiahan an sinabi nin sarong neurologong taga Austria na si Viktor E. Frankl, an “pakamate nin kawaran nin kahulogan asin halaga” sa saindang buhay.

Taano ta dakolon an nakakamate kaiyan? An sarong dahelan iyo na minilyon sa bilog na kinaban an nabubuhay sa grabe kamiserable asin kamakaheherak na kamugtakan. Kabtang na kan saindang buhay an kadukhaan, paghelang, kadahasan, asin pang-aapi. An buhay ninda tunay nanggad na “pano nin magña kasakitan,” siring kan sinabi ni Job kan enot na mga panahon manongod sa pagsakit nin tawo. (Job 14:1) An pangenot na kamawotan ninda iyo na mabuhay sana sa kada aldaw.

Minilyon na iba pa an may kaya sa buhay. Garo baga yaon na sa sainda an gabos na kaipuhan tanganing makamit an tunay na pagkakontento sa buhay. Alagad dakol pa man giraray an bakong kontento. Taano? Huling an mga “kasakitan asin kamondoan”—dai linalaoman na mga problema sa pinansial o makamomondong mga trahedya, arog baga kan pagkagadan nin aki—paorootrong nakakaapektar sa pinakamamawot nindang mga paglaom asin pangarap.—Salmo 90:10, BPV. *

May saro pang nakakadagdag sa lakop na pakamate na ini nin “kawaran nin kahulogan asin halaga.” Ano iyan? An pagigin halipoton nin buhay. Para sa dakol, garo bakong tama na an mga tawo, na may abilidad na makagibo nin kahangahangang mga bagay, halipot sana an buhay. Dai ninda masabotan an makolog na katunayan na napapaatubang sa sato gabos: Pag-abot nin panahon, dawa kun dai kita mapaatubang sa grabeng mga trahedya, mawawara sa sato an gabos huli sa kagadanan.—Parahulit 3:19, 20.

An Buhay daw Pirme na Sanang Garo Mayo nin Kahulogan?

Marahayon an pagkasumaryo ni Hadeng Salomon kan suanoy na Israel dapit sa buhay nin tawo. Naheling nia kun paano nagmaigot an mga tawo kan panahon nia sa paggamit kan saindang mga talento asin abilidad sa pagtanom, pagkultibar,  pagtogdok, asin pag-asikaso sa saindang pamilya, arog kan ginigibo niato ngonyan. Garo man sana sia naghapot, ‘Sa katapustapusi, ano an saysay kan gabos na ini?’ Nagkongklusyon sia na an gabos na ginigibo nin tawo “mayo nin halaga, asin garo sanang paglamag sa doros.”—Parahulit 2:17, BPV.

Alagad naniniwala daw si Hadeng Salomon na an gabos na ginigibo nin katawohan pirmeng “mayo nin halaga, asin garo sanang paglamag sa doros”? Dai. Sinasabi nia sana an realistikong pagmansay sa mangyayari sa buhay sa bakong perpektong kinaban na ini. Minsan siring, an ipinasabong na Tataramon nin Dios makakatao sa saimo nin kompiansa na dai pirmeng magigin siring kaini an mga bagay-bagay!

Paano ka magkakaigwa kan kompiansang iyan? Basahon tabi an duwang masunod na artikulo. Makakatabang iyan sa saimo na masabotan kun taano ta garo baga mayo nin kahulogan an buhay, kun paano reremedyohan an kamugtakan na ini, asin kun paano mo gigibohon na tunay na makahulogan an saimong buhay dawa ngonyan.

[Nota sa Ibaba]